𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴊𐴦𐴡𐴌 𐴃𐴡𐴓𐴡𐴌 𐴔𐴝𐴏𐴢 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴐𐴤𐴡𐴀𐴡𐴌 𐴁𐴡𐴌𐴔𐴥𐴝 𐴊𐴠𐴐𐴤𐴡𐴌 𐴉𐴡𐴏𐴥𐴞𐴔 𐴈𐴝𐴣𐴏𐴝𐴃 𐴁𐴝𐴚𐴓𐴝𐴊𐴠𐴐𐴢 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴁𐴡𐴖𐴋𐴝𐴌 𐴀𐴝𐴏𐴥𐴠𐴊𐴠 𐴀𐴠𐴑𐴧𐴤𐴝𐴕 𐴐𐴤𐴡𐴀𐴡𐴌 , 𐴀𐴥𐴠 𐴔𐴡𐴚𐴋𐴤𐴟 𐴐𐴤𐴡𐴀𐴡𐴌 𐴘𐴥𐴝𐴀𐴝𐴕𐴡𐴃 𐴁𐴦𐴠𐴐𐴢 𐴐𐴤𐴡𐴙𐴚𐴒𐴙𐴝 𐴌𐴟𐴇𐴝𐴙𐴚𐴒𐴙𐴝 𐴃𐴤𐴝𐴑𐴤𐴠 𐴀𐴝𐴌 𐴔𐴡𐴒𐴢 , 𐴔𐴟𐴌𐴟𐴚 ,𐴏𐴝𐴑 , 𐴏𐴝𐴔𐴧𐴥𐴗𐴝 , 𐴇𐴥𐴞𐴕𐴊𐴟 , 𐴎𐴝𐴃 𐴀𐴟𐴀𐴟𐴕 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴀𐴥𐴞𐴏𐴝𐴉𐴠 𐴃𐴤𐴝𐴑𐴤𐴠𐴊𐴠 𐴎𐴝𐴒𐴝 , 𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴎𐴦𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴀𐴥𐴠𐴑𐴧𐴡𐴓𐴠 𐴔𐴡𐴒𐴢 𐴀𐴥𐴡𐴑𐴧𐴡𐴓𐴡𐴌𐴠 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 𐴊𐴠𐴐𐴢 𐴏𐴥𐴡𐴉𐴝𐴘 𐴑𐴝𐴌𐴖𐴝𐴘𐴌 𐴕𐴝𐴔 𐴊𐴞𐴀𐴞 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔𐴡𐴌𐴠 𐴎𐴤𐴝𐴑 𐴎𐴤𐴝𐴑 𐴈𐴝𐴙𐴄𐴧𐴤𐴙𐴠 𐴔𐴝𐴙𐴅𐴧𐴤𐴙𐴠 , 𐴉𐴟𐴌𐴝 𐴊𐴞𐴘𐴥𐴠 𐴀𐴝𐴌 𐴔𐴝𐴘𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴡𐴓𐴡𐴃𐴑𐴝𐴌 𐴒𐴡𐴙𐴅𐴧𐴤𐴙𐴠 , 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴊𐴞𐴘𐴥𐴠 𐴀𐴟𐴒𐴧𐴤𐴗𐴝 𐴑𐴡𐴗𐴔𐴡𐴌 𐴖𐴡𐴌𐴠 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴈𐴥𐴡𐴃𐴡𐴔 𐴀𐴥𐴡𐴀𐴡𐴊𐴠 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴎𐴟𐴓𐴥𐴟𐴔 𐴀𐴝𐴏𐴥𐴠 𐴁𐴠𐴒𐴧𐴤𐴞𐴕 𐴒𐴡𐴙𐴅𐴧𐴤𐴙𐴠 , 𐴎𐴞𐴘𐴥𐴝𐴕𐴡𐴌 𐴕𐴡𐴃𐴞𐴅𐴝𐴃 𐴀𐴠𐴑 𐴔𐴡𐴓𐴞𐴘𐴥𐴟𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴊𐴠𐴐𐴢 𐴉𐴥𐴠𐴓𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌 𐴊𐴧𐴠 𐴀𐴝𐴣𐴐𐴄𐴡 𐴁𐴡𐴏𐴥𐴡𐴌 𐴉𐴟𐴌𐴝𐴌 , 𐴀𐴠𐴈𐴥𐴡𐴕 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴃 𐴁𐴡𐴌𐴔𐴥𐴝𐴌 𐴎𐴦𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴘𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 , 𐴔𐴥𐴟𐴌𐴥𐴟 𐴔𐴥𐴝 𐴉𐴟𐴑 𐴌𐴥𐴠𐴑𐴧𐴤𐴗𐴝𐴃 𐴃𐴤𐴝𐴑𐴤𐴠𐴊𐴠 / 𐴀𐴝𐴁𐴟 𐴏𐴡𐴀𐴦𐴞𐴊𐴡𐴌 𐴒𐴤𐴡𐴌𐴡𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴡𐴕𐴠 𐴃𐴞𐴕 𐴎𐴡𐴕 𐴎𐴤𐴠𐴌 𐴉𐴟𐴖𐴝𐴙𐴕𐴊𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝𐴃 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴀𐴝𐴌𐴑𐴝𐴕𐴡𐴃 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴀𐴥𐴡𐴘𐴧𐴠 𐴓𐴡𐴃𐴞 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴔𐴝𐴀𐴝𐴙𐴕 𐴁𐴟𐴔 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 , 𐴰 𐴱 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴰 𐴴 𐴎𐴡𐴕 𐴓𐴡𐴃 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴀𐴝𐴌 𐴁𐴠𐴐𐴤𐴝 𐴁𐴠𐴐𐴤𐴞 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴁𐴤𐴝𐴚𐴞 𐴒𐴞𐴘𐴥𐴡𐴘 𐴀𐴝𐴌 𐴉𐴟𐴌𐴞 𐴒𐴞𐴘𐴥𐴡𐴘 , 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴝𐴌𐴑𐴝𐴕𐴡𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴟𐴓𐴥𐴟𐴔𐴡𐴌𐴃𐴧𐴟 𐴀𐴝𐴎𐴝𐴊 𐴒𐴡𐴌𐴥𐴞𐴁𐴤𐴡𐴓𐴧𐴝 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴀𐴝𐴌 𐴀𐴝𐴌𐴑𐴝𐴕𐴞 𐴑𐴡𐴗𐴔 𐴁𐴠𐴒𐴧𐴤𐴟𐴕𐴡𐴌 𐴇𐴥𐴠𐴉𐴝𐴎𐴡𐴃𐴡𐴌 𐴎𐴞𐴔𐴧𐴝𐴊𐴝𐴌 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴝𐴕 𐴒𐴡𐴌𐴥𐴞 𐴁𐴝𐴦𐴊𐴠 𐴘𐴥𐴡 , 𐴏𐴡𐴓𐴠𐴌𐴊𐴧𐴠 𐴅𐴟𐴕 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴃 , 𐴋𐴡𐴌𐴟𐴕 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 ( 𐴀𐴝𐴌 𐴂𐴞 𐴅𐴞 ) 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴒𐴤𐴡𐴌 𐴁𐴝𐴌𐴞 𐴉𐴟𐴌𐴝 𐴊𐴡𐴀𐴡𐴕𐴡𐴌 𐴏𐴥𐴡𐴁𐴡𐴁𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌 𐴏𐴥𐴝𐴌𐴥𐴝 𐴀𐴥𐴡𐴘 𐴒𐴞𐴘𐴠 𐴒𐴤𐴡𐴘 𐴁𐴡𐴓𐴞 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴡𐴌 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴥𐴞𐴚 𐴀𐴡𐴚 𐴓𐴝𐴙𐴚 , 𐴏𐴥𐴟 𐴖𐴥𐴝𐴚 𐴐𐴤𐴡𐴣𐴀𐴡 𐴏𐴥𐴡 𐴎𐴡𐴕 𐴁𐴡𐴕 𐴒𐴡𐴌𐴥𐴞𐴁𐴤𐴝𐴌 𐴖𐴝𐴌𐴠𐴕 𐴁𐴝𐴀𐴞𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴇𐴥𐴡𐴑𐴟𐴔𐴡𐴃𐴞 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓𐴌 𐴀𐴝𐴊𐴝𐴓𐴡𐴃𐴡𐴃 𐴊𐴡𐴌𐴈𐴥𐴝𐴏𐴢 𐴱𐴱

𐴀𐴝𐴃𐴡𐴚𐴁𐴝𐴊𐴞 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 , 𐴏𐴥𐴟 𐴖𐴥𐴝𐴚 𐴐𐴤𐴡𐴣𐴀𐴡 𐴏𐴥𐴡 𐴎𐴡𐴕𐴡𐴌𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴀𐴝𐴐𐴤𐴔𐴞 𐴀𐴥𐴞𐴏𐴝𐴉𐴠 𐴁𐴡𐴕 𐴒𐴡𐴌𐴥𐴞𐴁𐴤𐴝𐴌 𐴖𐴝𐴌𐴠𐴕 𐴕𐴦𐴠𐴓𐴝𐴘 𐴊𐴞𐴀𐴞 𐴁𐴤𐴡𐴓𐴧𐴝 , 𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴇𐴥𐴡𐴑𐴟𐴔𐴡𐴃𐴞 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓𐴠 𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴀𐴝𐴊𐴝𐴓𐴡𐴃𐴡𐴃 𐴊𐴡𐴌𐴈𐴥𐴝𐴏𐴢 𐴃𐴟𐴓𐴥𐴞 𐴊𐴞𐴘𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌𐴅𐴠𐴕𐴄𐴤𐴞𐴕𐴝𐴃 𐴑𐴟𐴓𐴠 𐴊𐴟𐴕𐴞𐴘𐴝𐴘𐴌 𐴔𐴟𐴃𐴦𐴝𐴓𐴧𐴠𐴑 𐴀𐴞𐴕𐴏𐴦𐴝𐴉𐴢 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 𐴔𐴡𐴎𐴞𐴕 , 𐴀𐴞𐴕𐴑𐴟𐴖𐴝𐴌𐴞 𐴀𐴝𐴌 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴀𐴝𐴐𐴤𐴝𐴔𐴞 𐴁𐴡𐴙𐴕𐴧𐴥𐴙𐴠𐴊𐴠 , 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 , 𐴊𐴟𐴘𐴀𐴡𐴔 𐴕𐴠𐴃𐴝 / 𐴏𐴥𐴟 𐴖𐴥𐴝𐴚 , 𐴊𐴟𐴘𐴀𐴡𐴔 𐴁𐴟𐴆𐴤𐴙𐴟𐴑 𐴅𐴤𐴞 / 𐴀𐴡𐴚 𐴆𐴙𐴡 𐴎𐴤𐴡 , 𐴄𐴤𐴝𐴙𐴚 𐴔𐴥𐴟 𐴁𐴟𐴆𐴤𐴙𐴟𐴑 / 𐴔𐴡𐴚 𐴔𐴡𐴚 𐴏𐴥𐴟 , 𐴄𐴤𐴠 𐴔𐴥𐴝 𐴳 𐴳 𐴄𐴤𐴠 𐴔𐴥𐴝 𐴔𐴥𐴟 𐴁𐴟𐴔𐴥𐴟 𐴆𐴤𐴙𐴟𐴑 / 𐴀𐴡𐴚 𐴀𐴡𐴚 , 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴆𐴙𐴡 𐴆𐴙𐴠 , 𐴀𐴝𐴌 𐴉𐴝𐴌𐴝𐴌 𐴀𐴥𐴟𐴑𐴧𐴝𐴄𐴝 / 𐴀𐴡𐴚 𐴏𐴥𐴠𐴕 𐴔𐴥𐴞𐴘𐴥𐴝 , 𐴀𐴟𐴀𐴟𐴕𐴡𐴌𐴥𐴠 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴀𐴝𐴐𐴤𐴝𐴔𐴞 𐴀𐴥𐴞𐴏𐴝𐴉𐴠 𐴁𐴡𐴕 𐴒𐴡𐴌𐴥𐴞𐴁𐴤𐴝𐴌 𐴖𐴝𐴌𐴠𐴕 𐴕𐴦𐴠𐴓𐴝𐴘 𐴊𐴞𐴀𐴞 𐴁𐴡𐴓𐴧𐴥𐴝𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴀𐴝𐴊𐴝𐴓𐴡𐴃𐴡𐴃 𐴊𐴡𐴌𐴈𐴥𐴝𐴏𐴢 𐴃𐴟𐴓𐴥𐴞 𐴊𐴞𐴘𐴥𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴔𐴡𐴒𐴢 𐴁𐴝𐴒𐴞 𐴒𐴤𐴡𐴓𐴞 𐴉𐴝𐴌𐴞𐴁𐴤𐴡𐴊𐴠 𐴌𐴝𐴏𐴧𐴝𐴃 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 𐴱𐴱

𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌𐴊𐴧𐴠 𐴀𐴝𐴌𐴑𐴝𐴕𐴡𐴌 𐴉𐴡𐴏𐴥𐴞𐴔 𐴋𐴤𐴝𐴑𐴤𐴡𐴌 𐴁𐴡𐴖𐴋𐴝𐴌 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴒𐴤𐴡𐴓𐴞 𐴉𐴝𐴌𐴞𐴁𐴤𐴡𐴊𐴠 𐴌𐴝𐴏𐴧𐴝𐴃 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 , 𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴁𐴟𐴔 𐴀𐴥𐴡𐴑𐴧𐴡𐴓 𐴔𐴝𐴌𐴠𐴌 𐴁𐴡𐴓𐴞 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴀𐴠𐴕𐴋𐴞𐴓𐴧𐴝 𐴁𐴟𐴔 𐴔𐴝𐴌𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴌𐴠𐴌 𐴊𐴧𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴀𐴡𐴌 𐴊𐴧𐴠 𐴁𐴠𐴐𐴤𐴞 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴉𐴡𐴙𐴃𐴧𐴡 𐴊𐴞𐴕 𐴁𐴟𐴔 𐴔𐴝𐴌𐴠𐴌 𐴊𐴧𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴀𐴥𐴡𐴙𐴓𐴊𐴠 , 𐴐𐴗𐴠 𐴎𐴤𐴝 𐴒𐴤𐴗𐴝𐴚𐴡𐴌 𐴎𐴝𐴊𐴞 𐴉𐴝𐴌𐴝𐴚 , 𐴎𐴝𐴚 𐴃𐴟𐴓𐴝 , 𐴒𐴤𐴗𐴠𐴔 𐴛𐴝 , 𐴈𐴝𐴓𐴝 𐴃𐴟𐴓𐴞 , 𐴐𐴤𐴡𐴣𐴀𐴡 ( 𐴵 ) 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴥𐴠𐴃𐴤𐴠 𐴓𐴞𐴘𐴝 𐴉𐴝𐴌𐴝 , 𐴓𐴥𐴝𐴏𐴝 𐴉𐴝𐴌𐴝 , 𐴁𐴝𐴒𐴧𐴤𐴟𐴕𐴥𐴝 𐴉𐴝𐴌𐴝 𐴀𐴝𐴌 𐴕𐴥𐴝 𐴑𐴤𐴝 𐴑𐴤𐴝 𐴵 𐴓𐴡𐴔𐴁𐴤𐴡𐴌𐴡𐴌 𐴀𐴟𐴃𐴧𐴡𐴌 𐴋𐴤𐴝𐴑𐴤𐴠 𐴀𐴝𐴏𐴥𐴠𐴊𐴠 𐴎𐴟𐴓𐴥𐴝 𐴉𐴝𐴌𐴝 𐴀𐴞𐴀𐴞𐴕𐴡𐴃 𐴉𐴡𐴙𐴃𐴧𐴡 𐴊𐴞𐴕 𐴇𐴥𐴝𐴔𐴓𐴝 𐴒𐴡𐴌𐴥𐴝𐴃 𐴀𐴝𐴏𐴥𐴠 , 𐴀𐴠𐴕𐴋𐴞𐴓𐴧𐴝 𐴇𐴥𐴝𐴔𐴓𐴝 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴞𐴀𐴞𐴕𐴡𐴃 𐴅𐴟𐴕 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴰 𐴱 : 𐴶 𐴏𐴥𐴡 𐴁𐴝𐴎𐴠 𐴊𐴡𐴐𐴢 𐴔𐴞𐴓𐴥𐴡𐴄𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴇𐴥𐴝𐴔𐴓𐴝𐴃 𐴉𐴝𐴣𐴏𐴢 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞𐴌 𐴇𐴥𐴝𐴓𐴡𐴃𐴡𐴃 𐴎𐴞𐴕𐴊𐴞𐴒𐴞 𐴒𐴡𐴌𐴥𐴡𐴕𐴡𐴃 𐴔𐴡𐴅𐴁𐴟𐴌 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴊𐴟𐴖𐴥𐴝𐴐𐴞 𐴘𐴠 , 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴒𐴤𐴞𐴌𐴞 𐴌𐴝𐴙𐴑𐴧𐴤𐴙𐴠𐴊𐴠 𐴒𐴤𐴡𐴎𐴧𐴝𐴌 𐴀𐴠𐴓𐴝𐴑𐴝𐴃 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴀𐴡𐴘𐴌𐴝𐴕 𐴀𐴥𐴡𐴘𐴧𐴝 𐴎𐴝𐴒𐴝 𐴀𐴝𐴌 𐴁𐴞𐴓𐴋𐴤𐴞𐴚 𐴁𐴤𐴝𐴚𐴝 𐴀𐴥𐴡𐴑𐴧𐴡𐴓𐴡𐴌 𐴔𐴝𐴎𐴤𐴠 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 𐴀𐴥𐴡𐴘𐴧𐴠𐴊𐴠 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌 𐴁𐴝𐴁𐴡𐴃𐴠 𐴈𐴡𐴘𐴧𐴥𐴠𐴊𐴠 , 𐴒𐴤𐴡𐴎𐴧𐴝𐴃 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓 𐴁𐴡𐴊𐴧𐴝𐴐𐴢 𐴒𐴡𐴌𐴥𐴝 𐴕𐴡 𐴎𐴝𐴀𐴝 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴡𐴐𐴤𐴝𐴕𐴃𐴞𐴌 𐴇𐴥𐴝𐴓𐴡𐴃𐴡𐴃 𐴃𐴤𐴝𐴑𐴤𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 , 𐴉𐴥𐴡𐴓𐴡𐴏𐴃𐴞𐴕𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴊𐴡𐴃 𐴒𐴡𐴌𐴥𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴡𐴉𐴥𐴞𐴏𐴡𐴌 𐴎𐴞𐴔𐴧𐴝𐴊𐴝𐴌 / 𐴓𐴟𐴖𐴝𐴙𐴏𐴢 𐴖𐴝𐴄𐴠𐴌𐴥𐴠𐴆𐴠 𐴕𐴞𐴕𐴊𐴝 𐴒𐴡𐴌𐴥𐴞 𐴈𐴡𐴘𐴧𐴥𐴠𐴊𐴠 , 𐴒𐴤𐴡𐴎𐴧𐴝𐴃 𐴁𐴡𐴐𐴤𐴡𐴃𐴞 𐴒𐴡𐴌𐴥𐴡𐴕𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝 , 𐴇𐴝𐴃𐴧𐴤𐴝 𐴑𐴤𐴠 𐴈𐴥𐴝𐴘𐴁𐴡𐴓𐴧𐴝 𐴏𐴥𐴝𐴉𐴢 𐴉𐴝𐴕𐴥𐴞 𐴀𐴥𐴟𐴊𐴧𐴝 𐴕𐴥𐴝𐴘 𐴱𐴱