𐴓𐴡𐴒𐴢 𐴁𐴤𐴡𐴒𐴢 𐴀𐴠𐴑 𐴓𐴝𐴑 𐴉𐴡𐴕𐴎𐴝𐴙𐴐𐴢 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴡𐴓𐴝𐴎𐴟𐴌𐴞 𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴥𐴠 𐴱𐴱

𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴓𐴝𐴎𐴟𐴌𐴞 𐴀𐴥𐴝𐴣𐴃𐴞𐴘𐴝𐴌𐴡𐴌 𐴁𐴡𐴓𐴠 𐴓𐴡𐴒𐴢 𐴁𐴤𐴡𐴒𐴢 𐴀𐴠𐴑 𐴓𐴝𐴑 𐴉𐴡𐴕𐴎𐴝𐴙𐴐𐴢 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴐𐴤𐴡𐴣𐴀𐴡 𐴄𐴡𐴀𐴡𐴕𐴡𐴌 𐴀𐴝𐴃𐴌𐴝𐴉𐴡𐴃 𐴓𐴝𐴌𐴥𐴝𐴘 𐴀𐴝𐴌 𐴉𐴟𐴌𐴝𐴉𐴟𐴌𐴞𐴌 𐴎𐴡𐴌𐴞𐴘𐴝 , 𐴒𐴤𐴡𐴌 𐴃𐴤𐴡𐴌 𐴏𐴥𐴝𐴌𐴝 𐴀𐴥𐴡𐴘 𐴒𐴞𐴘𐴠 𐴒𐴤𐴡𐴘𐴊𐴠 𐴎𐴝𐴒𐴝 𐴀𐴝𐴌 𐴉𐴝𐴌𐴝 𐴀𐴥𐴞𐴀𐴞𐴕𐴡𐴃𐴧𐴤𐴟 𐴎𐴝𐴒𐴝 𐴓𐴝𐴌𐴞 𐴈𐴡𐴀𐴠𐴑 𐴊𐴞𐴕 𐴀𐴝𐴒𐴠 , 𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴏𐴥𐴝𐴔𐴞𐴓𐴝 𐴉𐴝𐴌𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴥𐴠𐴊𐴠 𐴘𐴥𐴝𐴀𐴝𐴕 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴞𐴕𐴏𐴦𐴝𐴕 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 𐴒𐴡𐴌𐴟 𐴋𐴞𐴛𐴝 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴋𐴞𐴛𐴝𐴘 𐴓𐴡𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴄𐴞𐴛𐴝 𐴉𐴡𐴘𐴐𐴤𐴝 𐴀𐴝𐴌 𐴔𐴟𐴙𐴓𐴧𐴡𐴔𐴝𐴕 𐴏𐴥𐴝𐴔𐴝𐴕 𐴓𐴡𐴘 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 , 𐴎𐴠𐴊𐴦𐴞𐴕 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴉𐴝𐴙𐴅𐴧𐴤𐴙𐴠 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴥𐴠 , 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴉𐴥𐴟𐴣𐴖𐴝𐴣𐴃𐴞 𐴎𐴝𐴀𐴝𐴌 𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴰 𐴲 𐴃𐴟𐴓𐴝 𐴓𐴡𐴃𐴞 𐴐𐴤𐴟𐴕𐴝 𐴓𐴟𐴄 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴉𐴡𐴣𐴃𐴤𐴡𐴃 𐴒𐴤𐴡𐴕𐴄𐴤𐴝 𐴒𐴤𐴡𐴕𐴄𐴤𐴝 𐴄𐴞𐴛𐴝 𐴓𐴟𐴀𐴝𐴃 𐴃𐴤𐴝𐴑𐴤𐴠 , 𐴀𐴞𐴀𐴞𐴕 𐴁𐴦𐴝𐴊𐴠 𐴒𐴡𐴔 𐴔𐴟𐴁𐴦𐴝𐴙𐴓 𐴀𐴥𐴡𐴑𐴧𐴡𐴓 𐴀𐴥𐴡 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴐𐴤𐴡𐴃 𐴑𐴝𐴌𐴝 𐴀𐴝𐴐𐴤𐴞 𐴕𐴡𐴁𐴧𐴡𐴘 𐴎𐴡𐴕 𐴓𐴡𐴃𐴞 , 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴝𐴀𐴝𐴌𐴠 𐴈𐴡𐴕𐴥𐴡 𐴑𐴞𐴘𐴥𐴡𐴓 𐴓𐴡𐴘 𐴎𐴟𐴑𐴝𐴎𐴟𐴑 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 , 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴡𐴌 𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴀𐴝𐴌𐴑𐴝𐴕𐴡𐴌 𐴁𐴝𐴀𐴝𐴌𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴑𐴟𐴓𐴠 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴀𐴝𐴉𐴞𐴓 𐴒𐴡𐴌𐴥𐴠𐴌 𐴊𐴧𐴠 , 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴥𐴟𐴔𐴡𐴌 𐴃𐴧𐴟 𐴁𐴝𐴏𐴝𐴘 𐴓𐴡𐴘𐴁𐴡𐴓𐴧𐴥𐴝 𐴁𐴡𐴓𐴞 𐴀𐴝𐴉𐴞𐴓 𐴒𐴡𐴌𐴥𐴠𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴤𐴟𐴏𐴞𐴊𐴡𐴚𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴈𐴥𐴝𐴕𐴝𐴌 𐴈𐴡𐴔𐴞 𐴀𐴝𐴌 𐴏𐴠𐴇𐴥𐴠𐴃𐴡𐴌 𐴈𐴥𐴡𐴌𐴝𐴁𐴞 𐴱𐴱

𐴀𐴝𐴌𐴑𐴝𐴕 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴓𐴝𐴌𐴥𐴝𐴘 𐴀𐴝𐴌 𐴉𐴟𐴌𐴝𐴉𐴟𐴌𐴞𐴌 𐴎𐴡𐴌𐴞𐴘𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴐𐴤𐴟𐴊𐴠 𐴒𐴝𐴘𐴍𐴡𐴌 𐴈𐴡𐴀𐴡𐴌 𐴒𐴤𐴞𐴕 𐴓𐴡𐴘 , 𐴒𐴤𐴡𐴌 𐴏𐴥𐴝𐴌𐴝 𐴃𐴤𐴡𐴌 𐴏𐴥𐴝𐴌𐴥𐴝 𐴀𐴥𐴡𐴘 𐴁𐴦𐴝𐴊𐴠 𐴎𐴞 𐴎𐴞𐴑𐴧𐴤𐴙𐴝 𐴏𐴟𐴑𐴤𐴠 𐴊𐴠𐴙𐴑𐴧𐴤𐴙𐴠 𐴀𐴥𐴞𐴑𐴧𐴤𐴙𐴝𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴃𐴤𐴝𐴑𐴤𐴡𐴕𐴡𐴌 𐴎𐴡𐴌𐴞𐴘𐴝 , 𐴑𐴟𐴓𐴠 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴈𐴥𐴝𐴕𐴝𐴌 𐴈𐴡𐴔𐴞 𐴘𐴠 𐴑𐴝𐴇𐴥𐴝𐴃 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 , 𐴈𐴥𐴝𐴕𐴝𐴌 𐴑𐴝𐴇𐴥𐴝𐴃 𐴀𐴥𐴡𐴀𐴡𐴕𐴠 𐴈𐴥𐴝𐴕𐴝 𐴄𐴤𐴞𐴑 𐴕𐴡 𐴃𐴤𐴝𐴑𐴤𐴡𐴕𐴠 𐴏𐴠𐴇𐴥𐴠𐴃 𐴀𐴥𐴡 𐴈𐴥𐴡𐴌𐴝𐴁𐴢 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 , 𐴀𐴥𐴠𐴊𐴦𐴟𐴕 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴝𐴒𐴝𐴃 𐴎𐴡𐴔𐴝 𐴀𐴥𐴡𐴀𐴡𐴕𐴠 𐴔𐴟𐴌𐴝 𐴉𐴠𐴌𐴝 𐴌𐴝𐴏𐴃𐴝 𐴒𐴤𐴝𐴣𐴄 𐴉𐴟𐴌𐴝𐴘 𐴒𐴞𐴘𐴥𐴡𐴘 , 𐴊𐴞𐴕𐴝𐴌𐴞 𐴎𐴡𐴌𐴟𐴌𐴡𐴃 𐴉𐴟𐴌𐴝 𐴀𐴥𐴡𐴘𐴃𐴠 𐴁𐴠𐴐𐴤𐴞 𐴔𐴡𐴐𐴑𐴞𐴓 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 , 𐴎𐴠𐴕𐴋𐴞𐴓𐴧𐴝 𐴁𐴤𐴝𐴃 , 𐴏𐴥𐴝𐴉𐴢 𐴉𐴝𐴕𐴥𐴞 , 𐴉𐴠𐴐𐴤𐴝𐴂𐴢 𐴉𐴠𐴈𐴥𐴝𐴕𐴝𐴌 𐴎𐴡𐴌𐴟𐴌𐴡𐴃 𐴉𐴟𐴌𐴝 𐴒𐴡𐴌𐴥𐴞𐴁𐴤𐴝𐴌 𐴎𐴝𐴒𐴝 , 𐴉𐴞𐴣𐴊𐴤𐴞𐴁𐴤𐴝𐴌 𐴈𐴡𐴀𐴡𐴌 𐴀𐴝𐴌 𐴌𐴝𐴙𐴃 𐴈𐴝𐴍𐴝𐴘𐴁𐴤𐴝𐴌 𐴃𐴤𐴡𐴌 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴎𐴡𐴌𐴟𐴌𐴡𐴃 𐴉𐴟𐴌𐴝 𐴒𐴡𐴌𐴥𐴝 𐴁𐴠𐴐𐴤𐴞 𐴔𐴡𐴐𐴑𐴞𐴓 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 ,𐴕𐴞𐴎𐴡𐴌 𐴃𐴤𐴡𐴌𐴡𐴃𐴧𐴟 𐴁𐴠𐴃𐴤𐴡𐴌 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴁𐴤𐴟𐴃𐴤𐴡𐴌𐴠 , 𐴒𐴟𐴌𐴝 𐴉𐴟𐴖𐴝𐴙𐴕 , 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴝𐴌 𐴇𐴥𐴝𐴔𐴞𐴓 𐴁𐴠𐴍𐴞𐴀𐴥𐴝𐴙𐴕𐴊𐴡𐴌 𐴏𐴠𐴇𐴥𐴠𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 ,𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴀𐴥𐴡𐴘 𐴒𐴞𐴘𐴥𐴡𐴘𐴊𐴠 𐴀𐴝𐴌𐴑𐴝𐴕𐴌 𐴄𐴡𐴀𐴡𐴕 𐴀𐴥𐴡𐴑𐴧𐴡𐴓𐴡𐴌 𐴌𐴟𐴇𐴝𐴙𐴚𐴒𐴙𐴝𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 , 𐴈𐴥𐴝𐴏𐴢 𐴒𐴡𐴌𐴥𐴞 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝 𐴀𐴝𐴌 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌 𐴀𐴠𐴓𐴝𐴑𐴝𐴌 𐴇𐴥𐴝𐴓𐴡𐴃 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴔𐴠𐴌𐴞𐴑𐴝𐴃 𐴁𐴡𐴌𐴔𐴥𐴝𐴌 𐴕𐴡𐴏𐴥𐴡𐴓 𐴈𐴥𐴡𐴃𐴡𐴔 𐴑𐴝𐴌𐴖𐴝𐴘𐴌 𐴁𐴠𐴌𐴟𐴊𐴧𐴤𐴠 𐴇𐴥𐴡𐴌𐴃𐴝𐴓 𐴱𐴱

𐴁𐴡𐴌𐴔𐴥𐴝 𐴀𐴝𐴌𐴑𐴝𐴕𐴡𐴃 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 , 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴀𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴥𐴠 𐴁𐴝𐴏𐴝𐴘 𐴓𐴡𐴘𐴁𐴡𐴓𐴧𐴥𐴝 𐴊𐴟𐴕𐴞𐴘𐴝𐴘𐴌𐴥𐴠 𐴎𐴝𐴕𐴝𐴘𐴁𐴤𐴝𐴌 𐴂𐴡𐴌𐴟𐴒𐴠𐴌𐴝𐴔 𐴓𐴡𐴘 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴁𐴠𐴌𐴟𐴊𐴧𐴤𐴠 , 𐴀𐴝𐴔𐴠𐴌𐴞𐴑𐴝𐴃 𐴃𐴤𐴝𐴑𐴤𐴠𐴊𐴠 𐴈𐴡𐴊𐴦𐴟𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴠𐴑 𐴎𐴝𐴒𐴝𐴃 𐴎𐴡𐴔𐴝 𐴀𐴥𐴡𐴘 , 𐴁𐴠𐴕𐴥𐴝𐴌 𐴊𐴤𐴡𐴌𐴞 𐴀𐴝𐴔𐴠𐴌𐴞𐴑𐴝𐴃 𐴅𐴟𐴕 𐴔𐴝𐴐𐴤𐴡𐴌 𐴃𐴞𐴕 𐴃𐴝𐴌𐴥𐴞𐴑𐴡𐴃 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴇𐴥𐴡𐴌𐴃𐴝𐴓𐴞 𐴀𐴥𐴡𐴑𐴧𐴡𐴓𐴠 𐴏𐴥𐴟𐴓𐴟𐴒𐴦𐴝𐴕 𐴀𐴥𐴞𐴏𐴝𐴉𐴠 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴎𐴝𐴕𐴝𐴘𐴧𐴥𐴠𐴊𐴠 , 𐴁𐴡𐴌𐴔𐴥𐴝𐴌 𐴎𐴦𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 , 𐴁𐴝𐴕𐴝𐴘𐴧𐴝 𐴉𐴥𐴞𐴄 𐴒𐴡𐴙𐴅𐴧𐴤𐴙𐴝 𐴃𐴡𐴌𐴞𐴑𐴝 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴘𐴥𐴝𐴀𐴝𐴕𐴡𐴃 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴔𐴟𐴊𐴝𐴈𐴡𐴓𐴡𐴃 𐴒𐴡𐴌𐴥𐴞 , 𐴎𐴟𐴓𐴥𐴟𐴔 𐴁𐴡𐴕 𐴒𐴡𐴌𐴥𐴝𐴘 𐴊𐴟𐴕𐴥𐴞 𐴋𐴝𐴀𐴝𐴘 𐴌𐴥𐴠 𐴐𐴤𐴝𐴎𐴝 𐴊𐴞𐴀𐴞𐴁𐴡𐴓𐴧𐴥𐴝 ( 𐴀𐴝𐴘 𐴏𐴞 𐴅𐴠 ) ( 𐴀𐴝𐴘 𐴏𐴞 𐴏𐴞 ) ( 𐴀𐴡 𐴀𐴝𐴘 𐴏𐴞 ) ( 𐴘𐴟 𐴀𐴠𐴕 ) ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 ) ( 𐴘𐴟𐴕𐴞𐴏𐴥𐴞𐴉𐴢 ) 𐴀𐴞𐴀𐴞𐴕 𐴐𐴤𐴡𐴣𐴀𐴡 𐴊𐴟𐴕𐴞𐴘𐴝𐴘𐴌 𐴀𐴡𐴙𐴕𐴧𐴡 𐴐𐴤𐴡𐴔𐴝𐴎 𐴀𐴥𐴡𐴑𐴧𐴡𐴓𐴡 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕𐴊𐴤𐴡𐴌 𐴑𐴤𐴟𐴐𐴞 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴴 𐴲 𐴰 𐴲 𐴐𐴤𐴡𐴕 𐴅𐴟𐴕 𐴔𐴝𐴐𐴤𐴡𐴌 𐴃𐴞𐴕 𐴃𐴝𐴌𐴥𐴞𐴑𐴡𐴃 𐴱 𐴴 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕𐴊𐴤𐴡𐴌𐴠 𐴇𐴥𐴝𐴊𐴞𐴘𐴝 𐴊𐴞𐴘𐴝 𐴒𐴞𐴘𐴥𐴠 , ( 𐴇𐴙𐴟𐴔𐴥𐴠𐴕 𐴑𐴡𐴕𐴏𐴥𐴝𐴕 𐴘𐴟 𐴀𐴠𐴏𐴢 𐴀𐴠 ) 𐴃𐴡𐴕𐴎𐴞𐴔 𐴀𐴝𐴌 ( 𐴏𐴟𐴆𐴞𐴓𐴞𐴘𐴠𐴕 𐴀𐴠𐴕 𐴅𐴞 𐴀𐴡 ) 𐴃𐴡𐴕𐴎𐴞𐴔 , 𐴀𐴠 𐴊𐴟𐴕𐴥𐴞 𐴃𐴡𐴕𐴎𐴞𐴔𐴠 𐴔𐴞𐴓𐴞 ( 𐴏𐴞 𐴀𐴠𐴏𐴢 𐴂𐴞 ) 𐴉𐴟𐴖𐴙𐴕 𐴉𐴝𐴓𐴝 𐴂𐴡𐴌𐴟𐴒𐴠𐴌𐴝𐴔𐴡𐴌 𐴀𐴥𐴞𐴏𐴧𐴝 𐴀𐴥𐴞𐴏𐴝𐴉𐴠 , 𐴇𐴥𐴝𐴊𐴞𐴘𐴝 𐴀𐴥𐴞𐴀𐴞𐴕 𐴃𐴡𐴑𐴏𐴞𐴔 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴠𐴀𐴠𐴔 𐴀𐴞𐴕𐴆𐴤𐴝𐴅 / 𐴕𐴞𐴑𐴝𐴃 𐴀𐴝𐴌𐴝 𐴌𐴥𐴠 𐴓𐴡𐴘 𐴂𐴡𐴌𐴟𐴒𐴠𐴌𐴝𐴔 𐴀𐴥𐴞𐴁𐴤𐴝 𐴐𐴤𐴟𐴌𐴟 𐴒𐴡𐴌𐴥𐴝 𐴒𐴞𐴘𐴥𐴠 , 𐴇𐴥𐴝𐴊𐴞𐴘𐴝𐴌 𐴂𐴠𐴑𐴡𐴃 𐴉𐴡𐴕𐴧𐴥𐴝𐴌 𐴏𐴥𐴝𐴔𐴝𐴕 , 𐴎𐴠𐴕𐴋𐴞𐴓𐴧𐴝 , 𐴀𐴞𐴐𐴑𐴟𐴓 𐴁𐴠𐴒𐴢 , 𐴉𐴝𐴕𐴥𐴞𐴌 𐴁𐴡𐴃𐴡𐴓 , 𐴏𐴥𐴝𐴃𐴞 , 𐴆𐴤𐴝𐴀𐴝𐴄 , 𐴉𐴠𐴀𐴠𐴕 , 𐴎𐴟𐴃𐴝 , 𐴔𐴡𐴌𐴡𐴊 𐴉𐴟𐴖𐴙𐴕𐴊𐴤𐴡𐴌𐴓𐴧𐴥𐴝 , 𐴉𐴥𐴡𐴌𐴡𐴑 , 𐴉𐴝𐴎𐴝𐴔𐴝 , 𐴀𐴠𐴏𐴑𐴤𐴝𐴉𐴢 , 𐴔𐴝𐴘𐴧𐴝 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴝 , 𐴀𐴝𐴌 𐴀𐴥𐴞𐴀𐴞𐴕𐴡𐴌 𐴉𐴥𐴟𐴣𐴖𐴝𐴣𐴃𐴞 𐴁𐴞𐴏𐴑𐴟𐴄 𐴀𐴝𐴌 𐴑𐴠𐴑 𐴀𐴥𐴡 𐴀𐴝𐴏𐴥𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴏𐴥𐴞𐴌𐴞𐴓𐴡𐴚 𐴑𐴝𐴃 𐴉𐴝𐴕𐴥𐴞 𐴁𐴝𐴕𐴠 𐴲 𐴱 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴅𐴟𐴕 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴔𐴟𐴀𐴟𐴏𐴡𐴔𐴧𐴙𐴝 𐴎𐴤𐴡𐴌 𐴀𐴝𐴃𐴤𐴞𐴑𐴧𐴙𐴝 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴉𐴝𐴕𐴥𐴞𐴁𐴝𐴕 𐴀𐴥𐴡𐴘 𐴀𐴝𐴌 𐴔𐴠𐴍𐴞 𐴁𐴤𐴝𐴚𐴞 𐴀𐴝𐴀𐴝𐴘 𐴲 𐴱 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴵 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴀𐴥𐴝𐴣𐴎𐴞 𐴒𐴞𐴘𐴥𐴡𐴘𐴊𐴠 𐴀𐴝𐴏𐴥𐴠 𐴁𐴡𐴓𐴞 , 𐴏𐴥𐴞𐴌𐴞𐴓𐴡𐴚 𐴑𐴝𐴌 𐴑𐴟𐴊𐴟𐴌𐴟𐴃𐴞 𐴀𐴝𐴉𐴡𐴃𐴡𐴌 𐴁𐴡𐴕𐴊𐴡𐴁𐴡𐴏𐴢 𐴒𐴡𐴌𐴥𐴡𐴙𐴕𐴧𐴝 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴓𐴞𐴁𐴕𐴝𐴕𐴡𐴌 𐴇𐴥𐴝𐴔𐴓𐴝𐴃 𐴀𐴞𐴏𐴌𐴦𐴝𐴙𐴓𐴡𐴃 𐴀𐴦𐴡𐴙𐴕 𐴱𐴱

𐴀𐴞𐴏𐴌𐴦𐴝𐴙𐴓𐴞 𐴇𐴥𐴡𐴑𐴟𐴔𐴡𐴃𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴊𐴡𐴀𐴡𐴙𐴕 𐴓𐴞𐴁𐴕𐴝𐴕𐴡𐴃𐴧𐴟 𐴇𐴥𐴞𐴎𐴁𐴟𐴓𐴧𐴝𐴇 𐴘𐴠 𐴐𐴤𐴡𐴔 𐴁𐴝𐴌𐴠 𐴒𐴡𐴃𐴡 𐴌𐴝𐴙𐴃𐴡𐴃 𐴔𐴝𐴙𐴅𐴧𐴤𐴙𐴠𐴊𐴠 𐴔𐴞𐴎𐴦𐴝𐴙𐴓 𐴀𐴝𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 , 𐴀𐴞𐴏𐴌𐴦𐴝𐴙𐴓𐴡𐴃 𐴁𐴠𐴐𐴤𐴞 𐴀𐴦𐴡𐴙𐴕 𐴎𐴡𐴓𐴞 𐴀𐴟𐴙𐴄𐴧𐴤𐴙𐴠 , 𐴎𐴞𐴘𐴥𐴝𐴕𐴡𐴌 𐴎𐴡𐴌𐴞𐴘𐴝 𐴁𐴡𐴖𐴋𐴝𐴌𐴡𐴌 𐴑𐴟𐴌𐴞𐴘𐴝𐴃 𐴐𐴡𐴔𐴟𐴕𐴥𐴝 𐴀𐴠𐴓𐴝𐴑𐴝𐴌 𐴁𐴡𐴀𐴡𐴃 𐴀𐴝𐴁𐴝𐴊𐴞 𐴈𐴥𐴝𐴓𐴞 𐴒𐴡𐴌𐴥𐴝 𐴒𐴞𐴘𐴥𐴠 , 𐴀𐴠 𐴀𐴠𐴉𐴢 𐴂𐴞 𐴀𐴠𐴅𐴤𐴠𐴕𐴏𐴞𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴒𐴡𐴃𐴡 𐴁𐴡𐴏𐴥𐴡𐴌 𐴀𐴡𐴑𐴃𐴟𐴁𐴡𐴌 𐴔𐴝𐴐𐴤𐴡𐴌 𐴇𐴥𐴝𐴣𐴃 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 , 𐴇𐴥𐴞𐴎𐴁𐴟𐴓𐴧𐴝𐴇 𐴀𐴝𐴌 𐴀𐴞𐴏𐴌𐴦𐴝𐴙𐴓𐴡𐴌 𐴊𐴡𐴌𐴔𐴞𐴘𐴝𐴕𐴡𐴃 𐴉𐴡𐴙𐴃𐴧𐴤𐴡 𐴊𐴞𐴕 𐴁𐴟𐴔𐴁𐴝𐴌𐴞 𐴉𐴝𐴓𐴄𐴝 𐴉𐴝𐴓𐴄𐴞 𐴀𐴥𐴟𐴀𐴝𐴃 𐴀𐴝𐴏𐴥𐴠 , 𐴀𐴦𐴡𐴙𐴕 𐴑𐴤𐴟𐴁 𐴁𐴠𐴐𐴤𐴞 𐴀𐴝𐴌 𐴈𐴡𐴀𐴠𐴑 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴀𐴝𐴌 𐴏𐴥𐴡 𐴎𐴡𐴕 𐴀𐴦𐴡𐴙𐴕 𐴕𐴞𐴉𐴥𐴝 𐴉𐴥𐴡𐴗𐴏𐴢 𐴊𐴤𐴟𐴣𐴖𐴝𐴣𐴌 𐴎𐴡𐴌𐴞𐴘𐴝 𐴕𐴞𐴘𐴥𐴝𐴐𐴢 𐴀𐴝𐴄𐴑𐴞 𐴎𐴡𐴀𐴡𐴕𐴠 𐴇𐴥𐴝𐴐𐴉𐴝𐴃𐴝𐴓 𐴁𐴤𐴡𐴃𐴧𐴞 𐴒𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱