𐴔𐴡𐴚𐴋𐴤𐴟𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴤𐴡𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴎𐴝𐴓𐴝𐴘 𐴊𐴞𐴀𐴞 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴀𐴟𐴏𐴑𐴝𐴌 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴐𐴗𐴠 𐴎𐴤𐴝 𐴒𐴤𐴗𐴝𐴚𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴉𐴝𐴌𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴎𐴝𐴓𐴝𐴘 𐴊𐴞𐴀𐴞 , 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴟𐴍𐴥𐴠 𐴉𐴥𐴝𐴀𐴝𐴕 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴤𐴡𐴌 𐴊𐴡𐴌𐴔𐴞𐴘𐴝𐴕𐴡𐴃 𐴕𐴞𐴉𐴌𐴡𐴃 𐴉𐴡𐴘𐴊𐴝 𐴒𐴡𐴌𐴥𐴞 𐴊𐴠𐴀𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴀𐴡𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌 𐴁𐴤𐴠𐴐𐴢 𐴊𐴤𐴡𐴙𐴅𐴧𐴙𐴝 𐴔𐴝𐴕𐴥𐴟𐴙𐴐𐴢 𐴑𐴠𐴙𐴏𐴧𐴥𐴟 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴐𐴗𐴠 𐴎𐴤𐴝 𐴒𐴤𐴗𐴝𐴚𐴡𐴌 𐴀𐴡𐴚 𐴁𐴝𐴓𐴥𐴝 𐴔𐴡𐴒𐴢 𐴉𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴀𐴝𐴙𐴓 , 𐴉𐴥𐴞𐴃𐴞𐴕 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴊𐴟𐴘 𐴁𐴝𐴌 𐴓𐴡𐴃𐴞 𐴉𐴝𐴌𐴝 𐴀𐴥𐴞𐴘𐴝𐴕𐴡𐴃 𐴒𐴤𐴡𐴓𐴞 𐴎𐴝𐴣𐴀𐴝 𐴑𐴠𐴙𐴏𐴧𐴥𐴟 𐴉𐴟𐴌𐴝 𐴀𐴝𐴎𐴝𐴘𐴧𐴝 𐴀𐴝𐴐𐴧𐴤𐴞𐴀𐴞𐴓 𐴁𐴠𐴒𐴧𐴤𐴞𐴕 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴀𐴥𐴠𐴕𐴋𐴞𐴓𐴧𐴝 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌 𐴁𐴤𐴠𐴐𐴢 𐴊𐴤𐴡𐴙𐴅𐴧𐴙𐴝 𐴔𐴝𐴕𐴥𐴟𐴙𐴐𐴢 𐴑𐴠𐴙𐴏𐴧𐴥𐴟 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 , 𐴐𐴗𐴠 𐴎𐴤𐴝𐴌 ( 𐴈𐴝𐴘𐴧𐴡𐴚 𐴈𐴥𐴝𐴓𐴞 𐴀𐴝𐴌 𐴑𐴝𐴛𐴝𐴚 𐴆𐴤𐴙𐴡𐴚𐴡𐴌 ) 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝 𐴀𐴥𐴡𐴀𐴡𐴑 𐴘𐴦𐴝𐴃𐴤𐴡 𐴔𐴡𐴒𐴢 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝 𐴀𐴥𐴡𐴀𐴡𐴑 𐴉𐴟𐴌𐴝 𐴊𐴞𐴀𐴞 𐴊𐴟𐴕𐴥𐴞 𐴑𐴡𐴗𐴔𐴡𐴌 𐴊𐴡𐴌𐴔𐴞𐴘𐴝𐴕𐴡𐴃 𐴈𐴡𐴙𐴅𐴧𐴙𐴝 𐴓𐴝𐴒𐴝𐴘 𐴊𐴠𐴀𐴠𐴌 𐴊𐴧𐴠 𐴁𐴡𐴓𐴞 𐴁𐴟𐴎𐴤𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴡𐴌 𐴀𐴟𐴃𐴧𐴡𐴌𐴠 𐴔𐴞𐴚𐴓𐴝𐴅𐴤𐴞 (𐴉𐴠𐴌𐴝𐴔𐴉𐴟𐴌𐴟𐴌) 𐴀𐴥𐴟𐴑𐴧𐴝𐴄𐴝𐴌𐴥𐴠 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴥𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱
𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴔𐴞𐴚𐴓𐴝𐴅𐴤𐴞 (𐴉𐴠𐴌𐴝𐴔𐴉𐴟𐴌𐴟) 𐴃𐴤𐴝𐴑𐴤𐴠𐴊𐴠 𐴀𐴥𐴟𐴑𐴧𐴝𐴄𐴤𐴝 𐴎𐴞𐴁𐴤𐴝 𐴁𐴤𐴟𐴓𐴟 𐴈𐴡𐴀𐴡𐴘 𐴀𐴠𐴑 𐴕𐴝𐴔𐴠 𐴔𐴡𐴐𐴦𐴟𐴌 ,
𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃𐴢 𐴀𐴥𐴟𐴑𐴧𐴝𐴄𐴤𐴝 𐴁𐴤𐴟𐴓𐴟𐴌 𐴒𐴤𐴡𐴌𐴡𐴃 𐴒𐴤𐴡𐴓𐴞𐴘𐴧𐴡𐴌𐴥𐴠 𐴀𐴥𐴞𐴁𐴤𐴝𐴌𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴥𐴊𐴠 𐴘𐴥𐴝𐴀𐴝𐴕 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 , 𐴁𐴤𐴟𐴓𐴟 𐴈𐴡𐴀𐴡𐴊𐴠 𐴀𐴥𐴞𐴁𐴤𐴝 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴓𐴡𐴘 𐴏𐴟𐴌𐴈𐴝 𐴃𐴦𐴝𐴓𐴧𐴟𐴑𐴝𐴃𐴢 𐴀𐴝𐴐𐴧𐴤𐴞𐴀𐴞𐴓 , 𐴑𐴞𐴘𐴥𐴡𐴓𐴧𐴝 𐴁𐴡𐴓𐴞 𐴈𐴡𐴘𐴓𐴥𐴠 𐴕𐴞𐴎𐴡𐴌 𐴎𐴝𐴃𐴞𐴌𐴥𐴠 𐴎𐴟𐴓𐴥𐴟𐴔 𐴀𐴝𐴌 𐴀𐴡𐴃𐴧𐴞𐴏𐴝𐴌𐴡𐴌 𐴃𐴧𐴟 𐴁𐴝𐴏𐴝𐴘 𐴁𐴤𐴡𐴓𐴧𐴝 , 𐴑𐴞𐴕𐴃𐴟 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴇𐴥𐴞𐴃𐴤𐴝𐴌𐴝 𐴕𐴞𐴐𐴤𐴝𐴌 𐴊𐴝𐴁𐴝𐴘 𐴀𐴥𐴡𐴑𐴧𐴡𐴓𐴢 𐴁𐴞𐴏𐴞𐴁𐴤𐴡𐴓𐴧𐴝 𐴀𐴞𐴁𐴤𐴝𐴌𐴠 𐴉𐴝𐴌𐴝𐴌 𐴀𐴥𐴟𐴑𐴧𐴝𐴄𐴤𐴝 𐴁𐴝𐴕𐴝𐴘 𐴊𐴞𐴘𐴥𐴠 , 𐴁𐴤𐴟𐴓𐴟𐴌𐴥𐴠 𐴔𐴝𐴌𐴡𐴕𐴡𐴌 𐴔𐴟𐴓𐴢 𐴔𐴡𐴑𐴏𐴥𐴡𐴃𐴢 𐴀𐴥𐴡𐴙𐴓𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴐𐴤𐴡𐴌𐴑𐴝𐴌𐴡𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴔𐴝𐴌𐴝 𐴔𐴝𐴌𐴞𐴌 𐴎𐴡𐴌𐴞𐴘𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴡𐴙𐴕𐴧𐴡 𐴉𐴝𐴌𐴝𐴃𐴢 𐴃𐴤𐴝𐴑𐴤𐴞𐴃𐴤𐴡 𐴇𐴥𐴡𐴑𐴟𐴔 𐴕𐴡 𐴊𐴞𐴀𐴞𐴓𐴥𐴠 𐴘𐴥𐴡 𐴀𐴞𐴁𐴤𐴝 𐴘𐴥𐴠 𐴕𐴞𐴎𐴡𐴌 𐴉𐴝𐴌𐴝𐴃𐴢 𐴃𐴤𐴝𐴑𐴤𐴞𐴁𐴤𐴝𐴌 𐴎𐴝𐴒𐴝 𐴊𐴞𐴘𐴧𐴥𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴡𐴑𐴟𐴔 𐴕𐴥𐴡 𐴔𐴝𐴕𐴠 𐴈𐴡𐴀𐴡𐴘 𐴀𐴞𐴁𐴤𐴝𐴌𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴊𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴊𐴤𐴡𐴔𐴑𐴞 𐴊𐴠𐴀𐴠 𐴁𐴡𐴓𐴝𐴎𐴟𐴌𐴞 𐴒𐴤𐴡𐴌𐴡𐴃𐴧𐴟 𐴕𐴦𐴠𐴓𐴝𐴘 𐴊𐴠𐴀𐴠𐴌 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴊𐴡𐴌𐴔𐴞𐴘𐴝𐴕𐴡𐴃 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 , 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴀𐴝𐴌 𐴄𐴡𐴀𐴡𐴕𐴡𐴌 𐴁𐴝𐴎𐴤𐴝𐴘𐴧𐴝 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 , 𐴊𐴤𐴡𐴔𐴑𐴞 𐴊𐴞𐴘𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴒𐴢 𐴁𐴝𐴒𐴞𐴌 𐴊𐴤𐴡𐴔𐴑𐴞𐴌 𐴎𐴡𐴌𐴞𐴘𐴝 𐴕𐴦𐴠𐴓𐴞 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌𐴡𐴌 𐴊𐴡𐴌𐴎𐴝 𐴁𐴠𐴌𐴥𐴝 𐴁𐴤𐴝𐴚𐴞 𐴁𐴤𐴟𐴃𐴤𐴡𐴌𐴠 𐴒𐴤𐴡𐴓𐴞 𐴒𐴤𐴡𐴌𐴡𐴌 𐴏𐴥𐴝𐴔𐴝𐴕 𐴁𐴠𐴒𐴧𐴤𐴞𐴕 𐴓𐴡𐴘 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 , 𐴒𐴞𐴌𐴥𐴡𐴏𐴢 𐴀𐴥𐴞𐴏𐴝𐴉𐴠 𐴒𐴤𐴡𐴌𐴡𐴃 𐴃𐴤𐴝𐴑𐴤𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴔𐴟𐴓𐴢 𐴎𐴝𐴒𐴝 𐴘𐴥𐴝𐴀𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴘𐴓𐴠 𐴀𐴥𐴡𐴀𐴡𐴑 𐴘𐴦𐴝𐴃𐴤𐴡 𐴓𐴝𐴌𐴥𐴝𐴘𐴌 𐴋𐴡𐴌𐴡𐴌 𐴃𐴧𐴟 𐴁𐴝𐴏𐴞𐴁𐴤𐴡𐴓𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴘𐴓𐴠 𐴀𐴥𐴡𐴀𐴡𐴑 , 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴤𐴡𐴔𐴑𐴞 𐴊𐴞𐴀𐴞 𐴁𐴡𐴓𐴝𐴎𐴟𐴌𐴞 𐴋𐴝𐴑𐴞 𐴀𐴝𐴕𐴥𐴞 𐴓𐴝𐴌𐴥𐴝𐴘𐴃 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴔𐴟𐴀𐴟𐴔 𐴓𐴝𐴙𐴕𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴐𐴤𐴡𐴣𐴀𐴡 𐴋𐴝𐴓𐴝𐴓 𐴒𐴠𐴌𐴠𐴉𐴃𐴝𐴌 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑 𐴌𐴥𐴡𐴘 𐴁𐴝𐴌𐴠 𐴐𐴤𐴙𐴝𐴔 𐴕𐴡𐴒𐴡𐴌 𐴀𐴟𐴉𐴡𐴎𐴞𐴓𐴥𐴝𐴌 𐴌𐴡𐴔𐴎𐴝𐴕 𐴕𐴡𐴒𐴡𐴌 𐴘𐴟𐴕𐴞𐴘𐴥𐴡𐴕𐴡𐴌 𐴑𐴝𐴓𐴠𐴕𐴆𐴞 𐴉𐴝𐴌𐴝𐴃𐴧𐴤𐴟 , 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴐𐴤𐴡𐴣𐴀𐴡 / 𐴀𐴝𐴁𐴊𐴟𐴓𐴧𐴝𐴇𐴢 𐴃𐴡𐴌𐴥𐴡𐴉𐴊𐴝𐴌 𐴕𐴝𐴔𐴡𐴌 𐴁𐴝𐴚𐴓𐴝𐴊𐴠𐴐𐴤𐴞 𐴋𐴝𐴓𐴝𐴓 𐴀𐴠𐴑 𐴎𐴡𐴕 , 𐴔𐴟𐴄 𐴃𐴞𐴕 𐴎𐴡𐴕 𐴁𐴞 𐴅𐴞 𐴁𐴞𐴌 𐴀𐴥𐴝𐴃𐴤𐴡𐴃 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 / 𐴏𐴦𐴝𐴅𐴠𐴊𐴤𐴝 𐴁𐴠𐴒𐴡𐴔 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌 , 𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴡𐴌 𐴁𐴝𐴣𐴐𐴢 𐴕𐴡𐴓 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 , / 𐴇𐴦𐴝𐴅𐴠𐴌𐴝 𐴁𐴠𐴒𐴡𐴔 𐴁𐴡𐴐𐴢 𐴱 𐴲 𐴁𐴡𐴏𐴥𐴡𐴌 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴘𐴝 𐴸 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 , 𐴋𐴝𐴓𐴝𐴓𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴀𐴞𐴕𐴋𐴤𐴞𐴘𐴝 𐴉𐴝𐴌 𐴒𐴡𐴌𐴥𐴝𐴘 𐴁𐴤𐴡𐴓𐴧𐴝 𐴃𐴞𐴕 𐴊𐴞𐴕 𐴓𐴡𐴃𐴞 𐴒𐴤𐴡𐴌𐴡𐴃 𐴓𐴟𐴖𐴝𐴘 𐴌𐴝𐴑𐴤𐴞 𐴁𐴦𐴝𐴊𐴠 , 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴓𐴡𐴘 , 𐴀𐴞𐴕𐴋𐴤𐴞𐴘𐴝 – 𐴁𐴝𐴚𐴓𐴝𐴊𐴠𐴐𐴢 𐴐𐴤𐴞𐴔𐴝𐴌 𐴑𐴝𐴓𐴞𐴕𐴊𐴞 𐴈𐴥𐴝𐴓 𐴉𐴝𐴌𐴥𐴝𐴘 𐴀𐴞𐴕𐴋𐴤𐴞𐴘𐴝 𐴒𐴤𐴡𐴓𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴒𐴡𐴃𐴡 𐴈𐴡𐴀𐴠𐴑 𐴔𐴝𐴐𐴢 𐴀𐴥𐴡𐴘𐴃𐴠 𐴔𐴦𐴝𐴣 𐴁𐴝𐴉𐴡𐴌𐴥𐴠 𐴁𐴡𐴀𐴡𐴃 𐴋𐴦𐴡𐴙𐴓𐴧𐴝 𐴓𐴟𐴁𐴢 𐴓𐴝𐴓𐴥𐴡𐴏𐴢 𐴊𐴠𐴈𐴥𐴝𐴘 , 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴦𐴝𐴣 𐴁𐴝𐴉𐴡𐴃𐴧𐴤𐴟 𐴓𐴡𐴘 𐴘𐴥𐴡𐴌𐴠 𐴀𐴞𐴕𐴋𐴤𐴞𐴘𐴝𐴃 𐴓𐴡𐴘 𐴎𐴝𐴘 𐴁𐴠𐴏𐴥𐴞 𐴉𐴥𐴠𐴓𐴥𐴝𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴕𐴠𐴅𐴤𐴠𐴌𐴥𐴞𐴘𐴝𐴃 𐴀𐴞𐴐𐴑𐴟𐴓 𐴁𐴤𐴝𐴚𐴞 𐴉𐴡𐴌𐴞 𐴈𐴡𐴔𐴡𐴃 𐴇𐴥𐴝𐴣𐴃𐴢 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴕𐴠𐴅𐴤𐴠𐴌𐴥𐴞𐴘𐴝 𐴊𐴠𐴐𐴤𐴡𐴌 𐴔𐴝𐴎𐴤𐴡𐴌 𐴀𐴥𐴞𐴏𐴧𐴝𐴌 𐴂𐴡𐴓𐴝𐴄𐴟 𐴋𐴞𐴐𐴄𐴤𐴞𐴑𐴡𐴃 𐴁𐴤𐴝𐴚𐴞 𐴉𐴡𐴙𐴅𐴧𐴤𐴙𐴠𐴊𐴠 𐴊𐴟𐴘 𐴄𐴝𐴓𐴝 𐴀𐴞𐴐𐴑𐴟𐴓 𐴀𐴠𐴑𐴧𐴤𐴝𐴕𐴡𐴌 𐴁𐴤𐴝𐴚𐴝 𐴏𐴟𐴌𐴝𐴌 𐴁𐴤𐴟𐴃𐴡𐴌 𐴃𐴧𐴟 , 𐴁𐴝𐴏𐴝𐴘 𐴓𐴡𐴀𐴡𐴙𐴕𐴧𐴝 𐴋𐴝𐴀𐴝𐴘 𐴘𐴠 𐴈𐴡𐴔𐴡𐴃 𐴇𐴥𐴝𐴣𐴃 𐴎𐴡𐴕 𐴓𐴝𐴐𐴢 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑𐴡𐴃 𐴀𐴟𐴊𐴧𐴤𐴝𐴌 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴠𐴂𐴟𐴄 𐴔𐴡𐴎𐴞𐴕 𐴕𐴠𐴅𐴤𐴠𐴌𐴥𐴞𐴘𐴝𐴃 𐴒𐴤𐴡𐴌 𐴁𐴝𐴣𐴊𐴡𐴀𐴡𐴙𐴕𐴧𐴝 𐴑𐴡𐴕𐴄𐴠𐴑𐴊𐴝𐴌 𐴀𐴥𐴡𐴑𐴧𐴡𐴓𐴠 𐴒𐴤𐴡𐴌 𐴁𐴝𐴣𐴊𐴤𐴡𐴕𐴡𐴃 𐴁𐴦𐴠𐴐𐴢 𐴁𐴤𐴝𐴒𐴢 𐴔𐴞𐴘𐴝𐴊 𐴉𐴥𐴟𐴌𐴝𐴘 𐴒𐴞𐴘𐴥𐴡𐴘𐴊𐴠 𐴏𐴥𐴝𐴔𐴝𐴕 𐴀𐴥𐴡𐴑𐴧𐴡𐴓 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠 𐴀𐴥𐴠𐴃𐴡𐴓𐴧𐴝 𐴀𐴠𐴕𐴋𐴞𐴓𐴧𐴝 𐴒𐴤𐴡𐴄𐴡𐴕𐴝 𐴁𐴝𐴌 𐴁𐴝𐴌 𐴀𐴥𐴡𐴀𐴡𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱