𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟𐴃 𐴔𐴝𐴓𐴡𐴌 𐴊𐴝𐴔 𐴁𐴝𐴌𐴥𐴝𐴃 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴓𐴝𐴌𐴥𐴝𐴘 𐴀𐴥𐴡𐴘 𐴁𐴦𐴝𐴊𐴠 , 𐴔𐴠𐴓𐴠𐴄𐴠𐴌𐴞 𐴘𐴠 𐴉𐴥𐴟𐴖𐴝𐴕𐴝𐴌 𐴌𐴝𐴏𐴧𐴝 , 𐴉𐴝𐴕𐴥𐴞𐴌 𐴌𐴝𐴏𐴧𐴝 𐴁𐴠𐴒𐴧𐴤𐴞𐴕 𐴁𐴡𐴕 𐴒𐴡𐴌𐴥𐴞 𐴊𐴡𐴀𐴡𐴕𐴠 , 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴈𐴥𐴝𐴘𐴁𐴝𐴌 𐴔𐴝𐴓 𐴏𐴥𐴝𐴔𐴝𐴕𐴡𐴌 𐴊𐴝𐴔 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴝𐴌𐴥𐴞 𐴎𐴝𐴀𐴝𐴌𐴥𐴠 𐴀𐴝𐴌𐴑𐴝𐴕𐴡𐴌 𐴔𐴝𐴙𐴕𐴐𐴤𐴙𐴠 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴀𐴥𐴡𐴘𐴧𐴥𐴠 𐴁𐴡𐴓𐴞 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟𐴃 𐴀𐴞𐴕𐴅𐴞𐴓𐴡𐴌 𐴃𐴠𐴓 , 𐴈𐴥𐴝𐴘𐴁𐴝𐴌 𐴃𐴠𐴓 , 𐴉𐴥𐴟𐴖𐴝𐴕𐴝 𐴔𐴝𐴏𐴢 , 𐴉𐴥𐴟𐴖𐴝𐴕𐴝 𐴔𐴡𐴌𐴞𐴏𐴢 , 𐴏𐴡𐴙𐴓 , 𐴀𐴝𐴕𐴋𐴝 , 𐴃𐴡𐴃𐴡𐴌𐴈𐴝𐴌𐴞 𐴐𐴤𐴡𐴣𐴀𐴡 𐴔𐴟𐴓 𐴈𐴥𐴝𐴘𐴁𐴝𐴌 𐴔𐴝𐴓 𐴏𐴥𐴝𐴔𐴝𐴕𐴡𐴌 𐴊𐴝𐴔 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴘𐴥𐴝𐴀𐴝𐴕 𐴁𐴦𐴝𐴊𐴠 𐴑𐴠𐴙𐴏𐴧𐴥𐴟 𐴏𐴞𐴏𐴢 𐴉𐴝𐴀𐴝 𐴀𐴥𐴟𐴊𐴧𐴝 𐴕𐴡 𐴎𐴝𐴀𐴝𐴌 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴁𐴧𐴠𐴌𐴠 𐴈𐴡𐴔𐴡𐴃 𐴏𐴡𐴙𐴓 𐴀𐴠𐴑 𐴁𐴡𐴏𐴃𐴤𐴝𐴌 𐴊𐴝𐴔 / 𐴰 𐴰 𐴰 𐴰 𐴵 𐴱 𐴄𐴞𐴛𐴝 , 𐴑𐴟𐴌𐴥𐴝𐴌 𐴀𐴝𐴕𐴋𐴝 𐴀𐴟𐴒𐴧𐴤𐴗𐴝𐴌 𐴊𐴝𐴔 / 𐴰 𐴰 𐴰 𐴱 𐴄𐴞𐴛𐴝 , 𐴉𐴞𐴛𐴝𐴏𐴢 𐴀𐴠𐴑 𐴁𐴞𐴏𐴧𐴥𐴝𐴌 𐴊𐴝𐴔 / 𐴰 𐴰 𐴰 𐴵 𐴱 𐴄𐴞𐴛𐴝 , 𐴃𐴠𐴓 ( 𐴵 ) 𐴓𐴞𐴄𐴤𐴝𐴌𐴞 𐴒𐴝𐴓𐴥𐴠𐴕 𐴀𐴟𐴒𐴧𐴤𐴗𐴝𐴌 𐴊𐴝𐴔 / 𐴰 𐴰 𐴰 𐴰 𐴵 𐴄𐴞𐴛𐴝 𐴓𐴡𐴃𐴞 𐴁𐴝𐴌𐴥𐴝 𐴊𐴝𐴔 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴡𐴃𐴤𐴝 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴡𐴌 𐴀𐴡𐴙𐴕𐴧𐴡 𐴋𐴤𐴝𐴑𐴡𐴌 𐴃𐴧𐴟 𐴀𐴝𐴘𐴧𐴥𐴠𐴊𐴠 𐴊𐴝𐴁𐴝𐴘 𐴀𐴥𐴡𐴑𐴧𐴡𐴓 𐴀𐴝𐴌 𐴉𐴟𐴖𐴝𐴙𐴕𐴊𐴤𐴡𐴌 𐴈𐴥𐴝𐴕𐴝𐴌 𐴊𐴟𐴊 𐴀𐴥𐴡𐴑𐴧𐴡𐴓 𐴀𐴝𐴀𐴝 𐴀𐴠𐴁𐴧𐴠𐴌𐴠 𐴁𐴡𐴕 𐴀𐴥𐴡𐴘 𐴎𐴡𐴀𐴡𐴕𐴠 , 𐴑𐴞𐴕𐴞 𐴓𐴡𐴘 𐴁𐴡𐴓𐴧𐴥𐴝 𐴀𐴥𐴟𐴊𐴧𐴝 𐴉𐴝𐴀𐴝 𐴕𐴡 𐴎𐴝𐴀𐴝𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴒𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴃𐴧𐴟 𐴉𐴝𐴌𐴥𐴝𐴘𐴃𐴤𐴡 𐴊𐴠 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴀𐴥𐴡 , 𐴀𐴠𐴈𐴥𐴡𐴕 𐴓𐴝𐴌𐴥𐴝𐴘𐴌 𐴎𐴟𐴌 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴕𐴡 𐴉𐴝𐴌𐴥𐴝𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴡𐴕 𐴈𐴥𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴝𐴃𐴝 𐴁𐴡𐴓𐴝𐴎𐴟𐴌𐴞 𐴒𐴦𐴡𐴗𐴌 𐴈𐴝𐴔 𐴒𐴡𐴌𐴥𐴝 𐴁𐴤𐴝𐴌 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴡𐴕 𐴈𐴥𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴝𐴃𐴝 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴃𐴡𐴓𐴧𐴗𐴝 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴁𐴡𐴓𐴝𐴎𐴟𐴌𐴞 𐴒𐴦𐴡𐴗𐴌 𐴈𐴝𐴔 𐴀𐴥𐴡𐴑𐴧𐴡𐴓 𐴒𐴡𐴌𐴥𐴝𐴁𐴤𐴝𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴑𐴝𐴛𐴠𐴕 𐴆𐴤𐴙𐴡𐴚 𐴐𐴤𐴡𐴊𐴡𐴌𐴞 𐴎𐴟𐴕𐴡𐴌 𐴒𐴤𐴝𐴣𐴍𐴡𐴃 𐴒𐴡𐴃𐴡 𐴅𐴟𐴕 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 , 𐴓𐴝𐴌𐴥𐴝𐴘𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴏𐴥𐴝𐴏𐴝𐴔𐴝𐴕 𐴓𐴡𐴘 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴔𐴠𐴓𐴠𐴄𐴠𐴌𐴞𐴌 𐴉𐴝𐴕𐴥𐴞𐴌 𐴎𐴝𐴣𐴀𐴝𐴏𐴡𐴌 𐴃𐴧𐴟 𐴀𐴥𐴝𐴣𐴃𐴞𐴘𐴝𐴌 𐴐𐴤𐴡𐴣𐴀𐴡 𐴏𐴥𐴝𐴔𐴝𐴕 𐴀𐴥𐴞𐴀𐴞𐴕 𐴃𐴟𐴓𐴥𐴞 𐴁𐴤𐴡𐴓𐴧𐴝 , 𐴔𐴡𐴚𐴋𐴤𐴟𐴌 𐴔𐴡𐴚𐴕𐴞 𐴌𐴥𐴠𐴑𐴧𐴤𐴗𐴝 𐴐𐴤𐴡𐴣𐴀𐴡 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴡𐴌 𐴀𐴡𐴙𐴕𐴧𐴡 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴁𐴡𐴕𐴒𐴡𐴌𐴥𐴞 𐴁𐴡𐴓𐴝𐴎𐴟𐴌𐴞 𐴁𐴞𐴘𐴝𐴌 𐴊𐴞𐴘𐴝 𐴁𐴝𐴘𐴧𐴥𐴠 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴔𐴥𐴟𐴌𐴥𐴟 𐴔𐴥𐴝 𐴊𐴡𐴀𐴡𐴙𐴕 𐴌𐴥𐴠𐴑𐴧𐴤𐴗𐴝 𐴲 𐴓𐴡𐴔𐴁𐴤𐴡𐴌𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴝𐴎𐴝𐴌𐴡𐴌 𐴔𐴟𐴀𐴟𐴕𐴃𐴟 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴀𐴡𐴕𐴟𐴔𐴝𐴕𐴞𐴑 𐴀𐴥𐴝𐴣𐴎𐴡𐴙𐴕𐴧𐴝 𐴵 𐴁𐴝𐴎𐴠 , 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴡𐴌 𐴔𐴝𐴃𐴤𐴝𐴃 𐴒𐴟𐴓𐴞𐴌 𐴏𐴡𐴚𐴈𐴥𐴝 𐴉𐴡𐴌𐴞 , 𐴊𐴡𐴌𐴥𐴡 𐴔𐴡𐴌𐴥𐴡 𐴀𐴝𐴒𐴤𐴝𐴃 𐴀𐴥𐴡𐴘𐴤𐴠 , 𐴔𐴡𐴕𐴃𐴡𐴌 𐴀𐴟𐴉𐴡𐴎𐴟𐴑𐴃𐴡 𐴊𐴝𐴁𐴝𐴘 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴡𐴕𐴠 𐴉𐴟𐴖𐴝 𐴀𐴥𐴞𐴁𐴤𐴝𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴲 𐴎𐴡𐴕 𐴐𐴤𐴡𐴇𐴞𐴊 , 𐴑𐴠𐴙𐴏𐴧𐴥𐴟 𐴒𐴤𐴝𐴙𐴓 , 𐴒𐴟𐴌𐴟 𐴀𐴟𐴒𐴧𐴤𐴗𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴑𐴠𐴙𐴏𐴧𐴥𐴟 𐴎𐴝𐴒𐴝𐴃 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴀𐴡𐴕𐴟𐴔𐴝𐴕𐴞𐴑 𐴊𐴦𐴟𐴛𐴅𐴧𐴙𐴝 𐴲 𐴁𐴝𐴎𐴠 𐴎𐴝𐴕𐴞 𐴉𐴥𐴟𐴕𐴞 𐴏𐴝𐴀𐴝𐴘 𐴏𐴞𐴃𐴤𐴞 , 𐴌𐴟𐴇𐴝𐴙𐴚𐴒𐴙𐴝 𐴁𐴦𐴠𐴐𐴢 𐴀𐴝𐴏𐴥𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 , ( 𐴳 ) 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴠𐴓𐴝𐴑𐴝 𐴖𐴥𐴞 𐴔𐴥𐴝 𐴓𐴥𐴝 𐴉𐴝𐴌𐴝 𐴀𐴝𐴌 𐴔𐴥𐴟𐴌𐴥𐴟 𐴀𐴥𐴟 𐴉𐴝𐴌𐴝𐴌 𐴃𐴧𐴟 , 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴌𐴟𐴕 𐴓𐴡𐴘 𐴵 𐴏𐴥𐴝𐴕 𐴎𐴝𐴒𐴝𐴃 𐴁𐴟𐴔 𐴇𐴥𐴝𐴔𐴓𐴝 𐴒𐴡𐴙𐴅𐴧𐴤𐴙𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴀𐴟𐴒𐴧𐴤𐴗𐴝 𐴁𐴟𐴔 𐴔𐴡𐴚𐴋𐴤𐴟 𐴁𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴌 𐴊𐴡𐴀𐴡𐴙𐴕𐴠 𐴁𐴟 𐴔𐴥𐴟 𐴉𐴝𐴌𐴝( 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴃 ) 𐴀𐴝𐴏𐴥𐴠𐴊𐴠 𐴉𐴟𐴓𐴡𐴌 𐴋𐴤𐴝𐴑𐴠 𐴉𐴡𐴌𐴞 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 , 𐴰 𐴱 𐴁𐴡𐴏𐴥𐴡𐴌 𐴁𐴤𐴝𐴌𐴝𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴊 𐴉𐴟𐴖𐴝𐴀𐴠𐴑 𐴎𐴡𐴕 𐴀𐴝𐴌 𐴱 𐴱 𐴁𐴡𐴏𐴥𐴡𐴌 𐴁𐴤𐴝𐴌𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴟𐴄 𐴊𐴟𐴘 𐴎𐴡𐴕 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 , 𐴀𐴝𐴌 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴊𐴟𐴘 𐴎𐴡𐴕𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴀𐴝𐴌 𐴒𐴡𐴌𐴟 𐴘𐴥𐴡 𐴀𐴟𐴒𐴧𐴤𐴗𐴝 𐴔𐴡𐴌𐴞 𐴒𐴞𐴘𐴥𐴠 𐴒𐴤𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴃𐴟𐴓 𐴑𐴡𐴌𐴡𐴔𐴡𐴌 𐴕𐴟𐴌 𐴐𐴤𐴡𐴔𐴏𐴡 𐴑𐴠𐴀𐴠𐴔𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴃 𐴴 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 𐴱𐴱

𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴓𐴝𐴑𐴝 ( 𐴖𐴥𐴠𐴞𐴏𐴄 𐴁𐴤𐴠𐴣𐴑 ) 𐴉𐴡𐴏𐴥𐴞𐴔 𐴈𐴝𐴣𐴏𐴥𐴝𐴌 𐴃𐴟𐴓 𐴑𐴡𐴌𐴡𐴔 𐴐𐴤𐴡𐴀𐴡𐴌𐴡𐴌 𐴕𐴟𐴌 𐴐𐴤𐴡𐴔𐴏𐴡 𐴑𐴠𐴀𐴠𐴔𐴡𐴃 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴴 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴁𐴡𐴓𐴞 , 𐴀𐴝𐴓 𐴅𐴡𐴎𐴞𐴌𐴝 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱