𐴔𐴡𐴚𐴋𐴤𐴟 𐴀𐴥𐴠𐴃𐴞𐴓𐴧𐴝 𐴉𐴝𐴌𐴝𐴃 𐴀𐴞𐴏𐴝 𐴔𐴝𐴏𐴥𐴡𐴌 𐴒𐴟𐴊𐴤𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴝𐴣𐴌𐴝𐴘𐴧𐴥𐴠𐴊𐴠 𐴔𐴝𐴀𐴝𐴙𐴕 𐴉𐴥𐴟𐴍𐴞 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕𐴡𐴌 𐴄𐴤𐴠𐴚 𐴀𐴠𐴑𐴧𐴤𐴝𐴕 𐴀𐴠𐴑𐴧𐴤𐴝𐴕 𐴏𐴥𐴞𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴓𐴥𐴝𐴏𐴝 𐴌𐴥𐴠𐴑𐴧𐴤𐴗𐴝 𐴀𐴝𐴂𐴧𐴝𐴙𐴚 𐴀𐴥𐴞𐴃𐴞𐴓𐴧𐴝 𐴉𐴝𐴌𐴝- 𐴐𐴗𐴠 𐴎𐴤𐴝 𐴌𐴥𐴠 𐴔𐴞𐴓𐴝𐴘𐴧𐴥𐴠𐴊𐴠 , 𐴉𐴟𐴓𐴡𐴌 𐴋𐴤𐴝𐴑𐴠 𐴀𐴝𐴏𐴥𐴠𐴊𐴠/ 𐴀𐴞𐴔𐴝𐴕 𐴇𐴥𐴟𐴏𐴡𐴕𐴡𐴌 𐴀𐴞𐴏𐴝 𐴔𐴝𐴏𐴥𐴡𐴌 𐴒𐴟𐴊𐴤𐴝𐴌 𐴈𐴝𐴣𐴏𐴝 𐴓𐴡𐴘 , 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴝𐴣𐴌𐴝𐴘𐴧𐴥𐴠𐴊𐴠 𐴔𐴝𐴀𐴝𐴙𐴕 𐴁𐴟𐴔𐴡𐴃 𐴀𐴥𐴟𐴣𐴌𐴝𐴕 𐴉𐴡𐴌𐴡𐴕𐴠 , 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴵 𐴱 : 𐴸 𐴁𐴝𐴎𐴠 , 𐴔𐴝𐴏𐴢 𐴏𐴝𐴘 𐴁𐴤𐴡𐴓𐴧𐴝 𐴒𐴞𐴘𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕𐴡𐴌 𐴄𐴤𐴠𐴚 𐴀𐴠𐴑𐴧𐴤𐴝𐴕 𐴀𐴠𐴑𐴧𐴤𐴝𐴕 𐴏𐴥𐴞𐴌𐴞 𐴒𐴞𐴘𐴥𐴡𐴘𐴊𐴠 𐴁𐴦𐴝𐴊𐴠 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴀𐴝𐴒𐴤𐴝𐴃 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴀𐴝𐴒𐴤𐴝𐴃 𐴉𐴝𐴘𐴧𐴥𐴠𐴊𐴠 𐴀𐴥𐴞𐴃𐴝𐴌𐴥𐴝 𐴀𐴥𐴡𐴙𐴓𐴊𐴠 𐴔𐴡𐴚𐴋𐴤𐴟 𐴀𐴝𐴓𐴞 𐴉𐴝𐴌𐴝𐴌 𐴁𐴤𐴝𐴐𐴞 𐴀𐴞𐴏𐴝 𐴔𐴝𐴏𐴥𐴡𐴌 𐴒𐴟𐴊𐴤𐴝𐴌 𐴒𐴞𐴌𐴥𐴡𐴏𐴢 / 𐴀𐴥𐴟 𐴀𐴞𐴔𐴝𐴕 𐴇𐴥𐴟𐴏𐴡𐴕𐴌 𐴐𐴤𐴡𐴣𐴍𐴡 𐴁𐴤𐴝𐴘 𐴀𐴠𐴑 𐴎𐴡𐴕 𐴀𐴝𐴌 𐴀𐴞𐴔𐴝𐴕 𐴇𐴥𐴟𐴏𐴡𐴕𐴡𐴌 𐴇𐴥𐴝𐴣𐴓𐴝 / 𐴀𐴞𐴁𐴌𐴝𐴇𐴥𐴞𐴔 , 𐴀𐴞𐴃𐴝𐴌𐴥𐴝 𐴊𐴟𐴕𐴥𐴞 𐴎𐴡𐴕 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴎𐴡𐴈𐴥𐴡𐴔 𐴀𐴡𐴓𐴝 𐴀𐴥𐴡𐴑𐴧𐴡𐴓 𐴀𐴠𐴓𐴝𐴅 𐴒𐴡𐴌𐴥𐴞𐴁𐴤𐴡𐴓𐴧𐴝 𐴒𐴡𐴃𐴡 𐴈𐴝𐴓𐴞𐴘𐴝 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 , 𐴁𐴝𐴚𐴓𐴝𐴊𐴠𐴐𐴢 𐴄𐴠𐴑𐴕𐴝𐴉𐴡𐴃 𐴳 𐴁𐴝𐴌 𐴓𐴡𐴃𐴞 𐴒𐴞𐴘𐴥𐴠 , 𐴔𐴡𐴕𐴃𐴡𐴌 𐴉𐴡𐴃𐴧𐴞 𐴁𐴝𐴌𐴡𐴃 𐴁𐴝𐴚𐴓𐴝𐴊𐴠𐴐𐴤𐴡𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴠 𐴕𐴡 𐴒𐴡𐴏𐴥𐴞 𐴖𐴝𐴉𐴠𐴏𐴢 𐴒𐴡𐴌𐴥𐴞 𐴊𐴞𐴘𐴥𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴠𐴑 𐴎𐴡𐴕𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 , 𐴀𐴞𐴀𐴞𐴕 𐴁𐴦𐴝𐴊𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴏𐴥𐴡 𐴃𐴝𐴌𐴥𐴞𐴑𐴡𐴃 𐴎𐴦𐴟𐴣𐴌𐴡𐴌 𐴁𐴦𐴝𐴊𐴠 𐴀𐴝𐴕𐴃𐴝𐴎𐴠 𐴳 𐴁𐴝𐴎𐴠 , 𐴐𐴗𐴠 𐴎𐴤𐴝 𐴉𐴝𐴌𐴝𐴃 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴃𐴤𐴝𐴙𐴑𐴧𐴤𐴙𐴠 𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴔𐴝𐴙𐴅𐴧𐴤𐴙𐴠𐴊𐴠 𐴒𐴟𐴓𐴞𐴌 𐴏𐴥𐴡𐴌𐴈𐴝 𐴉𐴡𐴌𐴞 , 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴡𐴌 𐴋𐴟𐴣𐴖𐴥𐴝𐴣𐴃 𐴀𐴝𐴒𐴤𐴝𐴃 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴀𐴟𐴑𐴞𐴓 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴙𐴅𐴧𐴤𐴙𐴠𐴊𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴞 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 , 𐴲 𐴱 𐴎𐴡𐴕𐴡𐴌 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴝𐴂𐴧𐴝𐴙𐴚 𐴀𐴟𐴑𐴞𐴓 𐴉𐴝𐴌𐴝𐴌 𐴔𐴡𐴏𐴥𐴡𐴙𐴃𐴡𐴌 𐴋𐴤𐴝𐴑𐴤𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌𐴡𐴃 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴀𐴥𐴝𐴣𐴎𐴡𐴙𐴕𐴧𐴝 𐴀𐴝𐴕𐴃𐴝𐴎𐴠 𐴰 𐴳 : 𐴳 𐴁𐴝𐴎𐴠 , 𐴓𐴝𐴌𐴥𐴝𐴘 𐴏𐴥𐴝𐴌𐴥𐴝 𐴎𐴝𐴕𐴞 𐴉𐴥𐴟𐴕𐴞 𐴏𐴝𐴀𐴝𐴘 𐴏𐴞𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴑 𐴁𐴡𐴓𐴞 𐴈𐴡𐴀𐴡𐴘 𐴔𐴝𐴙𐴅𐴧𐴤𐴙𐴠 𐴊𐴠 , 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴒𐴟𐴓𐴝 𐴀𐴟𐴒𐴧𐴤𐴗𐴝 𐴉𐴡𐴌𐴞 𐴉𐴥𐴟𐴍𐴞𐴘𐴡𐴌𐴥𐴠 , 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴲 𐴱 𐴎𐴡𐴕𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴔𐴝𐴘𐴧𐴝 𐴃𐴞𐴕 𐴎𐴡𐴕𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴥𐴝 𐴀𐴝𐴌 𐴋𐴡𐴌𐴟𐴕 𐴁𐴟𐴔 𐴔𐴝𐴌𐴥𐴝 , 𐴀𐴞𐴀𐴞𐴕𐴡𐴌 𐴎𐴡𐴌𐴞𐴘𐴝 𐴉𐴡𐴙𐴃𐴧𐴡 𐴊𐴞𐴕 𐴓𐴝𐴒𐴝𐴃𐴝𐴌 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕 𐴁𐴠𐴍𐴝𐴀𐴝𐴙𐴕 𐴁𐴠𐴍𐴞𐴀𐴝𐴙𐴕 𐴔𐴡𐴌𐴝𐴃 𐴀𐴝𐴏𐴥𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴟𐴀𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴌 𐴉𐴥𐴡𐴘𐴧𐴝𐴎𐴞 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴐𐴤𐴡𐴇𐴞𐴊 𐴀𐴝𐴌 𐴑𐴠𐴙𐴏𐴧𐴥𐴟 𐴒𐴤𐴝𐴙𐴓 𐴒𐴡𐴙𐴅𐴧𐴤𐴙𐴠 𐴱𐴱


𐴁𐴡𐴌𐴔𐴥𐴝 , 𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴀𐴝𐴏𐴥𐴠𐴊𐴠 𐴊𐴠𐴐𐴢 𐴁𐴡𐴘𐴊𐴞𐴐𐴢 𐴓𐴡𐴘 𐴃𐴦𐴝𐴓𐴧𐴟𐴑 𐴒𐴡𐴌𐴥𐴞𐴃𐴤𐴡𐴊𐴠 𐴉𐴟𐴌𐴝𐴕 𐴎𐴝𐴣𐴀𐴝𐴏𐴢 𐴒𐴤𐴝𐴣𐴍𐴝𐴌 𐴎𐴞𐴔𐴧𐴝 𐴓𐴡𐴘 𐴀𐴝𐴏𐴥𐴠𐴊𐴠 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌 𐴒𐴤𐴝𐴣𐴄𐴤𐴞𐴃 , 𐴔𐴡𐴒𐴢 𐴁𐴝𐴒𐴞 𐴘𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑𐴧𐴙𐴝 𐴊𐴦𐴟𐴛𐴅𐴧𐴙𐴝 𐴲 𐴱 𐴁𐴝𐴎𐴠 𐴋𐴡𐴣𐴀𐴡𐴌 𐴋𐴡𐴣𐴀𐴡𐴌 𐴇𐴥𐴝𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴙𐴅𐴧𐴤𐴙𐴠 , 𐴔𐴝𐴙𐴅𐴧𐴤𐴙𐴠 𐴊𐴤𐴠 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴄𐴤𐴞𐴑 𐴎𐴝𐴒𐴝𐴃 𐴕𐴡 𐴉𐴡𐴌𐴞 𐴁𐴦𐴠𐴐𐴢 𐴁𐴤𐴝𐴑 𐴀𐴥𐴝𐴣𐴃𐴞𐴘𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴃𐴤𐴝𐴑𐴤𐴠𐴊𐴠 𐴎𐴝𐴒𐴝𐴃 𐴉𐴡𐴙𐴅𐴧𐴤𐴙𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴟𐴒𐴧𐴤𐴗𐴝 𐴉𐴥𐴡𐴘𐴧𐴝𐴎𐴞 𐴉𐴝𐴌𐴝𐴃 𐴌𐴟𐴇𐴝𐴙𐴚𐴒𐴙𐴝𐴌 𐴒𐴤𐴡𐴌 𐴀𐴠𐴑𐴧𐴤𐴝𐴕𐴡𐴃 𐴉𐴡𐴌𐴞 , 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 𐴳 𐴱 𐴁𐴡𐴏𐴥𐴡𐴌𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴐𐴤𐴡𐴇𐴞𐴊 𐴀𐴡𐴘𐴧𐴠 𐴀𐴝𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴑𐴠𐴀𐴠𐴔𐴡𐴌 𐴀𐴡𐴉𐴥𐴡𐴌𐴝𐴊 𐴁𐴠𐴐𐴤𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴑𐴡𐴕𐴄𐴡𐴌𐴟𐴓 𐴒𐴡𐴌𐴥𐴞𐴁𐴤𐴡 𐴈𐴡𐴘𐴧𐴥𐴠 : 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴢 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴓𐴝𐴃𐴧𐴝𐴃 𐴀𐴥𐴟𐴀𐴝𐴃 𐴀𐴝𐴏𐴥𐴠𐴊𐴠 𐴀𐴡𐴉𐴥𐴡𐴌𐴝𐴊 𐴀𐴥𐴡𐴑𐴧𐴡𐴓𐴡 𐴌𐴥𐴠 , 𐴊𐴡𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌 𐴀𐴥𐴡 𐴁𐴠𐴐𐴤𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴎𐴝𐴘𐴁𐴡 𐴁𐴡𐴓𐴞 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴠𐴀𐴠𐴔𐴡𐴃 𐴀𐴥𐴡𐴀𐴡𐴌 𐴊𐴧𐴠 𐴈𐴥𐴟𐴕 𐴈𐴥𐴡𐴌𐴝𐴁𐴤𐴝 𐴌𐴥𐴠 𐴁𐴡𐴕 𐴒𐴡𐴌𐴥𐴝 𐴀𐴝𐴌 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴀𐴝𐴙𐴕𐴡𐴌 𐴁𐴠𐴌𐴟𐴊𐴧𐴤𐴞𐴃𐴤𐴝 𐴀𐴝𐴏𐴥𐴠 𐴁𐴠𐴒𐴧𐴤𐴞𐴕 𐴊𐴡𐴁𐴡𐴕 𐴒𐴡𐴌𐴥𐴞𐴁𐴤𐴝𐴌 𐴁𐴝𐴁𐴡𐴃𐴠 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴉𐴝𐴀𐴝𐴌𐴝𐴊𐴝𐴌𐴞 𐴀𐴝𐴌 𐴕𐴡𐴎𐴡𐴌𐴊𐴝𐴌𐴞 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴁𐴝𐴌𐴥𐴝𐴘 𐴊𐴞𐴘𐴝 𐴒𐴞𐴘𐴥𐴠 𐴁𐴡𐴓𐴞 , 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴀𐴝𐴘 𐴅𐴞 𐴂𐴞 / 𐴏𐴡𐴓𐴞𐴔 𐴔𐴟𐴇𐴝𐴔𐴧𐴡𐴊 𐴅𐴝𐴇𐴝𐴕𐴒𐴞𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝𐴃 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴐𐴑𐴟𐴓𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴇𐴥𐴝𐴔𐴓𐴝𐴃 𐴶 𐴱 𐴎𐴡𐴕 𐴐𐴤𐴡𐴇𐴞𐴊𐴢 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴒𐴤𐴡𐴎𐴧𐴝𐴃 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴕𐴋𐴤𐴝𐴌𐴠 𐴏𐴡𐴓𐴠𐴌 𐴊𐴧𐴠 𐴀𐴞𐴐𐴑𐴟𐴓 , 𐴎𐴞𐴘𐴥𐴝𐴕𐴡𐴃 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴒𐴤𐴡𐴌 𐴏𐴥𐴝𐴌𐴥𐴝 𐴃𐴤𐴡𐴌 𐴏𐴥𐴝𐴌𐴥𐴝 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 , 𐴀𐴞𐴐𐴑𐴟𐴓 𐴘𐴥𐴝𐴀𐴝𐴕𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴶 𐴱 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 𐴀𐴥𐴡𐴘𐴧𐴠 𐴁𐴡𐴓𐴞 , 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴡𐴌 𐴓𐴝𐴌𐴥𐴝𐴘𐴁𐴤𐴝𐴎 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴥𐴟𐴀𐴟𐴕 𐴁𐴦𐴝𐴊𐴠 𐴀𐴝𐴌𐴀𐴥𐴡 𐴰 𐴵 𐴎𐴡𐴕 𐴓𐴡𐴃𐴞 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴔𐴝𐴕𐴥𐴟𐴙𐴐𐴢 𐴀𐴞𐴐𐴑𐴟𐴓 𐴘𐴥𐴝𐴀𐴝𐴕𐴡𐴌 𐴃𐴧𐴟 , 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴌 𐴁𐴦𐴝𐴊𐴠 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴓𐴡𐴘 𐴒𐴞𐴘𐴥𐴠 𐴁𐴡𐴓𐴞 , 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴡𐴌 𐴓𐴝𐴌𐴥𐴝𐴘𐴁𐴤𐴝𐴎 𐴀𐴥𐴡𐴑𐴧𐴡𐴓𐴡𐴌 𐴀𐴝𐴕𐴋𐴤𐴝𐴌𐴠 𐴀𐴝𐴏𐴥𐴠𐴊𐴠 𐴒𐴤𐴡𐴎𐴧𐴝𐴌 𐴏𐴠𐴇𐴥𐴠𐴃𐴡𐴌 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴃𐴡𐴌𐴉𐴥𐴡𐴌 𐴃𐴧𐴟 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴌𐴝 𐴀𐴝𐴌 𐴀𐴝𐴒𐴤𐴝𐴃 𐴉𐴝𐴘𐴧𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴁𐴦𐴠𐴐𐴢 𐴁𐴤𐴝𐴑 𐴉𐴟𐴖𐴝𐴙𐴕 𐴀𐴝𐴌 𐴁𐴟𐴌𐴥𐴝 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴊𐴠 𐴘𐴥𐴝𐴀𐴝𐴕 𐴀𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴞𐴏𐴓𐴝𐴔𐴞 𐴁𐴡𐴏𐴥𐴡𐴌𐴡𐴌 𐴐𐴤𐴟𐴌𐴟𐴃 𐴑𐴝𐴁𐴤𐴝 𐴐𐴤𐴡𐴌𐴞𐴉𐴡𐴌 𐴒𐴞𐴓𐴝𐴉𐴢 𐴁𐴡𐴊𐴡𐴓𐴞 𐴊𐴞𐴘𐴝 𐴒𐴞𐴘𐴥𐴠 𐴱𐴱

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴃 𐴕𐴟𐴖𐴝 𐴀𐴞𐴏𐴓𐴝𐴔𐴞 𐴁𐴡𐴏𐴥𐴡𐴌 𐴐𐴤𐴟𐴌𐴟 𐴀𐴥𐴡𐴀𐴡𐴕𐴡𐴌 𐴓𐴡𐴒𐴠 𐴓𐴡𐴒𐴠 𐴉𐴡𐴃𐴧𐴞 𐴁𐴡𐴏𐴥𐴡𐴌 𐴁𐴡𐴊𐴡𐴓𐴠𐴊𐴠 𐴀𐴥𐴠𐴕𐴋𐴞𐴓𐴧𐴝

𐴀𐴠 𐴁𐴡𐴏𐴥𐴡𐴌 𐴀𐴥𐴡 , 𐴔𐴟𐴇𐴝𐴌𐴧𐴡𐴔 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴶 𐴴 𐴴 𐴱 𐴇𐴥𐴞𐴅𐴞𐴌𐴞 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴴 𐴲 𐴰 𐴲 𐴀𐴞𐴚𐴌𐴝𐴎𐴞 , 𐴀𐴝𐴐𐴤𐴝𐴌 𐴔𐴝𐴐𐴤𐴡𐴌 𐴳 𐴲 𐴃𐴝𐴌𐴥𐴞𐴑 𐴶 𐴳 𐴲 𐴱 𐴌𐴟𐴇𐴝𐴙𐴚𐴒𐴙𐴝 , 𐴌𐴦𐴡𐴘 𐴁𐴝𐴌𐴠 , 𐴔𐴡𐴑𐴧𐴝 𐴔𐴟𐴑𐴡𐴌𐴧𐴡𐴔𐴝𐴃 𐴀𐴝𐴏𐴥𐴠𐴊𐴠 ( 𐴑𐴝𐴁𐴤𐴝 𐴐𐴤𐴡𐴌𐴞𐴉𐴢 ) 𐴀𐴝𐴓𐴧𐴝𐴇𐴌 𐴒𐴤𐴡𐴌𐴡𐴌 𐴒𐴞𐴓𐴝𐴉𐴢 𐴁𐴡𐴊𐴡𐴓𐴞 𐴊𐴞𐴘𐴝 𐴒𐴞𐴘𐴥𐴠 , 𐴒𐴞𐴓𐴝𐴉𐴢 𐴘𐴥𐴝𐴀𐴝𐴕𐴡𐴌 𐴀𐴟𐴎𐴤𐴡𐴕 𐴰 𐴵 𐴳 𐴱 𐴑𐴞𐴓𐴥𐴟 , 𐴒𐴞𐴓𐴝𐴉𐴢 𐴁𐴝𐴕𐴡𐴕𐴡𐴃 𐴉𐴥𐴟𐴃𐴝 𐴁𐴦𐴝𐴊𐴠 𐴰 𐴲 𐴱 𐴑𐴞𐴓𐴥𐴟 𐴐𐴤𐴟𐴕𐴝 , 𐴰 𐴰 𐴱 𐴑𐴞𐴓𐴥𐴟 𐴌𐴟𐴉𐴝 , 𐴰 𐴰 𐴰 𐴱 𐴑𐴞𐴓𐴥𐴟 𐴌𐴠𐴐𐴤𐴡𐴔 𐴀𐴠𐴏𐴃𐴠𐴔𐴝𐴓 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴒𐴞𐴓𐴝𐴉𐴢 𐴘𐴥𐴝𐴀𐴝𐴕𐴡𐴌𐴥𐴠 𐴵 𐴄𐴟𐴑𐴍𐴝 𐴒𐴡𐴌𐴥𐴞 𐴁𐴝𐴕𐴝 𐴒𐴞𐴘𐴥𐴠 , 𐴏𐴝𐴙𐴌 𐴋𐴤𐴝𐴑𐴤𐴡𐴌 𐴓𐴧𐴝 𐴏𐴝𐴙𐴌 𐴒𐴤𐴝𐴕 𐴑𐴝𐴁𐴤𐴝 𐴐𐴤𐴡𐴌𐴞𐴉𐴡𐴌 𐴊𐴡𐴌𐴡𐴎𐴝𐴌 𐴓𐴧𐴥𐴝 𐴀𐴠𐴑𐴧𐴤𐴝𐴕 , 𐴀𐴝𐴌 𐴒𐴞𐴓𐴝𐴉𐴢 𐴘𐴥𐴝𐴀𐴝𐴕 𐴁𐴝𐴕𐴡𐴕𐴡𐴃 𐴀𐴝𐴌 𐴑𐴝𐴁𐴤𐴝 𐴐𐴤𐴡𐴌𐴞𐴉𐴥𐴡𐴌 𐴖𐴡𐴌𐴠 𐴒𐴤𐴟𐴌𐴞 𐴊𐴡𐴀𐴡𐴕𐴡𐴃 𐴹 𐴵 𐴱 𐴎𐴡𐴕 𐴁𐴠𐴐𐴤𐴞 𐴈𐴝𐴁𐴞𐴓 𐴁𐴝𐴌𐴥𐴞𐴑 𐴏𐴡𐴀𐴟𐴊𐴞 𐴀𐴞𐴕𐴅𐴞𐴕𐴥𐴝𐴌𐴠 𐴈𐴝𐴔 𐴒𐴡𐴌𐴥𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠𐴱𐴱