𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴠𐴌𐴊𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴃𐴤𐴞𐴘𐴧𐴝 𐴒𐴡𐴌𐴥𐴝𐴘 𐴏𐴠𐴑 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴎𐴝𐴒𐴝 𐴴 𐴒𐴤𐴝𐴕𐴡𐴃 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴔𐴏𐴞𐴌 𐴃𐴡𐴓𐴧𐴗𐴝 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 , 𐴀𐴝 𐴀𐴝 𐴎𐴝 𐴀𐴝 𐴒𐴡𐴌𐴥𐴠𐴌𐴊𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴃𐴤𐴞𐴘𐴧𐴝 𐴒𐴡𐴌𐴥𐴝𐴘 𐴏𐴠𐴑 𐴒𐴡𐴌𐴥𐴠𐴌 𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴎𐴝𐴒𐴝 𐴀𐴥𐴞𐴀𐴞𐴕 𐴀𐴥𐴡𐴙𐴓𐴊𐴠 : 𐴐𐴤𐴡𐴀𐴡𐴌𐴡𐴌 𐴑𐴝𐴛𐴝𐴚 𐴋𐴤𐴠𐴚 𐴌𐴥𐴠𐴑𐴧𐴤𐴗𐴝 𐴀𐴝𐴌𐴊𐴠 𐴂𐴥𐴠𐴕 𐴋𐴦𐴡 𐴂𐴡𐴌𐴝𐴚 𐴉𐴟𐴓𐴡𐴌 𐴔𐴝𐴎𐴤𐴠 𐴀𐴝𐴏𐴥𐴠𐴊𐴠 𐴁𐴝𐴚𐴓𐴝 𐴄𐴤𐴡𐴖𐴌𐴡𐴌 𐴑𐴙𐴝𐴚 𐴀𐴝𐴏𐴥𐴠𐴊𐴠 𐴀𐴥𐴞𐴛𐴡𐴃 , 𐴌𐴥𐴠𐴑𐴧𐴤𐴙𐴝 𐴲 𐴊𐴟𐴘𐴧𐴡𐴌 𐴁𐴡𐴌 𐴔𐴡𐴏𐴥𐴡𐴙𐴃 𐴀𐴝𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴝𐴎𐴝𐴌𐴡𐴌 𐴔𐴟𐴀𐴟𐴕𐴃𐴟 , 𐴐𐴗𐴠 𐴎𐴤𐴝 𐴉𐴟𐴓 𐴀𐴝𐴌𐴊𐴠 𐴌𐴥𐴠𐴑𐴧𐴤𐴗𐴝 𐴵 𐴉𐴝𐴣𐴏𐴡𐴌 𐴁𐴝𐴎𐴝𐴌𐴡𐴌 𐴋𐴤𐴝𐴑𐴡𐴌 𐴔𐴡𐴏𐴥𐴡𐴙𐴃𐴡𐴌 𐴔𐴟𐴀𐴟𐴕𐴃𐴟 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴃𐴡𐴓𐴧𐴗𐴝 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 , 𐴌𐴝𐴏𐴃𐴝𐴃 𐴀𐴝 𐴀𐴝 𐴎𐴝 𐴀𐴝 𐴒𐴡𐴌𐴥𐴠𐴌𐴊𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴃𐴤𐴞𐴘𐴧𐴝 𐴒𐴡𐴌𐴥𐴝𐴘 𐴁𐴠𐴐𐴤𐴞 𐴊𐴟𐴑 𐴊𐴠𐴀𐴠𐴌 𐴀𐴝𐴌 𐴀𐴡𐴐𐴤𐴝𐴕𐴃𐴞 𐴒𐴡𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴀𐴝 𐴀𐴝 𐴎𐴝 𐴀𐴝 𐴒𐴡𐴌𐴥𐴠𐴌 𐴊𐴠 𐴊𐴠𐴐𐴤𐴡𐴙𐴃𐴧𐴝 𐴎𐴠 𐴀𐴥𐴡𐴘𐴁𐴡 𐴀𐴥𐴡𐴀𐴡𐴑 , 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴊𐴤𐴡𐴌𐴞 𐴏𐴠𐴑 𐴒𐴡𐴌𐴥𐴠𐴌 𐴀𐴝𐴌 𐴁𐴠𐴐𐴤𐴞 𐴊𐴟𐴑 𐴊𐴠𐴀𐴠𐴌 , 𐴀𐴝𐴌 𐴒𐴝𐴌𐴥𐴞 , 𐴃𐴞𐴕 𐴏𐴝𐴑𐴧𐴝 , 𐴔𐴡𐴄𐴡𐴌 𐴏𐴝𐴘𐴑𐴤𐴠𐴓 𐴀𐴥𐴡𐴑𐴧𐴡𐴓 𐴀𐴥𐴡𐴙𐴃𐴠 𐴉𐴥𐴟𐴕 𐴀𐴥𐴟𐴊𐴧𐴝 𐴏𐴠𐴑 𐴒𐴡𐴌𐴥𐴠𐴌 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴎𐴝𐴌𐴥𐴠 𐴉𐴝𐴀𐴝 𐴎𐴞𐴛𐴥𐴡𐴃 𐴉𐴝𐴀𐴝 𐴒𐴝𐴌𐴥𐴞 𐴒𐴤𐴟𐴌𐴥𐴝 𐴁𐴠𐴒𐴧𐴤𐴟𐴕𐴡𐴌𐴥𐴠 𐴏𐴠𐴑 𐴒𐴡𐴌𐴥𐴠 𐴎𐴝𐴓𐴝𐴌 𐴊𐴠 𐴀𐴥𐴞𐴘𐴝𐴕𐴡𐴌 𐴁𐴝𐴁𐴡𐴃𐴠 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴎𐴞𐴔𐴧𐴝𐴊𐴝𐴌𐴠 , 𐴉𐴥𐴟𐴍𐴝 𐴉𐴥𐴟𐴍𐴥𐴞 𐴒𐴡𐴌𐴥𐴞𐴁𐴤𐴝𐴌 𐴈𐴡𐴕𐴥𐴡 𐴏𐴞𐴏𐴢 𐴉𐴥𐴟𐴣𐴖𐴝𐴣𐴃𐴞 𐴀𐴝𐴏𐴥𐴠𐴕𐴥𐴠 , 𐴏𐴠𐴑 𐴒𐴡𐴌𐴥𐴠 𐴏𐴝𐴀𐴝𐴌𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴙𐴑𐴧𐴙𐴝𐴁𐴡𐴌 𐴲 𐴱 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌𐴥𐴠 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴥𐴠 𐴀𐴝𐴀𐴝𐴘 𐴃𐴤𐴝𐴑𐴤𐴞 𐴁𐴤𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔 𐴊𐴞𐴘𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴀𐴝𐴙𐴑𐴧𐴙𐴝𐴁 𐴀𐴠𐴓𐴝𐴑𐴝𐴌 𐴁𐴤𐴟𐴃𐴤𐴡𐴌𐴠 𐴀𐴝𐴏𐴥𐴠𐴊𐴠 𐴲 𐴱 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌𐴥𐴠 , 𐴉𐴝𐴌𐴝 𐴀𐴝𐴌 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴞 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴀𐴝𐴘 𐴃𐴤𐴝𐴑𐴤𐴞 𐴁𐴡𐴓𐴧𐴥𐴝 𐴔𐴠𐴓𐴠𐴄𐴠𐴌𐴠 𐴇𐴥𐴡𐴑𐴟𐴔𐴡𐴃𐴠 𐴇𐴥𐴡𐴑𐴟𐴔 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴙𐴑𐴧𐴙𐴝𐴁 𐴀𐴠𐴓𐴝𐴑𐴝𐴌 𐴁𐴤𐴟𐴃𐴤𐴡𐴌𐴠 𐴔𐴠𐴓𐴠𐴄𐴠𐴌𐴞𐴌 𐴒𐴤𐴝𐴣𐴄𐴞𐴌 𐴀𐴝𐴃𐴠 𐴈𐴝𐴣𐴏𐴥𐴠 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴀𐴥𐴞𐴀𐴞𐴕 𐴐𐴤𐴡𐴣𐴀𐴡 𐴌𐴝𐴏𐴥𐴞𐴊𐴡𐴚 – 𐴂𐴟𐴕𐴧𐴥𐴝 𐴅𐴤𐴗𐴠𐴚 𐴌𐴝𐴏𐴃𐴝𐴌 𐴖𐴡𐴌𐴠 𐴀𐴝𐴏𐴥𐴠𐴊𐴠 , 𐴀𐴡𐴚 𐴋𐴝𐴙𐴚 𐴉𐴝𐴌𐴝 , 𐴂𐴡𐴓𐴧𐴝𐴚 𐴂𐴡𐴌𐴝𐴚 ( 𐴔𐴡𐴒𐴢 𐴉𐴝𐴌𐴝 ) , 𐴑𐴠𐴌𐴥𐴝 𐴃𐴤𐴡 𐴂𐴡𐴌𐴝𐴚 , 𐴌𐴠 𐴆𐴤𐴠𐴙𐴚 𐴂𐴡𐴌𐴝𐴚 , 𐴑𐴟𐴌𐴖𐴞 𐴄𐴤𐴠 𐴆𐴤𐴙𐴠 , 𐴂𐴥𐴝𐴘𐴑 𐴏𐴥𐴠 𐴒𐴞𐴌𐴥𐴞 , 𐴑𐴟𐴌𐴖𐴞 𐴄𐴤𐴠 𐴂𐴥𐴝𐴙𐴑 𐴏𐴥𐴠 𐴆𐴙𐴠 , 𐴑𐴟𐴌𐴖𐴞 𐴄𐴤𐴠 𐴂𐴥𐴝𐴙𐴑 𐴏𐴥𐴠 𐴒𐴞𐴌𐴥𐴞 , 𐴔𐴡𐴚 𐴕𐴞 𐴂𐴡𐴌𐴝𐴚 , 𐴏𐴝𐴚 𐴂𐴥𐴟𐴚 𐴋𐴤𐴠𐴚 , 𐴉𐴞𐴘𐴝𐴓𐴞 𐴆𐴤𐴙𐴡𐴚 𐴉𐴟𐴌𐴝𐴕 𐴉𐴝𐴌𐴝 , 𐴉𐴞𐴘𐴝𐴓𐴞 𐴆𐴤𐴙𐴡𐴚 𐴕𐴟𐴖𐴝 𐴉𐴝𐴌𐴝 𐴀𐴝𐴌 𐴀𐴥𐴟𐴌𐴥𐴠 𐴂𐴡 , 𐴉𐴝𐴌𐴝 𐴀𐴞𐴀𐴞𐴕𐴡𐴃 𐴃𐴤𐴝𐴑𐴤𐴠𐴊𐴠 𐴔𐴝𐴙𐴕𐴐𐴤𐴡𐴌𐴥𐴠 𐴅𐴟𐴕 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴴 𐴱 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 𐴵 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴉𐴝𐴌𐴝 𐴀𐴝𐴌 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴞 𐴀𐴝𐴑𐴧𐴙𐴝𐴁 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴀𐴝𐴘 𐴃𐴤𐴝𐴑𐴧𐴞 𐴁𐴡𐴓𐴧𐴥𐴝 𐴇𐴥𐴡𐴑𐴟𐴔 𐴎𐴝𐴌𐴞 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌𐴑𐴝𐴕 𐴁𐴠𐴒𐴧𐴤𐴟𐴓𐴧𐴝 𐴓𐴝𐴌𐴥𐴘𐴌 𐴔𐴡𐴘𐴊𐴝𐴕 𐴁𐴡𐴕𐴞 𐴎𐴡𐴀𐴡𐴕𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴈𐴝𐴔 𐴏𐴥𐴝𐴌𐴝 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴈𐴡𐴕𐴥𐴡 𐴑𐴞𐴘𐴥𐴡𐴃𐴧𐴟 𐴄𐴞𐴛𐴝 𐴉𐴡𐴘𐴐𐴤𐴝 𐴕𐴥𐴝𐴘 𐴀𐴥𐴝𐴃 𐴈𐴥𐴝𐴓𐴞 , 𐴀𐴠𐴕𐴋𐴞𐴓𐴧𐴝 𐴀𐴝𐴁𐴡𐴏𐴃𐴤𐴝𐴃 𐴕𐴞𐴎𐴡𐴌 𐴒𐴤𐴡𐴌 𐴊𐴟𐴖𐴝𐴌 𐴏𐴥𐴝𐴌𐴞 𐴀𐴡𐴙𐴕𐴧𐴡 𐴎𐴝𐴒𐴝𐴃 𐴎𐴝𐴘 𐴑𐴠𐴀𐴠𐴕 𐴒𐴡𐴌𐴥𐴞 𐴃𐴤𐴝𐴑𐴤𐴞 𐴁𐴤𐴡 𐴁𐴡𐴓𐴞 𐴏𐴞𐴕𐴃𐴝 𐴒𐴡𐴌𐴥𐴠𐴌 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴄𐴡𐴀𐴡𐴕 𐴑𐴡𐴁𐴎𐴝 𐴓𐴝𐴌𐴥𐴝𐴘 𐴒𐴡𐴌𐴥𐴞𐴓𐴥𐴠 , 𐴀𐴥𐴞𐴃𐴤𐴝𐴌𐴝𐴌𐴥𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴊𐴠 𐴘𐴥𐴝𐴀𐴝𐴕𐴡𐴌𐴥𐴠 𐴘𐴥𐴡 𐴋𐴡𐴌𐴝𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴝𐴌𐴥𐴡 𐴑𐴠𐴓𐴥𐴝𐴏𐴢 𐴃𐴦𐴝𐴓𐴞𐴔𐴞 𐴏𐴥𐴞𐴏𐴄𐴠𐴔𐴡𐴌 𐴑𐴡𐴀𐴡𐴓𐴠𐴅 𐴒𐴤𐴡𐴓𐴞𐴁𐴤𐴝𐴌 𐴀𐴠𐴔𐴃𐴦𐴝𐴕𐴡𐴌 𐴉𐴝𐴏𐴢 𐴉𐴥𐴠𐴓𐴡𐴌 𐴀𐴠𐴑𐴀𐴡𐴔 𐴁𐴝𐴌 𐴀𐴠𐴓𐴝𐴕 𐴱𐴱

𐴁𐴡𐴌𐴔𐴥𐴝𐴃 𐴲 𐴱 𐴑𐴠𐴓𐴥𐴝𐴏𐴢 𐴃𐴦𐴝𐴓𐴞𐴔𐴞 𐴏𐴥𐴞𐴏𐴄𐴠𐴔𐴡𐴌 𐴑𐴡𐴀𐴡𐴓𐴠𐴅𐴡𐴃 𐴒𐴤𐴡𐴓𐴞𐴁𐴝𐴌 𐴀𐴠𐴔𐴃𐴦𐴝𐴕𐴡𐴌 𐴉𐴝𐴏𐴢 𐴉𐴥𐴠𐴓𐴡𐴌 𐴏𐴠𐴌𐴥𐴝𐴚 , 𐴀𐴠𐴑𐴀𐴡𐴔 𐴁𐴝𐴌 𐴀𐴥𐴞𐴏𐴝𐴉𐴠 𐴅𐴟𐴕 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴟𐴓𐴠 𐴉𐴟𐴖𐴝𐴙𐴕𐴊𐴤𐴡𐴌 𐴁𐴤𐴟𐴃𐴤𐴡𐴌𐴠 𐴐𐴤𐴡𐴃𐴑𐴝𐴌𐴝 ٪ 𐴷 𐴵 𐴎𐴡𐴕𐴡𐴌 𐴁𐴠𐴐𐴤𐴞 𐴉𐴝𐴏𐴢 𐴀𐴥𐴡𐴘𐴧𐴠 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴡𐴀𐴡𐴓𐴠𐴅𐴡𐴃 𐴒𐴤𐴡𐴓𐴞𐴁𐴡𐴓𐴧𐴥𐴝 𐴑𐴟𐴓𐴠 𐴰 𐴲 𐴸 𐴸 𐴲 𐴱 𐴎𐴡𐴕 𐴉𐴟𐴖𐴝𐴙𐴕𐴊𐴤𐴠 𐴀𐴠𐴔𐴃𐴦𐴝𐴕 𐴊𐴞𐴘𐴥𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌 𐴃𐴟 𐴲 𐴹 𐴵 𐴴 𐴷 𐴎𐴡𐴕 𐴉𐴟𐴖𐴝𐴙𐴕 𐴉𐴝𐴏𐴢 𐴀𐴥𐴡𐴘𐴧𐴠 , 𐴐𐴤𐴡𐴃𐴑𐴝𐴌𐴝 ٪ 𐴀𐴥𐴞𐴏𐴝𐴉𐴠 𐴷 𐴵 𐴊𐴡𐴐𐴤𐴡𐴔 𐴹 𐴉𐴡𐴙𐴅𐴧𐴤𐴙𐴠 𐴊𐴠 𐴘𐴥𐴝𐴀𐴝𐴕 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴀𐴝𐴘𐴁𐴤𐴝𐴌 𐴀𐴝𐴒𐴠 𐴑𐴡𐴀𐴡𐴓𐴠𐴅𐴡𐴃 𐴒𐴤𐴡𐴓𐴞𐴁𐴤𐴡𐴓𐴧𐴥𐴝 𐴕𐴡 𐴓𐴝𐴑 𐴓𐴡𐴃𐴞 𐴉𐴟𐴖𐴝𐴙𐴕𐴊𐴤𐴠 𐴀𐴠𐴔𐴃𐴦𐴝𐴕 𐴊𐴞𐴀𐴞𐴃𐴡 , 𐴔𐴡𐴕𐴃𐴡𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴀𐴝𐴀𐴝𐴘 𐴁𐴦𐴝𐴊𐴠 𐴊𐴠𐴐𐴢 𐴀𐴝𐴒𐴝 𐴒𐴟𐴌𐴝 𐴁𐴠𐴒𐴧𐴤𐴟𐴓𐴧𐴝 𐴓𐴝𐴌𐴥𐴝𐴘 𐴏𐴡𐴓𐴡𐴕𐴠 𐴁𐴠𐴐𐴤𐴝 𐴁𐴠𐴐𐴤𐴞 𐴉𐴟𐴖𐴝𐴙𐴕 𐴀𐴞𐴐𐴑𐴟𐴓𐴡𐴃 𐴀𐴟𐴍𐴥𐴞 𐴕𐴥𐴡 𐴉𐴝𐴌𐴠 𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴀𐴠 𐴁𐴡𐴏𐴥𐴡𐴌 𐴑𐴟𐴓𐴠 𐴁𐴡𐴌𐴔𐴥𐴝𐴃 𐴀𐴝𐴊𐴤𐴝 𐴑𐴠𐴓𐴥𐴝𐴏𐴢 𐴀𐴥𐴡𐴘𐴃𐴠 𐴀𐴟𐴖𐴡𐴌𐴡𐴌 𐴑𐴠𐴓𐴥𐴝𐴏𐴢 𐴓𐴡𐴃𐴞 ( 𐴸 𐴹 𐴵 𐴳 𐴹 𐴳 𐴶 ) 𐴏𐴥𐴡 𐴔𐴡𐴓𐴞𐴘𐴥𐴟𐴕 𐴃𐴞𐴌𐴥𐴞𐴐𐴢 𐴕𐴡 𐴓𐴝𐴑 𐴃𐴞𐴕 𐴇𐴥𐴝𐴎𐴝𐴌 𐴉𐴝𐴣𐴏𐴢 𐴐𐴤𐴡 𐴀𐴝𐴣𐴍𐴥𐴝𐴙𐴆 𐴎𐴡𐴕 𐴉𐴟𐴖𐴝𐴙𐴕 𐴀𐴞𐴐𐴑𐴟𐴓𐴡𐴃 𐴒𐴤𐴡𐴙𐴓𐴧𐴠𐴊𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴈𐴝𐴣𐴏𐴥𐴠 𐴊𐴟𐴀𐴝 𐴱𐴱

𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴈𐴝𐴣𐴏𐴥𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴊𐴟𐴀𐴝 , 𐴀𐴦𐴡 𐴀𐴝𐴓𐴧𐴝𐴇 𐴀𐴝𐴣𐴀𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴔𐴡𐴏𐴥𐴡𐴓𐴔𐴝𐴕 𐴀𐴥𐴡𐴀𐴡𐴕𐴠 𐴁𐴡𐴓𐴝𐴎𐴟𐴌𐴞 𐴌𐴞𐴉𐴟𐴎𐴞 𐴁𐴝𐴕𐴝𐴘𐴓𐴥𐴡 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴀𐴡𐴕𐴠 𐴁𐴡𐴓𐴝𐴎𐴟𐴌𐴞 𐴕𐴞𐴎𐴡𐴌 𐴊𐴠𐴐𐴤𐴡𐴌 𐴁𐴝𐴀𐴞𐴌𐴠 𐴒𐴡𐴙𐴓𐴧𐴥𐴡 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴀𐴡𐴕𐴠 ( 𐴅𐴠𐴕𐴟𐴏𐴥𐴝𐴙𐴋 ) 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴌 𐴐𐴤𐴞𐴑𐴝𐴌 𐴀𐴝𐴌 𐴉𐴡𐴌𐴥𐴡𐴙𐴑𐴧𐴙𐴝 𐴁𐴡𐴌𐴃𐴝𐴖𐴡𐴌 𐴐𐴤𐴞𐴑𐴝𐴌 𐴀𐴥𐴟𐴀𐴝 𐴉𐴡𐴙𐴓𐴧𐴡 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴀𐴡𐴕𐴠 𐴊𐴠𐴐𐴤𐴡𐴙𐴃𐴧𐴝𐴃𐴝 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘 𐴓𐴡 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴀𐴡𐴕𐴠 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴃𐴦𐴝𐴓𐴞𐴔𐴡𐴃𐴧𐴟 𐴔𐴥𐴝𐴇𐴌𐴟𐴔 𐴒𐴡𐴌𐴥𐴞 𐴊𐴞𐴀𐴞𐴓𐴡 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴀𐴡𐴕𐴠 𐴀𐴝𐴣𐴀𐴝𐴌𐴝𐴌 𐴎𐴞𐴕𐴊𐴞𐴒𐴞𐴌 𐴈𐴡𐴕𐴥𐴡 𐴕𐴞𐴌𐴝𐴉𐴡𐴃𐴧𐴝 𐴇𐴥𐴠𐴉𐴝𐴎𐴡𐴃 𐴕𐴥𐴝𐴘 , 𐴀𐴦𐴡 𐴀𐴝𐴓𐴧𐴝𐴇𐴢 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴊𐴟𐴕𐴞𐴘𐴝𐴘 𐴘𐴝𐴀𐴝𐴕𐴡𐴃 𐴑𐴠𐴙𐴏𐴧𐴥𐴟 𐴏𐴥𐴝𐴌𐴥𐴝 𐴀𐴥𐴡𐴘 𐴒𐴞𐴓𐴝𐴔 𐴁𐴤𐴡𐴘 𐴐𐴟𐴊𐴤𐴠 𐴃𐴟𐴣𐴖𐴝𐴣𐴌 𐴏𐴥𐴝𐴀𐴝𐴌𐴝 𐴁𐴦𐴝𐴊𐴠 , 𐴀𐴦𐴡 𐴀𐴝𐴓𐴧𐴝𐴇𐴢 𐴀𐴝𐴣𐴀𐴝𐴌𐴝𐴌 𐴁𐴠𐴒𐴧𐴤𐴞𐴕 𐴖𐴝𐴉𐴠𐴏𐴢 𐴀𐴝𐴕𐴥𐴞 𐴊𐴡𐴀𐴡 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴇𐴝𐴔𐴦𐴝𐴏𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴓𐴝𐴌𐴥𐴝𐴘 𐴁𐴡𐴕 𐴉𐴥𐴝𐴘𐴏𐴠𐴓𐴝𐴌𐴥𐴠 𐴑𐴡𐴁𐴟𐴓 𐴒𐴡𐴙𐴅𐴧𐴤𐴙𐴠 𐴱𐴱

𐴇𐴝𐴔𐴦𐴝𐴏𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴠𐴉𐴝𐴎𐴡𐴃𐴞 𐴑𐴡𐴗𐴕𐴏𐴥𐴞𐴓𐴠 𐴉𐴝𐴏𐴢 𐴒𐴡𐴙𐴅𐴧𐴤𐴙𐴠𐴊𐴠 𐴓𐴝𐴌𐴥𐴝𐴘 𐴁𐴡𐴕 𐴉𐴥𐴝𐴘𐴏𐴠𐴓𐴝𐴌𐴥𐴠 𐴑𐴡𐴁𐴟𐴓 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴡𐴌 𐴋𐴡𐴣𐴀𐴡𐴌 𐴎𐴞𐴔𐴧𐴝𐴊𐴝𐴌 / 𐴏𐴡𐴔𐴥𐴞 𐴀𐴝𐴁𐴟 𐴎𐴤𐴟𐴌𐴞 𐴘𐴠 , 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴠 𐴓𐴝𐴌𐴥𐴝𐴘 𐴁𐴡𐴕 𐴉𐴥𐴝𐴘𐴏𐴠𐴓𐴝𐴌𐴥𐴠 𐴑𐴡𐴁𐴟𐴓 𐴒𐴡𐴙𐴅𐴧𐴤𐴙𐴠 , 𐴃𐴡𐴉𐴏𐴞𐴓 𐴄𐴤𐴞𐴑 𐴒𐴡𐴌𐴥𐴞𐴁𐴤𐴝𐴌 𐴁𐴝𐴁𐴡𐴃𐴠 𐴀𐴝𐴓𐴝𐴉𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴃𐴡𐴘𐴧𐴝𐴌 𐴁𐴡𐴓𐴞 , 𐴌𐴗𐴠𐴄𐴝𐴌 𐴈𐴥𐴡𐴁𐴡𐴌 𐴀𐴡𐴓𐴝𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴂𐴝𐴑𐴞𐴏𐴃𐴝𐴕𐴡𐴌 𐴊𐴟𐴘𐴀𐴡𐴔 𐴁𐴡𐴌 𐴀𐴟𐴎𐴞𐴌𐴠 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴊𐴡𐴀𐴡𐴕𐴡𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴃𐴤𐴡 𐴈𐴡𐴘𐴧𐴥𐴠 𐴱𐴱

𐴂𐴝𐴑𐴞𐴏𐴃𐴝𐴕𐴡𐴌 𐴊𐴟𐴘𐴀𐴡𐴔 𐴁𐴡𐴌 𐴀𐴟𐴎𐴞𐴌 𐴀𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴔𐴟𐴇𐴝𐴔𐴧𐴡𐴊 𐴀𐴞𐴏𐴇𐴦𐴝𐴑 𐴋𐴦𐴝𐴌𐴠 𐴈𐴡𐴘𐴧𐴥𐴠𐴊𐴠 , 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴓𐴝𐴑𐴝 𐴒𐴤𐴡𐴎𐴧𐴝 𐴀𐴝𐴌 ( 𐴖𐴥𐴞𐴏𐴄 𐴁𐴤𐴠𐴣𐴑 ) 𐴉𐴡𐴏𐴥𐴞𐴔 𐴈𐴝𐴣𐴏𐴝𐴌 𐴇𐴥𐴠𐴉𐴝𐴎𐴡𐴃𐴡𐴌𐴓𐴧𐴝 𐴁𐴡𐴓𐴞 , 𐴉𐴡𐴑𐴧𐴤𐴡𐴁𐴝𐴎𐴞 𐴏𐴥𐴝𐴌𐴥𐴝 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴉𐴥𐴡𐴗𐴏𐴢 𐴔𐴟𐴃𐴦𐴝𐴙𐴕 𐴒𐴡𐴌𐴥𐴡𐴕𐴡𐴌𐴓𐴧𐴝 𐴁𐴤𐴝𐴉𐴡𐴕 𐴏𐴝𐴀𐴝 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴉𐴥𐴝𐴘𐴏𐴠𐴓𐴝 𐴓𐴡𐴔𐴁𐴤𐴡 𐴵 𐴳 𐴷 𐴲 𐴔𐴡𐴎𐴞𐴕 , 𐴒𐴤𐴡𐴎𐴧𐴝𐴌𐴥𐴠 𐴕𐴟𐴖𐴝 𐴁𐴤𐴝𐴉𐴠 𐴁𐴝𐴕𐴝𐴘 𐴁𐴤𐴡𐴓𐴧𐴝 𐴋𐴡𐴣𐴀𐴡𐴌 𐴒𐴡𐴌𐴥𐴞 𐴁𐴠𐴒𐴧𐴤𐴞𐴕 𐴒𐴤𐴡𐴓𐴠 𐴉𐴥𐴝𐴀𐴝𐴕 , 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱