𐴔𐴡𐴚𐴋𐴤𐴟 𐴑𐴝𐴛𐴝𐴚 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝𐴃 𐴔𐴡𐴒𐴢 𐴁𐴝𐴒𐴞𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴊𐴟𐴘𐴀𐴡𐴔 𐴁𐴡𐴏𐴥𐴡𐴌 𐴑𐴦𐴡𐴓𐴠𐴅𐴡𐴌 𐴉𐴟𐴖𐴝 𐴀𐴠𐴑 𐴎𐴡𐴕 𐴐𐴤𐴡𐴇𐴞𐴊 , 𐴵 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 , 𐴑𐴝𐴛𐴝𐴚 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝𐴃 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌𐴒𐴟𐴐𐴧𐴞 𐴀𐴟𐴒𐴧𐴤𐴗𐴝 𐴃𐴤𐴝𐴑𐴤𐴠𐴊𐴠 𐴒𐴤𐴡𐴌 𐴀𐴠𐴑𐴧𐴤𐴝𐴕𐴡𐴃 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑𐴡𐴃 𐴀𐴥𐴝𐴣𐴎𐴡𐴙𐴕𐴧𐴝 𐴀𐴝𐴕𐴃𐴝𐴎𐴠 𐴰 𐴰 : 𐴳 𐴁𐴝𐴎𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴙𐴅𐴧𐴤𐴙𐴠𐴊𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴒𐴟𐴓𐴞 𐴀𐴟𐴒𐴧𐴤𐴗𐴝 𐴉𐴡𐴌𐴞 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 , 𐴑𐴦𐴡𐴓𐴠𐴅𐴡𐴃 𐴉𐴡𐴌𐴥𐴠𐴌𐴊𐴧𐴠 𐴊𐴟𐴘𐴀𐴡𐴔 𐴁𐴡𐴏𐴥𐴡𐴌𐴡𐴌 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴵 𐴎𐴡𐴕 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴥𐴠𐴕𐴋𐴞𐴓𐴧𐴝 𐴔𐴡𐴚𐴋𐴤𐴟 𐴁𐴟𐴔𐴥𐴟 𐴌𐴥𐴠𐴑𐴧𐴤𐴗𐴝𐴃 𐴔𐴝𐴎𐴤𐴠 𐴘𐴥𐴡 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴞𐴘𐴡𐴌𐴥𐴠 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴁𐴠𐴐𐴤𐴞 𐴊𐴡𐴌𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴀𐴝𐴌 𐴀𐴠𐴓𐴝𐴅 𐴒𐴡𐴌𐴞𐴁𐴌 𐴈𐴡𐴕𐴥𐴡 𐴌𐴝𐴏𐴧𐴝 𐴕𐴡 𐴃𐴤𐴝𐴑𐴤𐴡𐴕𐴠 𐴉𐴟𐴖𐴝 𐴀𐴥𐴞𐴁𐴤𐴝 𐴐𐴤𐴡𐴣𐴀𐴡 𐴑𐴝𐴛𐴝𐴚 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝𐴃 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝 𐴁𐴠𐴒𐴧𐴤𐴟𐴕𐴡𐴌 𐴅𐴝𐴕 𐴈𐴥𐴡𐴃𐴡𐴌𐴝𐴃 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴏𐴥𐴠𐴊𐴠 𐴀𐴝𐴌 𐴄𐴡𐴀𐴡𐴕𐴡𐴌 𐴁𐴝𐴎𐴤𐴝𐴘𐴧𐴝 𐴁𐴝𐴀𐴝𐴌 𐴃𐴧𐴟 𐴓𐴝𐴌𐴥𐴝𐴘 𐴃𐴧𐴤𐴟 𐴁𐴝𐴏𐴞𐴁𐴤𐴡𐴓𐴧𐴝 , 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴡𐴙𐴓𐴧𐴙𐴠 𐴀𐴥𐴝𐴘𐴊𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴔𐴡𐴒𐴢 𐴁𐴒𐴞 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴀𐴝𐴏𐴥𐴠𐴊𐴠 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴃 𐴋𐴡𐴌𐴟𐴕 𐴇𐴥𐴝𐴔𐴓𐴝 𐴒𐴡𐴌𐴥𐴝𐴃 , 𐴋𐴡𐴣𐴀𐴡 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴝𐴃 𐴀𐴝𐴌 𐴀𐴦𐴝𐴔 𐴁𐴡𐴕𐴋𐴟𐴑 𐴓𐴡𐴘 𐴒𐴟𐴓𐴞 𐴔𐴝𐴌𐴝𐴃 𐴀𐴝𐴏𐴥𐴠 𐴁𐴡𐴓𐴞 , 𐴔𐴦𐴝𐴔𐴠𐴓𐴝 𐴏𐴡𐴓𐴠𐴌 𐴊𐴧𐴠 𐴎𐴝𐴒𐴝 𐴀𐴥𐴞𐴀𐴞𐴕𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴎𐴝𐴃𐴞𐴘𐴡 𐴏𐴞𐴕𐴧𐴡 𐴉𐴡𐴌𐴞𐴏𐴡 𐴏𐴥𐴝𐴁𐴟𐴃 𐴁𐴝𐴕𐴝𐴘𐴃𐴤𐴡 𐴁𐴡𐴘𐴌𐴡𐴁 𐴒𐴞𐴘𐴥𐴠𐴊𐴠 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙 𐴒𐴠𐴌𐴠𐴉𐴃𐴝𐴌 𐴱𐴱

𐴎𐴝𐴃𐴞𐴘𐴡 𐴏𐴞𐴕𐴧𐴡 𐴉𐴡𐴌𐴞𐴏𐴡 𐴏𐴥𐴝𐴁𐴟𐴃 𐴁𐴝𐴕𐴝𐴘 𐴁𐴤𐴡𐴓𐴧𐴝 , 𐴑𐴞𐴐𐴟𐴌 𐴒𐴡𐴕𐴎𐴡𐴌 𐴁𐴡𐴘𐴌𐴡𐴁 𐴀𐴟𐴉𐴡𐴎𐴞𐴓𐴥𐴝𐴌 𐴁𐴤𐴟𐴄 𐴑𐴡𐴔𐴞𐴐𐴠𐴕𐴡𐴌 𐴀𐴡𐴉𐴥𐴞𐴏𐴡𐴃 𐴎𐴝𐴓𐴞 𐴈𐴝𐴁𐴡𐴏𐴢 𐴉𐴡𐴕𐴧𐴝 𐴓𐴡𐴘 𐴎𐴝𐴘 , 𐴁𐴡𐴘𐴌𐴡𐴁𐴡𐴌 𐴁𐴤𐴝𐴐𐴞𐴕𐴊𐴝 𐴑𐴟𐴖𐴥𐴝𐴓𐴝𐴘 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴏𐴥𐴝𐴁𐴟𐴃 𐴁𐴝𐴕𐴝𐴘𐴃𐴤𐴡 𐴏𐴝𐴘𐴧𐴥𐴠𐴊𐴠 , 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 , 𐴁𐴤𐴟𐴄 𐴑𐴡𐴔𐴞𐴐𐴠𐴕𐴡𐴌𐴠 𐴀𐴞𐴚𐴑𐴟𐴖𐴝𐴌𐴞 𐴀𐴝𐴌 𐴃𐴝𐴊𐴝𐴌𐴟𐴑 𐴒𐴡𐴌𐴥𐴞 𐴁𐴦𐴝𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴏𐴥𐴝𐴁𐴟𐴃 𐴀𐴥𐴡𐴀𐴡𐴕𐴠 , 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴉𐴟𐴓𐴞𐴐𐴡𐴌 𐴇𐴥𐴝𐴖𐴝𐴓𐴝 𐴒𐴡𐴌𐴥𐴞 𐴊𐴞𐴘𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴝𐴉𐴠𐴏𐴞𐴌 𐴔𐴦𐴝𐴔𐴠𐴓𐴝 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴔𐴡𐴐𐴖𐴝𐴌𐴝 𐴱𐴱

𐴀𐴠𐴑 𐴔𐴡𐴓𐴞𐴘𐴥𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴝𐴌 𐴖𐴝𐴊𐴝 𐴀𐴝𐴌 𐴏𐴟𐴑𐴃𐴞 𐴕𐴝𐴔𐴝𐴌𐴥𐴠 , 𐴀𐴥𐴠𐴇𐴃𐴠𐴌𐴝𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌 𐴔𐴝𐴕𐴞 𐴎𐴝𐴘𐴁𐴡𐴓𐴧𐴥𐴝 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴞𐴕𐴋𐴤𐴞𐴘𐴝 𐴕𐴞𐴘𐴥𐴟 𐴊𐴤𐴠𐴓𐴞𐴃 𐴀𐴥𐴡𐴘𐴧𐴠𐴊𐴠 𐴁𐴝𐴚𐴓𐴝 𐴐𐴤𐴝𐴘𐴒𐴡𐴌𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 , 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴁𐴡𐴘𐴍𐴥𐴡𐴑𐴡𐴃 , 𐴇𐴥𐴝𐴎𐴞𐴌 𐴀𐴥𐴡𐴘𐴧𐴠𐴊𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴥𐴟 𐴃𐴤𐴠𐴕 𐴏𐴗𐴠 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 , 𐴊𐴟𐴕𐴥𐴞 𐴎𐴡𐴕𐴠 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴐𐴖𐴝𐴌𐴝𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴈𐴥𐴝𐴔𐴝𐴈𐴥𐴝 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴀𐴡𐴘 𐴅𐴟𐴖𐴝𐴁 𐴊𐴞𐴘𐴥𐴠 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔 𐴱𐴱

𐴀𐴝𐴑𐴝𐴕 𐴔𐴡𐴚𐴋𐴤𐴟𐴃 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴏𐴝𐴀𐴝𐴘 𐴏𐴞𐴃𐴞 𐴎𐴝𐴕𐴞 𐴉𐴥𐴟𐴕𐴥𐴞 , 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴥𐴝𐴘 𐴉𐴥𐴠𐴓𐴥𐴝𐴘𐴁𐴝𐴌 𐴀𐴠𐴌𐴝𐴊𐴝 𐴓𐴡𐴘 , 𐴉𐴡𐴙𐴃𐴧𐴡 𐴊𐴞𐴕 𐴌𐴟𐴇𐴝𐴙𐴚𐴒𐴙𐴝 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴃 , 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴝𐴃 𐴀𐴝𐴏𐴥𐴠 , 𐴎𐴠 𐴇𐴥𐴝𐴔𐴓𐴝𐴌 𐴕𐴡𐴃𐴞𐴅𐴝𐴃 𐴉𐴡𐴙𐴃𐴧𐴡 𐴊𐴞𐴕 𐴀𐴠𐴑 𐴎𐴡𐴕 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴝𐴃 𐴀𐴝𐴌 𐴒𐴤𐴝𐴙𐴓 𐴀𐴥𐴟𐴀𐴝𐴃 𐴀𐴝𐴏𐴥𐴠 , 𐴒𐴤𐴝𐴙𐴓 𐴀𐴥𐴡𐴀𐴡𐴊𐴠 𐴀𐴥𐴞𐴁𐴤𐴠 𐴘𐴥𐴡 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴕𐴡 𐴉𐴡𐴀𐴡𐴕𐴠 𐴔𐴡𐴌𐴞 𐴎𐴝𐴒𐴤𐴡𐴘 𐴀𐴝𐴌 𐴎𐴞𐴘𐴥𐴝𐴕𐴃𐴟 𐴉𐴝𐴀𐴝 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝 𐴒𐴤𐴡𐴘 𐴁𐴡𐴓𐴞 , 𐴔𐴡𐴚𐴋𐴤𐴟𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴱 𐴃𐴝𐴌𐴥𐴞𐴑𐴡𐴃 𐴔𐴡𐴚𐴕𐴞 𐴉𐴝𐴌𐴝𐴌 𐴁𐴤𐴝𐴐𐴞𐴕𐴊𐴝 / 𐴈𐴝𐴓𐴟 𐴘𐴠 𐴔𐴡𐴚𐴕𐴞 𐴉𐴝𐴌𐴝𐴌 𐴊𐴡𐴀𐴡𐴙𐴕 𐴋𐴤𐴝𐴑𐴡𐴃 𐴀𐴝𐴏𐴥𐴠𐴊𐴠 𐴀𐴞𐴏𐴝 𐴔𐴝𐴏𐴥𐴡𐴌 𐴒𐴟𐴊𐴤𐴝𐴃 𐴔𐴝𐴏𐴢 𐴏𐴝𐴘𐴃𐴤𐴡 𐴒𐴞𐴘𐴥𐴠𐴊𐴠 𐴀𐴥𐴠𐴕𐴃𐴟 , 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴥𐴝𐴘𐴅𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 , 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴡 𐴉𐴝𐴀𐴝 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴥𐴝𐴓 𐴔𐴡𐴖𐴝𐴏𐴞 𐴑𐴠𐴀𐴠𐴔𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴱 𐴷 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴱𐴱

𐴒𐴤𐴡𐴎𐴧𐴝𐴌 𐴏𐴠𐴇𐴥𐴠𐴃𐴡𐴌 𐴋𐴞𐴂𐴦𐴝𐴌𐴔𐴠𐴕𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 , 𐴒𐴤𐴡𐴎𐴧𐴝𐴌 𐴀𐴥𐴝𐴓 𐴔𐴡𐴖𐴝𐴏𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴱 𐴷 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴔𐴡𐴌𐴞 𐴒𐴞𐴘𐴥𐴡𐴘 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴉𐴠𐴌𐴥𐴝𐴣𐴏𐴡𐴌 𐴈𐴥𐴡𐴁𐴡𐴌 𐴉𐴡𐴣𐴀𐴡𐴏𐴥𐴝 𐴀𐴠𐴅𐴤𐴠𐴕𐴏𐴞 ( 𐴀𐴠 𐴀𐴠𐴉𐴢 𐴂𐴞 ) 𐴌 𐴈𐴥𐴡𐴁𐴡𐴌 𐴔𐴥𐴝𐴀𐴞𐴑 𐴈𐴝𐴕 𐴘𐴟𐴕𐴟𐴏𐴢 𐴐𐴤𐴡𐴀𐴡𐴌𐴡𐴌 𐴋𐴤𐴝𐴑𐴤𐴠 𐴀𐴝𐴏𐴥𐴠𐴊𐴠 𐴀𐴥𐴝𐴓 𐴔𐴡𐴖𐴝𐴏𐴞 𐴑𐴠𐴀𐴠𐴔𐴡𐴃 , 𐴒𐴤𐴡𐴎𐴧𐴝𐴌 𐴀𐴡𐴙𐴕𐴧𐴡 𐴀𐴠𐴓𐴝𐴑𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 , 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴀𐴝𐴕𐴥𐴞 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃 𐴁𐴟𐴔 𐴔𐴝𐴌𐴞 𐴱 𐴷 𐴎𐴡𐴕 𐴐𐴤𐴡𐴇𐴞𐴊 𐴀𐴝𐴌 𐴹 𐴸 𐴲 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴒𐴤𐴝𐴙𐴓 𐴒𐴡𐴌𐴥𐴞 𐴉𐴥𐴝𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴠 𐴇𐴝𐴔𐴦𐴝𐴏𐴢 𐴀𐴥𐴝𐴣𐴃𐴞𐴘𐴝𐴌 𐴁𐴝𐴎 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴁𐴟𐴔𐴁𐴝𐴌𐴞 𐴒𐴡𐴙𐴅𐴧𐴤𐴞 𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴔𐴞𐴏𐴥𐴝 :𐴇𐴝𐴔𐴦𐴝𐴏𐴢 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 𐴀𐴥𐴝𐴓 𐴔𐴡𐴖𐴝𐴏𐴞 𐴑𐴠𐴀𐴠𐴔𐴡𐴃 , 𐴀𐴞𐴏𐴌𐴦𐴝𐴙𐴓𐴠 𐴁𐴟𐴔𐴁𐴝𐴌𐴞 𐴒𐴡𐴌𐴥𐴞 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴡𐴇𐴞𐴊 𐴒𐴡𐴙𐴅𐴧𐴤𐴙𐴠 𐴊𐴠 𐴀𐴝𐴌 𐴒𐴤𐴝𐴙𐴓 𐴒𐴡𐴙𐴅𐴧𐴤𐴙𐴠𐴊𐴠 , 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴀𐴞𐴏𐴌𐴦𐴝𐴙𐴓𐴠 𐴈𐴡𐴘𐴧𐴥𐴠𐴊𐴠 𐴀𐴝𐴣𐴀𐴝𐴌𐴝 𐴑𐴠𐴀𐴠𐴔𐴡𐴃 𐴁𐴟𐴔𐴁𐴝𐴌𐴞 𐴒𐴡𐴙𐴅𐴧𐴤𐴞𐴊𐴠 𐴕𐴡𐴀𐴡 , 𐴀𐴝𐴣𐴀𐴝𐴌𐴝 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴡𐴌 𐴓𐴦𐴞𐴋𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴐𐴤𐴝𐴕𐴝 𐴁𐴝𐴕𐴝𐴘𐴧𐴥𐴞𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 , 𐴘𐴥𐴝𐴀𐴝𐴕𐴡𐴌𐴥𐴠 𐴇𐴝𐴔𐴦𐴝𐴏𐴠 𐴉𐴥𐴟𐴖𐴝𐴣𐴃𐴞 𐴉𐴥𐴟𐴣𐴖𐴝𐴣𐴃𐴞 𐴀𐴞𐴏𐴌𐴦𐴝𐴙𐴓𐴠 𐴈𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴁𐴞𐴓𐴑𐴤𐴟𐴓 𐴊𐴤𐴡𐴓𐴝 𐴔𐴞𐴏𐴥𐴝 𐴈𐴡𐴃𐴤𐴝 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴝𐴕 𐴒𐴡𐴌𐴥𐴞 𐴊𐴞𐴘𐴥𐴠 , 𐴇𐴝𐴔𐴦𐴝𐴏𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴀𐴞𐴘𐴥𐴝𐴕 𐴃𐴡 𐴀𐴞𐴏𐴌𐴦𐴝𐴙𐴓𐴡𐴌 𐴀𐴠𐴑𐴀𐴡𐴔 𐴔𐴞𐴏𐴥𐴝 𐴈𐴡𐴃𐴤𐴝 𐴕𐴡 𐴀𐴥𐴡𐴀𐴡 , 𐴀𐴞𐴏𐴌𐴦𐴝𐴙𐴓𐴠 𐴀𐴠𐴕𐴋𐴞𐴓𐴧𐴝 𐴔𐴞𐴏𐴥𐴝 𐴈𐴡𐴃𐴤𐴝 𐴈𐴡𐴀𐴡𐴘 𐴀𐴝𐴘𐴧𐴥𐴠𐴌 𐴊𐴠 𐴷 𐴷 𐴁𐴡𐴏𐴥𐴡𐴌 𐴀𐴥𐴡𐴘𐴧𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱