𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔𐴡𐴌 𐴖𐴡𐴌𐴠 𐴏𐴝𐴂𐴢 𐴀𐴝𐴌 𐴎𐴟𐴓𐴥𐴟𐴔 𐴉𐴥𐴞𐴃𐴞𐴕 𐴕𐴡 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴁𐴡𐴓𐴞 𐴀𐴠𐴕 𐴘𐴟 𐴅𐴞 𐴘𐴠 𐴈𐴡𐴘𐴧𐴥𐴠 𐴱𐴱

𐴔𐴡𐴒𐴢 ,𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴀𐴝𐴌𐴑𐴝𐴕𐴡𐴃 𐴀𐴝𐴏𐴥𐴠𐴊𐴠 𐴀𐴡𐴙𐴕𐴧𐴡 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴐𐴤𐴡𐴣𐴀𐴡 , 𐴒𐴟𐴣𐴍𐴝 𐴁𐴡𐴌𐴔𐴥𐴝𐴃 𐴀𐴝𐴏𐴥𐴠𐴊𐴠 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴉𐴥𐴞𐴃𐴞𐴕 𐴕𐴡 𐴀𐴥𐴡𐴀𐴡 𐴉𐴥𐴝𐴀𐴝𐴕 , 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴉𐴝𐴄𐴞 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑𐴡𐴃 𐴕𐴦𐴠𐴓𐴝𐴘𐴧𐴥𐴠𐴊𐴠 𐴀𐴠𐴓𐴝𐴕 𐴕𐴝𐴔𐴝𐴃 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴞𐴌 𐴶 𐴵 𐴀𐴡𐴔 𐴁𐴡𐴘𐴍𐴥𐴡𐴑𐴡𐴃 , 𐴔𐴝𐴐𐴄𐴡𐴌 / 𐴄𐴗𐴠𐴔 𐴀𐴠𐴕𐴋𐴡𐴌𐴟 𐴘𐴠 , 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴝𐴃𐴝 𐴁𐴠𐴐𐴤𐴞 𐴏𐴡𐴑𐴃𐴤𐴡 𐴈𐴝𐴔 𐴀𐴥𐴡𐴑𐴧𐴡𐴓 𐴒𐴡𐴌𐴥𐴝𐴁𐴤𐴝𐴌 , 𐴁𐴡𐴓𐴝𐴎𐴟𐴌𐴞 𐴕𐴞𐴎𐴡𐴌 𐴎𐴝𐴒𐴝𐴃𐴧𐴤𐴟 𐴓𐴦𐴡𐴌𐴝𐴘 𐴊𐴞𐴘𐴝 𐴎𐴝𐴀𐴝𐴌 , 𐴀𐴝𐴌 𐴀𐴝𐴌𐴑𐴝𐴕𐴡𐴃 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴇𐴥𐴝𐴓𐴡𐴃 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴁𐴡𐴐𐴤𐴡𐴃𐴞 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴧𐴠 𐴘𐴥𐴝𐴀𐴝𐴕 𐴀𐴥𐴡 𐴅𐴟𐴖𐴝𐴁𐴡𐴃 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴡𐴕𐴧𐴞𐴘𐴝𐴘 𐴒𐴡𐴌𐴥𐴞 𐴊𐴤𐴡𐴌𐴞 𐴓𐴡𐴘 𐴒𐴞𐴘𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴙𐴏𐴧𐴥𐴟𐴌 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴒𐴤𐴡𐴌𐴒𐴟𐴐𐴧𐴤𐴞𐴌 𐴓𐴧𐴡𐴘 𐴎𐴟𐴑𐴝𐴎𐴟𐴑 𐴕𐴥𐴝𐴘 𐴱𐴱

𐴅𐴟𐴕 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴎𐴝𐴚 𐴃𐴟𐴓𐴝 𐴉𐴝𐴌𐴝𐴌 𐴔𐴡𐴏𐴥𐴡𐴙𐴃𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴃𐴡𐴁𐴓𐴞𐴒𐴞 𐴅𐴡𐴔𐴦𐴝𐴃𐴡𐴌 𐴔𐴝𐴕𐴥𐴟𐴙𐴐𐴢 𐴸 𐴎𐴡𐴕 , 𐴀𐴝𐴌 𐴀𐴥𐴠 𐴉𐴝𐴌𐴝𐴌 𐴒𐴤𐴡𐴌𐴠 𐴒𐴤𐴡𐴌𐴠 𐴒𐴤𐴡𐴓𐴞 𐴊𐴤𐴡𐴙𐴅𐴧𐴙𐴠𐴊𐴠 𐴴 𐴱 𐴎𐴡𐴕 𐴔𐴟𐴄 𐴲 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴡𐴕𐴧𐴞𐴘𐴝𐴘 𐴒𐴡𐴌𐴥𐴞 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴓𐴡𐴘 𐴒𐴞𐴀𐴞𐴓 𐴒𐴤𐴡𐴘 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴰 𐴷 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴥𐴟𐴊𐴧𐴝 𐴀𐴝𐴏𐴥𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴃𐴡𐴚𐴁𐴝𐴊𐴞 𐴎𐴦𐴝𐴓𐴠𐴔 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴁𐴟𐴌𐴥𐴝 𐴉𐴟𐴖𐴝 𐴑𐴠𐴣𐴏𐴝 𐴉𐴦𐴡𐴕𐴝 𐴉𐴡𐴌𐴥𐴡𐴑 𐴒𐴡𐴌𐴥𐴝 𐴏𐴥𐴝𐴌𐴥𐴝 𐴎𐴝𐴌𐴥𐴠 𐴎𐴞𐴛𐴧𐴥𐴡𐴃 𐴓𐴦𐴡𐴃 𐴉𐴝𐴘𐴧𐴥𐴠 𐴊𐴤𐴡𐴌𐴞 𐴓𐴡𐴘 𐴎𐴝𐴀𐴝 𐴒𐴤𐴡𐴘 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴕 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴏𐴥𐴠𐴊𐴠 / 𐴏𐴥𐴡𐴘𐴧𐴡𐴊𐴟𐴓 𐴔𐴟𐴏𐴃𐴡𐴉𐴝𐴌 𐴁𐴡𐴖 𐴏𐴝𐴙𐴌 𐴉𐴟𐴖𐴝𐴌 𐴔𐴦𐴝𐴣 𐴉𐴝𐴣𐴏𐴀𐴡𐴔 𐴉𐴟𐴖𐴝𐴌 𐴇𐴥𐴝𐴔𐴞𐴓 𐴀𐴝𐴐𐴧𐴤𐴞𐴀𐴞𐴓 , 𐴉𐴟𐴖𐴝 𐴈𐴥𐴝𐴓𐴝𐴏𐴢 𐴀𐴥𐴡𐴘𐴁𐴤𐴝𐴌 𐴀𐴡𐴑𐴃𐴤𐴡𐴃 𐴕𐴞𐴎𐴡𐴌 𐴁𐴠𐴍𐴝 𐴒𐴤𐴡𐴌𐴡𐴃 𐴕𐴡 𐴃𐴤𐴝𐴑𐴤𐴡𐴕𐴠 , 𐴉𐴟𐴖𐴝 𐴈𐴥𐴝𐴓𐴝𐴏𐴢 𐴀𐴥𐴡𐴘𐴃𐴠 𐴓𐴝𐴒𐴠𐴊𐴠 𐴎𐴡𐴌𐴟𐴌𐴞 𐴏𐴥𐴝𐴏𐴝𐴔𐴝𐴕𐴡𐴌 𐴁𐴡𐴕𐴊𐴟𐴁𐴡𐴏𐴃𐴤𐴡 𐴄𐴤𐴞𐴑 𐴔𐴡𐴃𐴠 𐴀𐴥𐴡𐴘 𐴕𐴡 𐴉𐴝𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴝𐴓𐴧𐴝𐴇𐴌 𐴇𐴥𐴡𐴑𐴟𐴔𐴠 𐴏𐴝𐴙𐴌 𐴒𐴤𐴗𐴝 𐴉𐴟𐴖𐴝 𐴏𐴥𐴞𐴛𐴧𐴡𐴌 𐴒𐴡𐴌𐴥𐴞 𐴊𐴟𐴕𐴞𐴘𐴝𐴘𐴃𐴧𐴤𐴟 𐴉𐴥𐴟𐴌𐴝𐴘 𐴒𐴞𐴘𐴥𐴡𐴘 , 𐴁𐴦𐴝𐴊𐴠 𐴀𐴠𐴈𐴥𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴒𐴤𐴟𐴕𐴡𐴌 𐴇𐴥𐴝𐴓𐴡𐴃 𐴑𐴠𐴀𐴠𐴕 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴓𐴡𐴘 𐴁𐴤𐴡𐴓𐴧𐴝 𐴀𐴥𐴟𐴊𐴧𐴝 𐴕𐴥𐴝𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴝𐴕𐴥𐴟𐴙𐴐𐴢 𐴲 𐴲 𐴎𐴡𐴕 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴁𐴤𐴝𐴙𐴒𐴧𐴡 𐴁𐴤𐴝𐴓𐴝 𐴀𐴥𐴞𐴏𐴝𐴉𐴠 𐴳 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴊𐴤𐴝𐴘 𐴎𐴝𐴘 𐴒𐴤𐴡𐴘 𐴉𐴝𐴙𐴅𐴧𐴤𐴞𐴀𐴞𐴓 , 𐴀𐴥𐴞𐴃𐴤𐴝𐴌𐴝𐴌 𐴔𐴟𐴑𐴎𐴟𐴁𐴝𐴕𐴞 𐴔𐴡𐴎𐴞𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴁𐴡𐴑𐴧𐴝 𐴒𐴟𐴕𐴥𐴝 𐴔𐴡𐴏𐴥𐴡𐴙𐴃𐴡𐴌 𐴁𐴤𐴟𐴃𐴤𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴀𐴝𐴌 𐴀𐴥𐴝𐴣𐴎𐴡𐴙𐴕𐴧𐴝 𐴁𐴞𐴀𐴞𐴕𐴧𐴝 𐴌𐴝𐴙𐴃𐴠 𐴊𐴞𐴕𐴠 𐴓𐴟𐴖𐴥𐴝𐴌 𐴌𐴡𐴄 𐴀𐴝𐴌 𐴋𐴝𐴕𐴋𐴝 𐴓𐴡𐴘 𐴔𐴝𐴌𐴝𐴃 𐴃𐴤𐴝𐴑𐴤𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴡 𐴀𐴝𐴘 𐴏𐴞𐴌 𐴅𐴡𐴕𐴡𐴌𐴥𐴡𐴓 𐴏𐴥𐴠𐴒𐴠𐴄𐴠𐴌𐴞 𐴀𐴝𐴌 ( 𐴀𐴠 𐴀𐴝𐴌 𐴘𐴟 ) 𐴌 𐴋𐴝𐴘𐴌𐴠𐴄𐴤𐴝𐴌𐴡𐴌 𐴁𐴡𐴘𐴍𐴥𐴡𐴑 𐴱𐴱

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴌 𐴐𐴤𐴡𐴀𐴡𐴌 𐴅𐴞𐴊𐴧𐴤𐴝𐴃 𐴀𐴝𐴏𐴥𐴠𐴊𐴠 𐴀𐴡 𐴀𐴝𐴘 𐴏𐴞 𐴀𐴞𐴏𐴓𐴝𐴔𐴞 𐴃𐴡𐴕𐴎𐴞𐴔𐴡𐴌 𐴀𐴡𐴉𐴥𐴞𐴏𐴡𐴃 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 , ( 𐴀𐴠 𐴀𐴝𐴌 𐴘𐴟 ) 𐴀𐴝𐴌𐴑𐴝𐴕 𐴌𐴟𐴇𐴝𐴙𐴚𐴒𐴙𐴝 𐴘𐴟𐴕𐴞𐴀𐴥𐴡𐴕𐴡𐴌 𐴋𐴝𐴘𐴌𐴠𐴑𐴄𐴤𐴝𐴌 𐴐𐴤𐴡𐴣𐴀𐴡 𐴋𐴠𐴓𐴞𐴒𐴠𐴐𐴤𐴠𐴕 𐴀𐴝𐴌 ( 𐴀𐴡 𐴀𐴝𐴘 𐴏𐴞 ) 𐴃𐴡𐴕𐴎𐴞𐴔𐴡𐴌 𐴏𐴥𐴠𐴒𐴠𐴄𐴠𐴌𐴞 𐴓𐴡𐴘 𐴁𐴡𐴘𐴍𐴥𐴡𐴑 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴎𐴠 𐴁𐴡𐴘𐴍𐴥𐴡𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴤𐴟𐴏𐴞𐴊𐴤𐴡𐴚 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴑𐴞𐴘𐴝𐴔𐴡𐴃𐴡𐴌 𐴕𐴡𐴔𐴟𐴕𐴝 𐴒𐴟𐴎𐴡𐴌𐴞 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴇𐴥𐴝𐴓𐴡𐴃 𐴀𐴥𐴞𐴀𐴞𐴕 𐴀𐴝𐴌 𐴀𐴠𐴈𐴥𐴡𐴕 𐴔𐴡𐴚𐴋𐴤𐴟𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴒𐴟𐴎𐴡𐴌𐴠𐴌 𐴊𐴧𐴠 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 𐴁𐴠𐴐𐴤𐴞 𐴊𐴡𐴌𐴡𐴊 𐴀𐴝𐴌 𐴀𐴡𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴔𐴡𐴐𐴖𐴝𐴌𐴝 𐴏𐴡𐴙𐴓𐴧𐴥𐴙𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴔𐴟𐴄𐴝 𐴔𐴟𐴄𐴞 𐴀𐴝𐴌𐴑𐴝𐴕𐴡𐴃 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔 𐴐𐴤𐴡𐴣𐴀𐴡 𐴉𐴟𐴌𐴝 𐴌𐴟𐴇𐴝𐴙𐴚𐴒𐴙𐴝𐴌 𐴊𐴟𐴑𐴧𐴤𐴞𐴃𐴤𐴝 𐴇𐴥𐴝𐴓𐴡𐴃 , 𐴀𐴝𐴌 𐴀𐴥𐴞𐴃𐴝𐴌𐴝𐴌 𐴓𐴧𐴝 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠𐴊𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴑𐴤𐴟𐴓𐴞𐴘𐴡𐴌𐴥𐴠 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴑𐴡𐴐𐴔𐴞𐴌𐴡𐴃 𐴀𐴠𐴔𐴁𐴤𐴟𐴐𐴢 𐴁𐴡𐴀𐴡𐴘 𐴵 𐴎𐴡𐴕 𐴀𐴞𐴕𐴋𐴤𐴞𐴘𐴝𐴌 𐴉𐴥𐴡𐴗𐴏𐴢 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴅𐴡𐴔𐴧𐴥𐴟 𐴑𐴡𐴐𐴔𐴞𐴌𐴡𐴌 𐴇𐴥𐴡𐴑𐴟𐴔𐴡𐴃𐴞 𐴁𐴡𐴘𐴝𐴕 𐴔𐴡𐴎𐴞𐴕 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑𐴡𐴃 𐴅𐴡𐴔𐴧𐴥𐴟 𐴑𐴡𐴐𐴔𐴞𐴌𐴡𐴃 𐴐𐴟𐴁𐴤𐴝 𐴒𐴡𐴌𐴥𐴝 𐴎𐴝𐴀𐴝𐴊𐴠 𐴀𐴥𐴝𐴣𐴃𐴞𐴘𐴝𐴌𐴞 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 𐴉𐴝𐴎𐴝𐴌𐴡𐴌 𐴁𐴤𐴟𐴃𐴤𐴡𐴌𐴠 𐴀𐴠𐴔𐴁𐴤𐴟𐴐𐴢 𐴁𐴡𐴀𐴡𐴘 , 𐴀𐴞𐴕𐴋𐴤𐴞𐴘𐴝𐴌 𐴉𐴥𐴡𐴗𐴏𐴢 𐴁𐴤𐴡𐴌𐴝 𐴒𐴝𐴌𐴥𐴞 𐴀𐴠𐴑𐴧𐴤𐴝𐴕𐴡𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴉𐴥𐴡𐴗𐴏𐴢 𐴵 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴉𐴡𐴖𐴌𐴞 𐴃𐴡𐴖𐴌𐴠 𐴔𐴡𐴊𐴡𐴃 𐴉𐴡𐴣𐴀𐴡𐴏𐴞 𐴇𐴥𐴝𐴔𐴓𐴝 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴃𐴟𐴖𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴹 𐴸 𐴹 𐴱 𐴐𐴤𐴡𐴕 𐴀𐴥𐴡𐴘𐴃𐴠 𐴑𐴡𐴐𐴔𐴞𐴌𐴞 𐴀𐴥𐴝𐴣𐴃𐴞𐴘𐴝𐴌𐴞 𐴋𐴝𐴀𐴝𐴘 𐴘𐴠 𐴀𐴞𐴕𐴋𐴤𐴞𐴘𐴝 𐴇𐴥𐴡𐴑𐴟𐴔𐴡𐴃𐴡𐴌 𐴁𐴠𐴌𐴟𐴊𐴧𐴤𐴠 𐴑𐴝𐴌𐴖𐴝𐴘 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴔𐴡𐴕𐴃𐴡𐴌 𐴀𐴠 𐴁𐴡𐴏𐴥𐴡𐴌 𐴑𐴠𐴙𐴏𐴧𐴥𐴟 𐴈𐴡𐴔𐴞 𐴒𐴞𐴀𐴞𐴓 𐴒𐴤𐴡𐴘 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴡𐴌 𐴇𐴥𐴝𐴔𐴓𐴝𐴌 𐴏𐴥𐴡𐴁𐴡𐴁𐴠 𐴀𐴠𐴓𐴝𐴑𐴝𐴃 𐴉𐴥𐴡𐴏𐴝𐴊 𐴉𐴥𐴞𐴃𐴞𐴕 𐴁𐴝𐴌𐴥𐴞𐴁𐴤𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴒𐴤𐴡𐴎𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴈𐴡𐴀𐴠𐴑 𐴊𐴡𐴌𐴎𐴤𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴒𐴤𐴡𐴎𐴧𐴝𐴌 𐴈𐴝𐴕 𐴘𐴟𐴕𐴟𐴏𐴢 𐴀𐴠𐴓𐴝𐴑𐴝𐴃 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴕𐴋𐴤𐴝𐴌𐴠 𐴏𐴡𐴓𐴠𐴌 𐴊𐴧𐴠 𐴀𐴞𐴐𐴑𐴟𐴓 𐴎𐴞𐴘𐴥𐴝𐴕𐴡𐴃 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴝 𐴀𐴥𐴡𐴘𐴧𐴠𐴊𐴠 𐴐𐴤𐴡𐴃 𐴐𐴤𐴡𐴃 𐴉𐴥𐴡𐴓𐴡𐴏𐴃𐴞𐴕𐴞 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴧𐴤𐴙𐴠 , 𐴀𐴞𐴐𐴑𐴟𐴓 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴀𐴞𐴏𐴌𐴦𐴝𐴙𐴓𐴞 𐴉𐴥𐴡𐴗𐴏𐴡𐴌 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴹 𐴲 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 , 𐴁𐴦𐴠𐴐𐴢 𐴁𐴤𐴝𐴒𐴢 𐴉𐴟𐴖𐴝𐴙𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴁𐴡𐴓𐴞 , 𐴒𐴤𐴡𐴎𐴧𐴝𐴌 𐴇𐴥𐴡𐴑𐴟𐴔𐴡𐴃𐴞 𐴁𐴡𐴘𐴝𐴕𐴡𐴌 𐴎𐴡𐴌𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱