𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴇𐴥𐴝𐴣𐴃 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌 𐴈𐴡𐴕𐴥𐴡 𐴑𐴞𐴘𐴥𐴠 𐴑𐴠𐴙𐴏𐴧𐴥𐴟 𐴕𐴡 𐴈𐴡𐴘𐴓𐴥𐴡 𐴱𐴱

𐴁𐴠𐴐𐴤𐴞 𐴎𐴡𐴌𐴟𐴌𐴞 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴔𐴦𐴝𐴔𐴠𐴓𐴝 , 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴌 𐴐𐴤𐴡𐴔𐴝𐴎𐴡𐴃𐴧𐴟𐴕 𐴓𐴟𐴖𐴝𐴘𐴧𐴝 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴃𐴤𐴝𐴑𐴤𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴥𐴞𐴃𐴤𐴝𐴌𐴝𐴌 𐴔𐴟𐴀𐴟𐴔 𐴈𐴝𐴓𐴡𐴌 𐴁𐴝𐴁𐴡𐴃𐴠 𐴁𐴠𐴐𐴤𐴞 𐴏𐴞𐴕𐴃𐴝 𐴀𐴝𐴌 𐴉𐴠𐴌𐴠𐴐𐴝𐴕𐴞𐴃 , 𐴁𐴡𐴌𐴔𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴖𐴝𐴉𐴠𐴏𐴢 𐴓𐴡𐴘 𐴎𐴝𐴘𐴁𐴤𐴡 𐴈𐴡𐴀𐴡𐴘 𐴈𐴡𐴀𐴡𐴘 𐴁𐴡𐴀𐴡𐴃 𐴁𐴝𐴌 𐴖𐴝𐴊𐴝 𐴒𐴡𐴌𐴥𐴞 𐴉𐴟𐴌𐴝 𐴕𐴥𐴡 𐴒𐴡𐴌𐴥𐴠 , 𐴁𐴦𐴝𐴊𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴊𐴠𐴐𐴢 𐴁𐴡𐴌𐴔𐴥𐴝𐴃 𐴖𐴝𐴉𐴠𐴏𐴢 𐴎𐴝𐴘𐴁𐴡𐴓𐴧𐴥𐴝 𐴉𐴥𐴞𐴃𐴞𐴕 𐴀𐴝𐴌𐴀𐴥𐴡 𐴀𐴠𐴑 𐴁𐴝𐴌 𐴊𐴠𐴐𐴢 𐴁𐴡𐴘𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴏𐴝𐴀𐴝𐴌 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴒𐴤𐴡𐴌 𐴀𐴟𐴎𐴞𐴌𐴠 𐴘𐴥𐴡 , 𐴁𐴡𐴌𐴔𐴥𐴝𐴌𐴥𐴠 𐴖𐴝𐴊𐴝 𐴈𐴥𐴠𐴓𐴝𐴉𐴢 𐴒𐴡𐴌𐴥𐴡𐴙𐴕𐴧𐴝 𐴀𐴡𐴁𐴞𐴐𐴧𐴤𐴝𐴐𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴹 𐴱 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴠𐴑𐴤𐴠𐴊𐴠 / 𐴑𐴡𐴌𐴞𐴔𐴟𐴓𐴧𐴝𐴇𐴢 𐴀𐴝𐴌 𐴔𐴟𐴔𐴃𐴝𐴎𐴟𐴓 𐴇𐴥𐴡𐴑 , 𐴀𐴞𐴃𐴝𐴌𐴥𐴝 𐴊𐴟𐴕𐴥𐴞 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 , 𐴀𐴝𐴣𐴀𐴝𐴌𐴝 𐴕𐴞𐴎𐴡𐴌 𐴊𐴠𐴐𐴢 𐴁𐴡𐴌𐴔𐴥𐴝 𐴀𐴝𐴌𐴑𐴝𐴕𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴀𐴝𐴐𐴤𐴝 𐴓𐴡𐴘 , 𐴁𐴠𐴐𐴤𐴞 𐴔𐴡𐴐𐴑𐴞𐴓𐴡𐴌 𐴏𐴥𐴝𐴣𐴀𐴝𐴃𐴠 , 𐴇𐴥𐴝𐴣𐴃 𐴁𐴡𐴏𐴥𐴡𐴌 𐴎𐴞𐴕𐴊𐴞𐴒𐴞 𐴑𐴠𐴀𐴠𐴔𐴡𐴃 𐴈𐴝𐴍𐴝𐴘𐴓𐴥𐴝𐴔 𐴊𐴠 , 𐴔𐴡𐴕𐴃𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴝𐴌 𐴈𐴡𐴕𐴥𐴡 𐴏𐴦𐴟𐴌𐴡𐴃 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴊𐴠𐴈𐴥𐴝 𐴕𐴡 𐴎𐴝𐴀𐴝𐴌 , 𐴇𐴥𐴝𐴣𐴃 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃𐴡 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴠𐴇𐴏𐴦𐴝𐴕𐴞𐴃 𐴑𐴤𐴟𐴁𐴢 𐴐𐴤𐴟𐴕𐴊𐴡𐴌 𐴒𐴡𐴌𐴥𐴞 𐴈𐴥𐴝𐴘 𐴓𐴡𐴘 𐴉𐴝𐴙𐴅𐴧𐴤𐴞 𐴊𐴠 𐴘𐴥𐴝𐴀𐴝𐴕𐴡𐴃 𐴁𐴝𐴚𐴓𐴝𐴊𐴠𐴐𐴢 𐴐𐴤𐴡𐴣𐴀𐴡 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴁𐴠𐴐𐴤𐴞 𐴐𐴤𐴟𐴑𐴟𐴌𐴞𐴘𐴝 , 𐴔𐴡𐴕𐴃𐴡𐴌 𐴈𐴡𐴕𐴥𐴞𐴑𐴧𐴤𐴙𐴝 𐴀𐴝𐴣𐴀𐴝𐴌𐴝 𐴊𐴠𐴐𐴤𐴡𐴃 𐴈𐴡𐴣𐴀𐴡𐴃𐴧𐴠 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴙𐴅𐴧𐴟𐴔𐴊𐴠 𐴈𐴡𐴀𐴡𐴘 𐴕𐴡 𐴉𐴝𐴌𐴥𐴞𐴌 ,/ 𐴑𐴡𐴌𐴞𐴔𐴟𐴓𐴧𐴝𐴇𐴢 𐴁𐴡𐴐𐴢 ( 𐴰 𐴶 ) 𐴁𐴡𐴏𐴥𐴡𐴌 / 𐴔𐴟𐴔𐴃𐴝𐴎𐴟𐴓 𐴇𐴥𐴡𐴑 𐴁𐴡𐴐𐴢 ( 𐴲 𐴲 ) 𐴁𐴡𐴏𐴥𐴡𐴌 𐴊𐴟𐴕𐴥𐴞 𐴎𐴡𐴕𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴀𐴠𐴍𐴥𐴠 𐴑𐴠𐴀𐴠𐴔𐴡𐴃 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 , 𐴘𐴟𐴕𐴞𐴏𐴞𐴉𐴢 , 𐴘𐴟 𐴀𐴠𐴕 ) 𐴀𐴞𐴃𐴝𐴌𐴥𐴝 𐴀𐴝𐴣𐴌𐴝𐴌𐴥𐴠 𐴁𐴠𐴐𐴤𐴞 𐴐𐴤𐴟𐴕𐴊𐴡𐴌 𐴒𐴡𐴌𐴥𐴞 𐴈𐴥𐴝𐴁𐴝𐴌 , 𐴔𐴡𐴕𐴃𐴡𐴌 𐴀𐴝𐴣𐴀𐴝𐴌𐴝 𐴊𐴠𐴐𐴤𐴡𐴃 𐴈𐴡𐴣𐴀𐴡𐴃𐴧𐴠 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴙𐴅𐴧𐴟𐴔𐴊𐴠 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴓𐴡𐴘𐴓𐴥𐴠 , 𐴀𐴝𐴣𐴀𐴝𐴌𐴝 𐴌𐴥𐴠 𐴈𐴡𐴕𐴥𐴡 𐴅𐴟𐴖𐴝𐴁 𐴊𐴞𐴀𐴞 𐴕𐴡 𐴉𐴝𐴌𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴟𐴑𐴡𐴌𐴧𐴡𐴌 𐴒𐴡𐴙𐴅𐴧𐴤𐴙𐴠𐴊𐴠 𐴑𐴡𐴔𐴞𐴄𐴤𐴞𐴌 𐴀𐴠𐴅𐴝𐴎𐴡𐴃 𐴓𐴡𐴘 𐴏𐴡𐴙𐴓 𐴑𐴞𐴕𐴃𐴡 𐴒𐴞𐴘𐴥𐴠𐴊𐴠 𐴊𐴠𐴔𐴝𐴒𐴞 𐴁𐴞𐴘𐴝𐴌𐴝𐴙𐴔𐴧𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴠𐴐𐴤𐴞 𐴔𐴝𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴀𐴟𐴃𐴧𐴡𐴌𐴠 𐴓𐴡𐴁𐴡𐴎𐴤𐴝 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 , 𐴒𐴡𐴃𐴡 𐴔𐴠 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴝𐴘 𐴊𐴞𐴘𐴥𐴠 , 𐴃𐴡𐴀𐴡𐴘 𐴀𐴥𐴞𐴃𐴝𐴌𐴥𐴝 𐴋𐴤𐴝𐴑𐴤𐴠 𐴋𐴤𐴟𐴑𐴤𐴠 𐴀𐴝𐴏𐴥𐴠𐴊𐴠 𐴉𐴝𐴌𐴝 , 𐴔𐴝𐴚𐴓𐴝 𐴅𐴤𐴞 , 𐴆𐴤𐴙𐴡𐴑 𐴓𐴠𐴒𐴤𐴝 , 𐴉𐴠𐴌𐴝𐴔 𐴉𐴟𐴌𐴟 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴃𐴤𐴝𐴑𐴧𐴤𐴙𐴠 𐴒𐴤𐴡𐴘 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴃𐴡𐴀𐴡𐴘 𐴀𐴠𐴈𐴥𐴡𐴕 𐴆𐴤𐴙𐴡𐴑 𐴓𐴠𐴒𐴤𐴝 𐴒𐴤𐴗𐴝𐴚𐴡𐴌 𐴉𐴠𐴌𐴝𐴔 𐴉𐴟𐴌𐴟𐴃 𐴎𐴝𐴘 𐴃𐴡𐴀𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 , 𐴓𐴡𐴁𐴡𐴎𐴤𐴝 𐴉𐴝𐴌𐴝𐴌 𐴁𐴤𐴝𐴐𐴞 𐴊𐴠𐴔𐴝𐴒𐴞 𐴁𐴞𐴘𐴝𐴌𐴝𐴙𐴔𐴧𐴝 𐴌𐴟𐴇𐴝𐴙𐴚𐴒𐴙𐴝 / 𐴏𐴡𐴘𐴡𐴃 𐴀𐴝𐴔𐴞𐴕 𐴁𐴝𐴉𐴢 / 𐴀𐴡𐴏𐴥𐴞 𐴌𐴥𐴝𐴇𐴔𐴝𐴕 𐴁𐴡𐴐𐴢 𐴴 𐴳 𐴁𐴡𐴏𐴥𐴡𐴌 , 𐴀𐴞𐴁𐴤𐴝 𐴘𐴠 𐴔𐴡𐴒𐴢 𐴁𐴝𐴒𐴞𐴌 𐴏𐴥𐴞𐴘𐴝𐴏𐴞 𐴉𐴝𐴄𐴞 𐴀𐴝𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴊𐴟𐴕𐴥𐴟𐴖𐴝 𐴘𐴠 𐴔𐴟𐴑𐴡𐴌𐴧𐴡𐴌 𐴒𐴡𐴌𐴥𐴞 𐴊𐴞𐴘𐴥𐴠𐴊𐴠 , 𐴉𐴝𐴌𐴝 𐴐𐴤𐴝𐴐𐴡𐴕 𐴑𐴡𐴔𐴞𐴄𐴤𐴞𐴃𐴧𐴟 𐴀𐴠𐴅𐴝𐴎𐴡𐴃 𐴕𐴝𐴔𐴝 𐴓𐴡𐴘 𐴁𐴦𐴝𐴊𐴠 , 𐴅𐴟𐴕 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴓𐴡𐴒𐴢 𐴁𐴤𐴡𐴒𐴢 𐴊𐴞𐴕𐴡𐴌 𐴱 𐴱 𐴁𐴝𐴎𐴠 , 𐴆𐴤𐴙𐴡𐴑 𐴓𐴠𐴒𐴤𐴝 𐴁𐴝𐴎𐴝𐴌𐴡𐴃 𐴏𐴡𐴙𐴓 𐴑𐴞𐴕𐴃𐴡 𐴎𐴝𐴀𐴝𐴊𐴧𐴠 𐴉𐴡𐴣𐴃𐴤𐴡𐴃 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴊𐴤𐴡𐴌𐴞 𐴁𐴠𐴐𐴤𐴝 𐴁𐴠𐴐𐴤𐴞 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴙𐴅𐴧𐴤𐴙𐴠 , 𐴀𐴠𐴈𐴥𐴡𐴕 𐴈𐴡𐴕𐴥𐴡 𐴔𐴞𐴑𐴧𐴤𐴙𐴝 𐴎𐴝𐴘 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴒𐴡𐴌𐴥𐴞𐴁𐴤𐴝𐴌 𐴈𐴡𐴕𐴥𐴡 𐴏𐴦𐴟𐴌𐴡𐴃 𐴀𐴥𐴡 𐴕𐴥𐴝𐴘 , 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴡𐴤𐴡𐴚𐴡𐴃 𐴎𐴠 𐴎𐴞𐴘𐴥𐴝𐴕𐴡𐴃 𐴀𐴝𐴏𐴥𐴠 𐴛𐴥𐴡𐴀𐴡𐴃 𐴈𐴡𐴊𐴞 𐴀𐴥𐴞𐴏𐴝𐴉𐴠 𐴎𐴞𐴘𐴥𐴡𐴓𐴡𐴃 𐴃𐴤𐴝𐴑𐴤𐴠𐴌 𐴉𐴥𐴝𐴀𐴝𐴕 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴞𐴛𐴥𐴡𐴃 𐴓𐴦𐴡𐴃 𐴉𐴝𐴀𐴝𐴌 𐴔𐴝𐴌𐴞 𐴉𐴥𐴠𐴓𐴥𐴝𐴌 , 𐴑𐴞𐴘𐴥𐴡𐴓𐴧𐴝 𐴔𐴝𐴙𐴅𐴧𐴤𐴡𐴏𐴢 𐴊𐴠 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴒𐴡𐴌𐴥𐴡𐴘𐴧𐴝 𐴀𐴥𐴟𐴊𐴧𐴝 𐴕𐴥𐴝𐴘 , 𐴔𐴡𐴚𐴋𐴤𐴟𐴃 𐴔𐴝𐴎𐴤𐴠 𐴒𐴡𐴃𐴡 𐴇𐴥𐴝𐴉𐴃𐴝𐴃 𐴒𐴡𐴓𐴝 𐴈𐴝𐴍𐴝 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕𐴡𐴌 𐴓𐴝𐴐𐴢 𐴀𐴝𐴌 𐴒𐴡𐴓𐴝𐴃 𐴌𐴡𐴏𐴥𐴞 𐴁𐴝𐴣𐴊𐴤𐴞 𐴉𐴥𐴝𐴣𐴐𐴞 𐴊𐴞𐴀𐴞 𐴔𐴝𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴓𐴝𐴐𐴢 𐴈𐴥𐴝𐴓𐴡𐴃 𐴁𐴤𐴝𐴐𐴠𐴌 𐴊𐴧𐴠 𐴉𐴝𐴀𐴝 𐴒𐴞𐴘𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝𐴌 𐴃𐴟𐴌𐴥𐴟 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴆𐴤𐴙𐴡𐴑 𐴂𐴡𐴕𐴋𐴟 𐴒𐴤𐴝𐴣𐴄𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴏𐴥𐴝𐴌𐴞 𐴊𐴡𐴀𐴡𐴕𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴔𐴡𐴚𐴋𐴤𐴟 – 𐴀𐴝𐴚𐴟𐴔𐴦𐴡 𐴌𐴝𐴏𐴧𐴝𐴃 𐴀𐴝𐴏𐴥𐴠𐴊𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 , 𐴆𐴤𐴙𐴡𐴑 𐴂𐴡𐴕𐴋𐴟 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞 𐴏𐴥𐴝𐴌𐴞 𐴊𐴡𐴀𐴡𐴕𐴠 ,𐴅𐴟𐴕 𐴔𐴝𐴐𐴤𐴡𐴌 𐴊𐴟𐴘 𐴃𐴝𐴌𐴥𐴞𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴦𐴝𐴊𐴠 𐴅𐴟𐴕 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴆𐴤𐴙𐴡𐴑 𐴂𐴡𐴕𐴋𐴟 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞 𐴐𐴤𐴡𐴣𐴀𐴡 𐴀𐴝𐴃𐴌𐴝𐴉𐴢 𐴁𐴠𐴒𐴧𐴤𐴟𐴓𐴧𐴝 𐴔𐴠𐴓𐴠𐴄𐴠𐴌𐴞 𐴘𐴠 , 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔𐴁𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴊𐴡𐴐𐴢 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴌𐴡𐴉𐴥𐴝 𐴏𐴥𐴝𐴌𐴞 𐴊𐴡𐴀𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴉𐴥𐴡𐴓𐴡𐴏𐴃𐴞𐴕𐴞 𐴌𐴞𐴉𐴟𐴎𐴞𐴌𐴥𐴠 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴝 𐴀𐴠𐴅𐴤𐴠𐴕𐴏𐴞 ( 𐴀𐴡𐴕𐴌𐴝 ) 𐴘𐴠 𐴅𐴟𐴕 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴈𐴡𐴘𐴧𐴥𐴠𐴊𐴠 , 𐴒𐴤𐴡𐴎𐴧𐴝𐴌 𐴊𐴡𐴀𐴡𐴙𐴕 𐴋𐴤𐴝𐴑𐴤𐴠 𐴀𐴝𐴏𐴥𐴠𐴊𐴠 𐴌𐴡𐴉𐴥𐴝 𐴕𐴝𐴔𐴡𐴌 𐴐𐴤𐴡𐴣𐴍𐴡 𐴐𐴤𐴡𐴀𐴡𐴌 𐴘𐴥𐴝𐴀𐴝𐴕 , 𐴊𐴡𐴐𐴢 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌 𐴀𐴝𐴏𐴧𐴡𐴌𐴡 𐴈𐴥𐴝𐴕𐴥𐴝 , 𐴎𐴞𐴃𐴝𐴌𐴥𐴝 𐴒𐴤𐴡𐴎𐴧𐴝𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴃 𐴀𐴥𐴡𐴘𐴧𐴠𐴊𐴠 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴀𐴥𐴠𐴍𐴥𐴠 𐴉𐴝𐴕𐴥𐴝 𐴓𐴡𐴘𐴧𐴠 , 𐴇𐴝𐴔𐴦𐴝𐴏𐴡𐴌 𐴀𐴥𐴝𐴣𐴃𐴞𐴘𐴝𐴌𐴁𐴝𐴎 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴞𐴛𐴡𐴌𐴡𐴃𐴧𐴟 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘𐴁𐴤𐴡𐴓𐴧𐴝 𐴁𐴡𐴓𐴞 𐴈𐴡𐴀𐴡𐴘 , 𐴔𐴠 𐴔𐴝𐴐𐴤𐴡𐴌 𐴐𐴤𐴟𐴌𐴟𐴃𐴧𐴟 𐴓𐴡𐴃𐴞 𐴀𐴞𐴏𐴌𐴦𐴝𐴙𐴓𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴇𐴥𐴝𐴔𐴓𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴀𐴠𐴈𐴥𐴡𐴕 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴀𐴞𐴘𐴥𐴝𐴕𐴃𐴟 𐴰 𐴲 𐴑𐴞𐴓𐴟𐴔𐴞𐴄𐴤𐴝𐴌 𐴊𐴟𐴌𐴥𐴠 𐴎𐴡𐴀𐴡 𐴒𐴤𐴡𐴘 𐴁𐴡𐴓𐴞 𐴈𐴡𐴀𐴡𐴘 𐴀𐴝𐴈𐴥𐴠𐴌𐴞 𐴀𐴡𐴋𐴝𐴌 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 , 𐴒𐴡𐴃𐴡 𐴈𐴡𐴀𐴠𐴑 𐴔𐴝𐴐𐴢 𐴀𐴥𐴡𐴘𐴃𐴠 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴃𐴧𐴟 𐴒𐴤𐴡𐴎𐴧𐴝 𐴀𐴠𐴓𐴝𐴑𐴝𐴃 𐴑𐴤𐴠𐴕𐴠 𐴛𐴡𐴀𐴡𐴃 𐴑𐴤𐴠𐴕𐴠 𐴀𐴟𐴖𐴥𐴡𐴣𐴃 𐴓𐴡𐴌𐴞 𐴓𐴡𐴌𐴞 𐴃𐴤𐴝𐴑𐴝 𐴉𐴡𐴌𐴠𐴌 , 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴀𐴡𐴕𐴌𐴝 𐴀𐴠𐴅𐴤𐴠𐴕𐴏𐴞𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴇𐴝𐴔𐴦𐴝𐴏𐴠 𐴔𐴝𐴕𐴞𐴓𐴥𐴠 𐴀𐴞𐴏𐴌𐴦𐴝𐴙𐴓𐴠 𐴘𐴥𐴡 𐴔𐴝𐴕𐴞𐴁𐴤𐴡 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴥𐴠𐴌 : 𐴀𐴝𐴔𐴞𐴌𐴞𐴑𐴝 𐴱𐴱

𐴒𐴤𐴡𐴎𐴧𐴝𐴃 𐴏𐴡𐴓𐴠𐴌 𐴊𐴧𐴠 𐴓𐴝𐴌𐴥𐴝𐴘 𐴈𐴥𐴡𐴃𐴡𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴕𐴡𐴘𐴧𐴝 𐴁𐴤𐴝𐴉𐴠 𐴀𐴠𐴓𐴝𐴕 𐴒𐴡𐴌𐴥𐴝 𐴒𐴞𐴘𐴥𐴠𐴊𐴠 𐴓𐴝𐴌𐴥𐴝𐴘 𐴁𐴡𐴕 𐴂𐴡𐴌𐴟𐴒𐴠𐴌𐴝𐴔 𐴀𐴞𐴁𐴤𐴝𐴌𐴥𐴠 , 𐴎𐴡𐴊𐴞 𐴇𐴝𐴔𐴦𐴝𐴏𐴠 𐴔𐴝𐴕𐴞𐴓𐴥𐴠 𐴀𐴞𐴏𐴌𐴦𐴝𐴙𐴓𐴠 𐴘𐴥𐴡 𐴔𐴝𐴕𐴞 𐴓𐴡𐴘𐴁𐴡 𐴁𐴡𐴓𐴞 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴝𐴐𐴤𐴝 𐴒𐴡𐴌𐴥𐴠𐴌 𐴁𐴡𐴓𐴞 , 𐴑𐴡𐴗𐴔𐴞 𐴇𐴥𐴠𐴉𐴝𐴎𐴡𐴃𐴞 𐴑𐴡𐴗𐴕𐴏𐴥𐴞𐴓𐴡𐴌 𐴃𐴡𐴌𐴉𐴥𐴡𐴃𐴧𐴤𐴟 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 / 𐴅𐴤𐴡𐴕 𐴑𐴡𐴌𐴁𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴓𐴝𐴌𐴥𐴝𐴘 𐴁𐴡𐴕 𐴂𐴠𐴓𐴦𐴝𐴕 𐴀𐴞𐴁𐴤𐴝 𐴃𐴞𐴕 𐴊𐴡𐴉𐴥𐴝 𐴒𐴡𐴌𐴥𐴞 𐴀𐴝𐴔𐴥𐴡𐴓𐴡𐴃 𐴀𐴝𐴕𐴥𐴝 𐴎𐴝𐴘𐴁𐴡 , 𐴀𐴠𐴑𐴀𐴡𐴔 𐴊𐴡𐴉𐴥𐴝 𐴏𐴥𐴡 𐴇𐴥𐴝𐴉𐴃𐴝 𐴓𐴝𐴌𐴥𐴝𐴘 𐴁𐴡𐴕 𐴓𐴡𐴘 𐴐𐴤𐴟𐴌𐴟 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱