𐴲 . 𐴱 𐴔𐴡𐴓𐴞𐴘𐴥𐴟𐴕 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴌 𐴉𐴞𐴍𐴥𐴡𐴌 𐴖𐴡𐴌𐴠 𐴉𐴟𐴣𐴎𐴤𐴝 𐴱𐴱

𐴊𐴟𐴘𐴀𐴡𐴔 𐴀𐴦𐴝𐴓𐴡𐴔𐴞 𐴓𐴝𐴌𐴥𐴝𐴘𐴌 𐴁𐴦𐴝𐴊𐴠 𐴊𐴟𐴕𐴞𐴘𐴝𐴘𐴌 𐴁𐴡𐴀𐴡𐴃 𐴊𐴠𐴐𐴤𐴡𐴡𐴃𐴧𐴟 , 𐴓𐴡𐴒𐴢 𐴁𐴤𐴡𐴒𐴢 𐴲 𐴲 𐴱 𐴔𐴡𐴓𐴞𐴘𐴥𐴟𐴕𐴥𐴡𐴌 𐴁𐴦𐴠𐴐𐴢 𐴔𐴝𐴕𐴥𐴟𐴙𐴐𐴢 𐴒𐴤𐴡𐴌 𐴀𐴝𐴌 𐴃𐴤𐴡𐴌 𐴏𐴥𐴝𐴌𐴥𐴝 𐴀𐴥𐴡𐴘 𐴒𐴞𐴀𐴞𐴓 𐴒𐴤𐴡𐴘 , 𐴀𐴥𐴟𐴀𐴟𐴕𐴟𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴀𐴡𐴙𐴕𐴧𐴡 𐴊𐴠𐴐𐴤𐴡𐴃 𐴎𐴝𐴘 𐴌𐴞𐴉𐴟𐴎𐴞 𐴁𐴡𐴕𐴞 𐴃𐴤𐴝𐴑𐴤𐴝 𐴉𐴡𐴌𐴠𐴌𐴊𐴧𐴠 𐴀𐴝𐴌 𐴊𐴟𐴑𐴧𐴤𐴡𐴌 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌 𐴉𐴡𐴌𐴠𐴌 𐴊𐴧𐴠 𐴳 𐴴 𐴔𐴡𐴓𐴞𐴘𐴥𐴟𐴕 𐴓𐴡𐴃𐴞 𐴔𐴝𐴙𐴕𐴐𐴤𐴙𐴠 𐴒𐴡𐴃𐴡 𐴈𐴝𐴙𐴓𐴧𐴝 𐴅𐴟𐴕 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴀𐴦𐴝𐴓𐴡𐴔𐴞 𐴌𐴞𐴉𐴟𐴎𐴞𐴌 𐴊𐴞𐴕 𐴁𐴝𐴕𐴝𐴘𐴧𐴥𐴠 , 𐴀𐴥𐴠 𐴔𐴡𐴖𐴑𐴝𐴃 𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴎𐴦𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴘𐴠 𐴊𐴠𐴐𐴢 𐴏𐴥𐴡𐴉𐴥𐴝𐴘 𐴑𐴝𐴌𐴖𐴝𐴘𐴌 𐴕𐴝𐴔 𐴊𐴞𐴀𐴞 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔𐴡𐴌𐴥𐴠 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴤𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴕𐴃𐴟 , 𐴉𐴡𐴌𐴝𐴕 𐴁𐴝𐴏𐴝𐴘 𐴲 . 𐴱 𐴔𐴡𐴓𐴞𐴘𐴥𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝 𐴀𐴟𐴑𐴤𐴞𐴘𐴝 𐴀𐴝𐴌 𐴄𐴠𐴑𐴕𐴝𐴉𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴌 , 𐴀𐴠𐴈𐴥𐴡𐴕𐴡𐴌 𐴀𐴡𐴑𐴃𐴤𐴡𐴃 𐴊𐴟𐴕𐴞𐴘𐴝𐴘𐴃 𐴀𐴥𐴡𐴑𐴧𐴡𐴓𐴡𐴌 𐴃𐴧𐴤𐴟 𐴁𐴤𐴝𐴌𐴥𐴡 𐴋𐴡𐴣𐴀𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔 , 𐴀𐴥𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴠 𐴘𐴥𐴡 𐴀𐴦𐴝𐴓𐴡𐴔𐴞 𐴌𐴞𐴉𐴟𐴎𐴞 𐴊𐴞𐴕𐴡𐴃 , 𐴊𐴞𐴕 𐴁𐴝𐴕𐴝𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴤𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴎𐴝𐴒𐴝 𐴄𐴤𐴞𐴑 𐴒𐴡𐴌𐴥𐴞 𐴊𐴞𐴀𐴞 𐴁𐴡𐴓𐴧𐴥𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌𐴡𐴎𐴢 𐴱𐴱

𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴇𐴥𐴠𐴉𐴝𐴎𐴡𐴃 𐴀𐴝𐴌 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴤𐴞 𐴉𐴝𐴌𐴠 𐴉𐴥𐴝𐴀𐴝𐴕 , 𐴎𐴝𐴒𐴝 𐴄𐴤𐴞𐴑 𐴒𐴡𐴌𐴥𐴞 𐴀𐴥𐴡𐴃 𐴒𐴡𐴌𐴥𐴞 𐴊𐴞𐴀𐴞 𐴁𐴡𐴓𐴧𐴥𐴝 𐴐𐴤𐴡𐴣𐴀𐴡 𐴏𐴝𐴙𐴌 𐴒𐴤𐴝𐴕 𐴐𐴡𐴌𐴥𐴡𐴃 𐴓𐴡𐴘 , 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌 𐴉𐴝𐴄𐴞 𐴏𐴥𐴡𐴖𐴧𐴝 𐴘𐴠 , 𐴌𐴞𐴉𐴟𐴎𐴞𐴌 𐴀𐴦𐴝𐴓𐴡𐴔𐴞 𐴊𐴞𐴕 𐴅𐴟𐴕 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌𐴑𐴝𐴕𐴡𐴃 𐴀𐴡𐴎𐴞𐴌𐴝𐴕𐴞 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴇𐴥𐴠𐴉𐴝𐴎𐴡𐴃 𐴏𐴥𐴝𐴌𐴥𐴝 𐴀𐴥𐴝𐴣𐴍𐴡𐴌 𐴓𐴝𐴃𐴤𐴞 𐴒𐴤𐴝𐴣𐴍𐴡𐴌 𐴑𐴞𐴓 𐴈𐴥𐴝𐴀𐴝𐴃 𐴀𐴝𐴏𐴥𐴠𐴊𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 , 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴉𐴡𐴙𐴃𐴧𐴡 𐴊𐴞𐴕 𐴑𐴤𐴟𐴕 𐴀𐴥𐴡𐴀𐴡𐴌 𐴁𐴡𐴓𐴞 , 𐴁𐴝𐴚𐴓𐴝𐴊𐴠𐴐𐴢 𐴑𐴟𐴃𐴤𐴟𐴉𐴝𐴓𐴡𐴚 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠 ( 𐴀𐴠 𐴀𐴝𐴌 𐴖𐴝𐴘 𐴀𐴠𐴉𐴢 ) 𐴀𐴝𐴌𐴑𐴝𐴕 𐴌𐴟𐴇𐴝𐴙𐴚𐴒𐴙𐴝 𐴘𐴦𐴟𐴃 𐴉𐴟𐴌𐴝𐴔𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴓𐴧𐴝 𐴀𐴝𐴌𐴑𐴝𐴕 𐴌𐴟𐴇𐴝𐴙𐴚𐴒𐴙𐴝 𐴘𐴦𐴟𐴃 𐴉𐴟𐴌𐴝𐴔 ( 𐴀𐴠 𐴀𐴝𐴌 𐴖𐴝𐴘 𐴀𐴠𐴉𐴢 ) 𐴌𐴟𐴇𐴝𐴙𐴚𐴒𐴙𐴝 𐴘𐴦𐴟𐴃 𐴀𐴠𐴏𐴟𐴏𐴥𐴞𐴘𐴠𐴐𐴤𐴠𐴕 ( 𐴀𐴝𐴌 𐴖𐴝𐴘 𐴀𐴠 ) 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴝𐴌 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝𐴙𐴕𐴊𐴤𐴡𐴌 𐴀𐴝𐴁𐴝𐴏𐴢 ( 𐴖𐴞 𐴀𐴝𐴌 𐴋𐴝𐴁𐴓𐴙𐴟 𐴀𐴠𐴏𐴢 ) 𐴉𐴝𐴄𐴞 𐴀𐴟𐴀𐴟𐴕 𐴐𐴤𐴡𐴣𐴀𐴡 𐴏𐴥𐴡 𐴉𐴝𐴄𐴞 𐴘𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴀𐴝𐴌 𐴀𐴞𐴕𐴏𐴦𐴝𐴕𐴞 𐴀𐴞𐴎𐴧𐴡𐴃 𐴐𐴤𐴡𐴌𐴔𐴝𐴕 𐴓𐴡𐴘 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞 𐴁𐴤𐴡𐴓𐴧𐴝 , 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴋𐴝𐴀𐴝𐴘 𐴋𐴝𐴀𐴝𐴘 𐴎𐴤𐴝𐴑𐴧𐴗𐴝 𐴈𐴝𐴍𐴝 𐴔𐴝𐴌𐴝𐴌 𐴀𐴞𐴕𐴏𐴦𐴝𐴉𐴢 𐴉𐴝𐴘 𐴁𐴡𐴓𐴧𐴥𐴝 , 𐴀𐴞𐴀𐴞𐴕 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴝𐴃𐴡𐴚𐴁𐴝𐴊𐴞𐴌 𐴐𐴤𐴞𐴑𐴝𐴌 𐴁𐴝𐴕𐴝𐴌 𐴊𐴧𐴠 𐴀𐴝𐴌 𐴔𐴝𐴌𐴞 𐴉𐴥𐴠𐴓𐴝𐴌 𐴊𐴧𐴠 𐴀𐴥𐴞𐴀𐴞𐴕𐴡𐴌𐴥𐴠 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴌𐴔𐴥𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴓𐴧𐴥𐴝 𐴵 𐴱 𐴔𐴡𐴓𐴞𐴘𐴥𐴟𐴕 ( 𐴘𐴟𐴌𐴟 ) 𐴔𐴡𐴊𐴡𐴃 𐴱𐴱

𐴁𐴡𐴌𐴔𐴥𐴝𐴌 𐴁𐴤𐴟𐴃𐴤𐴡𐴌𐴠 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴔𐴡𐴊𐴡𐴃𐴡𐴌 𐴀𐴟𐴉𐴡𐴎𐴟𐴑𐴃𐴡 𐴀𐴥𐴡𐴘𐴧𐴥𐴠𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴀𐴝𐴌 𐴁𐴡𐴌𐴔𐴥𐴝𐴌 𐴁𐴝𐴀𐴝𐴌𐴠 𐴀𐴡𐴙𐴕𐴧𐴡 𐴊𐴠𐴐𐴤𐴡𐴃 𐴊𐴤𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴠𐴌 𐴊𐴧𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴓𐴧𐴥𐴝 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃 𐴀𐴥𐴞𐴏𐴝𐴉𐴠 𐴵 𐴱 𐴔𐴡𐴓𐴞𐴘𐴥𐴟𐴕 𐴘𐴟𐴌𐴟 𐴔𐴡𐴊𐴡𐴃 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 , ( 𐴀𐴞 𐴘𐴟 ) 𐴘𐴟𐴌𐴟𐴂𐴢 𐴏𐴥𐴡𐴔𐴡𐴒𐴤𐴝 𐴘𐴠 𐴀𐴥𐴝𐴓𐴡𐴔𐴞 𐴌𐴞𐴉𐴟𐴎𐴞 𐴊𐴞𐴕 𐴅𐴟𐴕 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , ( 𐴀𐴞 𐴘𐴟 ) 𐴏𐴥𐴡𐴔𐴡𐴒𐴤𐴝 𐴘𐴠 𐴔𐴡𐴊𐴡𐴃 𐴒𐴡𐴙𐴅𐴧𐴤𐴙𐴠 𐴊𐴠 𐴄𐴞𐴛𐴝 𐴀𐴥𐴟𐴀𐴟𐴕 , 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴊𐴤𐴝𐴘 𐴒𐴞𐴘𐴥𐴡𐴘 𐴊𐴠 𐴌𐴞𐴉𐴟𐴎𐴞 𐴀𐴥𐴞𐴃𐴤𐴝𐴌𐴝𐴌 𐴓𐴧𐴝 𐴈𐴥𐴝𐴕𐴝 𐴉𐴝𐴕𐴥𐴞 , 𐴁𐴝𐴐𐴤𐴝 𐴁𐴝𐴌𐴞 𐴀𐴝𐴌 𐴎𐴡𐴌𐴟𐴌𐴞 𐴏𐴠𐴇𐴥𐴠𐴃𐴡𐴌 𐴇𐴥𐴠𐴉𐴝𐴎𐴡𐴃𐴡𐴌 𐴁𐴝𐴁𐴡𐴃𐴠 𐴈𐴥𐴡𐴌𐴡𐴏𐴢 𐴒𐴡𐴌𐴥𐴝 𐴎𐴝𐴘𐴁𐴡𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴞𐴀𐴞𐴕 𐴁𐴦𐴝𐴊𐴠 𐴔𐴠𐴍𐴞𐴃 𐴒𐴝𐴣𐴌𐴝𐴘𐴧𐴥𐴠𐴊𐴠 𐴔𐴝𐴀𐴝𐴙𐴕 𐴁𐴟𐴔 𐴀𐴥𐴡𐴑𐴧𐴡𐴓 𐴏𐴥𐴝𐴉𐴢 𐴒𐴡𐴌𐴥𐴞𐴁𐴤𐴡𐴓𐴧𐴥𐴝 𐴀𐴝𐴁𐴧𐴝𐴌 𐴔𐴡𐴊𐴡𐴃 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴀𐴠 𐴂𐴡𐴌𐴟𐴒𐴠𐴌𐴝𐴔𐴡𐴃 𐴁𐴡𐴌𐴔𐴥𐴝 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴠 𐴌𐴞𐴉𐴟𐴎𐴞 𐴀𐴥𐴡𐴘𐴧𐴠𐴊𐴠 𐴀𐴥𐴟𐴀𐴟𐴕 𐴐𐴤𐴡𐴣𐴀𐴡 , 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴊𐴤𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴌𐴞𐴉𐴟𐴎𐴞 𐴁𐴡𐴕𐴞 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴧𐴥𐴝 𐴀𐴥𐴟𐴊𐴧𐴝 𐴔𐴡𐴊𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌𐴑𐴝𐴕𐴡𐴃 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴀𐴥𐴠𐴍𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴝𐴌𐴝 𐴈𐴝𐴍𐴝 𐴁𐴝𐴌𐴥𐴠𐴌 𐴁𐴡𐴓𐴞𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴂𐴥𐴠𐴕 𐴄𐴦𐴡 𐴂𐴡𐴌𐴝𐴚 𐴀𐴝𐴌 𐴎𐴝𐴔 𐴃𐴡𐴓𐴞𐴃 𐴌𐴟𐴇𐴝𐴙𐴚𐴒𐴙𐴝 𐴴 𐴎𐴡𐴕 𐴐𐴤𐴡𐴇𐴞𐴊 , 𐴸 𐴱 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴂𐴥𐴠𐴕 𐴄𐴦𐴡 𐴂𐴡𐴌𐴝𐴚 𐴉𐴝𐴌𐴝 𐴀𐴝𐴌 𐴎𐴝𐴔 𐴃𐴡𐴓𐴞 𐴉𐴝𐴌𐴝𐴃 , 𐴅𐴟𐴕 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑 𐴀𐴥𐴝𐴣𐴎𐴡𐴙𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴳 : 𐴵 𐴁𐴝𐴎𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴊𐴡𐴌𐴔𐴞𐴘𐴝𐴕𐴡𐴃 𐴏𐴡𐴙𐴓𐴧𐴥𐴠𐴌 𐴊𐴧𐴠 𐴓𐴝𐴌𐴥𐴝𐴘𐴃 𐴴 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴀𐴝𐴌 𐴸 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴃𐴡𐴌𐴉𐴥𐴡𐴃𐴧𐴟 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴝 𐴀𐴥𐴡𐴘𐴧𐴠𐴊𐴠 𐴀𐴥𐴞𐴀𐴞𐴕 𐴉𐴥𐴟𐴍𐴥𐴞 , 𐴂𐴥𐴠𐴕 𐴄𐴦𐴡 𐴂𐴡𐴌𐴝𐴚 𐴉𐴝𐴌𐴝𐴃 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 𐴀𐴝𐴌 𐴲 𐴱 𐴎𐴡𐴕 𐴒𐴤𐴝𐴙𐴓 , 𐴀𐴝𐴌 𐴎𐴝𐴔 𐴃𐴡𐴓𐴞 𐴉𐴝𐴌𐴝𐴃 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 𐴀𐴝𐴌 𐴶 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴉𐴝𐴕𐴥𐴞𐴁𐴝𐴕𐴡𐴌 𐴎𐴡𐴌𐴞𐴘𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴸 𐴓𐴝𐴑𐴤𐴡𐴌 𐴖𐴡𐴌𐴠 𐴔𐴝𐴕𐴥𐴟𐴙𐴐𐴢 𐴓𐴟𐴏𐴧𐴝𐴕𐴞𐴃 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴟𐴃𐴧𐴡𐴌 𐴉𐴟𐴒𐴡𐴌 𐴀𐴥𐴞𐴏𐴧𐴝𐴌 𐴐𐴤𐴞𐴓𐴡𐴄𐴡𐴌 𐴀𐴠𐴓𐴝𐴑𐴝𐴃 𐴎𐴤𐴡𐴌 𐴁𐴠𐴐𐴤𐴞 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴀𐴥𐴡𐴘𐴧𐴠 𐴁𐴡𐴓𐴞 , 𐴅𐴟𐴕 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴞 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴕 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴉𐴝𐴕𐴥𐴞 𐴁𐴝𐴕𐴡𐴌 𐴎𐴡𐴌𐴞𐴘𐴝 𐴸 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴓𐴟𐴏𐴧𐴝𐴕𐴞𐴃 𐴀𐴝𐴏𐴥𐴠 𐴁𐴡𐴓𐴞 , 𐴐𐴤𐴞𐴓𐴡𐴄 𐴋𐴞𐴐𐴄𐴤𐴞𐴑𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴇𐴥𐴡𐴓𐴝 𐴊𐴞𐴀𐴞 𐴁𐴝𐴚𐴓𐴝𐴊𐴠𐴐𐴤𐴞 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴢 ( 𐴘𐴟 𐴀𐴠𐴕 𐴁𐴞 ) 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴐𐴤𐴞𐴓𐴡𐴄 𐴀𐴠𐴓𐴝𐴑𐴝𐴌 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴀𐴠𐴑 𐴀𐴝𐴣𐴍𐴥𐴟 𐴉𐴝𐴕𐴥𐴞𐴃 𐴀𐴥𐴝𐴣𐴍𐴝 𐴀𐴥𐴟𐴣𐴍𐴝 𐴒𐴡𐴌𐴥𐴝 𐴉𐴡𐴌𐴠𐴌 𐴀𐴝𐴌 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴒𐴤𐴡𐴌𐴡𐴃 𐴉𐴝𐴕𐴥𐴞 𐴒𐴤𐴡𐴙𐴓𐴧 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴞𐴕𐴞 𐴎𐴤𐴗𐴠𐴓𐴥𐴝𐴌 𐴉𐴝𐴣𐴏𐴢 𐴓𐴝𐴑 𐴆𐴝𐴓𐴞𐴆 𐴇𐴥𐴝𐴎𐴝𐴌 𐴌𐴞𐴉𐴟𐴎𐴞𐴌𐴥𐴠 𐴑𐴟𐴓𐴠𐴔𐴁𐴞𐴘𐴝 𐴘𐴠 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴃𐴤𐴝𐴑𐴤𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴊𐴞𐴀𐴞𐴁𐴡 𐴱𐴱

𐴑𐴟𐴓𐴠𐴔𐴁𐴞𐴘𐴝 𐴊𐴠𐴐𐴤𐴡𐴃 𐴃𐴤𐴝𐴑𐴠𐴌 𐴊𐴧𐴠 𐴁𐴡𐴐𐴢 𐴕𐴥𐴡 𐴉𐴟𐴌𐴝𐴊𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴑𐴡𐴕𐴄𐴟𐴌𐴟𐴓 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 , 𐴁𐴞𐴕𐴞 𐴎𐴤𐴗𐴠𐴓𐴥𐴝𐴌 𐴰 𐴰 𐴰 𐴰 𐴴 𐴵 𐴎𐴡𐴕 𐴉𐴡𐴌𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴡𐴌𐴠 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴃𐴤𐴝𐴑𐴤𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴊𐴞𐴀𐴞𐴁𐴡 𐴁𐴡𐴓𐴞 , 𐴑𐴟𐴓𐴠𐴔𐴁𐴞𐴘𐴝𐴌 𐴉𐴡𐴌𐴁𐴤𐴝𐴐𐴞𐴌 𐴔𐴟𐴃𐴦𐴝𐴓𐴧𐴠𐴑𐴝 𐴀𐴠𐴅𐴤𐴠𐴕𐴏𐴞 𐴘𐴠 𐴅𐴟𐴕 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱