𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴡𐴀𐴡𐴕𐴡𐴃 𐴆𐴞𐴕𐴝𐴌 𐴈𐴥𐴝𐴏𐴢 𐴏𐴥𐴡𐴉𐴞𐴌𐴠 𐴔𐴡𐴊𐴡𐴃 𐴒𐴡𐴌𐴥𐴞𐴁𐴤𐴡 𐴈𐴡𐴘𐴧𐴠 𐴱𐴱

𐴅𐴟𐴕 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴆𐴞𐴕𐴝 – 𐴁𐴝𐴚𐴓𐴝𐴊𐴠𐴐𐴢 𐴊𐴟𐴘 𐴊𐴠𐴐𐴤𐴡𐴌 , 𐴏𐴥𐴞𐴘𐴝𐴏𐴞 𐴔𐴟𐴃𐴦𐴝𐴓𐴧𐴠𐴑𐴝 𐴀𐴥𐴡𐴘𐴧𐴠𐴊𐴠 𐴃𐴠𐴌𐴥𐴡𐴀𐴡𐴔 𐴔𐴞𐴄𐴤𐴞𐴚𐴡𐴃 , 𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴔𐴞𐴓𐴞 𐴐𐴤𐴟𐴕𐴊𐴡𐴌 𐴀𐴝𐴌 𐴀𐴝𐴏𐴦𐴝𐴕 𐴌𐴝𐴏𐴃𐴝 𐴕𐴦𐴓𐴝𐴘 𐴔𐴡𐴊𐴡𐴃 𐴒𐴡𐴌𐴥𐴞 𐴁𐴤𐴡𐴓𐴧𐴝 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴔𐴡𐴏𐴀𐴟𐴊𐴢 𐴁𐴤𐴞𐴕 𐴔𐴥𐴟𐴔𐴠𐴕𐴠 , 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴆𐴞𐴕𐴝𐴌 𐴈𐴥𐴝𐴏𐴢 𐴏𐴥𐴡𐴉𐴞𐴌 / 𐴋𐴠𐴚 𐴎𐴞𐴅𐴝𐴕𐴡 𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃 𐴔𐴝𐴕𐴥𐴟𐴙𐴐𐴢 𐴁𐴠𐴐𐴤𐴞 , 𐴎𐴝𐴒𐴝𐴌 𐴀𐴠𐴌𐴥𐴞𐴘𐴝 𐴐𐴤𐴡𐴣𐴍𐴡 𐴊𐴠 𐴀𐴥𐴠𐴃𐴡𐴓𐴧𐴝 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴁𐴡𐴕𐴊𐴡𐴁𐴡𐴏𐴢 𐴒𐴡𐴙𐴃𐴧𐴤𐴠 𐴔𐴡𐴐𐴑𐴞𐴓 𐴀𐴥𐴡𐴀𐴡𐴕𐴠 , 𐴊𐴠𐴐𐴢 𐴁𐴡𐴘𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 𐴊𐴤𐴝𐴉𐴢 𐴒𐴡𐴌𐴥𐴞 𐴈𐴝𐴔 𐴒𐴡𐴌𐴥𐴡𐴕𐴡𐴌 𐴃𐴟 𐴁𐴤𐴝𐴌𐴥𐴡 ,𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃 𐴒𐴡𐴌𐴥𐴝 𐴌𐴥𐴠 𐴘𐴥𐴠 𐴎𐴡𐴌𐴟𐴌𐴞 𐴁𐴟𐴎𐴤𐴞 𐴘𐴥𐴝𐴀𐴝𐴕𐴡𐴃 𐴉𐴝𐴣𐴉𐴡𐴌𐴝𐴕 𐴊𐴞𐴀𐴞 𐴈𐴝𐴔 𐴒𐴡𐴌𐴥𐴠𐴌 𐴊𐴧𐴠 , 𐴁𐴝𐴚𐴓𐴝𐴊𐴠𐴐𐴤𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴈𐴥𐴡𐴕 𐴀𐴝𐴌𐴑𐴝𐴕𐴡𐴃 𐴏𐴡𐴓𐴠𐴌 𐴊𐴧𐴠 𐴉𐴥𐴡𐴏𐴝𐴊𐴡𐴌 𐴁𐴝𐴁𐴡𐴃𐴠 𐴁𐴠𐴐𐴤𐴞 𐴏𐴞𐴕𐴃𐴝 𐴉𐴠𐴌𐴠𐴐𐴝𐴕𐴞𐴃 𐴁𐴡𐴓𐴞 𐴈𐴡𐴀𐴡𐴘 𐴁𐴦𐴝𐴊𐴠 𐴁𐴡𐴖𐴋𐴝𐴌 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴀𐴥𐴡𐴀𐴡𐴌 𐴊𐴧𐴠 𐴀𐴥𐴞𐴀𐴞𐴕𐴡𐴌 𐴀𐴝𐴏𐴥𐴡𐴌 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴥𐴟𐴊𐴧𐴝 𐴀𐴝𐴀𐴝𐴙𐴃 𐴉𐴝𐴌𐴠 𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴠𐴈𐴥𐴡𐴕𐴡𐴌 𐴉𐴥𐴡𐴏𐴝𐴊𐴡𐴌 𐴔𐴟𐴃𐴦𐴝𐴓𐴧𐴠𐴑𐴝 𐴔𐴟𐴓 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕 𐴓𐴡𐴘 𐴔𐴞𐴓𐴞 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴘𐴥𐴡 , 𐴁𐴝𐴚𐴓𐴝𐴊𐴠𐴐𐴤𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴆𐴞𐴕𐴝𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴃𐴞𐴕 𐴓𐴝𐴑 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴃𐴞𐴕 𐴔𐴡𐴓𐴞𐴘𐴥𐴟𐴕 𐴌𐴞𐴉𐴟𐴎𐴞𐴌𐴥𐴠 𐴏𐴥𐴡𐴀𐴞 𐴎𐴝𐴒𐴝 𐴊𐴞𐴀𐴞𐴁𐴡𐴓𐴧𐴥𐴝 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴠 ) 𐴈𐴡𐴘𐴧𐴥𐴠 𐴱𐴱

𐴁𐴡𐴌𐴔𐴥𐴝𐴌 𐴊𐴟𐴘 𐴓𐴝𐴑𐴤𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴐𐴤𐴡𐴣𐴀𐴡 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴃𐴞𐴕 𐴔𐴡𐴓𐴞𐴘𐴥𐴟𐴕 𐴌𐴞𐴉𐴟𐴎𐴞 𐴌𐴥𐴠 , 𐴊𐴟𐴖𐴝𐴌𐴝 𐴏𐴥𐴡𐴀𐴞 𐴎𐴝𐴒𐴝 𐴊𐴡𐴀𐴡𐴕 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑𐴝 𐴔𐴡𐴇𐴝 𐴔𐴥𐴝𐴚 𐴒𐴞𐴌𐴥𐴞 𐴀𐴡𐴉𐴥𐴞𐴏𐴡 𐴃𐴧𐴟 𐴅𐴟𐴕 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴈𐴥𐴡𐴁𐴡𐴌 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴵 𐴲 𐴰 𐴲 𐴐𐴤𐴡𐴕𐴡𐴌 𐴓𐴧𐴥𐴝 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 , 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴌𐴞𐴉𐴟𐴎𐴞𐴌𐴥𐴠 𐴏𐴥𐴡𐴀𐴞 𐴎𐴝𐴒𐴝 𐴊𐴡𐴀𐴡𐴕𐴡𐴌 𐴂𐴡𐴌𐴟𐴒𐴠𐴌𐴝𐴔𐴡𐴃 , 𐴏𐴥𐴟𐴌𐴞𐴘𐴝 , 𐴀𐴝𐴉𐴒𐴝𐴕𐴞𐴏𐴃𐴦𐴝𐴕 , 𐴊𐴡𐴀𐴡𐴙𐴕 𐴏𐴟𐴋𐴤𐴝𐴕 , 𐴁𐴡𐴌𐴔𐴥𐴝 , 𐴑𐴗𐴠𐴕 𐴒𐴟 , 𐴀𐴞𐴀𐴞𐴕 𐴁𐴦𐴝𐴊𐴠 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴊𐴠𐴐𐴤𐴡𐴌 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴀𐴥𐴡 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠 , 𐴏𐴥𐴟𐴌𐴞𐴘𐴥𐴝𐴌 𐴌𐴞𐴉𐴟𐴎𐴞 𐴕𐴡 𐴓𐴝𐴑𐴤𐴡𐴌 𐴁𐴠𐴐𐴤𐴞 ( 𐴰 𐴰 𐴰 𐴳 𐴳 𐴹 ) 𐴁𐴡𐴌𐴔𐴥𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴊𐴟𐴘 𐴓𐴝𐴑𐴤𐴡𐴌 𐴁𐴠𐴐𐴤𐴞 ( 𐴰 𐴰 𐴰 𐴶 𐴲 𐴲 ) 𐴌𐴞𐴉𐴟𐴎𐴞 𐴀𐴟𐴀𐴕𐴡𐴌 𐴃𐴡𐴑𐴧𐴝 𐴏𐴝𐴙𐴌 𐴓𐴡𐴔𐴁𐴤𐴡𐴌𐴡𐴃 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴃𐴡𐴚𐴁𐴝𐴊𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴐𐴤𐴞𐴑𐴝𐴌 𐴀𐴥𐴟𐴀𐴝 𐴀𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴝𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌𐴊𐴠 𐴀𐴥𐴠𐴕𐴃𐴟 𐴀𐴝𐴎𐴝𐴊 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴅𐴡𐴓𐴊𐴞 𐴔𐴡𐴊𐴡𐴃 𐴒𐴡𐴌𐴥𐴞 𐴁𐴤𐴡𐴓𐴧𐴝 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴠 ) 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃 𐴉𐴡𐴣𐴀𐴡𐴏𐴝𐴌 𐴊𐴧𐴠 𐴋𐴝𐴓𐴝𐴓 𐴃𐴞𐴕 𐴎𐴡𐴕𐴡𐴌𐴥𐴠 𐴎𐴞𐴘𐴥𐴡𐴓 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴶 𐴳 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 ,𐴁𐴟𐴄 𐴓𐴡𐴘 𐴉𐴡𐴣𐴀𐴡𐴏𐴝𐴘𐴧𐴥𐴠𐴊𐴠 𐴋𐴝𐴓𐴝𐴓 𐴃𐴞𐴕 𐴎𐴡𐴕𐴡𐴌𐴥𐴠 𐴀𐴝𐴓𐴡𐴒𐴢 𐴀𐴝𐴓𐴡𐴒𐴢 𐴁𐴤𐴝𐴉𐴠 𐴎𐴞𐴘𐴥𐴡𐴓𐴡𐴌 𐴐𐴤𐴝𐴎𐴝 𐴉𐴥𐴟𐴕𐴝𐴘 𐴊𐴞𐴘𐴥𐴠 𐴁𐴡𐴓𐴞 , 𐴅𐴟𐴕 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴅𐴝𐴑𐴝𐴌𐴃𐴝 𐴒𐴡𐴓𐴥𐴟𐴁 𐴈𐴥𐴡𐴁𐴡𐴌𐴡𐴃 𐴉𐴝𐴀𐴝 𐴒𐴞𐴘𐴥𐴠 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴔𐴡𐴐𐴦𐴟𐴌 𐴈𐴡𐴏𐴟𐴌𐴁𐴡𐴕 𐴊𐴠 𐴘𐴥𐴝𐴀𐴝𐴕 𐴀𐴞𐴕𐴑𐴟𐴖𐴝𐴌𐴞 𐴀𐴝𐴌 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞 𐴏𐴥𐴝𐴁𐴟𐴃 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴀𐴝𐴆𐴙𐴠 𐴋𐴞𐴐𐴄𐴤𐴞𐴑𐴡𐴌 𐴅𐴠𐴕𐴄𐴟 𐴐𐴤𐴡𐴀𐴡𐴌𐴡𐴌 𐴀𐴝𐴊𐴝𐴓𐴡𐴃𐴡𐴌 𐴑𐴝𐴎𐴞 𐴘𐴠 , 𐴅𐴟𐴕 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴉𐴥𐴝𐴘𐴏𐴠𐴓𐴝 𐴉𐴥𐴟𐴕𐴝𐴘 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴟𐴍𐴡𐴌 𐴔𐴝𐴎𐴤𐴞𐴌𐴥𐴠 𐴀𐴝𐴣𐴐𐴄𐴡 𐴁𐴡𐴏𐴥𐴡𐴌 𐴀𐴝𐴌 𐴎𐴟𐴣𐴖𐴝𐴛𐴓𐴧𐴝 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴏𐴥𐴡 𐴁𐴡𐴏𐴥𐴡𐴌𐴡𐴌 𐴊𐴡𐴌𐴠 𐴎𐴞𐴘𐴥𐴡𐴓 𐴀𐴝𐴌 𐴉𐴡𐴙𐴃𐴧𐴡 𐴎𐴡𐴕𐴡𐴌 𐴃𐴤𐴟 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴄𐴞𐴛𐴝 𐴰 𐴰 𐴵 𐴔𐴡𐴓𐴞𐴘𐴥𐴟𐴕𐴡𐴌 𐴊𐴡𐴌𐴠 𐴎𐴡𐴌𐴞𐴁𐴝𐴕𐴝 𐴘𐴥𐴡 𐴊𐴞𐴘𐴝 𐴉𐴡𐴌𐴞𐴁𐴤𐴡𐴊𐴠 𐴉𐴥𐴟𐴕𐴝𐴘 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴎𐴡𐴌𐴞𐴁𐴝𐴕𐴝𐴌 𐴄𐴞𐴛𐴝 𐴀𐴝𐴊𐴝𐴘 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞𐴓𐴥𐴠 , 𐴎𐴞𐴘𐴥𐴡𐴓𐴡𐴌 𐴉𐴥𐴝𐴘𐴏𐴠𐴓𐴝𐴌 𐴁𐴝𐴀𐴝𐴌𐴠 𐴃𐴞𐴕 𐴔𐴝𐴐𐴢 𐴁𐴦𐴠𐴐𐴢 𐴈𐴥𐴝𐴍𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴉𐴥𐴟𐴕𐴝𐴘 𐴊𐴞𐴘𐴥𐴠𐴊𐴠 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴔𐴟𐴌𐴥𐴟 𐴀𐴥𐴟 𐴌𐴥𐴠𐴑𐴤𐴗𐴥𐴝𐴃 𐴔𐴡𐴒𐴢 𐴁𐴝𐴒𐴞 𐴒𐴤𐴡𐴙𐴓𐴧𐴙𐴠 , 𐴔𐴠𐴓𐴠𐴄𐴠𐴌𐴞𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴀𐴝𐴌 𐴑𐴠𐴙𐴏𐴧𐴥𐴟 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴔𐴟𐴌𐴥𐴟 𐴀𐴥𐴟 𐴌𐴥𐴠𐴑𐴤𐴗𐴥𐴝𐴌 𐴁𐴤𐴟𐴃𐴤𐴡𐴌𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 ,𐴅𐴟𐴕 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴓𐴡𐴒𐴢 𐴁𐴤𐴡𐴒𐴢 𐴊𐴦𐴟𐴛𐴅𐴧𐴙𐴝 𐴐𐴤𐴝𐴌𐴡 𐴁𐴝𐴌𐴥𐴡 𐴁𐴝𐴎𐴠 𐴒𐴤𐴡𐴓𐴞 𐴎𐴝𐴒𐴝 𐴓𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴔𐴟𐴌𐴥𐴟 𐴏𐴟 𐴒𐴞𐴌𐴥𐴞𐴃 𐴀𐴝𐴏𐴥𐴠𐴊𐴠 ( 𐴕𐴥𐴝 𐴑𐴤𐴝 𐴑𐴤𐴝 𐴵 ) 𐴒𐴤𐴝𐴣𐴄𐴞 𐴃𐴧𐴟 𐴋𐴡𐴌𐴟𐴕 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴁𐴡𐴀𐴡𐴃 𐴌𐴟𐴇𐴝𐴙𐴚𐴒𐴙𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴘𐴟 𐴀𐴠𐴕𐴡𐴌 𐴀𐴞𐴐𐴑𐴟𐴓𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝 𐴈𐴡𐴔𐴡𐴃 𐴰 𐴴 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴱𐴱

𐴅𐴟𐴕 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴉𐴥𐴡𐴓𐴡𐴏𐴃𐴞𐴕𐴞 𐴉𐴝𐴕𐴥𐴝 𐴓𐴡𐴘 𐴃𐴦𐴡𐴙𐴃𐴧𐴝 𐴃𐴤𐴝𐴑𐴤𐴠𐴌 𐴊𐴧𐴠 𐴕𐴟𐴏𐴝𐴘𐴌𐴝𐴃 𐴑𐴠𐴀𐴠𐴔𐴡𐴌 𐴘𐴟 𐴀𐴠𐴕𐴡𐴌 ( 𐴘𐴟 𐴀𐴠𐴕 𐴀𐴝𐴌 𐴋𐴝𐴁𐴓𐴙𐴟 𐴀𐴠 ) 𐴀𐴞𐴐𐴑𐴟𐴓𐴡𐴃 , 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴰 𐴴 𐴎𐴡𐴕 𐴓𐴡𐴃𐴞 𐴔𐴡𐴎𐴓𐴟𐴔 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴘𐴟 𐴀𐴠𐴕𐴡𐴌 𐴀𐴞𐴐𐴑𐴟𐴓𐴡𐴃 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴔𐴡𐴎𐴓𐴟𐴔 𐴉𐴥𐴡𐴓𐴡𐴏𐴃𐴞𐴕𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 , 𐴀𐴝𐴣𐴀𐴝𐴌𐴝 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴡𐴌 𐴓𐴝𐴌𐴥𐴝𐴘𐴁𐴝𐴎 𐴀𐴥𐴡𐴑𐴧𐴡𐴓 𐴁𐴠𐴐𐴤𐴝 𐴁𐴠𐴐𐴤𐴞 𐴔𐴝𐴌𐴞 𐴉𐴥𐴠𐴓𐴝𐴘𐴧𐴞 𐴁𐴡𐴓𐴞 𐴈𐴡𐴀𐴡𐴌 𐴊𐴧𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴷 𐴱 𐴖𐴥𐴝𐴕 𐴊𐴠𐴐𐴤𐴠 𐴒𐴤𐴡𐴎𐴧𐴝𐴌 𐴓𐴝𐴌𐴥𐴝𐴘 𐴁𐴡𐴕𐴡𐴌 𐴁𐴝𐴁𐴡𐴃𐴠 𐴀𐴝𐴔𐴠𐴌𐴞𐴑𐴝𐴌 𐴉𐴡𐴌𐴡𐴏𐴃𐴝𐴁𐴡𐴌 𐴇𐴥𐴠𐴔𐴝𐴘𐴡𐴃 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴔𐴠𐴌𐴞𐴑𐴝 𐴐𐴤𐴡𐴣𐴀𐴡 𐴷 𐴱 𐴖𐴥𐴝𐴕 𐴊𐴠𐴐𐴤𐴠 𐴒𐴤𐴡𐴎𐴧𐴝𐴌 𐴓𐴝𐴌𐴥𐴝𐴘 𐴁𐴡𐴕𐴡𐴌 𐴁𐴝𐴁𐴡𐴃𐴠 , 𐴀𐴝𐴔𐴠𐴌𐴞𐴑𐴝𐴌 𐴉𐴡𐴌𐴏𐴃𐴝𐴁𐴡𐴌 𐴇𐴥𐴠𐴔𐴝𐴘𐴡𐴃 𐴒𐴡𐴌𐴥𐴞 𐴁𐴦𐴝𐴊𐴠 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴞 𐴇𐴝𐴔𐴦𐴝𐴏𐴢 𐴀𐴝𐴌 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴈𐴡𐴘𐴧𐴥𐴠𐴊𐴠 , 𐴈𐴡𐴊𐴞 𐴀𐴥𐴡𐴑𐴧𐴡𐴓𐴡𐴌 𐴁𐴡𐴊𐴡𐴓𐴝 𐴁𐴡𐴊𐴡𐴓𐴞 𐴌𐴥𐴠 𐴀𐴝𐴔𐴥𐴡𐴓𐴡𐴃 𐴀𐴝𐴕𐴥𐴞 𐴁𐴤𐴡𐴓𐴧𐴝 𐴀𐴠𐴑 𐴎𐴡𐴕𐴠 𐴀𐴡𐴉𐴡𐴌 𐴎𐴡𐴕𐴡𐴌 𐴌𐴞𐴘𐴝𐴘𐴡𐴃 𐴒𐴡𐴌𐴥𐴡 𐴀𐴝𐴌 𐴖𐴦𐴝 𐴀𐴥𐴡𐴘 𐴕𐴡 𐴃𐴤𐴝𐴙𐴑𐴧𐴙𐴡 𐴎𐴤𐴟𐴉𐴥𐴞 𐴀𐴝𐴘𐴧𐴥𐴡 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴡𐴌 𐴑𐴡𐴊𐴡𐴌 𐴒𐴡𐴌𐴥𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱