𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴉𐴥𐴞𐴃𐴞𐴕 𐴀𐴥𐴡 𐴏𐴡𐴓𐴠𐴌 𐴊𐴧𐴠 𐴅𐴠𐴕𐴟𐴏𐴥𐴝𐴙𐴋 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴠𐴕𐴠𐴋𐴝𐴌 𐴀𐴥𐴡𐴃𐴡𐴖𐴝 𐴐𐴤𐴡𐴀𐴡𐴌𐴡𐴃 𐴇𐴥𐴡𐴌𐴃𐴝𐴓 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴊𐴡𐴌𐴔𐴞𐴘𐴝𐴕𐴡𐴃 𐴏𐴡𐴓𐴠𐴌 𐴊𐴧𐴠 𐴓𐴝𐴌𐴥𐴝𐴘𐴃 , 𐴊𐴟𐴕𐴥𐴞 𐴋𐴝𐴀𐴝𐴘𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴝𐴎𐴤𐴠 𐴒𐴤𐴡𐴓𐴝𐴘 𐴉𐴞𐴐𐴤𐴞 𐴁𐴦𐴝𐴊𐴠 , 𐴉𐴥𐴞𐴃𐴞𐴕 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴊𐴧𐴠 , 𐴀𐴥𐴞𐴀𐴞𐴕 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴠𐴕𐴠𐴋𐴝𐴌 𐴀𐴥𐴡𐴃𐴡𐴖𐴝 𐴐𐴤𐴡𐴀𐴡𐴌𐴡𐴃 𐴅𐴟𐴕 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴐𐴤𐴡𐴣𐴀𐴡 𐴑𐴠𐴕𐴠𐴋𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 ,𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴊𐴝𐴁𐴞 𐴀𐴥𐴡𐴙𐴓𐴊𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴥𐴞𐴃𐴞𐴕 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠𐴊𐴠 𐴑𐴟𐴐𐴤𐴞𐴐𐴢 𐴁𐴡𐴕 𐴒𐴡𐴌𐴥𐴡𐴕 , 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕 , 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴘𐴥𐴝𐴀𐴝𐴕𐴡𐴌 𐴀𐴞𐴕𐴏𐴦𐴝𐴉𐴢 𐴏𐴝𐴀𐴝 , 𐴀𐴝𐴌 𐴊𐴠𐴐𐴢 𐴁𐴡𐴘𐴊𐴠𐴐𐴤𐴢 𐴔𐴞𐴓𐴞 ( 𐴏𐴦𐴠𐴙𐴉𐴢 𐴎𐴟𐴕 ) 𐴇𐴥𐴠𐴉𐴝𐴎𐴡𐴃𐴞 𐴎𐴟𐴕 𐴁𐴝𐴕𐴝𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴡𐴕 , 𐴀𐴝𐴌 𐴒𐴤𐴡𐴌 𐴃𐴤𐴡𐴌 𐴏𐴥𐴝𐴌𐴥𐴝 𐴖𐴦𐴝𐴙𐴆𐴧𐴙𐴝 𐴃𐴞𐴌𐴥𐴝𐴙𐴆𐴧𐴙𐴝 𐴔𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴊𐴡𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃 𐴒𐴡𐴌𐴥𐴡𐴙𐴕𐴧𐴝 𐴊𐴟𐴕𐴞𐴘𐴝𐴘𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴌𐴥𐴠 𐴒𐴤𐴡𐴓𐴞 𐴔𐴡𐴊𐴡𐴃 𐴒𐴡𐴌𐴥𐴞 𐴉𐴝𐴌𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴊𐴡𐴀𐴡𐴕 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞𐴌 𐴀𐴟𐴓𐴋𐴝 𐴒𐴡𐴌𐴥𐴠𐴌 𐴊𐴧𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴈𐴡𐴕𐴥𐴡 𐴑𐴞𐴘𐴥𐴡𐴌 𐴃𐴡𐴌𐴥𐴡𐴉𐴊𐴤𐴝𐴌𐴞 𐴕𐴡 𐴒𐴡𐴌𐴥𐴞 , 𐴊𐴠𐴐𐴢𐴁𐴡𐴘𐴊𐴠𐴐𐴢 𐴔𐴞𐴓𐴞 𐴃𐴤𐴝𐴑𐴞𐴑 𐴃𐴝𐴊𐴝𐴌𐴟𐴑𐴞 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴁𐴝𐴕𐴝𐴘 , 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴏𐴞𐴂𐴢 𐴊𐴡𐴀𐴡𐴕 𐴁𐴡𐴓𐴞 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴱𐴀𐴝𐴌𐴑𐴝𐴕 𐴁𐴤𐴟𐴏𐴞𐴊𐴡𐴚𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴁𐴡𐴓𐴝𐴎𐴟𐴌𐴞 𐴒𐴦𐴡𐴗𐴌 𐴈𐴝𐴔 𐴒𐴡𐴌𐴥𐴝𐴌 𐴱𐴱

𐴀𐴝𐴌𐴑𐴝𐴕 𐴁𐴤𐴟𐴏𐴞𐴊𐴡𐴚𐴡𐴌 𐴀𐴠𐴓𐴝𐴑𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴥𐴠 , 𐴉𐴟𐴛𐴔𐴝𐴓𐴞 , 𐴛𐴡𐴚𐴆𐴤𐴙𐴚 , 𐴀𐴝𐴄𐴧𐴤𐴗𐴝𐴚 𐴚𐴥𐴝𐴏𐴠 , 𐴏𐴥𐴞𐴕𐴊𐴞 𐴉𐴝𐴌𐴝𐴚 𐴀𐴝𐴌 𐴃𐴝𐴔𐴧𐴥𐴞𐴚 𐴆𐴤𐴙𐴡𐴚 , 𐴉𐴝𐴌𐴝 𐴀𐴞𐴀𐴞𐴕 𐴐𐴤𐴡𐴣𐴀𐴡 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴁𐴡𐴀𐴡𐴃 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 , 𐴁𐴡𐴓𐴝𐴎𐴟𐴌𐴞 𐴊𐴤𐴡𐴌𐴞 𐴊𐴤𐴡𐴌𐴞 𐴒𐴦𐴡𐴗𐴌 𐴈𐴝𐴔 𐴒𐴡𐴌𐴥𐴝𐴌 𐴊𐴧𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴒𐴠 𐴓𐴡𐴃𐴞 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴓𐴝𐴌𐴥𐴝𐴘 𐴀𐴝𐴌 𐴉𐴟𐴌𐴝 𐴉𐴟𐴌𐴞𐴌 𐴎𐴡𐴌𐴞𐴘𐴝 𐴒𐴤𐴡𐴌 𐴁𐴝𐴌𐴞 𐴐𐴤𐴡𐴐𐴤𐴡𐴔𐴁𐴤𐴡𐴃𐴧𐴞 𐴇𐴥𐴝𐴌𐴝𐴘 𐴀𐴡𐴙𐴕𐴧𐴡 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴏𐴥𐴝𐴌𐴝 𐴓𐴡𐴘 , 𐴖𐴦𐴝𐴙𐴆𐴧𐴤𐴙𐴝 𐴃𐴞𐴌𐴥𐴝𐴙𐴆𐴧𐴤𐴙𐴝 𐴊𐴞𐴕 𐴈𐴝𐴍𐴝𐴌 𐴊𐴧𐴠 𐴈𐴡𐴊𐴦𐴟𐴕 𐴔𐴡𐴎𐴓𐴟𐴔 , 𐴀𐴥𐴠𐴍𐴠 𐴖𐴡𐴌𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴄𐴞𐴛𐴝 𐴉𐴡𐴘𐴐𐴤𐴝 𐴑𐴠𐴙𐴏𐴧𐴥𐴟 𐴕𐴡 𐴊𐴞𐴀𐴞 𐴊𐴞𐴕 𐴁𐴤𐴡𐴌 𐴈𐴝𐴔 𐴒𐴡𐴌𐴥𐴝𐴌 𐴊𐴧𐴠 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴎𐴝𐴓𐴝𐴕𐴞 𐴁𐴤𐴟𐴏𐴞𐴊𐴡𐴚𐴡𐴃𐴧𐴤𐴟 𐴊𐴤𐴝𐴘 𐴒𐴞𐴘𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕 𐴔𐴝𐴀𐴝𐴙𐴕 𐴉𐴥𐴟𐴍𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴁𐴤𐴟𐴏𐴞𐴊𐴡𐴚𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴁𐴡𐴓𐴝𐴎𐴟𐴌𐴞 𐴒𐴦𐴡𐴗𐴌 𐴈𐴝𐴔 𐴒𐴡𐴌𐴥𐴝𐴌 𐴱𐴱

𐴀𐴝𐴌𐴑𐴝𐴕 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴏𐴝𐴚𐴒𐴤𐴞𐴌𐴥𐴞 𐴁𐴞𐴓 𐴉𐴝𐴌𐴝𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕 , 𐴔𐴠 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃 𐴀𐴝𐴃𐴡𐴚𐴁𐴝𐴊𐴞 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 , 𐴉𐴡𐴌𐴝𐴕 𐴁𐴝𐴏𐴝𐴘 𐴈𐴡𐴕 𐴔𐴞𐴑𐴧𐴤𐴙𐴝 𐴎𐴝𐴘𐴃𐴝𐴔 𐴈𐴡𐴀𐴡𐴘 𐴁𐴤𐴝𐴉𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 , 𐴋𐴝𐴓𐴝𐴓𐴡𐴌 𐴁𐴤𐴠𐴐𐴢 𐴊𐴡𐴙𐴅𐴧𐴤𐴙𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴔𐴞𐴔𐴁𐴤𐴡𐴌 𐴀𐴥𐴡𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴀𐴝𐴙𐴑𐴧𐴙𐴝𐴁𐴡𐴃 𐴒𐴞𐴀𐴞𐴓 𐴒𐴤𐴡𐴘 , 𐴀𐴥𐴠𐴕𐴃𐴟 𐴂𐴡𐴌𐴟𐴒𐴠𐴌𐴝𐴔 𐴔𐴡𐴎𐴞𐴕 𐴀𐴝𐴙𐴑𐴧𐴙𐴝𐴁𐴡𐴃𐴧𐴤𐴟 𐴕𐴦𐴠𐴓𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴂𐴟𐴕𐴧𐴥𐴝 𐴆𐴤𐴗𐴠𐴕 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴏𐴡𐴋𐴧𐴤𐴟 𐴏𐴡𐴔𐴧𐴥𐴞 𐴉𐴝𐴌𐴝𐴌 𐴋𐴤𐴝𐴑𐴤𐴠 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴡𐴑𐴃𐴤𐴡𐴃 , 𐴌𐴝𐴏𐴧𐴝𐴃 𐴔𐴝𐴀𐴝𐴙𐴕 𐴁𐴟𐴔 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴊𐴟𐴕𐴥𐴞 𐴎𐴡𐴕 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 , 𐴂𐴟𐴕𐴧𐴥𐴝 𐴆𐴤𐴗𐴠𐴕 𐴐𐴤𐴡𐴀𐴡𐴌𐴡𐴃 𐴃𐴤𐴝𐴑𐴤𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴒𐴤𐴡𐴌 𐴃𐴤𐴡𐴌 𐴏𐴥𐴝𐴌𐴥𐴝 𐴌𐴞𐴉𐴟𐴎𐴞𐴌 𐴋𐴦𐴡𐴙𐴓𐴧𐴝 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴝𐴃𐴝 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴁𐴞𐴕𐴝 𐴉𐴡𐴘𐴐𐴤𐴝 𐴊𐴞𐴕 𐴁𐴤𐴡𐴌 𐴒𐴤𐴝𐴣𐴄𐴞 𐴁𐴝𐴣𐴊𐴤𐴝𐴌 𐴔𐴝𐴓 𐴀𐴥𐴝𐴣𐴍𐴝𐴁𐴤𐴝𐴌 , 𐴀𐴝𐴌 𐴎𐴠𐴃𐴤𐴡𐴑𐴧𐴡𐴕𐴡𐴃 𐴋𐴝𐴑𐴠 𐴀𐴥𐴠𐴃𐴤𐴡𐴑𐴧𐴡𐴕𐴡𐴃 𐴇𐴥𐴝𐴎𐴞𐴌 𐴀𐴥𐴡𐴘𐴁𐴡𐴓𐴧𐴝 𐴀𐴡𐴋𐴝𐴌 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 , 𐴎𐴡𐴊𐴞 𐴇𐴥𐴝𐴎𐴞𐴌 𐴕𐴡 𐴀𐴥𐴡𐴘𐴓𐴠 𐴀𐴥𐴞𐴃𐴝𐴌 𐴁𐴠𐴌𐴟𐴊𐴧𐴤𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴀𐴡𐴋𐴝𐴌 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴏𐴝𐴓𐴞𐴉𐴝𐴌𐴝𐴚𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴐𐴤𐴞 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴀𐴝𐴏𐴥𐴠𐴊𐴠 𐴏𐴝𐴓𐴞 𐴉𐴝𐴌𐴝𐴚 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴌𐴥𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴅𐴟𐴕 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑𐴡𐴃 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴧𐴤 𐴒𐴤𐴞𐴌𐴞 𐴊𐴤𐴡𐴌𐴞 𐴁𐴦𐴝𐴊𐴠 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴡𐴌𐴥𐴠 𐴒𐴤𐴡𐴌𐴡𐴃𐴧𐴟𐴕 𐴕𐴦𐴠𐴓𐴝𐴘 , 𐴏𐴝𐴓𐴞𐴉𐴝𐴌𐴝𐴚𐴡𐴌 𐴀𐴞𐴐𐴑𐴟𐴓𐴡𐴃 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠 , 𐴁𐴦𐴝𐴊𐴠 𐴀𐴥𐴠𐴕𐴃𐴟 𐴈𐴡𐴊𐴦𐴟𐴕 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕𐴡𐴌𐴥𐴠 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴠 𐴒𐴤𐴡𐴘 , 𐴁𐴦𐴝𐴊𐴠 𐴃𐴟𐴣𐴖𐴥𐴝𐴣𐴌𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴉𐴢 𐴓𐴡𐴘 𐴃𐴦𐴝𐴓𐴧𐴟𐴑 𐴌𐴝𐴑𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴎𐴝𐴔 𐴊𐴞𐴀𐴞 𐴀𐴠𐴑 𐴎𐴡𐴕 𐴀𐴠𐴑 𐴎𐴡𐴕 𐴏𐴠𐴑 𐴒𐴡𐴙𐴅𐴧𐴤𐴙𐴠 , 𐴇𐴥𐴝𐴘𐴅𐴤𐴠𐴑 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴕𐴝𐴂𐴧𐴥𐴟𐴌𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞𐴃 𐴓𐴡𐴘 𐴒𐴞𐴘𐴥𐴠 𐴒𐴤𐴡𐴘 , 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴙𐴅𐴧𐴙𐴝 𐴉𐴝𐴌𐴝 𐴘𐴝𐴀𐴝𐴕 𐴈𐴝𐴙𐴓𐴧𐴝 𐴖𐴝𐴀𐴝𐴕 , 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴥𐴡𐴘𐴧𐴝 𐴕𐴡 𐴀𐴥𐴡𐴘𐴧𐴝 𐴀𐴠𐴓𐴎𐴝𐴔 𐴀𐴥𐴡𐴑𐴧𐴡𐴓 𐴊𐴞𐴀𐴞 ,𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴀𐴝𐴌 𐴑𐴠𐴙𐴏𐴧𐴥𐴟𐴌𐴥𐴠 𐴁𐴝𐴣𐴊𐴤𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 𐴘𐴥𐴡 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴠 𐴁𐴡𐴏𐴥𐴡𐴌 𐴸 𐴱 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴔𐴝𐴙𐴕𐴐𐴤𐴞 𐴉𐴥𐴡𐴌𐴡𐴎𐴞 𐴇𐴥𐴡𐴅 𐴀𐴝𐴊𐴝𐴘 𐴒𐴡𐴙𐴅𐴧𐴤𐴙𐴠 𐴱𐴱

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴌 𐴇𐴥𐴡𐴅 𐴀𐴟𐴎𐴞𐴌 / 𐴋𐴝𐴑𐴄𐴡𐴌 𐴃𐴡𐴖𐴉𐴥𐴞𐴑 𐴀𐴥𐴝𐴌 𐴌𐴡𐴁𐴞𐴀𐴥𐴝 𐴘𐴠 𐴈𐴡𐴘𐴧𐴥𐴠𐴊𐴠 , 𐴀𐴠 𐴁𐴡𐴏𐴥𐴡𐴌 𐴴 𐴲 𐴰 𐴲 𐴀𐴞𐴚𐴌𐴝𐴎𐴞 𐴵 𐴴 𐴴 𐴱 𐴇𐴥𐴞𐴅𐴞𐴌𐴞 𐴶 𐴳 𐴲 𐴱 𐴌𐴟𐴇𐴝𐴙𐴕𐴒𐴙𐴝 𐴐𐴤𐴡𐴕𐴡𐴃 𐴉𐴥𐴡𐴌𐴎𐴤𐴞𐴘𐴝 𐴇𐴥𐴡𐴅 𐴀𐴝𐴊𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 , 𐴇𐴥𐴝𐴅𐴞 𐴀𐴥𐴡𐴑𐴧𐴡𐴓𐴡𐴌 𐴒𐴡𐴕𐴝 𐴸 𐴱 𐴓𐴝𐴑 𐴳 𐴳 𐴇𐴥𐴝𐴎𐴝𐴌 𐴴 𐴶 𐴱 𐴎𐴡𐴕 𐴀𐴥𐴡𐴘𐴧𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴥𐴠 𐴹 𐴓𐴝𐴑 𐴸 𐴵 𐴇𐴥𐴝𐴎𐴝𐴌 𐴷 𐴳 𐴱 𐴎𐴡𐴕 𐴔𐴡𐴌𐴡𐴊 𐴀𐴝𐴌 𐴸 𐴓𐴝𐴑 𐴵 𐴷 𐴇𐴥𐴝𐴎𐴝𐴌 𐴵 𐴲 𐴎𐴡𐴕 𐴔𐴝𐴘𐴧𐴝 𐴁𐴡𐴓𐴞 𐴇𐴥𐴡𐴅 𐴀𐴟𐴎𐴞𐴌𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴇𐴥𐴝𐴅𐴞 𐴀𐴟𐴀𐴟𐴕 𐴁𐴠𐴒𐴧𐴤𐴟𐴕𐴠 𐴒𐴡𐴃𐴡 𐴈𐴝𐴓𐴞𐴘𐴝 𐴎𐴞𐴓𐴇𐴥𐴝𐴅𐴧𐴤𐴝 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴇𐴥𐴡𐴅𐴡𐴌 𐴔𐴡𐴘𐴊𐴝𐴕 ( 𐴀𐴝𐴌𐴉𐴦𐴝𐴃𐴤𐴡𐴃 ) 𐴕𐴞𐴎𐴡𐴌 𐴇𐴥𐴡𐴅 𐴑𐴡𐴁𐴟𐴓 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴈𐴝𐴣𐴏𐴥𐴠 𐴊𐴟𐴀𐴝 𐴔𐴝𐴙𐴒𐴧𐴤𐴙𐴠 , 𐴏𐴡𐴀𐴟𐴊𐴞 𐴇𐴥𐴡𐴅 𐴑𐴡𐴔𐴞𐴄𐴤𐴞𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴊𐴟𐴕𐴞𐴘𐴝𐴘𐴌 𐴰 𐴰 𐴲 𐴃𐴤𐴝𐴕 𐴊𐴠𐴐𐴤𐴡𐴃𐴧𐴟 𐴔𐴝𐴕𐴥𐴟𐴙𐴐𐴢 𐴇𐴥𐴡𐴅 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴙𐴐𐴧𐴤𐴙𐴠 𐴊𐴠 𐴀𐴥𐴞𐴕𐴃𐴟 𐴐𐴤𐴡𐴃𐴑𐴝𐴌𐴝 𐴳 . 𐴳 𐴶 𐴎𐴡𐴕 𐴀𐴞𐴐𐴤𐴞𐴘𐴥𐴝𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃𐴧𐴤𐴟 𐴳 . 𐴳 𐴲 𐴎𐴡𐴕 𐴀𐴝𐴌𐴡𐴁 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃𐴧𐴟 𐴳 . 𐴱 𐴱 𐴎𐴡𐴕 𐴀𐴝𐴉𐴌𐴞𐴑𐴤𐴝𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃𐴧𐴟 𐴀𐴝𐴌 𐴀𐴝𐴔𐴌𐴞𐴑𐴤𐴝 𐴀𐴡 𐴀𐴡𐴏𐴄𐴡𐴌𐴡𐴓𐴥𐴞𐴘𐴝𐴃𐴧𐴟 𐴲 . 𐴳 𐴎𐴡𐴕 𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴒𐴤𐴡𐴎𐴧𐴝𐴃𐴧𐴟 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴢 𐴕𐴦𐴠𐴓𐴞 𐴎𐴡𐴀𐴡𐴕 𐴒𐴤𐴡𐴘 𐴏𐴥𐴝𐴌𐴥𐴝 𐴈𐴡𐴕𐴥𐴡 𐴏𐴟𐴑𐴃𐴞 𐴕𐴥𐴝𐴘 : 𐴀𐴞𐴏𐴓𐴝𐴔𐴞 𐴒𐴟𐴌𐴥𐴟𐴂𐴢 𐴱𐴱

𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴝𐴣𐴃𐴞𐴘𐴝𐴌𐴁𐴝𐴎 𐴒𐴟𐴌𐴥𐴟𐴉𐴠 𐴏𐴥𐴝𐴉𐴢 𐴓𐴡𐴎𐴤𐴡𐴃 𐴔𐴝𐴎𐴤𐴠 𐴈𐴡𐴘𐴧𐴠𐴊𐴠 , 𐴎𐴠𐴃𐴤𐴡𐴑𐴧𐴡𐴕 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴢 𐴔𐴟𐴑𐴡𐴔𐴧𐴡𐴓 𐴁𐴤𐴝𐴉𐴠 𐴒𐴤𐴡𐴎𐴧𐴝𐴃𐴧𐴟 𐴕𐴦𐴠𐴓𐴞 𐴕𐴥𐴡 𐴎𐴝𐴀𐴝 𐴒𐴤𐴡𐴘 , 𐴃𐴡𐴃𐴤𐴡𐴑𐴧𐴤𐴡𐴕 𐴉𐴡𐴙𐴅𐴧𐴡𐴕𐴃𐴡 𐴀𐴞𐴏𐴌𐴦𐴝𐴙𐴓 𐴓𐴡𐴘 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴋𐴞𐴀𐴞𐴓 𐴒𐴡𐴌𐴥𐴝 𐴕𐴡 𐴎𐴝𐴘𐴁𐴤𐴡 , 𐴅𐴟𐴕 𐴔𐴝𐴐𐴤𐴡𐴌 𐴵 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴡𐴌 𐴇𐴥𐴝𐴔𐴓𐴝𐴃 𐴀𐴝𐴌𐴀𐴥𐴡 𐴊𐴟𐴘 𐴎𐴡𐴕 𐴀𐴞𐴏𐴌𐴦𐴝𐴙𐴓𐴡𐴌 𐴈𐴡𐴊𐴞 𐴔𐴡𐴌𐴞 𐴎𐴡𐴀𐴡𐴕𐴡𐴌 𐴁𐴦𐴝𐴊𐴠 ( 𐴎𐴞𐴘𐴥𐴝𐴕𐴡𐴌 𐴁𐴞𐴋𐴞𐴘𐴟 𐴀𐴝𐴓 𐴑𐴡𐴏𐴧𐴦𐴝𐴔 𐴁𐴠𐴌𐴠𐴒𐴤𐴠𐴋𐴠 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠 ) 𐴒𐴤𐴡𐴎𐴧𐴝𐴌 𐴀𐴥𐴝𐴣𐴃𐴞𐴘𐴝𐴌𐴁𐴝𐴎 𐴀𐴥𐴡𐴑𐴧𐴡𐴓𐴠 𐴀𐴠𐴓𐴝𐴕 𐴘𐴝𐴀𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱