𐴓𐴝𐴌𐴥𐴝𐴘𐴌 𐴋𐴡𐴌𐴡𐴌 𐴃𐴧𐴟 𐴁𐴝𐴏𐴞 𐴃𐴤𐴝𐴑𐴤𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴥𐴝𐴃 𐴉𐴥𐴟𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴤𐴡𐴌𐴠 𐴑𐴟𐴀𐴟𐴂𐴢 𐴑𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴁𐴠𐴌𐴟𐴊𐴧𐴤𐴠 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴔𐴡𐴒𐴢 𐴁𐴝𐴒𐴞 𐴘𐴠 , 𐴀𐴝𐴌𐴑𐴝𐴕𐴡𐴃 𐴓𐴝𐴌𐴥𐴝𐴘𐴌 𐴋𐴡𐴌𐴡𐴌 𐴃𐴧𐴟 𐴐𐴤𐴡𐴌𐴞 𐴃𐴤𐴝𐴙𐴑𐴧𐴤𐴙𐴠𐴊𐴠 𐴓𐴝𐴑𐴤𐴝 𐴓𐴝𐴑𐴤𐴞 𐴊𐴠𐴐𐴤𐴡𐴙𐴃𐴧𐴝 𐴀𐴝𐴣𐴐𐴄𐴡 𐴎𐴝𐴃𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 , 𐴐𐴤𐴟𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴝𐴃𐴡𐴌 𐴃𐴧𐴤𐴟 𐴀𐴥𐴝𐴃 𐴉𐴥𐴟𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 , 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴌 𐴊𐴠𐴐𐴤𐴡𐴌 𐴁𐴝𐴀𐴝𐴌𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴝𐴀𐴞𐴅𐴧𐴡 𐴔𐴡𐴊𐴡𐴃 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴞𐴋𐴞𐴘𐴝𐴃 𐴁𐴝𐴕𐴝𐴀𐴡𐴄𐴞 𐴁𐴞𐴋𐴞𐴘𐴟 𐴀𐴝𐴌 𐴉𐴡𐴄𐴤𐴟 𐴀𐴥𐴡𐴑𐴧𐴡𐴓 𐴊𐴠𐴈𐴥𐴝𐴌 𐴊𐴧𐴠 𐴀𐴥𐴞𐴀𐴞𐴕 𐴏𐴥𐴡𐴀𐴥𐴞 𐴄𐴞𐴑𐴝𐴘 𐴁𐴤𐴡𐴓𐴧𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴊𐴡𐴃𐴡𐴌 𐴕𐴝𐴔 𐴊𐴞𐴀𐴞 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴈𐴥𐴡𐴃𐴡𐴔 𐴒𐴡𐴌𐴥𐴠𐴌 𐴊𐴧𐴠 𐴀𐴝𐴌 𐴁𐴡𐴊𐴧𐴝𐴐𐴡𐴌 𐴁𐴝𐴀𐴝𐴌𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴊𐴧𐴠 𐴀𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴞𐴀𐴞𐴕 𐴊𐴟𐴕𐴞𐴘𐴝𐴘𐴌 𐴃𐴧𐴟 𐴀𐴝𐴕𐴊𐴤𐴝𐴌𐴡𐴃 𐴓𐴟𐴖𐴝𐴘𐴧𐴝 𐴃𐴤𐴝𐴑𐴤𐴠 𐴉𐴥𐴝𐴀𐴝𐴕 𐴀𐴝𐴌 𐴏𐴥𐴝𐴁𐴟𐴃 𐴁𐴡𐴕𐴞 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴀𐴥𐴝𐴃 𐴉𐴥𐴟𐴕 𐴀𐴥𐴡𐴑𐴧𐴡𐴓 , 𐴐𐴤𐴟𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴌 𐴊𐴧𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴁𐴤𐴟𐴏𐴞𐴊𐴡𐴚 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴀𐴥𐴡𐴘𐴃𐴠 𐴀𐴝𐴃𐴠 𐴈𐴝𐴣𐴏𐴥𐴡𐴌 𐴉𐴝𐴌𐴝𐴌 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴓𐴝𐴌𐴥𐴝𐴘𐴌 𐴋𐴡𐴌𐴡𐴌 𐴃𐴧𐴤𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴀𐴡𐴙𐴕𐴧𐴡 𐴎𐴝𐴒𐴝𐴌 𐴀𐴥𐴞𐴑𐴧𐴤𐴙𐴝 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴤𐴟 𐴎𐴠𐴕𐴋𐴞𐴓𐴧𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴐𐴤𐴡𐴃𐴤𐴝 𐴐𐴤𐴡𐴃𐴤𐴞 𐴀𐴥𐴝𐴃 𐴉𐴥𐴟𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴀𐴝𐴙𐴓 , 𐴀𐴥𐴠𐴕𐴋𐴞𐴓𐴧𐴝 𐴅𐴟𐴕 𐴔𐴝𐴐𐴤𐴡𐴌 𐴶 𐴲 𐴃𐴝𐴌𐴥𐴞𐴑𐴡𐴃 𐴔𐴡𐴚𐴋𐴤𐴟 𐴐𐴗𐴠 𐴎𐴤𐴝 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴇𐴥𐴠𐴉𐴝𐴎𐴡𐴃𐴞 𐴎𐴝𐴒𐴝𐴌 𐴀𐴥𐴞𐴑𐴧𐴤𐴙𐴝 𐴐𐴤𐴡𐴌𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴐𐴤𐴡𐴃𐴤𐴝 𐴐𐴤𐴡𐴃𐴤𐴞 𐴀𐴥𐴝𐴃 𐴉𐴥𐴟𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌𐴡𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴉𐴝𐴕𐴥𐴞 𐴁𐴝𐴕 𐴀𐴥𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑 𐴀𐴟𐴑𐴤𐴞𐴘𐴝𐴃 𐴀𐴝𐴏𐴥𐴠𐴊𐴠 , 𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕𐴡𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴑𐴠𐴀𐴠𐴔 𐴑𐴠𐴙𐴏𐴧𐴥𐴟𐴃 𐴓𐴝𐴒𐴝𐴃𐴝𐴌 𐴎𐴤𐴡𐴌 𐴁𐴠𐴐𐴤𐴞 𐴊𐴡𐴀𐴡𐴕𐴠 , 𐴉𐴝𐴕𐴥𐴞 𐴁𐴝𐴕 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴱 𐴲 , 𐴲 𐴲 𐴀𐴝𐴌 𐴀𐴟𐴕𐴏𐴞 𐴉𐴝𐴌𐴝𐴚𐴡𐴃 𐴅𐴟𐴕 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕 , 𐴉𐴥𐴝𐴑 𐴏𐴥𐴝𐴌𐴥𐴝 𐴓𐴝𐴒𐴝𐴃𐴝𐴌 𐴎𐴤𐴡𐴌 𐴊𐴡𐴀𐴡𐴕𐴠 𐴉𐴝𐴕𐴥𐴞 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴦𐴠𐴐𐴢 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴠𐴍𐴞 𐴁𐴤𐴝𐴚𐴞 𐴀𐴝𐴘𐴁𐴤𐴝𐴌 𐴇𐴥𐴝𐴓𐴡𐴃 𐴀𐴥𐴡𐴘 𐴉𐴝𐴌𐴠𐴊𐴠 𐴀𐴥𐴠𐴃𐴤𐴡𐴓𐴧𐴝 𐴀𐴝𐴌 𐴌𐴞𐴉𐴟𐴎𐴞𐴌 𐴃𐴠𐴌𐴉𐴝𐴓𐴡𐴌 𐴒𐴤𐴡𐴌𐴡𐴃 𐴉𐴝𐴕𐴥𐴞 𐴒𐴤𐴡𐴓𐴠𐴌 𐴊𐴧𐴠 𐴀𐴥𐴠𐴃𐴤𐴡𐴓𐴧𐴝 𐴃𐴡𐴀𐴡𐴙𐴃𐴧𐴝 𐴓𐴝𐴌𐴞 𐴌𐴝𐴙𐴑𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴄𐴠𐴑𐴏𐴥𐴡 𐴀𐴝𐴌 𐴒𐴡𐴌𐴟 𐴒𐴟𐴏𐴧𐴡 𐴕𐴥𐴡 𐴊𐴠𐴀𐴠 𐴊𐴠 𐴀𐴥𐴠𐴃𐴡𐴓𐴧𐴝 𐴔𐴡𐴒𐴢 𐴁𐴝𐴒𐴢 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊𐴢 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 𐴔𐴥𐴝𐴔 𐴁𐴡𐴌𐴥𐴝 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴒𐴡𐴌𐴟𐴌 𐴒𐴟𐴏𐴧𐴡 𐴀𐴝𐴌 𐴄𐴠𐴑𐴏𐴥𐴡 𐴕𐴥𐴡 𐴊𐴠𐴀𐴠 𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊𐴢 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴅𐴟𐴕 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴰 𐴰 : 𐴰 𐴱 𐴁𐴝𐴎𐴠 , 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴵 𐴎𐴡𐴙𐴕𐴧𐴝 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴉𐴝𐴣𐴏𐴢 𐴀𐴥𐴝𐴣𐴃𐴞𐴘𐴝𐴌 𐴁𐴝𐴙𐴕𐴊𐴤𐴝 , 𐴔𐴥𐴝𐴔 𐴁𐴡𐴌𐴥𐴝 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴏𐴞𐴕𐴒𐴞𐴌𐴞 𐴂𐴡𐴌𐴝𐴚 𐴉𐴝𐴌𐴝𐴃 𐴒𐴤𐴡𐴙𐴓𐴧𐴙𐴠 , 𐴁𐴦𐴝𐴊𐴠 𐴒𐴡𐴌𐴟 𐴒𐴟𐴏𐴧𐴡 𐴀𐴝𐴌 𐴄𐴠𐴑𐴏𐴥𐴡 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴈𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌𐴑𐴝𐴕 𐴔𐴥𐴝𐴔 𐴁𐴡𐴌𐴥𐴝 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴏𐴞𐴕𐴒𐴞𐴌𐴞 𐴂𐴡𐴌𐴝𐴚 𐴉𐴝𐴌𐴝𐴌 𐴉𐴡𐴙𐴃𐴧𐴡 𐴀𐴥𐴝𐴙𐴓𐴧𐴝𐴌 𐴖𐴡𐴌𐴠 𐴉𐴡𐴙𐴃𐴧𐴡 𐴔𐴝𐴐𐴤𐴠 𐴰 𐴵 𐴂𐴡𐴀𐴡𐴕 𐴒𐴡𐴌𐴟𐴌 𐴒𐴟𐴏𐴧𐴡 𐴀𐴝𐴌 𐴰 𐴲 𐴓𐴝𐴑 𐴁𐴡𐴌𐴔𐴥𐴝 𐴄𐴞𐴛𐴝 , 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴄𐴠𐴑𐴏𐴥𐴡 𐴁𐴝𐴣𐴊𐴤𐴞 𐴊𐴞𐴘𐴠 , 𐴒𐴡𐴌𐴞𐴁 𐴊𐴟𐴑𐴧𐴤𐴞𐴃𐴝 𐴀𐴥𐴝𐴙𐴓𐴧𐴝 / 𐴀𐴝𐴁𐴊𐴟𐴌 𐴌𐴡𐴇𐴥𐴞𐴔 𐴁𐴡𐴐𐴢 𐴲 𐴵 𐴁𐴡𐴏𐴥𐴡𐴌 , 𐴀𐴞𐴁𐴤𐴝𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁 𐴀𐴥𐴡𐴀𐴡𐴕𐴠 𐴊𐴟𐴑𐴧𐴤𐴡𐴃 𐴉𐴡𐴌𐴞 𐴄𐴞𐴛𐴝 𐴕𐴡 𐴃𐴤𐴝𐴑𐴤𐴡𐴕𐴠 𐴅𐴟𐴕 𐴔𐴝𐴐𐴤𐴡𐴌 𐴄𐴠𐴑𐴏𐴥𐴡𐴌 𐴁𐴦𐴡𐴙𐴃𐴧𐴝 𐴰 𐴲 𐴓𐴝𐴑 𐴄𐴞𐴛𐴝 𐴀𐴝𐴌 𐴰 𐴵 𐴂𐴡𐴀𐴡𐴕 𐴒𐴡𐴌𐴟𐴌 𐴒𐴟𐴏𐴧𐴡 𐴊𐴞𐴀𐴞 𐴕𐴥𐴡 𐴉𐴝𐴌𐴠𐴊𐴠 𐴀𐴥𐴠𐴃𐴡𐴓𐴧𐴝 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊𐴢 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴈𐴡𐴔𐴞 𐴱𐴱

𐴀𐴝𐴌𐴑𐴝𐴕𐴡𐴃 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴐𐴤𐴡𐴀𐴡𐴌 , 𐴔𐴡𐴚𐴋𐴤𐴟 , 𐴏𐴠𐴕 𐴋𐴤𐴗𐴠 , 𐴄𐴡𐴚 𐴒𐴤𐴟 , 𐴐𐴤𐴡𐴀𐴡𐴌 𐴀𐴞𐴀𐴞𐴕𐴡𐴃 𐴔𐴝𐴎𐴤𐴠 , 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴈𐴡𐴔𐴡𐴕𐴡𐴌 𐴎𐴡𐴌𐴞𐴘𐴝 𐴏𐴠𐴇𐴥𐴠𐴃 𐴀𐴝𐴌𐴝𐴔𐴞𐴘𐴡𐴃𐴡𐴌 𐴁𐴝𐴁𐴡𐴃𐴠 , 𐴔𐴝𐴕𐴥𐴟𐴙𐴐𐴢 𐴁𐴠𐴐𐴤𐴞 𐴔𐴡𐴐𐴑𐴞𐴓𐴡𐴃 𐴉𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠𐴊𐴠 𐴀𐴠𐴓𐴝𐴑𐴝 𐴀𐴥𐴞𐴀𐴞𐴕𐴡𐴃 𐴔𐴝𐴎𐴤𐴠 𐴘𐴥𐴡 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴁𐴟𐴔 𐴔𐴝𐴌𐴞 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴀𐴝𐴌 𐴊𐴝𐴁𐴝𐴘𐴌 𐴊𐴟𐴖𐴝𐴕 𐴀𐴥𐴡𐴑𐴧𐴡𐴓 𐴁𐴤𐴝𐴚𐴞 𐴏𐴟𐴌𐴞 𐴉𐴥𐴠𐴓𐴥𐴡𐴕𐴠 , 𐴐𐴤𐴡𐴀𐴡𐴌 𐴀𐴥𐴞𐴀𐴞𐴕𐴃 𐴔𐴝𐴎𐴤𐴠 𐴘𐴥𐴡 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴈𐴡𐴔𐴞 𐴀𐴥𐴡𐴀𐴡𐴕𐴠 , 𐴎𐴝𐴒𐴝 𐴀𐴥𐴞𐴀𐴞𐴕𐴡𐴌 𐴔𐴝𐴙𐴕𐴐𐴤𐴡𐴌 𐴏𐴠𐴇𐴥𐴠𐴃𐴡𐴌 𐴇𐴥𐴝𐴓𐴡𐴃 𐴀𐴥𐴡𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝 𐴐𐴟𐴅𐴝 𐴀𐴞𐴘𐴥𐴝𐴃 𐴔𐴝𐴎𐴤𐴠 𐴏𐴝𐴙𐴌𐴀𐴡𐴔 𐴊𐴞𐴕 𐴀𐴥𐴡 𐴓𐴝𐴌𐴥𐴝𐴘 𐴏𐴝𐴓𐴟 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴉𐴥𐴡𐴓𐴡𐴏𐴃𐴞𐴕𐴞 𐴒𐴤𐴡𐴌 𐴏𐴥𐴝𐴌𐴥𐴝 𐴱𐴱

𐴒𐴤𐴡𐴎𐴧𐴝𐴌 𐴀𐴟𐴃𐴧𐴡𐴌 𐴀𐴠𐴓𐴝𐴑𐴝𐴃 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔 𐴈𐴥𐴡𐴃𐴡𐴔 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴈𐴡𐴀𐴡𐴘 , 𐴀𐴞𐴏𐴌𐴦𐴝𐴙𐴓𐴠 𐴀𐴠𐴓𐴝𐴕 𐴒𐴡𐴌𐴥𐴞 𐴈𐴡𐴀𐴠𐴑 𐴔𐴝𐴐𐴢 𐴁𐴦𐴝𐴊𐴠 , 𐴒𐴤𐴡𐴎𐴧𐴝𐴌 𐴐𐴤𐴡𐴀𐴡𐴌 𐴐𐴟𐴅𐴝 𐴀𐴞𐴘𐴥𐴝 𐴋𐴞𐴐𐴄𐴤𐴞𐴑𐴡𐴃 𐴏𐴝𐴙𐴌𐴀𐴡𐴔 𐴊𐴞𐴕𐴡𐴃 𐴔𐴝𐴎𐴤𐴠 𐴘𐴥𐴡 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴀𐴝𐴌 𐴁𐴟𐴔𐴁𐴝𐴌𐴞 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴉𐴠𐴌𐴥𐴝𐴣𐴏𐴡𐴌 𐴈𐴥𐴡𐴁𐴡𐴌 𐴀𐴠𐴅𐴤𐴠𐴕𐴏𐴞 ( 𐴀𐴠 𐴀𐴠𐴉𐴢 𐴂𐴞 ) 𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴉𐴥𐴡𐴓𐴡𐴏𐴃𐴞𐴕𐴞 𐴐𐴟𐴅𐴝 𐴀𐴞𐴘𐴥𐴝 𐴀𐴠𐴓𐴝𐴑𐴝𐴌 𐴃𐴧𐴤𐴟 , 𐴀𐴡𐴙𐴕𐴧𐴡 𐴀𐴠𐴓𐴝𐴑𐴝𐴌 𐴀𐴥𐴞𐴑𐴧𐴤𐴙𐴝 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴠 𐴒𐴤𐴡𐴎𐴧𐴝𐴌 𐴃𐴧𐴟 𐴁𐴡𐴕 𐴒𐴡𐴙𐴅𐴧𐴤𐴞𐴀𐴞𐴓 𐴊𐴠 𐴵 𐴵 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴌𐴞 𐴊𐴞𐴘𐴥𐴠 𐴱𐴱

𐴏𐴠𐴇𐴥𐴠𐴃 𐴋𐴞𐴂𐴦𐴝𐴌𐴔𐴠𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 , 𐴀𐴞𐴏𐴌𐴦𐴝𐴙𐴓𐴠 𐴁𐴡𐴕 𐴒𐴡𐴙𐴅𐴧𐴤𐴞𐴀𐴞𐴓𐴊𐴠 𐴈𐴡𐴊𐴞 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 , 𐴒𐴤𐴡𐴎𐴧𐴝𐴌 𐴀𐴥𐴝𐴓 𐴐𐴞𐴉𐴥𐴝 𐴇𐴥𐴝𐴐𐴉𐴝𐴃𐴝𐴓𐴡𐴌 𐴋𐴝𐴘𐴌𐴠𐴑𐴄𐴝𐴌 𐴐𐴤𐴡𐴣𐴀𐴡 𐴵 𐴵 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴌𐴞 𐴊𐴞𐴘𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱