𐴁𐴤𐴟𐴏𐴞𐴊𐴡𐴚𐴡𐴃 𐴒𐴤𐴡𐴌 𐴉𐴟𐴌𐴞 𐴒𐴞𐴘𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕 , 𐴓𐴡𐴒𐴢 𐴁𐴤𐴡𐴒𐴢 𐴒𐴟𐴣𐴍𐴝 𐴁𐴤𐴟𐴏𐴞𐴊𐴡𐴚 𐴎𐴡𐴓𐴞 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 , 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴤𐴝𐴘 𐴊𐴦𐴟𐴣𐴌𐴞 𐴋𐴤𐴝𐴑𐴤𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴙𐴓𐴧𐴡𐴏𐴢 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴎𐴝𐴔 𐴊𐴞𐴀𐴞 , 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴦𐴡𐴌𐴝𐴘 𐴓𐴦𐴡𐴌𐴝𐴘 𐴊𐴤𐴡𐴌𐴠𐴌 𐴊𐴧𐴠 𐴘𐴥𐴝𐴀𐴝𐴕 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱

𐴁𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴁𐴠𐴒𐴧𐴤𐴟𐴓𐴧𐴝𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴎𐴝𐴒𐴝 𐴎𐴝𐴒𐴝 𐴀𐴝𐴏𐴥𐴠 , 𐴀𐴥𐴞𐴃𐴝𐴌𐴝𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴎𐴝𐴌𐴥𐴞 𐴏𐴥𐴝𐴙𐴑 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴡𐴕𐴠 𐴈𐴡𐴀𐴡 , 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴀𐴝𐴃𐴝 𐴉𐴝𐴃𐴝 𐴁𐴞𐴏𐴝𐴌𐴞 𐴏𐴥𐴝𐴙𐴑 𐴒𐴡𐴌𐴥𐴠 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴒𐴟𐴣𐴍𐴝 𐴉𐴟𐴌𐴞 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 𐴄𐴡𐴀𐴡𐴕 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓 , 𐴒𐴤𐴡𐴌 𐴏𐴥𐴝𐴌𐴥𐴝 𐴃𐴤𐴡𐴌 𐴏𐴥𐴝𐴌𐴥𐴝 𐴀𐴥𐴡𐴘 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑𐴧𐴤𐴡𐴃 𐴉𐴡𐴌𐴡𐴕𐴠 , 𐴎𐴞𐴛𐴥𐴡𐴃 𐴉𐴝𐴌𐴠 𐴀𐴥𐴞𐴛𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 𐴱

𐴔𐴠 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴓𐴡𐴒𐴢 𐴁𐴤𐴡𐴒 𐴴 𐴁𐴝𐴎𐴠 , 𐴓𐴝𐴌𐴥𐴝𐴘𐴌 𐴈𐴥𐴡𐴃𐴡𐴌𐴝𐴃𐴧𐴤𐴟𐴕 𐴁𐴝𐴏𐴞𐴁𐴤𐴡𐴓𐴧𐴝 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴏𐴥𐴞𐴕𐴊𐴞 𐴉𐴝𐴌𐴝𐴚𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴃𐴡 𐴒𐴞𐴘𐴥𐴠𐴊𐴠 𐴳 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕𐴡𐴌𐴥𐴠 , 𐴔𐴠𐴓𐴠𐴄𐴠𐴌𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴎𐴝𐴔 𐴓𐴝𐴒𐴝𐴘 𐴁𐴡𐴕 𐴒𐴡𐴌𐴥𐴞 , 𐴁𐴠𐴐𐴤𐴞 𐴔𐴝𐴌𐴝 𐴊𐴤𐴡𐴌𐴝 𐴎𐴟𐴓𐴥𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱

𐴔𐴡𐴕𐴃𐴡𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴤𐴡𐴌𐴞 𐴊𐴤𐴡𐴌𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴐𐴤𐴝𐴊𐴝 𐴐𐴤𐴞𐴊𐴝 𐴕𐴞𐴊𐴝𐴒𐴞 𐴀𐴦𐴝𐴔 𐴔𐴝𐴕𐴥𐴟𐴙𐴐𐴢 , 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴙𐴓𐴧𐴞𐴀𐴞𐴓 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴀𐴥𐴟𐴊𐴧𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴦𐴡𐴃 𐴕𐴥𐴡 𐴉𐴝𐴀𐴝 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴌𐴝𐴙𐴃𐴠 𐴊𐴞𐴕𐴠 𐴎𐴟𐴓𐴥𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴔𐴦𐴝𐴣 𐴁𐴤𐴡𐴙𐴕 𐴁𐴝𐴂𐴢 𐴁𐴤𐴝𐴘𐴀𐴝𐴙𐴕𐴊𐴠 , 𐴀𐴝𐴌𐴑𐴝𐴕𐴡𐴌 𐴁𐴝𐴀𐴝𐴌𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴔𐴝𐴙𐴕𐴐𐴤𐴡𐴌 𐴈𐴝𐴣𐴏𐴥𐴠 , 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔𐴡𐴃𐴧𐴟𐴕 𐴁𐴝𐴏𐴝𐴘 𐴓𐴡𐴘 𐴁𐴡𐴓𐴧𐴥𐴝 𐴀𐴝𐴌𐴡𐴎 𐴒𐴡𐴌𐴥𐴠𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴙𐴑𐴧𐴙𐴝𐴁𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞𐴁𐴡𐴓𐴧𐴥𐴝 𐴔𐴡𐴅𐴁𐴟𐴌 𐴒𐴡𐴌𐴥𐴠𐴌 𐴱𐴱

𐴔𐴠 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴀𐴝𐴙𐴑𐴧𐴙𐴝𐴁𐴡𐴃 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞𐴁𐴡𐴓𐴧𐴥𐴝 ( 𐴀𐴝𐴘 𐴋𐴞 𐴂𐴞 ) 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴔𐴡𐴁𐴟𐴌 𐴒𐴡𐴌𐴥𐴠𐴌𐴊𐴧𐴠 𐴎𐴝𐴕𐴝 𐴒𐴞𐴘𐴠 , 𐴀𐴝𐴙𐴑𐴧𐴙𐴝𐴁𐴡𐴌 𐴏𐴝𐴑𐴧𐴞 𐴉𐴝𐴌𐴝𐴚 𐴌𐴟𐴇𐴝𐴙𐴚𐴒𐴙𐴝 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴱

𐴔𐴠𐴓𐴠𐴄𐴠𐴌𐴞𐴌 𐴀𐴞𐴐𐴤𐴝𐴌𐴝 𐴓𐴡𐴘 𐴀𐴟𐴒𐴧𐴤𐴗𐴝 𐴉𐴥𐴞𐴑𐴄𐴞𐴌𐴞𐴌 𐴒𐴤𐴞𐴌𐴝𐴌 𐴁𐴤𐴟𐴃𐴡𐴌𐴠 𐴏𐴝𐴑𐴧𐴞 𐴉𐴝𐴌𐴝𐴚 𐴀𐴝𐴘𐴋𐴞𐴂𐴞 𐴑𐴠𐴀𐴠𐴔 𐴐𐴤𐴡𐴣𐴀𐴡 𐴉𐴡𐴙𐴃𐴧𐴡 𐴑𐴠𐴀𐴠𐴔𐴡𐴃𐴧𐴤𐴟 𐴵 𐴱 𐴎𐴡𐴕 𐴀𐴥𐴞𐴏𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴅𐴁𐴟𐴌 𐴒𐴡𐴌𐴥𐴞 𐴔𐴞𐴄𐴤𐴞𐴚𐴡𐴃 𐴔𐴝𐴃𐴝𐴘 𐴓𐴡𐴘 𐴒𐴞𐴘𐴥𐴠 𐴱 𐴎𐴠𐴍𐴥𐴠 𐴉𐴟𐴓𐴞𐴐𐴢 𐴔𐴠𐴓𐴠𐴄𐴠𐴌𐴞 𐴀𐴝𐴒𐴠 𐴓𐴡𐴃𐴞 𐴀𐴝𐴙𐴐𐴧𐴤𐴙𐴠 𐴀𐴝𐴏𐴥𐴠 , 𐴔𐴝𐴃𐴝𐴘 𐴓𐴡𐴘 𐴒𐴞𐴘𐴥𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴓𐴡𐴄𐴤𐴝𐴌𐴞 𐴊𐴞𐴘𐴥𐴠 , 𐴕𐴝𐴔 𐴀𐴟𐴍𐴥𐴠𐴊𐴠 𐴀𐴥𐴞𐴃𐴝𐴌𐴥𐴠 𐴁𐴡𐴓𐴝𐴎𐴟𐴌𐴞 𐴷 𐴊𐴞𐴕𐴡𐴃𐴧𐴤𐴟 𐴵 𐴱 𐴊𐴞𐴕𐴡𐴓𐴧𐴥𐴝 𐴔𐴠𐴓𐴠𐴄𐴠𐴌𐴞 𐴄𐴠𐴕𐴧𐴞𐴕 𐴊𐴞𐴀𐴞 𐴁𐴡𐴓𐴧𐴝 𐴓𐴡𐴘 𐴎𐴝𐴀𐴝 𐴒𐴤𐴡𐴘 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴄𐴠𐴕𐴧𐴞𐴕 𐴉𐴥𐴟𐴌𐴥𐴝𐴘 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞 𐴓𐴡𐴘 𐴏𐴡𐴓𐴠𐴌𐴊𐴧𐴠 𐴓𐴝𐴌𐴥𐴝𐴘𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴔𐴟𐴀𐴟𐴔 𐴓𐴝𐴙𐴕𐴡𐴃 𐴉𐴡𐴣𐴀𐴡𐴏𐴝𐴘 𐴊𐴠𐴀𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝𐴌 𐴓𐴝𐴌𐴥𐴝𐴘 𐴁𐴡𐴕 𐴒𐴌𐴥𐴝𐴘𐴃𐴡 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴌𐴠 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞 𐴁𐴡𐴓𐴧𐴝 𐴈𐴡𐴘𐴧𐴥𐴠 : 𐴔𐴞𐴏𐴥𐴞𐴌𐴡𐴌 𐴌𐴝𐴎𐴝 𐴱𐴱

𐴔𐴠 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 , 𐴔𐴞𐴏𐴥𐴞𐴌 , 𐴊𐴟𐴁𐴝𐴘 , 𐴁𐴝𐴇𐴌𐴝𐴙𐴕 𐴐𐴤𐴡𐴣𐴀𐴡 𐴀𐴝𐴌𐴡𐴁𐴢 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴌𐴝𐴎𐴝 𐴀𐴥𐴡𐴑𐴧𐴡𐴓 𐴔𐴞𐴓𐴞 , 𐴆𐴞𐴕𐴝𐴌 𐴐𐴤𐴡𐴀𐴡𐴌 𐴁𐴠𐴅𐴤𐴞𐴚𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴀𐴝𐴌𐴡𐴁𐴢 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚𐴡𐴃 , 𐴔𐴞𐴏𐴥𐴞𐴌𐴡𐴌 𐴌𐴝𐴎𐴝 / 𐴀𐴝𐴁𐴊𐴟𐴓 𐴉𐴡𐴃𐴧𐴤𐴝 𐴏𐴞 𐴏𐴞 𐴘𐴠 , 𐴒𐴤𐴡𐴎𐴧𐴝𐴃 𐴓𐴝𐴌𐴥𐴝𐴘 𐴁𐴡𐴕 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞𐴃𐴤𐴡 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴉𐴥𐴡𐴓𐴡𐴏𐴃𐴞𐴕𐴡𐴌 𐴁𐴝𐴁𐴡𐴃𐴠 𐴆𐴞𐴕𐴝𐴌 𐴂𐴡𐴓𐴡𐴏𐴥𐴞 𐴌𐴥𐴠 𐴔𐴞𐴏𐴥𐴞𐴌𐴡𐴌 𐴌𐴝𐴎𐴝 𐴘𐴠 𐴑𐴡𐴊𐴡𐴌 𐴒𐴡𐴌𐴥𐴠 𐴈𐴡𐴀𐴡𐴘 𐴃𐴡𐴑𐴌𐴞𐴌𐴡𐴌 𐴔𐴝𐴎𐴤𐴠 , 𐴒𐴤𐴡𐴎𐴧𐴝𐴌 𐴓𐴝𐴌𐴥𐴝𐴘 𐴁𐴡𐴕 𐴒𐴡𐴌𐴥𐴞 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴀𐴥𐴡𐴑𐴧𐴡𐴓 𐴉𐴡𐴣𐴀𐴡𐴏𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕 , 𐴊𐴠𐴌𐴞 𐴕𐴡 𐴒𐴡𐴌𐴥𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴃𐴧𐴟 𐴎𐴞𐴔𐴧𐴝𐴊𐴝𐴌𐴞 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴒𐴤𐴡𐴎𐴧𐴝 𐴀𐴝𐴌 𐴔𐴞𐴏𐴥𐴞𐴌 𐴓𐴡𐴘 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴀𐴝𐴀𐴝 𐴎𐴝𐴀𐴝𐴌 𐴁𐴡𐴖𐴋𐴝𐴌 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴞𐴏𐴥𐴞𐴌 𐴀𐴝𐴌 𐴒𐴤𐴡𐴎𐴧𐴝 𐴀𐴝𐴀𐴝 𐴎𐴝𐴀𐴝𐴌 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴁𐴡𐴖𐴋𐴝𐴌 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴎𐴠 𐴁𐴡𐴖𐴋𐴝𐴌 𐴁𐴝𐴀𐴝𐴘 𐴒𐴤𐴡𐴎𐴧𐴝𐴃 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴒𐴤𐴡𐴓𐴠𐴌 𐴁𐴡𐴓𐴞 𐴐𐴟𐴁𐴤𐴝 𐴁𐴡𐴓𐴞 𐴘𐴥𐴡 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴈𐴡𐴘𐴧𐴠 , 𐴉𐴠𐴌𐴥𐴝𐴣𐴏𐴡𐴌 𐴈𐴥𐴡𐴁𐴡𐴌 𐴀𐴠𐴅𐴤𐴠𐴕𐴏𐴞 ( 𐴀𐴠 𐴀𐴠𐴉𐴢 𐴂𐴞 ) 𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴀𐴞𐴏𐴌𐴦𐴝𐴙𐴓𐴠 𐴒𐴤𐴡𐴎𐴧𐴝𐴌 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴇𐴝𐴔𐴦𐴝𐴏𐴡𐴌 𐴁𐴠𐴌𐴟𐴊𐴧𐴤𐴠 𐴑𐴝𐴌𐴖𐴝𐴘 𐴁𐴠𐴐𐴤𐴞 𐴃𐴠𐴎 𐴒𐴡𐴌𐴥𐴞 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴢 𐴀𐴠𐴑 𐴎𐴡𐴕𐴠 𐴌𐴠𐴂𐴟𐴄𐴝𐴌𐴡𐴌𐴥𐴠 𐴈𐴡𐴘𐴧𐴠𐴊𐴠 ! 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴒𐴤𐴡𐴎𐴧𐴝 𐴀𐴝𐴌 𐴔𐴞𐴏𐴥𐴞𐴌 𐴓𐴡𐴘 𐴴 𐴱 𐴑𐴞𐴓𐴟𐴔𐴞𐴄𐴝𐴌 𐴓𐴝𐴔𐴁𐴝 𐴁𐴡𐴖𐴋𐴝𐴌 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴎𐴠 𐴁𐴡𐴖𐴋𐴝𐴌 𐴁𐴝𐴀𐴝𐴘 𐴉𐴥𐴡𐴓𐴡𐴏𐴃𐴞𐴕𐴡𐴌 𐴇𐴝𐴔𐴦𐴝𐴏𐴢 𐴓𐴝𐴌𐴥𐴝𐴘𐴁𐴝𐴏𐴢 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴀𐴥𐴝𐴣𐴃𐴞𐴘𐴝𐴌 𐴉𐴡𐴣𐴀𐴡𐴏𐴝 𐴎𐴝𐴀𐴝𐴌 , 𐴔𐴡𐴕𐴃𐴡𐴌 𐴀𐴞𐴏𐴌𐴦𐴝𐴙𐴓𐴠 𐴒𐴤𐴡𐴎𐴧𐴝𐴃 𐴊𐴠𐴌𐴞 𐴉𐴥𐴝𐴀𐴝𐴕 𐴓𐴝𐴌𐴥𐴝𐴘 𐴏𐴝𐴓𐴟 𐴌𐴝𐴑𐴤𐴞 𐴁𐴤𐴡𐴓𐴧𐴝 𐴀𐴠𐴓𐴎𐴝𐴔 𐴀𐴞𐴀𐴞𐴕 𐴊𐴠𐴀𐴠𐴌𐴊𐴧𐴠 𐴁𐴡𐴓𐴞 , 𐴔𐴞𐴏𐴥𐴞𐴌𐴡𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴈𐴥𐴡𐴁𐴡𐴌𐴡𐴌 𐴇𐴥𐴝𐴖𐴝𐴓𐴝 𐴊𐴞𐴀𐴞 𐴀𐴝𐴓𐴑𐴝𐴇𐴠𐴌𐴥𐴝 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱