𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴦𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴱 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴓𐴝𐴌𐴥𐴝𐴘 𐴁𐴠𐴐𐴤𐴞 𐴎𐴟𐴌𐴠 𐴐𐴤𐴟𐴌𐴠 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴉𐴝𐴌𐴝 , 𐴐𐴗𐴠 𐴎𐴤𐴝 𐴉𐴝𐴌𐴝 , 𐴉𐴡𐴘𐴧𐴝𐴎𐴞 𐴉𐴝𐴌𐴝 , 𐴀𐴝𐴓𐴞 𐴉𐴝𐴌𐴝 , 𐴀𐴝𐴌 𐴄𐴡𐴀𐴡𐴕𐴡 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓 𐴀𐴡𐴙𐴕𐴧𐴡 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴌 𐴔𐴞𐴑𐴧𐴤𐴙𐴝 𐴎𐴝𐴘 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴃𐴡𐴚 𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴓𐴡𐴘 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴓𐴝𐴒𐴝𐴃𐴝𐴌 𐴇𐴥𐴝𐴔𐴓𐴝 𐴎𐴝𐴌𐴞 𐴌𐴝𐴑𐴤𐴡𐴕𐴡𐴌 𐴎𐴡𐴌𐴞𐴘𐴝 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴌 𐴄𐴡𐴀𐴡𐴕𐴡𐴌 𐴀𐴝𐴃𐴡𐴌 𐴈𐴝𐴣𐴏𐴥𐴡𐴌 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕𐴡𐴌 𐴒𐴟𐴓𐴝 𐴀𐴥𐴡𐴑𐴧𐴡𐴓 𐴉𐴡𐴌𐴞 𐴉𐴥𐴟𐴍𐴥𐴡𐴕𐴠 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴠𐴌 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴀𐴡𐴌 𐴊𐴧𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴔𐴝𐴕𐴥𐴟𐴙𐴐𐴢 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴕𐴦𐴠𐴓𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴈𐴝𐴘𐴧𐴡𐴚 𐴈𐴥𐴝𐴓𐴞𐴌 𐴈𐴥𐴝𐴓 𐴉𐴝𐴌𐴥𐴝𐴘𐴁𐴤𐴝𐴌 𐴐𐴤𐴡𐴣𐴀𐴡𐴃 , 𐴈𐴥𐴝𐴓𐴡𐴃 𐴋𐴟𐴉𐴥𐴞 𐴷 𐴁𐴡𐴏𐴥𐴡𐴌𐴅𐴧𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴀𐴠𐴈𐴥𐴡𐴕 𐴔𐴡𐴚𐴋𐴤𐴟𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴀𐴝𐴌 𐴖𐴦𐴝𐴙𐴆𐴧𐴙𐴝 𐴃𐴞𐴌𐴥𐴝𐴙𐴆𐴧𐴙𐴝 𐴉𐴡𐴣𐴃𐴤𐴠 𐴒𐴤𐴝𐴣𐴍𐴠 𐴈𐴥𐴝𐴘𐴁𐴡𐴓𐴧𐴥𐴝 𐴏𐴥𐴝𐴉𐴢 𐴉𐴝𐴕𐴥𐴞 𐴕𐴡 𐴉𐴡𐴀𐴡𐴕𐴠 𐴏𐴠𐴇𐴥𐴠𐴃𐴡𐴌 𐴇𐴥𐴝𐴓𐴡𐴃 𐴀𐴥𐴡 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴰 𐴲 𐴎𐴡𐴕𐴡𐴌 𐴁𐴦𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘𐴧𐴠 𐴱𐴱

𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴤𐴡𐴚 𐴊𐴟𐴕𐴥𐴞 𐴎𐴝𐴒𐴝 𐴔𐴞𐴓𐴝𐴘 𐴰 𐴲 𐴎𐴡𐴕𐴡𐴌 𐴃𐴧𐴤𐴟 𐴁𐴤𐴝𐴌𐴥𐴡 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 , 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴔𐴞𐴓𐴞 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴉𐴥𐴟𐴌𐴥𐴝𐴘 𐴉𐴥𐴠𐴓𐴥𐴝𐴌 𐴊𐴧𐴠 , 𐴀𐴥𐴠𐴕𐴃𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴢 𐴄𐴠𐴑𐴕𐴝𐴉𐴢 𐴉𐴡𐴣𐴀𐴡𐴙𐴏𐴧𐴙𐴠 , 𐴔𐴡𐴕𐴃𐴡𐴌 𐴁𐴝𐴚𐴓𐴝𐴊𐴠𐴐𐴢 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴝𐴌𐴥𐴠 𐴁𐴡𐴌𐴥𐴡𐴘 𐴃𐴡𐴓𐴞 𐴏𐴠𐴑𐴡𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴥𐴠 , 𐴀𐴠𐴈𐴥𐴡𐴕 𐴀𐴥𐴞𐴃𐴝𐴌𐴝𐴌𐴥𐴠 𐴖𐴝𐴉𐴠𐴏𐴢 𐴁𐴡𐴌𐴔𐴥𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 , 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞 𐴓𐴡𐴘 𐴈𐴡𐴃𐴤𐴝 𐴏𐴝𐴓𐴝𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴌𐴔𐴥𐴝𐴃 𐴐𐴤𐴡𐴃𐴑𐴝𐴌𐴝 𐴵 𐴲 𐴎𐴡𐴕 𐴉𐴟𐴖𐴝𐴙𐴕𐴊𐴠 𐴖𐴠𐴑𐴏𐴥𐴞𐴕 ( 𐴄𐴞𐴑𐴝 ) 𐴓𐴝𐴒𐴝𐴘 𐴉𐴝𐴌𐴠𐴌 𐴊𐴠 𐴱𐴱

𐴁𐴡𐴌𐴔𐴥𐴝𐴃 𐴖𐴠𐴑𐴏𐴥𐴞𐴕 ( 𐴄𐴞𐴑𐴝 ) 𐴓𐴝𐴒𐴝𐴘 ) 𐴕𐴡 𐴉𐴝𐴌𐴥𐴠𐴌 𐴊𐴧𐴠 𐴉𐴟𐴖𐴝𐴙𐴕𐴊𐴤𐴡𐴌 𐴒𐴡𐴕𐴝 , 𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞𐴁𐴤𐴝𐴌 𐴀𐴝𐴒𐴡𐴌 𐴇𐴥𐴝𐴓𐴡𐴃 𐴓𐴡𐴘 𐴔𐴞𐴓𐴝𐴘 𐴏𐴝𐴘𐴓𐴥𐴠 , 𐴃𐴞𐴕 𐴒𐴟𐴕𐴧𐴝 𐴁𐴝𐴌𐴥𐴞 𐴒𐴞𐴘𐴥𐴡𐴘 𐴁𐴡𐴓𐴞 , ( 𐴀𐴠𐴕 𐴘𐴟 𐴅𐴞 ) 𐴘𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴱 𐴃𐴝𐴌𐴥𐴞𐴑𐴤𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌𐴞 𐴑𐴝𐴕𐴉𐴠𐴌𐴥𐴠𐴣𐴏𐴡𐴃 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴀𐴝𐴌 𐴑𐴟𐴊𐴟𐴌𐴟𐴃𐴞 𐴀𐴝𐴉𐴡𐴃𐴡𐴌 𐴔𐴟𐴃𐴦𐴝𐴓𐴧𐴠𐴑 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴢 𐴀𐴝𐴌 𐴏𐴠𐴇𐴥𐴠𐴃𐴡𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴢 𐴔𐴞𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴡𐴕𐴠 𐴴 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴱 𐴃𐴝𐴌𐴥𐴞𐴑 𐴌𐴝𐴃𐴞𐴘𐴝 𐴰 𐴱 𐴁𐴝𐴎𐴡𐴌 𐴁𐴦𐴝𐴊𐴠 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴝𐴂𐴧𐴝𐴙𐴚 𐴔𐴥𐴟𐴌𐴥𐴟 𐴔𐴥𐴝 𐴁𐴡𐴌 𐴔𐴡𐴏𐴥𐴡𐴙𐴃𐴡𐴌 𐴉𐴡𐴏𐴥𐴞𐴔𐴠 𐴆𐴞𐴕𐴝 𐴉𐴝𐴄𐴧𐴞𐴃 𐴀𐴝𐴏𐴥𐴠𐴊𐴠 / 𐴏𐴥𐴡𐴘𐴡𐴊 𐴑𐴡𐴌𐴞𐴔𐴡𐴌 𐴒𐴤𐴡𐴌𐴡𐴌 𐴋𐴤𐴝𐴑𐴤𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴟𐴒𐴧𐴤𐴗𐴝 𐴉𐴡𐴌𐴞 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 , 𐴌𐴟𐴇𐴝𐴙𐴚𐴒𐴙𐴝 𐴴 𐴎𐴡𐴕 𐴀𐴥𐴡𐴊𐴡𐴃 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 𐴀𐴝𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴘𐴝𐴁𐴤𐴝 𐴄𐴠𐴁𐴓𐴥𐴠𐴄𐴤𐴡𐴌 𐴑𐴠𐴙𐴏𐴡𐴃 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴊𐴟𐴘 𐴎𐴡𐴕𐴡𐴌 𐴀𐴟𐴔𐴡𐴌 𐴑𐴡𐴙𐴊 𐴐𐴤𐴝𐴎𐴝 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌𐴡𐴃 𐴰 𐴸 𐴇𐴥𐴝𐴎𐴝𐴌 𐴘𐴝𐴁𐴤𐴝 𐴄𐴠𐴁𐴓𐴥𐴠𐴄 𐴉𐴝𐴏𐴝𐴌 𐴑𐴝𐴌𐴞 𐴀𐴡 𐴷 𐴳 𐴓𐴝𐴑 𐴹 𐴇𐴥𐴝𐴎𐴝𐴌 𐴕𐴡𐴒𐴡𐴃 𐴄𐴞𐴛𐴝 𐴉𐴝𐴀𐴝 𐴒𐴞𐴘𐴥𐴠𐴊𐴠 𐴔𐴦𐴝𐴔𐴠𐴓𐴝𐴃 𐴌𐴟𐴇𐴝𐴙𐴒𐴙𐴝 𐴐𐴤𐴡𐴣𐴀𐴡 𐴲 𐴎𐴡𐴕𐴡𐴌 𐴀𐴟𐴔𐴡𐴌 𐴑𐴡𐴙𐴊 𐴐𐴤𐴝𐴎𐴝 , 𐴀𐴝𐴌 𐴉𐴡𐴃𐴧𐴞 𐴀𐴠𐴑 𐴎𐴡𐴕𐴠 𐴰 𐴵 𐴇𐴥𐴝𐴎𐴝𐴌 𐴄𐴞𐴛𐴝 𐴎𐴡𐴌𐴞𐴁𐴝𐴕𐴝 𐴊𐴞𐴀𐴞𐴁𐴡 𐴈𐴡𐴀𐴡𐴘 , 𐴎𐴞𐴓𐴥𐴝𐴌 𐴅𐴡𐴐𐴢 / 𐴔𐴟𐴕𐴐𐴤𐴞 𐴀𐴝𐴁𐴊𐴟𐴓 𐴔𐴡𐴅𐴞𐴊𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 , 𐴀𐴝𐴊𐴝𐴓𐴡𐴃𐴠 𐴇𐴥𐴡𐴑𐴟𐴔 𐴉𐴥𐴟𐴕𐴝𐴘 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴎𐴡𐴌𐴞𐴁𐴝𐴕𐴝 𐴕𐴡 𐴊𐴞𐴀𐴞𐴓𐴥𐴠 𐴎𐴞𐴘𐴥𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴀𐴠𐴑 𐴁𐴡𐴏𐴥𐴡𐴌 𐴁𐴠𐴐𐴤𐴞 𐴏𐴡𐴑𐴃𐴤𐴡 𐴈𐴝𐴔 𐴒𐴡𐴌𐴥𐴝𐴌 𐴐𐴤𐴝𐴎𐴝 𐴉𐴥𐴟𐴕𐴝𐴘 𐴊𐴞𐴘𐴥𐴠 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴀𐴟𐴔𐴡𐴌 𐴑𐴡𐴙𐴊 𐴐𐴤𐴝𐴎𐴝 𐴉𐴝𐴘𐴧𐴝 𐴀𐴥𐴡𐴑𐴧𐴡𐴓 𐴀𐴥𐴡𐴙𐴓𐴊𐴠 / 𐴑𐴟𐴃𐴤𐴟 𐴉𐴝𐴓𐴡𐴚 𐴲 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 / 𐴑𐴡𐴓𐴞 𐴔𐴟𐴓𐴧𐴝𐴇𐴢 ( 𐴔𐴡𐴌𐴇𐴦𐴟𐴔𐴡𐴌 ) 𐴉𐴟𐴖𐴝 / 𐴕𐴡𐴅𐴔𐴟𐴓 𐴇𐴥𐴟𐴊𐴝 𐴰 𐴳 𐴁𐴡𐴏𐴥𐴡𐴌 𐴀𐴝𐴌 𐴌𐴝𐴔𐴥𐴟 𐴀𐴟𐴉𐴡𐴎𐴞𐴓𐴥𐴝𐴌 𐴏𐴠𐴀𐴞𐴕𐴊𐴝 𐴈𐴥𐴡𐴕𐴊𐴡𐴑𐴝𐴌 𐴉𐴝𐴌𐴝𐴌 𐴏𐴥𐴡𐴓𐴞 𐴔𐴟𐴓𐴧𐴝𐴇 𐴔𐴞𐴔𐴁𐴤𐴡𐴌𐴡𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊 𐴐𐴤𐴡𐴌𐴞𐴉𐴢 𐴲 𐴴 𐴁𐴡𐴏𐴥𐴡𐴌 𐴊𐴠 𐴀𐴟𐴑𐴤𐴞𐴘𐴝 𐴕𐴞𐴘𐴥𐴟𐴏𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴉𐴝𐴑𐴞𐴏𐴃𐴤𐴝𐴕𐴠 𐴌𐴠𐴅𐴞𐴏𐴄𐴝𐴌 𐴒𐴡𐴙𐴅𐴧𐴤𐴙𐴝 𐴀𐴝𐴉𐴒𐴝𐴕𐴞 𐴌𐴞𐴉𐴟𐴎𐴞 𐴀𐴝𐴌𐴀𐴥𐴡 𐴀𐴠𐴑 𐴁𐴡𐴏𐴥𐴡𐴌 𐴃𐴤𐴝𐴑𐴤𐴞 𐴉𐴝𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴊𐴡𐴉𐴃𐴤𐴡𐴌𐴞 𐴀𐴝𐴔𐴓𐴝 𐴘𐴠 𐴎𐴟𐴌 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴉𐴝𐴑𐴞𐴏𐴃𐴤𐴝𐴕𐴠 𐴓𐴡𐴒𐴢 𐴁𐴤𐴡𐴒𐴢 𐴀𐴠𐴑 𐴔𐴡𐴓𐴞𐴘𐴥𐴟𐴕 𐴵 𐴓𐴝𐴑 𐴀𐴝𐴉𐴒𐴝𐴕𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴌𐴠𐴅𐴞𐴏𐴄𐴠𐴌𐴠𐴐𐴤𐴠𐴕 𐴑𐴝𐴀𐴝𐴋𐴡𐴌 𐴔𐴞𐴘𐴝𐴃 𐴀𐴠𐴑 𐴁𐴡𐴏𐴥𐴡𐴌 𐴁𐴝𐴌𐴥𐴝𐴘 𐴊𐴞𐴘𐴥𐴠 , 𐴀𐴝𐴌 𐴊𐴠𐴐𐴤𐴡𐴌 𐴁𐴝𐴀𐴞𐴌 𐴒𐴡𐴌𐴥𐴝 𐴂𐴡𐴌𐴟𐴒𐴠𐴌𐴝𐴔 𐴀𐴠𐴑 𐴁𐴡𐴏𐴥𐴡𐴌𐴥𐴡𐴌 𐴓𐴧𐴝 𐴃𐴤𐴞𐴘𐴝 𐴒𐴡𐴌𐴝𐴥𐴘𐴧𐴠 𐴁𐴡𐴓𐴞 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴊𐴡𐴀𐴡𐴙𐴕 𐴒𐴤𐴡𐴎𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴃 𐴵 𐴲 𐴎𐴡𐴕 𐴐𐴤𐴡𐴇𐴞𐴊 𐴇𐴥𐴝𐴐𐴉𐴝𐴃𐴝𐴓 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴝 𐴒𐴞𐴘𐴥𐴠 𐴱𐴱

𐴉𐴥𐴡𐴓𐴡𐴏𐴃𐴞𐴕𐴞 𐴒𐴤𐴡𐴎𐴧𐴝𐴌 𐴊𐴡𐴀𐴡𐴙𐴕 𐴀𐴥𐴞𐴏𐴧𐴝𐴃 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴃𐴤𐴝𐴙𐴑𐴧𐴤𐴙𐴠𐴊𐴠 𐴀𐴞𐴐𐴑𐴟𐴓 𐴀𐴠𐴑𐴧𐴤𐴝𐴕𐴡𐴌 𐴖𐴡𐴌𐴠 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴵 𐴲 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 , 𐴅𐴤𐴡𐴁𐴑𐴤𐴠 𐴒𐴤𐴡𐴎𐴧𐴝𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴊𐴡𐴌𐴥𐴡 𐴔𐴡𐴌𐴥𐴡 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴇𐴥𐴝𐴐𐴉𐴝𐴃𐴝𐴓 𐴀𐴥𐴡𐴑𐴧𐴡𐴓 𐴁𐴡𐴕 𐴀𐴥𐴡𐴘 𐴎𐴡𐴀𐴡𐴕𐴠 , 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴉𐴝𐴀𐴝 𐴀𐴥𐴟𐴊𐴧𐴝 𐴁𐴡𐴕 𐴀𐴥𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱