𐴔𐴡𐴚𐴋𐴤𐴟 𐴇𐴥𐴝𐴁𐴞 𐴉𐴝𐴌𐴝𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴥𐴟𐴍𐴞 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 𐴶 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴁𐴤𐴝𐴑𐴤𐴝 𐴒𐴤𐴟𐴚𐴕𐴥𐴝 𐴒𐴤𐴗𐴝𐴚𐴡𐴌 𐴉𐴡𐴏𐴥𐴞𐴔 𐴇𐴥𐴝𐴁𐴞 𐴉𐴝𐴌𐴝𐴃 , 𐴅𐴟𐴕 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴊𐴞𐴕𐴡𐴌 𐴱 𐴱 𐴁𐴝𐴎𐴡𐴌 𐴁𐴦𐴝𐴊𐴠 𐴔𐴝𐴕𐴥𐴟𐴙𐴐𐴢 𐴃𐴤𐴝𐴑𐴤𐴠𐴊𐴠 𐴒𐴤𐴡𐴌 𐴀𐴠𐴑𐴧𐴝𐴤𐴝𐴕𐴡𐴃 , 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴟𐴒𐴧𐴤𐴗𐴝 𐴉𐴡𐴌𐴞 𐴉𐴥𐴟𐴍𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴠𐴑 𐴒𐴤𐴡𐴌𐴒𐴟𐴐𐴧𐴞𐴌 𐴃𐴞𐴕 𐴎𐴡𐴕 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴏𐴥𐴡 𐴎𐴡𐴕 𐴊𐴡𐴌𐴥𐴡 𐴔𐴡𐴌𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠 𐴒𐴤𐴡𐴄𐴡𐴕𐴝 𐴀𐴞𐴘𐴥𐴝𐴕𐴡𐴌 𐴁𐴦𐴝𐴊𐴠 𐴏𐴥𐴝𐴌𐴔𐴠 𐴀𐴝𐴌𐴀𐴥𐴡 𐴀𐴠𐴕𐴋𐴞𐴓𐴧𐴝 𐴒𐴤𐴡𐴄𐴡𐴕𐴝 𐴀𐴥𐴡𐴙𐴃 𐴉𐴝𐴌𐴠 𐴁𐴡𐴓𐴞 𐴈𐴡𐴀𐴡𐴘 𐴋𐴡𐴌𐴝𐴘𐴧𐴥𐴡𐴌𐴠 𐴰 𐴰 𐴰 𐴲 𐴎𐴡𐴕 𐴓𐴡𐴃𐴞 𐴇𐴥𐴝𐴁𐴞 𐴉𐴝𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴎𐴝𐴘 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴒𐴡𐴃𐴡 𐴇𐴥𐴝𐴉𐴃𐴝𐴃 𐴔𐴝𐴎𐴤𐴠 𐴘𐴥𐴡 𐴔𐴝𐴀𐴝𐴙𐴕 𐴁𐴟𐴔 𐴉𐴥𐴟𐴍𐴥𐴞 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴡𐴌 𐴄𐴤𐴠𐴚 𐴏𐴥𐴞𐴌𐴥𐴞 𐴒𐴞𐴘𐴥𐴡𐴘 , 𐴀𐴝𐴌 𐴀𐴠𐴑 𐴎𐴡𐴕 𐴔𐴠𐴓𐴠𐴄𐴠𐴌𐴞𐴌 𐴒𐴟𐴓𐴞𐴌 𐴎𐴡𐴌𐴞𐴘𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴌 𐴀𐴡𐴚 𐴔𐴝𐴚𐴓𐴝 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴐𐴤𐴠𐴑𐴝𐴘𐴡𐴃𐴡𐴌 𐴏𐴦𐴟𐴌𐴡𐴃𐴠 𐴅𐴝𐴕𐴑𐴝𐴌𐴞 𐴱𐴱

𐴕𐴝𐴔 / 𐴏𐴥𐴟𐴀𐴥𐴟 𐴕𐴝𐴙𐴚 // 𐴁𐴡𐴐𐴢 ( 𐴴 𐴳 ) 𐴁𐴡𐴏𐴥𐴡𐴌 , 𐴀𐴞𐴃𐴠 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴈𐴥𐴝𐴏𐴢 𐴏𐴞𐴛𐴝𐴍𐴞 ( 𐴀𐴠𐴔 𐴀𐴝𐴘 ) 𐴀𐴥𐴞𐴏𐴝𐴉𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴠𐴑 𐴎𐴡𐴕 , 𐴐𐴤𐴝𐴊𐴝 𐴉𐴟𐴐𐴤𐴑 𐴉𐴞𐴣𐴊𐴤𐴞 𐴊𐴠𐴐𐴤𐴡𐴙𐴃𐴧𐴝𐴌 𐴁𐴤𐴠𐴐𐴢 𐴊𐴤𐴡𐴌𐴞 , 𐴔𐴡𐴚𐴋𐴤𐴟𐴌 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴟𐴌𐴥𐴝 𐴉𐴞𐴌𐴝 𐴒𐴡𐴌𐴥𐴝𐴃 𐴃𐴤𐴝𐴑𐴤𐴠 𐴀𐴝𐴌 𐴈𐴥𐴡𐴁𐴡𐴌 𐴀𐴥𐴡𐴑𐴧𐴡𐴓 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴣𐴏𐴥𐴠 𐴉𐴡𐴣𐴀𐴡𐴏𐴝𐴘 𐴊𐴠𐴀𐴠 , 𐴒𐴡𐴃𐴡 𐴃𐴞𐴕 𐴔𐴝𐴐𐴢 𐴀𐴥𐴡𐴘𐴃𐴠 𐴔𐴡𐴒𐴢 𐴁𐴝𐴒𐴞𐴌 𐴏𐴞𐴛𐴝𐴍𐴞 𐴀𐴞𐴃𐴠 , 𐴔𐴡𐴚𐴒𐴋𐴤𐴟 𐴄𐴡𐴀𐴡𐴕𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴌𐴥𐴠𐴑𐴧𐴤𐴗𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴒𐴤𐴡𐴌𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴡𐴓𐴞 𐴀𐴥𐴝𐴣𐴃𐴞𐴘𐴝𐴌 𐴓𐴡𐴘 𐴑𐴤𐴟𐴕 𐴒𐴡𐴌𐴥𐴝𐴌 𐴀𐴠𐴓𐴎𐴝𐴔 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴀𐴠𐴑 𐴎𐴡𐴕 , 𐴀𐴥𐴠𐴕𐴋𐴞𐴓𐴧𐴝 𐴀𐴡𐴙𐴕𐴧𐴡 𐴎𐴝𐴒𐴝𐴌 𐴁𐴠𐴈𐴡𐴏𐴦𐴟𐴌 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴘𐴥𐴡 𐴎𐴞𐴛𐴥𐴡𐴃 𐴉𐴝𐴀𐴝 𐴀𐴥𐴞𐴛𐴧𐴡𐴃 𐴔𐴝𐴌𐴝 𐴊𐴤𐴡𐴌𐴝 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴝𐴃 𐴃𐴤𐴝𐴑𐴤𐴠 , 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴏𐴞𐴛𐴝𐴍𐴞 𐴀𐴥𐴞𐴃𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴁𐴐𐴤𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴊𐴞𐴀𐴞 𐴑𐴟𐴄𐴤𐴞 𐴑𐴟𐴄𐴤𐴞 𐴄𐴞𐴛𐴝 𐴔𐴝𐴒𐴠 , 𐴕𐴡 𐴊𐴞𐴀𐴞𐴓𐴥𐴝 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴊𐴠𐴀𐴠 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴤𐴟𐴏𐴞𐴊𐴡𐴚𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴝 𐴁𐴝𐴌𐴥𐴞 𐴒𐴞𐴘𐴥𐴡𐴘 𐴱𐴱

𐴀𐴝𐴑𐴝𐴕 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴡𐴏𐴢 𐴁𐴡𐴓𐴞 𐴈𐴡𐴀𐴡𐴘 𐴈𐴡𐴕𐴥𐴡 𐴇𐴥𐴝𐴑𐴞𐴑𐴡𐴃

𐴀𐴝𐴌 𐴁𐴟𐴕𐴘𐴝𐴊 𐴏𐴥𐴝𐴌𐴥𐴝 𐴀𐴠𐴓𐴎𐴝𐴔 𐴊𐴞𐴀𐴞 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴓𐴝𐴒𐴝𐴃𐴝𐴌 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴌𐴠𐴂𐴟𐴄 𐴔𐴡𐴎𐴞𐴕 𐴅𐴟𐴕 𐴔𐴝𐴐𐴤𐴡𐴌 𐴵 – 𐴶 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴹 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴕𐴥𐴝𐴙𐴑𐴧𐴡𐴕 𐴊𐴡𐴚 𐴉𐴝𐴌𐴝𐴃𐴧𐴤𐴟𐴕 𐴀𐴠𐴕𐴋𐴞𐴓𐴧𐴝 𐴔𐴞𐴏𐴥𐴝 𐴀𐴠𐴓𐴎𐴝𐴔 𐴓𐴝𐴒𐴝𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴦𐴝𐴊𐴠 𐴏𐴥𐴡 – 𐴇𐴥𐴝𐴣𐴃 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴀𐴥𐴠 𐴉𐴝𐴌𐴝𐴃𐴧𐴟 𐴀𐴝𐴌𐴀𐴥𐴡 𐴈𐴡𐴊𐴦𐴟𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴝𐴣𐴊𐴤𐴞 𐴓𐴡𐴘 𐴒𐴞𐴘𐴥𐴡𐴘 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴞𐴀𐴞𐴕𐴡𐴌 𐴀𐴝𐴒𐴠 𐴀𐴠𐴕𐴋𐴞𐴓𐴧𐴝 𐴔𐴞𐴏𐴥𐴝 𐴀𐴝𐴓𐴎𐴝𐴔 𐴊𐴞𐴀𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴏𐴥𐴞𐴕𐴊𐴞 𐴉𐴝𐴌𐴝𐴚𐴡𐴃𐴧𐴟 𐴘𐴥𐴡 𐴰 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴀𐴞𐴓 𐴒𐴤𐴡𐴘 𐴊𐴠 𐴀𐴝𐴏𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴀𐴠𐴕 𐴈𐴡𐴕𐴥𐴡 𐴊𐴞𐴕 𐴕𐴥𐴝𐴘𐴊𐴠 𐴀𐴠𐴑 𐴉𐴝𐴌𐴝𐴃𐴧𐴤𐴟 𐴕𐴥𐴡 𐴀𐴠𐴑 𐴉𐴝𐴌𐴝𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴞𐴏𐴥𐴝 𐴀𐴠𐴓𐴎𐴝𐴔 𐴊𐴞𐴀𐴞 𐴊𐴞𐴀𐴞 𐴁𐴝𐴣𐴊𐴤𐴞 𐴕𐴡 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴊𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝 𐴕𐴟𐴏𐴝𐴘𐴌𐴝𐴃 𐴑𐴠𐴀𐴠𐴔𐴡𐴌 𐴀𐴝𐴃𐴡𐴚𐴁𐴝𐴊𐴞𐴌 𐴇𐴥𐴝𐴔𐴓𐴝𐴌 𐴁𐴝𐴁𐴡𐴃𐴠 𐴅𐴞 𐴏𐴞 𐴏𐴞 𐴃𐴡𐴕𐴎𐴞𐴔𐴡𐴌 𐴕𐴞𐴕𐴊𐴝 𐴱𐴱

𐴈𐴥𐴡𐴓𐴞𐴅𐴞 𐴃𐴝𐴀𐴝𐴀𐴟𐴕 𐴑𐴡𐴗𐴕𐴏𐴥𐴞𐴓 ( 𐴅𐴞 𐴏𐴞 𐴏𐴞 ) 𐴘𐴠 , 𐴔𐴝𐴎𐴤𐴡𐴌 𐴒𐴤𐴡𐴎𐴧𐴝𐴌 𐴕𐴟𐴏𐴝𐴘𐴌𐴝𐴃 𐴑𐴠𐴀𐴠𐴔𐴡𐴌 𐴖𐴡𐴌𐴠 , 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴌 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴎𐴠 𐴇𐴥𐴝𐴔𐴓𐴝𐴃 𐴰 𐴰 𐴲 𐴊𐴟𐴘 𐴐𐴤𐴡𐴃𐴡𐴌 𐴁𐴠𐴐𐴤𐴞 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴀𐴝𐴌 𐴁𐴡𐴀𐴡𐴃 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴉𐴥𐴡𐴓𐴡𐴏𐴃𐴞𐴕𐴞 𐴏𐴠𐴇𐴥𐴠𐴃 𐴋𐴞𐴂𐴦𐴝𐴌𐴔𐴠𐴕𐴠𐴌 𐴌𐴠𐴂𐴟𐴄 𐴔𐴡𐴎𐴞𐴕 ,, 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴦𐴠𐴐𐴢 𐴁𐴤𐴝𐴒𐴢 𐴁𐴠𐴍𐴞𐴀𐴝𐴙𐴕 𐴀𐴝𐴌 𐴉𐴟𐴖𐴝𐴙𐴕 𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌𐴡𐴁 𐴕𐴞𐴘𐴥𐴟𐴎 𐴈𐴥𐴡𐴁𐴡𐴌𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 ,𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴀𐴞𐴏𐴌𐴦𐴝𐴙𐴓𐴡𐴌 𐴂𐴠𐴓𐴝𐴕 𐴁𐴝𐴕𐴝𐴘𐴧𐴝 𐴎𐴟𐴓𐴥𐴟𐴔 𐴁𐴡𐴕 𐴒𐴡𐴌𐴥𐴝𐴘 𐴁𐴤𐴡𐴓𐴧𐴝 , 𐴅𐴞 𐴏𐴞 𐴏𐴞 𐴘𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴕𐴟𐴏𐴝𐴘𐴌𐴝𐴃 𐴇𐴥𐴝𐴔𐴓𐴝𐴌 𐴁𐴦𐴝𐴊𐴠 𐴓𐴝𐴌𐴥𐴝𐴘 𐴁𐴡𐴕𐴡𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴌𐴝𐴎𐴞𐴕𐴝𐴔𐴝 𐴕𐴥𐴝𐴘 𐴱𐴱

𐴔𐴝𐴎𐴤𐴡𐴌 𐴒𐴤𐴡𐴎𐴧𐴝 𐴕𐴟𐴏𐴝𐴘𐴌𐴝𐴃 𐴑𐴠𐴀𐴠𐴔𐴡𐴌 𐴖𐴡𐴌𐴠 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴌 𐴁𐴦𐴝𐴊𐴠 ,𐴓𐴝𐴌𐴥𐴝𐴘 𐴁𐴡𐴕𐴡𐴌 𐴁𐴝𐴁𐴡𐴃𐴠 𐴀𐴞𐴏𐴌𐴦𐴝𐴙𐴓 𐴓𐴡𐴘 , 𐴎𐴠 𐴈𐴡𐴕𐴥𐴡 𐴏𐴟𐴑𐴃𐴞 𐴕𐴝𐴔𐴝𐴃 𐴇𐴥𐴝𐴔𐴞𐴐𐴤𐴝𐴌𐴓𐴧𐴝 𐴓𐴝𐴌𐴥𐴝𐴘 𐴁𐴡𐴕 𐴀𐴝𐴌 𐴒𐴤𐴡𐴎𐴧𐴝𐴌 𐴃𐴧𐴟 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴢 𐴀𐴠𐴑 𐴎𐴡𐴕 𐴀𐴥𐴟𐴊𐴧𐴤𐴝 𐴕𐴡 𐴃𐴤𐴝𐴑𐴤𐴠 𐴉𐴥𐴝𐴀𐴝𐴕 𐴕𐴦𐴠𐴓𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴌𐴞𐴁𐴤𐴡 𐴊𐴠 𐴘𐴥𐴝𐴀𐴝𐴕 𐴃𐴤𐴝𐴑𐴤𐴡𐴕 𐴎𐴡𐴌𐴟𐴌𐴞 𐴁𐴡𐴓𐴞 , 𐴇𐴝𐴔𐴦𐴝𐴏𐴡𐴌 𐴏𐴥𐴞𐴘𐴝𐴏𐴞 𐴕𐴠𐴃𐴝 / 𐴀𐴞𐴏𐴔𐴝𐴀𐴞𐴓 𐴇𐴝𐴕𐴥𐴞𐴘𐴧𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴃𐴟𐴌𐴑𐴞𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴇𐴝𐴑𐴝𐴕 𐴉𐴞𐴊𐴝𐴕 𐴀𐴝𐴌 / 𐴀𐴞𐴏𐴔𐴝𐴀𐴞𐴓 𐴇𐴝𐴕𐴥𐴞𐴘𐴧𐴝𐴌 𐴊𐴡𐴌𐴔𐴞𐴘𐴝𐴕𐴡𐴃 𐴔𐴞𐴓𐴝 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴤𐴡𐴃 𐴈𐴡𐴃𐴤𐴝 𐴘𐴝𐴀𐴝𐴕 𐴈𐴡𐴘𐴧𐴥𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴒𐴤𐴡𐴎𐴧𐴝𐴌 𐴖𐴡𐴌𐴠 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞𐴌 𐴷 𐴴 𐴲 𐴊𐴞𐴕 𐴀𐴥𐴡𐴀𐴡𐴕𐴡𐴌 𐴉𐴥𐴟𐴣𐴖𐴝𐴣𐴃𐴞 , 𐴒𐴤𐴡𐴎𐴧𐴝𐴌 𐴏𐴠𐴇𐴥𐴠𐴃 𐴋𐴞𐴂𐴦𐴝𐴌𐴔𐴠𐴕𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴐𐴤𐴡𐴇𐴞𐴊 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝𐴌 𐴔𐴟𐴓 𐴒𐴡𐴕𐴝 𐴀𐴠𐴑 𐴓𐴝𐴑 𐴀𐴠𐴒𐴤𐴡𐴙𐴐𐴢 𐴇𐴥𐴝𐴎𐴝𐴌 𐴁𐴤𐴝𐴌𐴝𐴘 𐴒𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱