𐴔𐴡𐴚𐴋𐴤𐴟 𐴔𐴡𐴚𐴕𐴞 𐴉𐴝𐴌𐴝𐴌 𐴀𐴝𐴂𐴧𐴝𐴙𐴚 𐴁𐴡𐴖𐴋𐴝𐴌𐴡𐴌 𐴒𐴤𐴞𐴌𐴥𐴝𐴌 𐴁𐴝𐴀𐴝𐴌𐴠 𐴔𐴡𐴒𐴢 𐴁𐴝𐴒𐴞 𐴒𐴤𐴡𐴓𐴞 𐴓𐴟𐴖𐴝𐴘 𐴃𐴤𐴝𐴙𐴑𐴧𐴙𐴠 , 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 , 𐴔𐴡𐴚𐴕𐴞 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴉𐴝𐴌𐴝𐴌 𐴃𐴧𐴤𐴟 𐴐𐴤𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴂𐴥𐴠𐴕 𐴄𐴤𐴡 𐴂𐴡𐴌𐴝𐴚 𐴉𐴝𐴌𐴝𐴌 𐴃𐴧𐴤𐴟 𐴕𐴝𐴉𐴢 𐴊𐴙𐴡𐴙𐴅𐴧𐴙𐴝 𐴉𐴥𐴝𐴍𐴥𐴞 𐴘𐴡𐴌𐴥𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴵 𐴁𐴝𐴎𐴠 , 𐴔𐴡𐴚𐴕𐴞 𐴉𐴝𐴌𐴝𐴌 𐴀𐴝𐴂𐴧𐴝𐴙𐴚 𐴁𐴡𐴖𐴋𐴝𐴌𐴡𐴌 𐴒𐴤𐴞𐴌𐴥𐴝𐴌 𐴁𐴝𐴀𐴝𐴌𐴠 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴌 𐴎𐴦𐴡𐴣𐴓𐴡𐴌 𐴁𐴤𐴟𐴃𐴤𐴡𐴌𐴠 , 𐴰 𐴲 𐴎𐴡𐴕 𐴓𐴡𐴃𐴞 𐴔𐴡𐴒𐴢 𐴁𐴝𐴒𐴞 𐴓𐴟𐴖𐴝𐴘 𐴃𐴤𐴝𐴑𐴤𐴞 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴡𐴓𐴥𐴞 𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴊𐴞𐴕𐴡𐴌 𐴱 𐴱 𐴁𐴝𐴎𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴟𐴀𐴟𐴕𐴡𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴐𐴤𐴟𐴌𐴟 𐴒𐴡𐴌𐴥𐴞 𐴊𐴞𐴘𐴥𐴠 , 𐴊𐴞𐴕𐴡𐴌 𐴀𐴠𐴑 𐴁𐴝𐴎𐴠 𐴉𐴡𐴙𐴅𐴧𐴡𐴕𐴃𐴡 𐴓𐴝𐴌𐴥𐴝𐴘 𐴏𐴡𐴙𐴓𐴧𐴥𐴙𐴠 , 𐴊𐴟𐴕𐴥𐴞 𐴋𐴝𐴀𐴝𐴘𐴧𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴔𐴡𐴚𐴕𐴞 𐴉𐴝𐴌𐴝 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴋𐴡𐴌𐴠 𐴉𐴝𐴌𐴝 𐴏𐴥𐴝𐴌𐴥𐴞 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴀𐴥𐴠 𐴇𐴥𐴝𐴔𐴓𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴅𐴤𐴠𐴄 𐴓𐴝𐴌𐴥𐴝𐴘𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔 𐴊𐴟𐴖𐴥𐴝 𐴔𐴝𐴙𐴅𐴧𐴤𐴙𐴠𐴊𐴠 𐴘𐴥𐴡 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴘𐴥𐴝𐴀𐴝𐴌 𐴁𐴦𐴝𐴊𐴠 𐴔𐴥𐴟𐴌𐴥𐴟 𐴀𐴥𐴟 𐴌𐴥𐴠𐴑𐴧𐴤𐴗𐴝 (𐴀𐴥𐴠𐴃𐴝𐴓𐴞𐴘𐴝 𐴉𐴝𐴌𐴝) , 𐴏𐴝𐴙𐴌 𐴔𐴝𐴙𐴓 𐴀𐴝𐴌 𐴏𐴞𐴇𐴟 𐴆𐴤𐴗𐴥𐴠𐴕 𐴉𐴝𐴌𐴝𐴃 𐴔𐴝𐴎𐴤𐴠 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴅𐴤𐴠𐴄 𐴓𐴝𐴌𐴥𐴝𐴘𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔 𐴔𐴝𐴙𐴅𐴧𐴤𐴙𐴠 𐴁𐴡𐴓𐴞 , 𐴔𐴡𐴚𐴕𐴞 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴈𐴥𐴟𐴊 𐴑𐴟𐴐𐴢 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴀𐴟𐴑𐴤𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴔𐴝𐴘𐴧𐴝 𐴀𐴠𐴑 𐴎𐴡𐴕 𐴒𐴡𐴓𐴝𐴃 𐴉𐴥𐴝𐴣𐴐𐴞 𐴓𐴝𐴒𐴝𐴘 𐴈𐴥𐴟𐴊 𐴑𐴟𐴐𐴞 𐴒𐴡𐴌𐴥𐴞 𐴕𐴞𐴎𐴡𐴌𐴥𐴠 𐴕𐴞𐴎𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 , 𐴁𐴝𐴓𐴟 𐴈𐴥𐴝𐴓𐴞 𐴰 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 / 𐴀𐴠𐴙𐴆 – 𐴶 𐴴 𐴁𐴡𐴓𐴡𐴑𐴡𐴃 𐴒𐴤𐴡𐴄𐴡𐴕𐴝 𐴀𐴞𐴘𐴥𐴝𐴕 𐴀𐴥𐴡𐴘𐴧𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴒𐴤𐴡𐴄𐴡𐴕𐴝 𐴀𐴥𐴡𐴙𐴓𐴊𐴠 ! 𐴁𐴝𐴓𐴟 𐴈𐴥𐴝𐴓𐴞 𐴰 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠/𐴀𐴠𐴁𐴝𐴊𐴟𐴓𐴧𐴝𐴇𐴌 𐴎𐴤𐴞𐴀𐴞 / 𐴊𐴞𐴓 𐴑𐴝𐴀𐴞𐴏𐴢 𐴁𐴡𐴐𐴢 𐴴 𐴱 𐴁𐴡𐴏𐴥𐴡𐴌 , 𐴔𐴝𐴘𐴧𐴝 𐴀𐴞𐴁𐴤𐴝 𐴒𐴤𐴡𐴌𐴒𐴗𐴝 𐴈𐴡𐴙𐴅𐴧𐴙𐴝𐴃 𐴔𐴦𐴝𐴣 𐴁𐴝𐴉𐴢 𐴓𐴡𐴘 𐴌𐴝𐴒𐴢 𐴒𐴡𐴌𐴥𐴞 , 𐴒𐴡𐴓𐴝𐴃 𐴉𐴥𐴝𐴣𐴐𐴞 𐴊𐴞𐴀𐴞 𐴕𐴞𐴎𐴡𐴌𐴥𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴎𐴞𐴔𐴧𐴝𐴊𐴝𐴌 𐴀𐴡 𐴏𐴞 / 𐴐𐴤𐴡𐴔𐴞𐴔 𐴇𐴥𐴟𐴏𐴝𐴙𐴕𐴠 𐴒𐴤𐴡𐴄𐴡𐴕𐴝 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴤𐴝𐴐𐴡𐴕 𐴏𐴡𐴌𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴌𐴝 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴁𐴡𐴌𐴔𐴥𐴝 , 𐴀𐴝𐴌𐴑𐴝𐴕 , 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝𐴌 / 𐴇𐴝𐴉𐴠𐴎 𐴌𐴥𐴝𐴇𐴔𐴡𐴃𐴟𐴓𐴧𐴝𐴇𐴢 𐴁𐴝𐴉𐴢 𐴀𐴝𐴓𐴞 𐴅𐴟𐴇𐴥𐴝𐴌 , 𐴎𐴞𐴁𐴤𐴝 𐴁𐴤𐴝𐴐𐴡𐴕 𐴏𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠 , 𐴔𐴝𐴕𐴥𐴟𐴙𐴐𐴢 𐴀𐴞𐴁𐴤𐴝 𐴈𐴡𐴀𐴠𐴑 𐴊𐴞𐴕 𐴀𐴝𐴒𐴠 𐴑𐴠𐴀𐴠𐴔𐴡𐴌 𐴒𐴤𐴡𐴌𐴡𐴌 𐴃𐴧𐴟 𐴊𐴡𐴙𐴅𐴧𐴙𐴝𐴃 𐴔𐴝𐴏𐴢 𐴏𐴝𐴘𐴃𐴤𐴡 𐴒𐴞𐴘𐴠 , 𐴁𐴦𐴝𐴊𐴠 𐴖𐴝𐴉𐴠𐴏𐴢 𐴒𐴤𐴡𐴌𐴡𐴃 𐴉𐴥𐴞𐴌𐴞 𐴕𐴥𐴡 𐴀𐴝𐴘𐴧𐴥𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴁𐴝𐴚𐴓𐴝𐴊𐴠𐴐𐴤𐴞 𐴎𐴝𐴙𐴓𐴧𐴝 𐴈𐴡𐴊𐴦𐴟𐴕𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴈𐴝𐴣𐴏𐴝𐴃 𐴓𐴝𐴐𐴢 𐴀𐴟𐴒𐴧𐴤𐴗 𐴁𐴤𐴝𐴐𐴠𐴌 𐴊𐴧𐴠 𐴊𐴠𐴑𐴤𐴞 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴈𐴥𐴡𐴁𐴡𐴌 𐴎𐴝𐴕𐴝𐴘𐴧𐴥𐴠 , 𐴃𐴝𐴌 𐴉𐴡𐴌𐴠 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴇𐴥𐴡𐴑𐴟𐴔𐴡𐴃 𐴎𐴝𐴘 𐴓𐴝𐴐𐴢 𐴀𐴝𐴕𐴥𐴞 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞 𐴁𐴦𐴝𐴊𐴠 / 𐴔𐴡𐴌𐴝 𐴓𐴝𐴐𐴢 𐴀𐴥𐴞𐴁𐴤𐴝 / 𐴇𐴝𐴉𐴠𐴎𐴢 𐴌𐴥𐴝𐴇𐴔𐴡𐴃𐴟𐴓𐴧𐴝𐴇𐴢 𐴁𐴡𐴓𐴞 𐴏𐴞𐴕𐴧𐴡 𐴉𐴝𐴀𐴝 𐴒𐴞𐴘𐴥𐴠𐴊𐴠 𐴘𐴥𐴝𐴀𐴝𐴕 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴑𐴠𐴀𐴠𐴔𐴡𐴌 𐴃𐴧𐴟 𐴊𐴤𐴝𐴘 𐴒𐴞𐴘𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕𐴊𐴤𐴡𐴌 𐴁𐴝𐴉𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴐𐴤𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴁𐴝𐴏𐴥𐴞 𐴁𐴝𐴏𐴥𐴞 𐴑𐴠𐴙𐴏𐴧𐴥𐴟 𐴉𐴝𐴌𐴝𐴌 𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 , 𐴸 𐴱 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕 𐴈𐴡𐴊𐴦𐴟𐴕𐴡𐴌𐴥𐴠 , 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴡𐴃 𐴒𐴤𐴡𐴓𐴞 𐴈𐴝𐴔 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴁𐴡𐴓𐴝𐴎𐴟𐴌𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴘 𐴁𐴦𐴝𐴊𐴠 , 𐴀𐴥𐴞𐴃𐴝𐴌𐴥𐴝 𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴑𐴠𐴀𐴠𐴔𐴡𐴃 𐴒𐴤𐴡𐴓𐴝𐴘 𐴌𐴝𐴙𐴑𐴧𐴤𐴙𐴠 , 𐴃𐴡𐴀𐴡𐴘 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴋𐴡𐴌𐴠 𐴀𐴝𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 , 𐴎𐴠 𐴈𐴡𐴕𐴥𐴡 𐴑𐴟𐴐𐴤𐴡𐴓𐴠 𐴊𐴤𐴝𐴘 𐴒𐴞𐴘𐴥𐴠 𐴒𐴤𐴡𐴘 , 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞 𐴉𐴝𐴌𐴝𐴃 𐴀𐴝𐴀𐴝𐴘 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴡𐴌 𐴁𐴝𐴉𐴢 𐴔𐴦𐴝𐴣 𐴀𐴥𐴡𐴑𐴧𐴡𐴓𐴡𐴌𐴥𐴠 𐴊𐴤𐴡𐴌𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴈𐴥𐴡𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴥𐴞𐴃𐴝𐴌𐴥𐴝 𐴌𐴥𐴠 𐴈𐴡𐴀𐴡𐴌 𐴊𐴧𐴠 , 𐴃𐴟𐴣𐴖𐴥𐴝𐴣𐴌𐴝𐴌 𐴉𐴟𐴖𐴝𐴙𐴕 𐴇𐴥𐴝𐴎𐴞𐴌 𐴒𐴡𐴌𐴥𐴡 , 𐴕𐴡𐴀𐴡𐴘𐴓𐴥𐴠 𐴃𐴟𐴣𐴖𐴥𐴝𐴣𐴌𐴥𐴝 𐴌𐴥𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴟𐴔 𐴁𐴡𐴓𐴞 𐴈𐴡𐴀𐴡𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴀𐴥𐴞𐴃𐴤𐴝𐴌𐴥𐴝 𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴀𐴥𐴠 𐴊𐴞𐴕 𐴀𐴥𐴡𐴘𐴃𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞𐴌 𐴓𐴡𐴘 𐴔𐴞𐴓𐴃𐴡 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴁𐴡𐴌𐴔𐴥𐴝𐴌 𐴒𐴟𐴓𐴞 𐴘𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴊𐴡𐴐𐴢 𐴁𐴡𐴏𐴥𐴡𐴙𐴌𐴅𐴧𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃𐴢 𐴱𐴱

𐴁𐴡𐴌𐴔𐴥𐴝𐴌 𐴀𐴥𐴠𐴑𐴟𐴓𐴃𐴟 𐴔𐴝𐴙𐴅𐴧𐴤𐴙𐴠𐴊𐴠 𐴔𐴡𐴄𐴝 𐴆𐴠𐴀𐴠𐴓𐴡𐴌 𐴒𐴟𐴓𐴞 𐴉𐴡𐴌𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴥𐴠𐴑𐴟𐴓𐴠 𐴕𐴝𐴉𐴢 𐴊𐴡𐴙𐴅𐴧𐴙𐴝𐴃 𐴑𐴞𐴛𐴧𐴥𐴝𐴌𐴥𐴝 𐴃𐴟𐴖𐴝𐴌 𐴊𐴧𐴠 , 𐴊𐴡𐴐𐴢 𐴁𐴡𐴏𐴥𐴡𐴙𐴌𐴅𐴧𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴀𐴝𐴌 𐴊𐴟𐴘 𐴎𐴡𐴕 𐴋𐴡𐴣𐴀𐴡𐴌 𐴁𐴝𐴍𐴝𐴀𐴝𐴙𐴕 , 𐴔𐴟𐴄 𐴃𐴞𐴕 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴥𐴞𐴃𐴝𐴌𐴥𐴝 𐴌𐴥𐴠 𐴃𐴡𐴌𐴝𐴃𐴡𐴌𐴞 𐴇𐴥𐴝𐴐𐴉𐴝𐴃𐴝𐴓 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴀𐴝𐴊𐴤𐴝 𐴌𐴝𐴏𐴧𐴝𐴃 𐴊𐴡𐴐𐴢 𐴁𐴡𐴏𐴥𐴡𐴙𐴌𐴅𐴧𐴙𐴝 𐴉𐴟𐴖𐴝 𐴖𐴥𐴝 𐴔𐴡𐴌𐴞 𐴒𐴞𐴘𐴥𐴡𐴘 , 𐴀𐴡𐴙𐴕𐴧𐴡 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴊𐴝𐴁𐴝𐴘 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴊𐴝𐴁𐴝𐴘𐴌 𐴑𐴡𐴀𐴡𐴓𐴠𐴅𐴤𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴝 𐴒𐴞𐴘𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴀𐴞𐴕𐴋𐴟𐴕𐴞𐴆𐴤𐴙𐴝𐴃 𐴔𐴠𐴍𐴞 𐴁𐴤𐴝𐴚𐴞 𐴱 𐴱 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴎𐴤𐴡𐴌 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴔𐴡𐴌𐴑𐴡𐴎𐴞 𐴋𐴞𐴘𐴝 𐴏𐴟𐴓𐴝𐴖𐴞𐴏𐴞𐴃 𐴑𐴟𐴛𐴅𐴧𐴤𐴙𐴠𐴊𐴠 𐴁𐴠𐴀𐴝𐴙𐴕𐴞 𐴐𐴤𐴟𐴕𐴝𐴌 𐴈𐴥𐴡𐴕𐴞𐴌 𐴋𐴤𐴝𐴑𐴤𐴠 , 𐴉𐴝𐴀𐴝𐴌𐴡𐴌 𐴔𐴠𐴍𐴞 𐴁𐴤𐴝𐴚𐴞 𐴉𐴡𐴌𐴡𐴕𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴱 𐴱 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴵 𐴳 𐴎𐴡𐴕𐴡𐴌 𐴁𐴦𐴠𐴐𐴢 𐴔𐴝𐴕𐴥𐴟𐴙𐴐𐴢 𐴀𐴥𐴝𐴣𐴎𐴞 𐴒𐴞𐴘𐴥𐴡𐴘 𐴁𐴡𐴓𐴞 , 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴇𐴥𐴡𐴑𐴟𐴔𐴡𐴃𐴞 𐴈𐴥𐴡𐴁𐴡𐴌𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱