𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴁𐴡𐴕 𐴈𐴥𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃𐴡𐴌 𐴔𐴟𐴃𐴦𐴝𐴓𐴧𐴠𐴑 𐴔𐴡𐴏𐴞𐴁𐴡𐴃 𐴀𐴥𐴡𐴑𐴧𐴡𐴓 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴝𐴌𐴥𐴝𐴃 𐴀𐴝𐴏𐴥𐴠 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴊𐴞𐴘𐴝 𐴉𐴡𐴌𐴡𐴕𐴡𐴌 𐴁𐴦𐴝𐴊𐴠 , 𐴈𐴥𐴝𐴕𐴝 𐴉𐴝𐴕𐴥𐴞 𐴀𐴝𐴌 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴁𐴝𐴁𐴡𐴃𐴠 𐴏𐴝𐴀𐴝 𐴏𐴞𐴃𐴤𐴝 𐴁𐴠𐴒𐴧𐴤𐴞𐴕 𐴀𐴠𐴑𐴧𐴟𐴁𐴝𐴌𐴠 𐴉𐴥𐴟𐴌𐴝𐴘 𐴒𐴞𐴘𐴠 𐴒𐴤𐴡𐴘 , 𐴀𐴥𐴠𐴃𐴡𐴓𐴧𐴝 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴡𐴌 𐴔𐴡𐴊𐴡𐴃 𐴀𐴝𐴌 𐴁𐴝𐴀𐴝𐴌𐴡𐴌 𐴔𐴡𐴊𐴡𐴃 𐴀𐴥𐴡𐴑𐴧𐴡𐴓 𐴀𐴥𐴞𐴃𐴝𐴌𐴝𐴌 𐴓𐴧𐴝 𐴁𐴠𐴐𐴤𐴞 𐴎𐴡𐴌𐴟𐴌𐴡𐴃 𐴀𐴥𐴡𐴘𐴧𐴠𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴠 , 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴎𐴟𐴌𐴠 𐴐𐴤𐴟𐴌𐴠 𐴏𐴡𐴓𐴠𐴌𐴊𐴧𐴠 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 , 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴡𐴃𐴞 𐴊𐴟𐴑𐴧𐴤𐴡𐴃 𐴉𐴡𐴌𐴞 𐴒𐴞𐴘𐴥𐴠 𐴒𐴤𐴡𐴘 , 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴓𐴝𐴌𐴥𐴝𐴘𐴌 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴕𐴡𐴃𐴞𐴅𐴝 𐴋𐴡𐴕𐴋𐴡 𐴁𐴠𐴐𐴤𐴞 𐴋𐴡𐴣𐴀𐴡𐴌 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴁𐴤𐴟𐴒𐴤𐴝 𐴉𐴡𐴌𐴠𐴌 , 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴝 𐴀𐴥𐴟𐴀𐴝 , 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴁𐴡𐴊𐴧𐴝𐴐𐴢 𐴒𐴡𐴌𐴥𐴝 , 𐴔𐴡𐴌𐴝𐴌 𐴉𐴠𐴌𐴠𐴐𐴝𐴕𐴞 𐴁𐴡𐴊𐴧𐴝𐴐𐴢 𐴒𐴡𐴌𐴥𐴝 , 𐴊𐴞𐴕 𐴊𐴞𐴕 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴐𐴤𐴡𐴀𐴡𐴘 𐴎𐴝𐴀𐴝 𐴉𐴡𐴌𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴕𐴋𐴞𐴓𐴧𐴝 𐴊𐴡𐴌𐴁𐴡𐴊𐴡𐴌𐴞 𐴀𐴝𐴌 𐴁𐴞𐴌𐴝𐴕𐴝 𐴇𐴥𐴝𐴓𐴡𐴃 𐴀𐴥𐴡𐴀𐴡𐴌 𐴊𐴧𐴠 𐴀𐴥𐴞𐴀𐴞𐴕𐴡𐴌𐴥𐴠 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌 𐴔𐴝𐴙𐴕𐴐𐴤𐴡𐴌 𐴎𐴝𐴕𐴡𐴌 𐴇𐴥𐴠𐴉𐴝𐴎𐴡𐴃𐴡𐴌 𐴁𐴠𐴁𐴠𐴏𐴃𐴤𐴝 𐴒𐴡𐴌𐴥𐴞 𐴁𐴤𐴡𐴓𐴧𐴝 , 𐴊𐴟𐴕𐴞𐴘𐴝𐴘𐴌 𐴔𐴟𐴃𐴦𐴝𐴓𐴡𐴑𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴡𐴌𐴡𐴎 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴌𐴠𐴀𐴠𐴁𐴡𐴌 𐴋𐴞 𐴅𐴞 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔 𐴏𐴝𐴘𐴃𐴤𐴡 𐴀𐴝𐴙𐴐𐴧𐴤𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴌𐴠𐴀𐴠𐴁𐴡𐴌 𐴋𐴞 𐴅𐴞 𐴁𐴝𐴌𐴡𐴐𐴄𐴡𐴌 / 𐴔𐴟𐴇𐴝𐴔𐴧𐴡𐴊 𐴇𐴦𐴝𐴌𐴟𐴕 𐴌𐴡𐴐𐴤𐴞𐴊 , 𐴅𐴟𐴕 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴐𐴤𐴝𐴀𐴝𐴌𐴡 𐴉𐴝𐴣𐴏𐴢 𐴁𐴝𐴎𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝 𐴀𐴟𐴑𐴤𐴞𐴘𐴝𐴌 𐴉𐴝𐴣𐴏𐴢 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴏𐴝𐴘𐴃𐴤𐴡 𐴀𐴝𐴙𐴐𐴧𐴤𐴙𐴠 , 𐴀𐴥𐴠 𐴀𐴡𐴑𐴃𐴤𐴡𐴃 𐴌𐴠𐴀𐴠𐴁𐴡𐴌 𐴋𐴞 𐴅𐴞 𐴀𐴥𐴞𐴁𐴤𐴝𐴌𐴠 𐴑𐴠𐴀𐴠𐴔𐴡𐴌 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴒𐴦𐴝𐴋 𐴀𐴥𐴡𐴉𐴢 𐴀𐴥𐴡𐴕𐴥𐴝𐴌 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴦𐴝𐴊𐴠 𐴑𐴠𐴀𐴠𐴔𐴡𐴌 𐴔𐴝𐴎𐴤𐴞 𐴀𐴝𐴌 𐴏𐴥𐴝𐴁 – 𐴔𐴝𐴎𐴤𐴞 𐴀𐴥𐴡𐴑𐴧𐴡𐴓 𐴓𐴡𐴘 𐴁𐴡𐴘𐴍𐴥𐴡𐴑 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴦𐴝𐴊𐴠 𐴀𐴥𐴠 𐴁𐴡𐴘𐴍𐴥𐴡𐴑𐴡𐴃 𐴋𐴡𐴣𐴀𐴡𐴌 𐴔𐴠𐴀𐴠𐴔𐴝𐴕 𐴀𐴥𐴞𐴏𐴝𐴉𐴠 𐴋𐴞 𐴅𐴞 𐴘𐴠 𐴃𐴡𐴑𐴌𐴞𐴌 𐴒𐴡𐴌𐴥𐴞𐴓𐴥𐴡 , 𐴃𐴡𐴑𐴌𐴞𐴌𐴡𐴌 𐴐𐴤𐴠𐴐𐴠 𐴏𐴥𐴡𐴓𐴧𐴝 𐴔𐴡𐴐𐴖𐴝𐴌𐴝𐴌 𐴁𐴦𐴝𐴊𐴠 𐴔𐴝𐴎𐴞 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴟𐴕𐴠 𐴀𐴠𐴑 𐴀𐴝𐴁𐴝𐴏𐴠 , 𐴀𐴝𐴣𐴀𐴝𐴌𐴝 𐴎𐴠𐴃𐴡 𐴈𐴥𐴝𐴌𐴥𐴝 𐴉𐴝𐴌𐴞 𐴀𐴝𐴣𐴀𐴝𐴌𐴝𐴌 𐴊𐴠𐴐𐴢 𐴁𐴡𐴌𐴔𐴥𐴝𐴃 𐴖𐴝𐴉𐴠𐴏𐴢 𐴎𐴝𐴘𐴃𐴝𐴔 𐴁𐴤𐴡𐴘 𐴏𐴝𐴀𐴞𐴌 , 𐴀𐴝𐴌 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴑𐴠𐴀𐴠𐴔𐴡𐴃 𐴁𐴡𐴐𐴤𐴡𐴃𐴞 𐴒𐴡𐴌𐴥𐴞𐴌 𐴊𐴧𐴠 𐴀𐴝𐴣𐴐𐴄𐴡 𐴁𐴡𐴏𐴥𐴡𐴌 𐴉𐴟𐴌𐴝𐴌 , 𐴓𐴝𐴒𐴝𐴃𐴝𐴌 𐴑𐴤𐴟𐴕 𐴀𐴥𐴟𐴀𐴝𐴃 𐴀𐴝𐴏𐴥𐴠 , 𐴔𐴡𐴕𐴃𐴡𐴌 𐴑𐴠𐴀𐴠𐴔 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴌𐴝𐴙𐴃𐴠 𐴊𐴞𐴕𐴠 𐴉𐴝𐴀𐴝𐴌𐴝 𐴊𐴠𐴀𐴠𐴌 , 𐴀𐴝𐴣𐴀𐴝𐴌𐴝 𐴌𐴥𐴠 𐴐𐴤𐴟𐴕𐴊𐴡𐴌 𐴁𐴤𐴝𐴉𐴠 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴦𐴝𐴊𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌 𐴀𐴟𐴎𐴞𐴌 / 𐴐𐴠𐴙𐴈𐴢 𐴇𐴥𐴝𐴏𐴞𐴕𐴝 𐴐𐴤𐴡𐴣𐴀𐴡 𐴇𐴥𐴡𐴑𐴟𐴔𐴡𐴃𐴞 𐴀𐴝𐴔𐴓𐴝 𐴀𐴝𐴌 𐴊𐴠𐴐𐴤𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴟𐴑𐴟𐴌𐴞𐴘𐴝 𐴎𐴝𐴕𐴝𐴘𐴧𐴥𐴠 , 𐴈𐴥𐴝𐴏𐴢 𐴒𐴡𐴌𐴥𐴞 𐴑𐴠𐴀𐴠𐴔 𐴐𐴤𐴝𐴐𐴡𐴕𐴑𐴝𐴌 𐴏𐴞 𐴀𐴝𐴘 𐴏𐴞 𐴐𐴤𐴡𐴣𐴀𐴡 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌 𐴐𐴤𐴟𐴑𐴟𐴌𐴞𐴘𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴀𐴟𐴑𐴞𐴓𐴠 𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝𐴃 𐴋𐴦𐴡 𐴀𐴡𐴚𐴏𐴥𐴠𐴕 𐴏𐴥𐴟𐴆𐴞 𐴌𐴥𐴠 𐴁𐴡𐴕 𐴒𐴡𐴌𐴥𐴞𐴁𐴤𐴝𐴌 𐴖𐴝𐴌𐴠𐴕 𐴁𐴝𐴀𐴞𐴌 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴊𐴡𐴌𐴈𐴥𐴝𐴏𐴢 𐴊𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌𐴥𐴠 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 , 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴇𐴥𐴡𐴑𐴟𐴔𐴡𐴃𐴞 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓𐴠 𐴅𐴟𐴕 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 𐴒𐴤𐴡𐴓𐴝𐴘𐴧𐴥𐴠𐴊𐴠 𐴊𐴡𐴌𐴈𐴥𐴝𐴏𐴡𐴃 , 𐴊𐴠𐴐𐴤𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 / 𐴋𐴦𐴡 𐴀𐴡𐴚𐴏𐴥𐴠𐴕 𐴏𐴥𐴟𐴆𐴞 𐴀𐴝𐴌 𐴉𐴟𐴌𐴝𐴕 𐴌𐴝𐴎𐴝 / 𐴀𐴥𐴟 𐴄𐴞𐴚 𐴆𐴙𐴡 , 𐴊𐴟𐴕𐴥𐴞 𐴎𐴡𐴕𐴡𐴌 𐴕𐴝𐴔 𐴀𐴥𐴡 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴐𐴗𐴠 𐴎𐴤𐴝 𐴉𐴝𐴌𐴝𐴌 𐴃𐴧𐴤𐴟 𐴓𐴝𐴌𐴥𐴝𐴘𐴌 𐴋𐴡𐴌𐴠 𐴕𐴦𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 , 𐴀𐴥𐴝𐴃 𐴉𐴥𐴟𐴕 𐴐𐴤𐴡𐴣𐴀𐴡 𐴐𐴤𐴟𐴕𐴝 𐴌𐴟𐴉𐴝 𐴊𐴝𐴔𐴞 𐴈𐴦𐴡𐴌 𐴏𐴟𐴖𐴡𐴌 𐴁𐴠𐴒𐴧𐴤𐴞𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴐𐴗𐴠 𐴎𐴤𐴝 𐴉𐴝𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴥𐴡𐴑𐴟𐴔 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴅𐴟𐴕 𐴔𐴝𐴐𐴤𐴡𐴌 𐴶 𐴲 𐴃𐴝𐴌𐴥𐴞𐴑𐴡𐴃 𐴓𐴝𐴌𐴥𐴘𐴌 𐴋𐴡𐴌𐴡𐴌 𐴃𐴧𐴤𐴟 𐴁𐴝𐴏𐴞𐴁𐴤𐴡𐴓𐴧𐴝 , 𐴕𐴦𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴀𐴥𐴝𐴃 𐴉𐴥𐴟𐴕 𐴐𐴤𐴡𐴣𐴀𐴡 𐴐𐴤𐴟𐴕𐴝 𐴌𐴟𐴉𐴝 𐴊𐴝𐴔𐴞 𐴈𐴦𐴡𐴌 𐴏𐴟𐴖𐴡𐴌 𐴀𐴥𐴟𐴊𐴧𐴝 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 , 𐴀𐴝𐴌 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠𐴊𐴠 𐴏𐴞𐴏𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴖𐴝𐴉𐴠𐴏𐴢 𐴔𐴝𐴒𐴠𐴌 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , “ 𐴓𐴝𐴌𐴥𐴘𐴌 𐴋𐴡𐴌𐴡𐴌 𐴃𐴧𐴤𐴟 𐴁𐴝𐴏𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴉𐴝𐴌𐴝𐴌 𐴃𐴧𐴤𐴟 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴥𐴡𐴑𐴟𐴔 𐴊𐴞𐴘𐴥𐴠 , 𐴀𐴝𐴌 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝𐴌 𐴀𐴥𐴞𐴑𐴧𐴤𐴙𐴝 𐴀𐴝𐴣𐴀𐴝𐴌𐴝 𐴀𐴥𐴟𐴊𐴧𐴝 𐴐𐴤𐴝𐴀𐴞𐴅𐴧𐴤𐴡 𐴔𐴡𐴊𐴡𐴃 𐴒𐴡𐴌𐴥𐴞 𐴃𐴟𐴣𐴖𐴥𐴝𐴣𐴌𐴥𐴝𐴌𐴥𐴠 𐴉𐴡𐴣𐴀𐴡𐴏𐴝𐴘 𐴊𐴞𐴘𐴟𐴔 𐴁𐴡𐴓𐴞 𐴈𐴡𐴘𐴧𐴥𐴠 , 𐴃𐴡𐴀𐴡𐴘 𐴐𐴗𐴠 𐴎𐴤𐴝 𐴉𐴝𐴌𐴝𐴌 𐴃𐴞𐴕 𐴇𐴥𐴝𐴎𐴝𐴌𐴡𐴌 𐴁𐴦𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴌 𐴃𐴧𐴤𐴟 𐴕𐴦𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴀𐴝𐴊𐴤𐴝 𐴉𐴡𐴣𐴃𐴤𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴃𐴝𐴓𐴝𐴐𐴤𐴞 𐴒𐴡𐴌𐴥𐴞 , 𐴀𐴥𐴝𐴃 𐴉𐴥𐴟𐴕 , 𐴐𐴤𐴟𐴕𐴝 𐴌𐴟𐴉𐴝 𐴒𐴡𐴔 𐴈𐴦𐴡𐴌 𐴏𐴟𐴖𐴡𐴌 𐴉𐴞𐴣𐴊𐴤𐴝𐴃𐴧𐴟 𐴀𐴥𐴟𐴊𐴧𐴝 𐴑𐴤𐴟𐴣𐴖𐴝𐴛 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 ” 𐴁𐴡𐴓𐴞 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌 𐴃𐴟 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴃 𐴒𐴝𐴌𐴥𐴞𐴌 𐴀𐴠𐴑𐴏𐴥𐴞𐴋𐴤𐴠𐴕𐴡𐴃 𐴁𐴝𐴚𐴓𐴝𐴊𐴠𐴐𐴤𐴞 𐴊𐴟𐴘 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴃 𐴅𐴞𐴊𐴧𐴤𐴝 – 𐴔𐴡𐴊𐴞𐴕𐴝 𐴔𐴡𐴇𐴝 𐴏𐴥𐴡𐴍𐴡𐴑𐴡𐴃 , 𐴅𐴟𐴕 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑 𐴏𐴡𐴀𐴟𐴊𐴞𐴘𐴝𐴌 𐴄𐴝𐴙𐴔 𐴌𐴝𐴙𐴃𐴡𐴌 𐴱 𐴱 𐴁𐴝𐴎𐴠 𐴒𐴝𐴌𐴥𐴞 𐴀𐴠𐴑𐴏𐴥𐴞𐴋𐴤𐴠𐴕𐴡𐴃 𐴊𐴟𐴘 𐴎𐴡𐴕 𐴁𐴝𐴚𐴓𐴝𐴊𐴠𐴐𐴤𐴞 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴔𐴡𐴕𐴎𐴟𐴌 𐴕𐴝𐴔𐴡𐴌 𐴁𐴝𐴚𐴓𐴝𐴊𐴠𐴐𐴤𐴞 𐴀𐴠𐴑 𐴎𐴡𐴕 𐴁𐴠𐴐𐴤𐴞 𐴀𐴝𐴒𐴤𐴝𐴃 𐴉𐴝𐴘𐴧𐴠 , 𐴀𐴥𐴞𐴁𐴤𐴝𐴌𐴠 𐴀𐴠𐴈𐴥𐴡𐴕 𐴀𐴝𐴓 𐴉𐴥𐴝𐴇𐴥𐴝𐴊 𐴀𐴞𐴕𐴄𐴝𐴌 𐴕𐴥𐴠𐴐𐴕𐴥𐴠𐴓 𐴇𐴥𐴝𐴐𐴉𐴝𐴃𐴝𐴓𐴡𐴃 𐴀𐴠𐴓𐴝𐴅 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 / 𐴔𐴟𐴇𐴝𐴔𐴧𐴡𐴊 𐴔𐴟𐴇𐴥𐴞𐴘𐴟𐴊𐴧𐴞𐴕 𐴁𐴝𐴉𐴢 𐴕𐴟𐴌 𐴀𐴥𐴝𐴇𐴔𐴡𐴊 𐴁𐴡𐴐𐴢 𐴹 𐴲 𐴁𐴡𐴏𐴥𐴡𐴌 / 𐴔𐴟𐴇𐴝𐴔𐴧𐴡𐴊 𐴃𐴝𐴌𐴠𐴑 𐴁𐴝𐴉𐴢 𐴀𐴝𐴁𐴊𐴟𐴓 𐴑𐴡𐴌𐴞𐴔 𐴁𐴡𐴐𐴢 𐴷 𐴲 𐴁𐴡𐴏𐴥𐴡𐴌 , 𐴀𐴝𐴒𐴤𐴝𐴃 𐴉𐴝𐴘𐴧𐴥𐴠𐴊𐴠 𐴔𐴡𐴕𐴎𐴟𐴌 𐴐𐴤𐴡𐴣𐴀𐴡 𐴃𐴞𐴕𐴥𐴞 𐴎𐴡𐴕 𐴐𐴤𐴝𐴃𐴑𐴝𐴕𐴞𐴘𐴝𐴌 𐴔𐴝𐴕𐴥𐴟𐴙𐴐𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴏𐴗𐴠 𐴎𐴠𐴓𐴠𐴕𐴡𐴃 𐴉𐴝𐴕𐴥𐴞 𐴁𐴝𐴕𐴠 𐴔𐴠𐴍𐴞 𐴁𐴤𐴝𐴚𐴞 𐴊𐴟𐴘 𐴎𐴡𐴕𐴌 𐴔𐴡𐴗𐴃 𐴱𐴱

𐴏𐴗𐴠 𐴎𐴠𐴓𐴠𐴕 𐴊𐴠𐴐𐴤𐴡𐴌 𐴀𐴟𐴃𐴧𐴡𐴌 𐴉𐴟𐴑 𐴀𐴥𐴞𐴏𐴧𐴝𐴃 𐴒𐴡𐴃𐴡 𐴇𐴥𐴝𐴉𐴃𐴝𐴃 𐴀𐴥𐴡𐴘𐴧𐴠𐴊𐴠 𐴃𐴟𐴖𐴥𐴝𐴕𐴡𐴌 𐴉𐴥𐴟𐴣𐴖𐴝𐴣𐴃𐴞 , 𐴎𐴤𐴡𐴌 𐴁𐴠𐴐𐴤𐴞 𐴊𐴡𐴀𐴡𐴕𐴠 𐴔𐴠𐴍𐴞 𐴁𐴤𐴝𐴚𐴞 𐴊𐴟𐴘 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴀𐴠𐴑 𐴎𐴡𐴕 𐴀𐴥𐴝𐴣𐴎𐴞 𐴒𐴞𐴘𐴥𐴡𐴘 𐴁𐴡𐴓𐴞 , 𐴉𐴟𐴓𐴞𐴐𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱