𐴁𐴠𐴑𐴝𐴕𐴟𐴕𐴞 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴈𐴝𐴍𐴝 𐴔𐴝𐴌𐴝 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴄𐴤𐴝𐴘𐴓𐴠𐴕𐴡𐴃 𐴇𐴥𐴡𐴌𐴃𐴝𐴓 𐴱𐴱

𐴀𐴝𐴌𐴑𐴝𐴕𐴡𐴃 𐴊𐴟𐴖𐴥𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴉𐴢 , 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴊𐴡𐴌𐴔𐴞𐴘𐴝𐴕𐴡𐴃 𐴏𐴡𐴓𐴠𐴌 𐴊𐴠 𐴓𐴝𐴌𐴥𐴝𐴘𐴌 𐴏𐴝𐴑𐴧𐴝𐴌 𐴃𐴡𐴓𐴠 𐴒𐴤𐴡𐴓𐴝𐴘 , 𐴁𐴠𐴑𐴝𐴕𐴟𐴕𐴞 𐴃𐴡𐴖𐴌𐴠 𐴉𐴞𐴐𐴤𐴞 𐴉𐴥𐴠𐴓𐴥𐴝𐴌 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴝𐴍𐴝 𐴔𐴝𐴌𐴝 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴄𐴤𐴝𐴘𐴓𐴠𐴕𐴡𐴃 𐴃𐴤𐴝𐴑𐴤𐴠𐴊𐴠 𐴀𐴝𐴌𐴑𐴝𐴕 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴡𐴉𐴥𐴞𐴏𐴡𐴌 𐴔𐴟𐴀𐴟𐴕𐴃𐴟 , 𐴅𐴟𐴕 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴊𐴝𐴁𐴞 𐴀𐴥𐴡𐴙𐴓𐴊𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴥𐴞𐴃𐴞𐴕 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠𐴊𐴠 𐴑𐴟𐴐𐴤𐴞𐴐𐴢 𐴁𐴡𐴕 𐴒𐴡𐴌𐴥𐴡𐴕 , 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕 , 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴘𐴥𐴝𐴀𐴝𐴕𐴡𐴌 𐴀𐴞𐴕𐴏𐴦𐴝𐴉𐴢 𐴏𐴝𐴀𐴝 , 𐴀𐴝𐴌 𐴊𐴠𐴐𐴢 𐴁𐴡𐴘𐴊𐴠𐴐𐴤𐴢 𐴔𐴞𐴓𐴞 ( 𐴏𐴦𐴠𐴙𐴉𐴢 𐴎𐴟𐴕 ) 𐴇𐴥𐴠𐴉𐴝𐴎𐴡𐴃𐴞 𐴎𐴟𐴕 𐴁𐴝𐴕𐴝𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴡𐴕 , 𐴀𐴝𐴌 𐴒𐴤𐴡𐴌 𐴃𐴤𐴡𐴌 𐴏𐴥𐴝𐴌𐴥𐴝 𐴖𐴦𐴝𐴙𐴆𐴧𐴙𐴝 𐴃𐴞𐴌𐴥𐴝𐴙𐴆𐴧𐴙𐴝 𐴔𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴊𐴡𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃 𐴒𐴡𐴌𐴥𐴡𐴙𐴕𐴧𐴝 𐴊𐴟𐴕𐴞𐴘𐴝𐴘𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓 𐴒𐴤𐴡𐴓𐴞 𐴔𐴡𐴊𐴡𐴃 𐴒𐴡𐴌𐴥𐴞 𐴉𐴝𐴌𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴊𐴡𐴀𐴡𐴕 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞𐴌 𐴀𐴟𐴓𐴋𐴝 𐴒𐴡𐴌𐴥𐴠𐴌 𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴈𐴡𐴕𐴥𐴡 𐴑𐴞𐴘𐴥𐴡𐴌 𐴃𐴡𐴌𐴥𐴡𐴉𐴊𐴤𐴝𐴌𐴞 𐴕𐴡 𐴒𐴡𐴌𐴥𐴞 , 𐴊𐴠𐴐𐴢𐴁𐴡𐴘𐴊𐴠𐴐𐴢 𐴔𐴞𐴓𐴞 𐴃𐴤𐴝𐴑𐴞𐴑 𐴃𐴝𐴊𐴝𐴌𐴟𐴑𐴞 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴁𐴝𐴕𐴝𐴘 , 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴏𐴞𐴂𐴢 𐴊𐴡𐴀𐴡𐴕 𐴁𐴡𐴓𐴞 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴉𐴟𐴌𐴝 𐴊𐴟𐴕𐴞𐴘𐴝𐴘𐴃 ( 𐴁𐴠𐴓𐴥𐴠𐴑 𐴉𐴡𐴌 𐴌𐴟𐴇𐴝𐴙𐴚𐴒𐴙𐴝 ) 𐴊𐴞𐴕 𐴁𐴝𐴕𐴝𐴘𐴧𐴥𐴠 𐴱𐴱

𐴴 𐴲 𐴰 𐴲 𐴐𐴤𐴡𐴕 𐴅𐴟𐴕 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴁𐴤𐴝𐴉𐴝 𐴏𐴞𐴕𐴃𐴝 𐴒𐴡𐴌𐴥𐴠𐴊𐴠 𐴊𐴠𐴐𐴢 𐴁𐴠𐴒𐴧𐴤𐴞𐴕𐴡𐴃 , ( 𐴂𐴡𐴌𐴡𐴄𐴤𐴠𐴑𐴄 𐴌𐴟𐴇𐴝𐴙𐴚𐴒𐴙𐴝 ) 𐴃𐴡𐴕𐴎𐴞𐴔𐴡𐴌 𐴀𐴝𐴕𐴋𐴤𐴝𐴌𐴠 𐴈𐴝𐴓𐴝 𐴈𐴦𐴡𐴌 𐴉𐴞𐴣𐴊𐴤𐴞 𐴐𐴤𐴟𐴒𐴢 𐴉𐴝𐴓𐴡𐴕 𐴒𐴡𐴌𐴥𐴝 𐴀𐴥𐴞𐴏𐴝𐴉𐴠 , ( 𐴁𐴠𐴓𐴥𐴠𐴑 𐴉𐴡𐴌 𐴌𐴟𐴇𐴝𐴙𐴚𐴒𐴙𐴝 ) 𐴊𐴞𐴕 𐴁𐴝𐴕𐴝𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴅𐴟𐴕 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴌 , 𐴊𐴞𐴕 𐴀𐴞𐴁𐴤𐴝𐴌𐴥𐴠 ( 𐴁𐴠𐴓𐴥𐴠𐴑 𐴉𐴡𐴌 𐴌𐴟𐴇𐴝𐴙𐴚𐴒𐴙𐴝 ) 𐴈𐴡𐴀𐴡𐴘 𐴔𐴟𐴃𐴦𐴝𐴙𐴕 𐴒𐴡𐴌𐴥𐴡𐴕𐴥𐴡𐴃 𐴃𐴡𐴕𐴎𐴞𐴔 𐴀𐴥𐴞𐴁𐴤𐴝𐴌 𐴔𐴡𐴑𐴏𐴥𐴡𐴊 𐴀𐴥𐴡𐴙𐴓𐴊𐴠 , 𐴑𐴟𐴓𐴠 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔𐴡𐴌 𐴁𐴤𐴟𐴃𐴤𐴡𐴌𐴠 𐴀𐴠𐴑 𐴎𐴟𐴑𐴃𐴞 𐴀𐴠𐴃𐴧𐴠𐴇𐴦𐴝𐴊 𐴀𐴠𐴃𐴧𐴠𐴉𐴦𐴝𐴑 𐴉𐴡𐴘𐴊𐴝 𐴒𐴡𐴌𐴥𐴡𐴕 , 𐴎𐴟𐴓𐴥𐴟𐴔 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴡𐴀𐴡𐴌𐴝𐴘 𐴕𐴡 𐴉𐴥𐴠𐴓𐴥𐴝𐴊𐴠 𐴀𐴥𐴠𐴕𐴋𐴞𐴓𐴧𐴝 𐴇𐴥𐴞𐴏𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴉𐴡𐴘𐴊𐴝 𐴒𐴡𐴌𐴥𐴡𐴕 , 𐴁𐴤𐴝𐴘𐴧𐴡𐴌 𐴒𐴟𐴏𐴧𐴡 𐴁𐴤𐴝𐴘𐴧𐴠 𐴈𐴥𐴝𐴀𐴝 𐴉𐴥𐴠𐴓𐴥𐴝𐴘 𐴊𐴡𐴀𐴡𐴕 , 𐴊𐴞𐴕 𐴉𐴝𐴓𐴡𐴕 𐴒𐴡𐴌𐴥𐴝 𐴒𐴞𐴘𐴥𐴠𐴊𐴠 𐴘𐴥𐴝𐴀𐴝𐴕𐴡𐴃 𐴑𐴟𐴓𐴠 𐴌𐴟𐴇𐴝𐴙𐴒𐴙𐴝𐴌 𐴃𐴡𐴌𐴉𐴥𐴡𐴃𐴧𐴟 ( 𐴀𐴝𐴌𐴁𐴤𐴞𐴐𐴠𐴕 ) 𐴄𐴞𐴀𐴞𐴔𐴠 𐴁𐴠𐴐𐴤𐴝 𐴁𐴠𐴐𐴤𐴞 𐴀𐴡𐴕𐴡𐴌𐴥𐴝𐴌 𐴐𐴤𐴟𐴑𐴟𐴌𐴞𐴘𐴝 𐴀𐴝𐴊𐴝𐴘 𐴒𐴡𐴌𐴥𐴠𐴌 , 𐴏𐴥𐴝𐴌𐴔𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔𐴡𐴌 𐴁𐴤𐴟𐴃𐴤𐴡𐴌𐴠 𐴇𐴥𐴞𐴏𐴢 𐴉𐴡𐴘𐴊𐴝 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴎𐴝𐴘𐴁𐴝 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴥𐴠𐴌 𐴱𐴱

𐴉𐴟𐴌𐴝 𐴊𐴟𐴕𐴞𐴘𐴝𐴘𐴃 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴰 𐴲 𐴱 𐴔𐴡𐴓𐴞𐴘𐴥𐴟𐴕 𐴀𐴥𐴡𐴘𐴧𐴠 𐴱𐴱

𐴉𐴟𐴌𐴝 𐴊𐴟𐴕𐴞𐴘𐴝𐴘𐴃 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 , 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴝 𐴀𐴝𐴌 𐴉𐴥𐴡𐴏𐴦𐴝𐴊𐴡𐴌 𐴎𐴡𐴌𐴞𐴘𐴝 , 𐴴 𐴲 𐴰 𐴲 𐴐𐴤𐴡𐴕 𐴀𐴠𐴂𐴌𐴞𐴓 𐴔𐴝𐴐𐴤𐴡𐴌 𐴀𐴠𐴈𐴥𐴠𐴌𐴞 𐴉𐴡𐴙𐴅𐴧𐴡𐴕𐴃𐴡 , 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴞 𐴊𐴤𐴝𐴘 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴰 𐴲 𐴱 𐴔𐴡𐴓𐴞𐴘𐴥𐴟𐴕𐴡𐴌 𐴖𐴡𐴌𐴠 𐴀𐴥𐴡𐴘𐴧𐴠 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑𐴝 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 ) 𐴔𐴡𐴇𐴝 𐴔𐴥𐴝𐴚 𐴒𐴞𐴌𐴞𐴌 𐴀𐴡𐴉𐴥𐴞𐴏𐴠 𐴅𐴟𐴕 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴏𐴟𐴋𐴤𐴝𐴕 , 𐴁𐴡𐴌𐴔𐴥𐴝 , 𐴉𐴥𐴡𐴓𐴡𐴏𐴃𐴞𐴕 𐴀𐴝𐴌 𐴏𐴦𐴟𐴌𐴞𐴘𐴝 𐴐𐴤𐴡𐴣𐴀𐴡 𐴉𐴟𐴌𐴝 𐴊𐴟𐴕𐴞𐴘𐴝𐴘𐴃 𐴓𐴝𐴒𐴝𐴃𐴝𐴌 𐴉𐴥𐴡𐴏𐴦𐴝𐴊𐴡𐴌 𐴎𐴡𐴌𐴞𐴘𐴝 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴊𐴤𐴝𐴘 𐴎𐴝𐴀𐴝 , 𐴁𐴝𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴳 𐴲 𐴰 𐴲 𐴐𐴤𐴡𐴕𐴡𐴃 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴳 .𐴷 𐴱 𐴱 𐴔𐴡𐴓𐴞𐴘𐴥𐴟𐴕 , 𐴲 𐴲 𐴰 𐴲 𐴐𐴤𐴡𐴕𐴡𐴃 𐴀𐴝𐴐𐴧𐴤𐴞𐴀𐴞𐴓𐴊𐴠 𐴸 . 𐴸 𐴔𐴡𐴓𐴞𐴘𐴥𐴟𐴕 𐴁𐴡𐴓𐴞 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴃𐴞𐴕𐴀𐴡𐴔 𐴊𐴠𐴐𐴤𐴡𐴃 𐴉𐴡𐴣𐴀𐴡𐴏𐴝𐴘 𐴊𐴡𐴀𐴡𐴕𐴧𐴥𐴝𐴕 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴄 𐴇𐴥𐴡𐴓 𐴕𐴡𐴀𐴡 𐴱𐴱

𐴰 𐴰 𐴰 𐴲 𐴱 𐴇𐴥𐴝𐴎𐴝𐴌𐴡𐴃𐴧𐴟 𐴰 𐴰 𐴰 𐴳 𐴱 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴊𐴡𐴀𐴡𐴙𐴕 𐴀𐴞𐴐𐴤𐴞𐴘𐴝𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴀𐴝𐴔𐴠𐴌𐴞𐴑𐴤𐴝𐴃 𐴓𐴡𐴘 𐴎𐴝𐴘 𐴀𐴝𐴁𐴝𐴊 𐴒𐴡𐴌𐴥𐴝 𐴒𐴞𐴘𐴥𐴠 , 𐴀𐴥𐴞𐴃𐴝𐴌𐴥𐴝𐴌𐴥𐴠 𐴀𐴞𐴕𐴏𐴦𐴝𐴕𐴞𐴘𐴡𐴃𐴞𐴌 𐴈𐴦𐴝𐴃𐴠𐴌𐴠 𐴀𐴝𐴔𐴠𐴌𐴞𐴑𐴝𐴃 𐴀𐴝𐴁𐴝𐴊 𐴒𐴡𐴌𐴥𐴝 𐴒𐴞𐴓𐴥𐴠 𐴘𐴥𐴡 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴃𐴞𐴕𐴀𐴡𐴔 𐴊𐴠𐴐𐴤𐴡𐴃 𐴉𐴡𐴣𐴀𐴡𐴏𐴥𐴝𐴘 𐴊𐴡𐴀𐴡𐴕𐴧𐴥𐴝𐴕 , 𐴊𐴠𐴌𐴞 𐴔𐴞𐴘𐴝𐴊 𐴀𐴡𐴓𐴝 𐴇𐴥𐴡𐴓 𐴕𐴡𐴀𐴡 𐴁𐴡𐴓𐴞 𐴀𐴝𐴔𐴠𐴌𐴞𐴑𐴤𐴝𐴌 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 / 𐴔𐴠𐴑𐴤𐴠𐴕𐴎𐴞 𐴌𐴟𐴖𐴠 𐴘𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴈𐴡𐴃𐴤𐴝 𐴘𐴝𐴀𐴝𐴕 𐴀𐴝𐴔𐴠𐴌𐴞𐴑𐴤𐴝𐴌 𐴌𐴞𐴉𐴟𐴎𐴞𐴌 𐴔𐴦𐴝𐴔𐴠𐴓𐴝𐴌 𐴀𐴠𐴓𐴝𐴑𐴝𐴀𐴞 𐴌𐴝𐴁𐴠𐴃𐴝𐴑𐴝𐴌𐴠 , 𐴋𐴤𐴝𐴑𐴤𐴝𐴃 𐴒𐴡𐴙𐴅𐴧𐴤𐴙𐴠𐴊𐴠 𐴂𐴠𐴌𐴠𐴏𐴢 𐴑𐴝𐴕𐴉𐴠𐴣𐴌𐴥𐴠𐴏𐴡𐴃 , 𐴀𐴠𐴑 𐴏𐴥𐴟𐴖𐴝𐴓𐴡𐴌 𐴅𐴟𐴖𐴝𐴁𐴡𐴃 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴏𐴥𐴠𐴉𐴝𐴌𐴡𐴃 𐴑𐴝𐴌𐴞𐴃 𐴕𐴝𐴑𐴝𐴔𐴞 , 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴡𐴌 𐴇𐴥𐴝𐴔𐴓𐴝 𐴌𐴡𐴉𐴥𐴝𐴌 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴌 𐴀𐴠𐴓𐴝𐴑𐴝𐴃 𐴱𐴱

𐴒𐴤𐴡𐴎𐴧𐴝 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 , 𐴒𐴤𐴡𐴎𐴧𐴝𐴌 𐴊𐴡𐴀𐴡𐴙𐴕 𐴇𐴥𐴞𐴏𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴓𐴝𐴌𐴥𐴝𐴘𐴌 𐴄𐴠𐴀𐴠𐴣𐴑 𐴒𐴝𐴌𐴥𐴞 𐴀𐴥𐴡𐴑𐴧𐴡𐴓 𐴒𐴤𐴡𐴙𐴓𐴧𐴙𐴠 , 𐴀𐴝𐴌 𐴀𐴥𐴠 𐴀𐴡𐴑𐴃𐴤𐴡𐴃 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔𐴁𐴝𐴌𐴞 𐴘𐴥𐴡 𐴒𐴡𐴙𐴅𐴧𐴤𐴙𐴠 , 𐴅𐴠 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴐𐴤𐴡𐴃𐴝 𐴐𐴤𐴡𐴃𐴞 𐴔𐴝𐴕𐴥𐴟𐴙𐴐𐴢 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴤𐴡𐴓𐴧𐴝 𐴒𐴤𐴡𐴌 𐴏𐴥𐴝𐴌𐴥𐴞 𐴊𐴤𐴡𐴀𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 𐴀𐴥𐴡𐴘𐴧𐴠 𐴱𐴱

𐴇𐴥𐴡𐴅𐴡𐴌 𐴊𐴞𐴕𐴡𐴃 𐴋𐴝𐴑𐴄𐴡𐴌 𐴀𐴝𐴌 𐴀𐴠𐴔𐴁𐴓𐴥𐴠𐴣𐴏𐴢 𐴈𐴥𐴠𐴊𐴔𐴡𐴃𐴡𐴌 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴌𐴡𐴎𐴝𐴑𐴝𐴌𐴡𐴌 𐴈𐴥𐴠𐴊𐴔𐴡𐴃 𐴱𐴱

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴌 𐴏𐴠𐴇𐴥𐴠𐴃𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 , 𐴀𐴠 𐴁𐴡𐴏𐴥𐴡𐴌 𐴵 𐴴 𐴴 𐴱 𐴇𐴥𐴞𐴅𐴞𐴌𐴞 𐴐𐴤𐴡𐴕𐴡𐴌 𐴇𐴥𐴝𐴅𐴞 𐴀𐴥𐴡𐴑𐴧𐴡𐴓𐴡𐴌 𐴓𐴧𐴝 𐴀𐴠𐴑𐴀𐴡𐴔𐴥𐴞𐴑 𐴀𐴠𐴓𐴝𐴅𐴡𐴌 𐴁𐴝𐴁𐴡𐴃𐴠 𐴈𐴥𐴠𐴊𐴔𐴡𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴝𐴘𐴧𐴝 𐴔𐴡𐴌𐴡𐴊 𐴔𐴞𐴓𐴝𐴘 𐴶 𐴶 𐴴 𐴵 𐴎𐴡𐴕 𐴌𐴡𐴎𐴝𐴑𐴝𐴌 𐴓𐴡𐴘𐴧𐴠 , 𐴎𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴰 𐴰 𐴰 𐴳 𐴎𐴡𐴕 𐴏𐴠𐴇𐴥𐴠𐴃𐴡𐴌 𐴁𐴝𐴁𐴡𐴃𐴠 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴔𐴟𐴃𐴦𐴝𐴓𐴧𐴠𐴑 , 𐴀𐴝𐴌 𐴁𐴝𐴑𐴞 𐴶 𐴶 𐴴 𐴲 𐴎𐴡𐴕 𐴌𐴡𐴎𐴝𐴑𐴝𐴌 𐴀𐴠𐴔𐴁𐴟𐴓𐴥𐴠𐴣𐴏𐴡𐴌 𐴁𐴝𐴁𐴡𐴃𐴠 , 𐴰 𐴵 𐴱 𐴐𐴤𐴝𐴕𐴡𐴌 𐴁𐴠𐴐𐴤𐴞 𐴔𐴡𐴌𐴑𐴡𐴎𐴡𐴌 𐴎𐴡𐴌𐴞𐴘𐴝 𐴇𐴥𐴝𐴅𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴠𐴑𐴀𐴡𐴔𐴥𐴞𐴑 𐴊𐴝𐴁𐴝𐴘 𐴀𐴠𐴓𐴝𐴅 𐴒𐴡𐴌𐴥𐴝 𐴎𐴝𐴘𐴁𐴡 , 𐴔𐴟𐴄𐴝 𐴔𐴟𐴄𐴞 𐴊𐴝𐴁𐴝𐴘 𐴀𐴠𐴓𐴝𐴅𐴡𐴌 𐴌𐴡𐴎𐴝𐴑𐴝𐴌 𐴀𐴥𐴡𐴑𐴧𐴡𐴓𐴠 𐴲 𐴷 𐴇𐴥𐴝𐴎𐴝𐴌 𐴒𐴤𐴡𐴕𐴄𐴤𐴝𐴌 𐴃𐴧𐴟 𐴁𐴤𐴝𐴌𐴥𐴡 𐴁𐴦𐴠𐴐𐴢 𐴀𐴡𐴑𐴃𐴤𐴡 𐴇𐴥𐴝𐴅𐴞 𐴀𐴥𐴡𐴑𐴧𐴡𐴓𐴡𐴌 𐴈𐴥𐴠𐴊𐴔𐴡𐴃 𐴒𐴡𐴌𐴥𐴞𐴁𐴤𐴡𐴊𐴠 𐴘𐴥𐴝𐴀𐴝𐴕 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱