𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴀𐴝𐴃𐴠 𐴈𐴝𐴣𐴏𐴥𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴓𐴝𐴌𐴥𐴝𐴘 𐴃𐴠𐴎 𐴀𐴥𐴡𐴘𐴧𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴏𐴞𐴇𐴟 𐴆𐴤𐴗𐴠𐴚 𐴉𐴝𐴌𐴝𐴃𐴧𐴟 𐴌𐴡𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕 𐴕𐴦𐴠𐴓𐴞 𐴎𐴝𐴘𐴃𐴡 𐴒𐴤𐴡𐴘 𐴈𐴡𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴊𐴡𐴀𐴡𐴙𐴕 𐴀𐴠𐴓𐴝𐴑𐴝𐴌 𐴁𐴝𐴒𐴧𐴤𐴟𐴕𐴥𐴝 𐴉𐴝𐴌𐴝 , 𐴛𐴡𐴚 𐴆𐴤𐴙𐴡𐴚 𐴉𐴝𐴌𐴝 𐴀𐴝𐴌 𐴂𐴥𐴠𐴕 𐴄𐴦𐴡 𐴂𐴡𐴌𐴝𐴚 , 𐴉𐴝𐴌𐴝 𐴀𐴞𐴀𐴞𐴕𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴥𐴟𐴌𐴥𐴟 𐴏𐴟 𐴒𐴞𐴌𐴥𐴞𐴃 𐴀𐴝𐴏𐴥𐴠𐴊𐴠 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞 𐴕𐴥𐴝 𐴑𐴤𐴝 𐴑𐴤𐴝 (𐴵 ) 𐴓𐴡𐴔𐴁𐴤𐴡𐴌𐴃𐴧𐴟 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴝𐴃 𐴀𐴝𐴏𐴥𐴠 , 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴅𐴟𐴕 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 , 𐴁𐴝𐴒𐴧𐴤𐴟𐴕𐴥𐴝 𐴉𐴝𐴌𐴝𐴃 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴃𐴞𐴕 𐴁𐴝𐴌 𐴁𐴟𐴔𐴁𐴝𐴌𐴞 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝 𐴏𐴞𐴇𐴟 𐴆𐴤𐴗𐴠𐴚 𐴒𐴤𐴗𐴝𐴚𐴡𐴌 𐴇𐴥𐴝𐴁𐴞 𐴉𐴝𐴌𐴝𐴌 𐴊𐴡𐴀𐴡𐴙𐴕 𐴉𐴝𐴌𐴝 , 𐴔𐴝𐴎𐴤𐴡𐴌 𐴉𐴝𐴌𐴝 𐴀𐴝𐴌 𐴉𐴟𐴑 𐴉𐴝𐴌𐴝 , 𐴀𐴞𐴀𐴞𐴕𐴡𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴟𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 , 𐴔𐴡𐴒𐴢 𐴁𐴝𐴒𐴢 𐴘𐴠 𐴅𐴟𐴕 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴰 𐴱 𐴁𐴝𐴎𐴡𐴌 𐴁𐴤𐴟𐴃𐴤𐴡𐴌𐴥𐴠 𐴉𐴝𐴌𐴝 𐴏𐴥𐴝𐴌𐴥𐴞 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 , 𐴀𐴝𐴈𐴥𐴠𐴌𐴞 𐴖𐴝𐴌𐴕𐴥𐴞𐴕 𐴊𐴞𐴘𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴟𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴏𐴞𐴇𐴟 𐴆𐴤𐴗𐴠𐴚 , 𐴂𐴥𐴠𐴕𐴄𐴦𐴡 𐴒𐴤𐴞𐴌𐴥𐴞 , 𐴀𐴝𐴌 𐴛𐴡𐴚 𐴆𐴤𐴙𐴡𐴚 , 𐴉𐴝𐴌𐴝 𐴀𐴞𐴀𐴞𐴕 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴉𐴝𐴌𐴝 𐴀𐴥𐴡𐴑𐴧𐴡𐴓 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴧𐴟 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴝𐴀𐴝𐴙𐴕 𐴁𐴟𐴔 𐴁𐴟𐴖𐴥𐴝 𐴒𐴡𐴌𐴥𐴝𐴘𐴧𐴠 𐴁𐴡𐴓𐴞 𐴀𐴝𐴉𐴖𐴝 𐴈𐴥𐴡𐴁𐴡𐴌 𐴀𐴠𐴑𐴧𐴤𐴝𐴕 𐴀𐴥𐴡 𐴕𐴦𐴠𐴙𐴓𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴕 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃 𐴏𐴝𐴙𐴌 𐴔𐴝𐴙𐴓𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴟𐴓𐴔𐴝𐴕𐴡𐴌 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴝𐴕𐴝 𐴉𐴥𐴟𐴕𐴞 𐴏𐴝𐴀𐴝𐴘 𐴏𐴞𐴃𐴤𐴞 𐴁𐴟𐴔 𐴊𐴟𐴖𐴥𐴝 𐴔𐴝𐴙𐴅𐴧𐴤𐴙𐴠 , 𐴎𐴞𐴀𐴞𐴕 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 𐴒𐴤𐴡𐴌 𐴀𐴠𐴑𐴧𐴤𐴝𐴕 𐴀𐴝𐴌 𐴏𐴥𐴟𐴖𐴝𐴌𐴞 𐴒𐴝𐴏𐴢 𐴀𐴥𐴡𐴑𐴧𐴡𐴓 𐴁𐴤𐴝𐴚𐴞 𐴏𐴟𐴌𐴞 𐴕𐴝𐴐𐴢 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴈𐴥𐴝𐴌𐴝𐴃𐴧𐴟 𐴈𐴥𐴝𐴌𐴝 𐴃𐴡𐴌𐴝 𐴃𐴡𐴌𐴞 𐴔𐴝𐴕𐴥𐴟𐴙𐴐𐴢 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴤𐴝𐴃 𐴀𐴠𐴓𐴝𐴕 𐴁𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴝𐴚𐴓𐴝 𐴐𐴤𐴘𐴒𐴡𐴌 𐴒𐴤𐴟𐴓𐴝 𐴓𐴡𐴘 𐴔𐴟𐴑𐴤𐴝 𐴔𐴟𐴑𐴤𐴞 𐴀𐴝𐴏𐴥𐴠𐴊𐴠 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌 𐴒𐴤𐴝𐴣𐴄𐴞 𐴓𐴡𐴒𐴢 𐴁𐴤𐴡𐴒𐴢 𐴁𐴠𐴒𐴧𐴤𐴟𐴕 , 𐴔𐴡𐴒𐴢 𐴁𐴝𐴒𐴒𐴞 𐴘𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 , 𐴀𐴠𐴈𐴥𐴡𐴕 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴀𐴝𐴌 𐴔𐴡𐴚𐴋𐴤𐴟𐴌 𐴀𐴝𐴃𐴌𐴝𐴉𐴡𐴃 , 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴃𐴡𐴃 𐴁𐴝𐴑𐴞 𐴀𐴝𐴏𐴥𐴠𐴊𐴠 𐴒𐴤𐴝𐴣𐴄𐴞 𐴁𐴠𐴒𐴧𐴤𐴞𐴕𐴡𐴌𐴥𐴠 𐴏𐴥𐴝𐴉𐴢 𐴒𐴡𐴌𐴥𐴞 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴂𐴠𐴓𐴝𐴕 𐴂𐴡𐴌𐴟𐴒𐴠𐴌𐴝𐴔 𐴉𐴥𐴞𐴄 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴡𐴚𐴋𐴤𐴟 𐴐𐴤𐴡𐴀𐴡𐴌𐴡 𐴌𐴥𐴠 𐴀𐴥𐴞𐴃𐴤𐴝𐴌𐴥𐴝𐴌 𐴒𐴤𐴝𐴣𐴄𐴞 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴁𐴡𐴀𐴡𐴃 𐴊𐴠𐴌𐴞 𐴀𐴥𐴡𐴘𐴃𐴠 𐴃𐴡𐴘𐴧𐴝𐴌𐴞 𐴒𐴡𐴌𐴥𐴠𐴌 , 𐴖𐴡𐴌𐴠 𐴈𐴟𐴀𐴥𐴝 𐴒𐴞𐴘𐴠𐴊𐴠 𐴒𐴤𐴝𐴣𐴄𐴞 𐴀𐴥𐴞𐴀𐴞𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴃𐴧𐴤𐴝𐴃 𐴓𐴝𐴌𐴥𐴝𐴘 𐴒𐴡𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘 𐴁𐴤𐴡𐴊𐴠 𐴀𐴥𐴠𐴃𐴡𐴓𐴧𐴝 , 𐴌𐴝𐴏𐴧𐴝 𐴀𐴥𐴡𐴑𐴧𐴡𐴓𐴡𐴃 𐴀𐴝𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴃 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓 , 𐴀𐴝𐴌 𐴒𐴤𐴡𐴌𐴡𐴌 𐴏𐴥𐴝𐴃𐴡𐴌 𐴖𐴡𐴌𐴠 𐴏𐴠𐴕𐴥𐴝𐴘𐴂𐴥𐴝𐴌 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓 , 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴔𐴞𐴑𐴧𐴤𐴙𐴝 𐴎𐴝𐴒𐴝 𐴀𐴥𐴡𐴑𐴧𐴡𐴓 , 𐴀𐴟𐴖𐴡𐴌𐴠 𐴈𐴟𐴀𐴥𐴝 𐴒𐴞𐴘𐴥𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴕𐴡 𐴃𐴤𐴝𐴑𐴤𐴞𐴁𐴤𐴡𐴓𐴧𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴥𐴟𐴣𐴐𐴞𐴘𐴝𐴌𐴞 𐴀𐴥𐴞𐴏𐴝𐴉𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴝𐴕𐴝 𐴊𐴞𐴘𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴎𐴝𐴕𐴡𐴌 𐴖𐴡𐴌𐴠 𐴈𐴥𐴡𐴃𐴡𐴌𐴥𐴝 𐴌𐴥𐴠 𐴁𐴤𐴝𐴉𐴞 𐴘𐴡𐴌𐴥𐴠 𐴊𐴤𐴟𐴖𐴥𐴝𐴌𐴝𐴘 𐴈𐴟𐴀𐴥𐴝 𐴎𐴝𐴀𐴝𐴌 𐴊𐴠 , 𐴃𐴟𐴣𐴖𐴥𐴝𐴣𐴌𐴥𐴝 𐴅𐴟𐴕 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴌𐴝𐴙𐴃𐴡𐴌 𐴹 𐴁𐴝𐴎𐴠 𐴀𐴥𐴡𐴘𐴃𐴠 𐴐𐴤𐴟𐴌𐴟 𐴒𐴡𐴌𐴥𐴞 𐴎𐴠𐴃𐴡 𐴈𐴥𐴝𐴌𐴝 𐴉𐴝𐴌𐴡 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴡𐴌𐴃𐴟 𐴕𐴦𐴠𐴓𐴞 𐴎𐴡𐴀𐴡 𐴒𐴤𐴡𐴘 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴠𐴓𐴝𐴕 𐴕𐴦𐴠𐴓𐴝𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴰 𐴰 𐴲 𐴲 𐴃𐴤𐴗𐴝 𐴑𐴟𐴌𐴁𐴝𐴕𐴞𐴌 𐴎𐴝𐴕𐴖𐴝𐴌 𐴁𐴝𐴍𐴝 𐴎𐴝𐴘𐴁𐴡 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴑𐴟𐴌𐴁𐴝𐴕𐴡𐴌 𐴀𐴞𐴊𐴤𐴡𐴌 𐴔𐴡𐴖𐴑𐴝𐴃 𐴏𐴥𐴡𐴀𐴡𐴓 , 𐴒𐴡𐴌𐴟 𐴔𐴞𐴓𐴝𐴘 𐴊𐴟𐴘 𐴇𐴥𐴝𐴎𐴝𐴌𐴡𐴌 𐴁𐴦𐴠𐴐𐴢 𐴎𐴝𐴕𐴖𐴝𐴌 𐴎𐴦𐴡𐴌 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴁𐴝𐴚𐴓𐴝𐴊𐴠𐴐𐴢 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝 𐴀𐴟𐴑𐴤𐴞𐴘𐴝 , 𐴄𐴠𐴑𐴕𐴝𐴉𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴓𐴧𐴝 𐴁𐴞𐴁𐴤𐴞𐴕𐴧𐴡 𐴀𐴠𐴕 𐴅𐴞 𐴀𐴡 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴊𐴝𐴕 𐴈𐴥𐴡𐴌𐴝𐴃 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴊𐴞𐴘𐴥𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 , 𐴑𐴟𐴌𐴁𐴝𐴕𐴞𐴌 𐴎𐴝𐴕𐴖𐴝𐴌 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴰 𐴰 𐴸 𐴱 𐴃𐴤𐴗𐴝 𐴒𐴡𐴌𐴟 𐴀𐴝𐴌 𐴰 𐴰 𐴴 𐴃𐴤𐴗𐴝 𐴏𐴥𐴡𐴀𐴡𐴓 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴌𐴞𐴉𐴟𐴎𐴞 𐴀𐴝𐴌 𐴌𐴝𐴘𐴐𐴤𐴡𐴕 𐴀𐴝𐴌 𐴖𐴝𐴉𐴠𐴏𐴞𐴌 𐴎𐴟𐴣𐴖𐴝𐴣𐴓𐴧𐴝 𐴑𐴡𐴔𐴞𐴐𐴕𐴝𐴌 / 𐴔𐴟𐴇𐴝𐴔𐴧𐴡𐴃 𐴐𐴤𐴡𐴔𐴏𐴟𐴊 𐴊𐴟𐴅𐴤𐴝 𐴘𐴠 𐴈𐴥𐴡𐴁𐴡𐴌 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴰 𐴰 𐴰 𐴱 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴌 𐴎𐴞𐴘𐴡𐴓𐴡𐴃 𐴱𐴱

𐴷 𐴱 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴴 𐴹 𐴹 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴌 𐴎𐴞𐴘𐴡𐴓𐴡𐴃 𐴀𐴝𐴏𐴥𐴠 𐴁𐴡𐴓𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴒𐴤𐴡𐴌 𐴀𐴟𐴎𐴞𐴌𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴷 𐴱 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴞 𐴀𐴠𐴑 𐴔𐴡𐴓𐴞𐴘𐴥𐴟𐴕 𐴊𐴟𐴘 𐴓𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴑𐴠𐴙𐴏𐴧𐴥𐴟 𐴔𐴝𐴙𐴕𐴐𐴤𐴙𐴠 𐴒𐴝𐴙𐴌 𐴑𐴝𐴕𐴟𐴕𐴞 𐴈𐴝𐴔 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴥𐴞𐴃𐴤𐴝𐴌𐴝𐴌𐴥𐴠 𐴎𐴞𐴘𐴡𐴓𐴡𐴃 𐴊𐴞𐴘𐴝 𐴉𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 , 𐴊𐴡𐴀𐴡𐴙𐴕 𐴀𐴞𐴐𐴤𐴞𐴘𐴝𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴧𐴠𐴊 𐴀𐴡𐴑𐴃𐴤𐴡𐴃 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴒𐴤𐴡𐴌 𐴀𐴟𐴎𐴞𐴌 / 𐴀𐴝𐴏𐴥𐴡𐴊𐴟𐴎 𐴎𐴡𐴔𐴝𐴕 𐴈𐴦𐴝𐴕𐴠 𐴁𐴠𐴐𐴤𐴞 𐴏𐴞𐴕𐴃𐴝 𐴉𐴠𐴌𐴠𐴐𐴝𐴕𐴞𐴌 𐴏𐴥𐴝𐴣𐴀𐴝𐴃𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝𐴃 𐴔𐴡𐴊𐴡𐴃 𐴉𐴡𐴣𐴀𐴡𐴏𐴥𐴝 , 𐴂𐴠𐴓𐴝𐴕𐴡𐴌 𐴀𐴝𐴕𐴋𐴤𐴝𐴌𐴠 𐴀𐴞𐴏𐴌𐴦𐴝𐴙𐴓𐴠 𐴓𐴝𐴌𐴥𐴝𐴘 𐴃𐴤𐴝𐴔𐴝𐴘𐴁𐴤𐴡 𐴈𐴡𐴘𐴧𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴊𐴡𐴀𐴡𐴙𐴕 𐴒𐴤𐴡𐴎𐴧𐴝𐴃 𐴂𐴠𐴓𐴝𐴕𐴡𐴌 𐴀𐴝𐴕𐴋𐴤𐴝𐴌𐴠 𐴓𐴝𐴌𐴥𐴝𐴘 𐴃𐴤𐴝𐴔𐴝𐴘𐴁𐴡 𐴁𐴡𐴓𐴞 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴃𐴦𐴝𐴑𐴤𐴞 𐴓𐴝𐴌𐴥𐴝𐴘 𐴒𐴡𐴙𐴅𐴧𐴤𐴙𐴝 𐴀𐴠𐴓𐴝𐴑𐴝𐴃 𐴁𐴦𐴠𐴐𐴢 𐴒𐴡𐴌𐴥𐴞 𐴀𐴞𐴕𐴏𐴦𐴝𐴕𐴞 𐴔𐴡𐴊𐴡𐴃 𐴉𐴡𐴣𐴀𐴡𐴏𐴝𐴘 𐴉𐴝𐴌𐴝 𐴎𐴝𐴀𐴝 𐴉𐴥𐴝𐴀𐴝𐴕 , 𐴀𐴞𐴏𐴌𐴦𐴝𐴙𐴓𐴡𐴌 𐴁𐴡𐴘𐴝𐴕 𐴔𐴡𐴎𐴞𐴕 𐴌𐴡𐴉𐴥𐴝𐴌 𐴀𐴠𐴓𐴝𐴑𐴝𐴃 𐴁𐴞𐴀𐴞𐴕𐴧𐴝 𐴸 𐴁𐴝𐴎𐴠 𐴓𐴡𐴃𐴞 𐴀𐴥𐴝𐴣𐴎𐴡𐴙𐴕𐴧𐴝 𐴷 𐴁𐴝𐴎𐴠 𐴉𐴡𐴙𐴅𐴧𐴡𐴕𐴃𐴡 𐴓𐴝𐴌𐴥𐴝𐴘 𐴁𐴡𐴕 𐴃𐴤𐴝𐴑𐴤𐴞𐴁𐴤𐴡 𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴊𐴡𐴃𐴡𐴌 𐴏𐴥𐴝𐴔𐴝𐴕 𐴁𐴤𐴡𐴌𐴝 𐴄𐴠𐴌𐴝𐴑 𐴒𐴝𐴌𐴥𐴞 𐴀𐴥𐴡𐴑𐴧𐴡𐴓 , 𐴀𐴞𐴏𐴌𐴦𐴝𐴙𐴓𐴡𐴌 𐴑𐴡𐴁𐴎𐴝𐴃 𐴀𐴝𐴏𐴥𐴠𐴊𐴠 𐴑𐴡𐴌𐴡𐴔 𐴐𐴝𐴓𐴟𐴔 𐴉𐴡𐴙𐴅𐴧𐴡𐴕𐴃𐴡 𐴉𐴡𐴣𐴀𐴡𐴏𐴞 𐴉𐴝𐴌𐴠 𐴉𐴥𐴝𐴀𐴝𐴕 , 𐴘𐴥𐴝𐴀𐴝𐴕𐴃𐴟 𐴏𐴡𐴓𐴝𐴇𐴟𐴊𐴧𐴞𐴕 𐴌𐴦𐴟𐴋 𐴁𐴝𐴀𐴝𐴘 𐴒𐴤𐴡𐴎𐴧𐴝𐴌 𐴀𐴡𐴙𐴕𐴧𐴡 𐴀𐴠𐴓𐴝𐴑𐴝 𐴁𐴠𐴒𐴧𐴤𐴟𐴓𐴝 𐴏𐴥𐴝𐴔𐴝𐴕 𐴉𐴡𐴣𐴀𐴡𐴏𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱