𐴔𐴡𐴚𐴋𐴤𐴟𐴌 𐴏𐴝𐴙𐴌 𐴔𐴝𐴙𐴓𐴡𐴃 𐴎𐴝𐴓𐴠𐴔 𐴒𐴡𐴀𐴡𐴌𐴔𐴠𐴕 𐴊𐴠𐴐𐴤𐴡𐴙𐴃𐴧𐴝𐴌 𐴒𐴡𐴤𐴌 𐴊𐴟𐴖𐴝𐴌 𐴁𐴤𐴝𐴙𐴚𐴒𐴠 𐴱𐴱

𐴀𐴝𐴌𐴝𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴏𐴝𐴙𐴌 𐴔𐴝𐴙𐴓𐴡𐴃 𐴀𐴝𐴏𐴠𐴥𐴊𐴠 𐴅𐴠𐴄𐴤𐴠 𐴉𐴝𐴌𐴝𐴃 𐴔𐴠 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴌 𐴳 𐴁𐴝𐴎𐴠 𐴳𐴰 𐴔𐴞𐴓𐴡𐴄𐴡𐴃 𐴳𐴰 𐴎𐴡𐴙𐴕𐴧𐴙𐴝 𐴀𐴟𐴒𐴧𐴤𐴗𐴝 𐴎𐴝𐴓𐴠𐴔 𐴒𐴡𐴀𐴡𐴌𐴔𐴠𐴕𐴡𐴌 𐴋𐴝𐴀𐴝𐴘 𐴒𐴡𐴤𐴓𐴞 , 𐴊𐴠𐴐𐴤𐴡𐴙𐴃𐴧𐴝𐴌 𐴳𐴰 𐴐𐴝𐴤𐴕𐴡𐴌 𐴖𐴡𐴌𐴠 𐴒𐴡𐴤𐴌 𐴊𐴟𐴖𐴝𐴌 𐴁𐴤𐴝𐴣𐴒𐴞 𐴏𐴟𐴣𐴌𐴞 𐴊𐴤𐴡𐴕𐴐𐴤𐴡 𐴒𐴡𐴌𐴥𐴞 𐴊𐴝𐴔𐴞 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴋𐴝𐴣𐴈𐴝𐴃𐴞 𐴒𐴡𐴌𐴞𐴥 𐴓𐴡𐴘 𐴒𐴞𐴘𐴡𐴥𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴎𐴝𐴕𐴝 𐴒𐴞𐴘𐴠𐴥 , 𐴁𐴝𐴦𐴊𐴠 𐴔𐴠 𐴔𐴝𐴐𐴤𐴡𐴌 𐴷 𐴲 𐴃𐴝𐴌𐴥𐴞𐴑𐴡𐴃 𐴔𐴡𐴚𐴋𐴤𐴟𐴃 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃

𐴁𐴡𐴌𐴔𐴥𐴝𐴌 𐴎𐴝𐴓𐴠𐴔 𐴒𐴡𐴀𐴡𐴌𐴔𐴠𐴕 𐴀𐴝𐴌 𐴀𐴞𐴥𐴃𐴝𐴌𐴝 𐴁𐴡𐴓𐴝𐴎𐴟𐴌𐴞 𐴄𐴠𐴕𐴧𐴞𐴕 𐴊𐴞𐴀𐴞 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴘𐴧𐴥𐴠𐴊𐴠 𐴌𐴟𐴇𐴙𐴚𐴒𐴙𐴝𐴌 𐴅𐴡𐴖𐴝𐴕 𐴰 𐴲 𐴱 𐴎𐴡𐴕 𐴐𐴡𐴣𐴀𐴡 𐴊𐴟𐴕𐴥 𐴞 𐴋𐴝𐴀𐴝𐴘 𐴔𐴞𐴓𐴞 , 𐴔𐴡𐴒𐴢 , 𐴇𐴥𐴞𐴕𐴊𐴟 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴡𐴧𐴓𐴡𐴌𐴠𐴥 𐴈𐴡𐴕𐴡𐴥 𐴖𐴝𐴅𐴝𐴤 𐴏𐴝𐴥𐴌𐴥𐴝 𐴁𐴠𐴑𐴝𐴕𐴟𐴕𐴞 𐴃𐴡𐴖𐴌𐴠 𐴊𐴤𐴡𐴌𐴞 𐴖𐴞𐴔𐴝𐴓𐴝 𐴉𐴝𐴌𐴝𐴌 𐴀𐴞𐴏𐴑𐴟𐴓𐴡𐴃 𐴓𐴡𐴘 𐴎𐴝𐴘 𐴁𐴝𐴣𐴊𐴤𐴞 𐴌𐴝𐴙𐴑𐴧𐴤𐴙𐴠 ,
𐴁𐴟𐴤𐴏𐴞𐴊𐴡𐴚 𐴄𐴡𐴀𐴡𐴕 𐴒𐴟𐴣𐴍𐴝𐴌𐴠𐴥 𐴔𐴡𐴒𐴢 𐴁𐴝𐴒𐴞 𐴘𐴠 𐴑𐴡𐴁𐴎𐴝 𐴒𐴡𐴌𐴞𐴥 𐴁𐴝𐴦𐴊𐴠 , 𐴁𐴡𐴌𐴔𐴥𐴝𐴌 𐴎𐴝𐴓𐴠𐴔 𐴒𐴡𐴀𐴡𐴌𐴔𐴠𐴕𐴠𐴥 𐴔𐴡𐴚𐴋𐴤𐴟 𐴌𐴠𐴥 𐴁𐴠𐴐𐴞𐴤 𐴔𐴠𐴓𐴠𐴄𐴠𐴌𐴞𐴌 𐴁𐴡𐴓 𐴓𐴡𐴘 𐴑𐴡𐴁𐴎𐴝 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴀𐴝𐴌 𐴀𐴞𐴈𐴥𐴡𐴕 𐴀𐴝𐴏𐴥𐴠𐴊𐴠 𐴊𐴠𐴐𐴤𐴡𐴙𐴃𐴧𐴝𐴌 𐴓𐴡𐴌𐴝𐴏𐴡𐴌𐴝 𐴘𐴡𐴥 𐴁𐴡𐴕 𐴒𐴡𐴌𐴞𐴥 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 𐴀𐴝𐴌 𐴀𐴞𐴥𐴃𐴤𐴝𐴌𐴝 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴘𐴡𐴥 𐴁𐴠𐴐𐴝𐴤 𐴁𐴠𐴐𐴞𐴤 𐴊𐴟𐴑 𐴉𐴝𐴀𐴝𐴌𐴌 𐴁𐴡𐴓𐴞 𐴔𐴡𐴚𐴋𐴤𐴟𐴌 𐴁𐴤𐴟𐴃𐴤𐴡𐴃𐴧𐴟 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠 𐴱𐴱


𐴀𐴝𐴙𐴑𐴧𐴙𐴝𐴁𐴡𐴃 𐴉𐴥𐴞𐴃𐴞𐴕 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴄𐴠𐴕𐴧𐴞𐴕 𐴊𐴞𐴀𐴞 𐴁𐴡𐴓𐴧𐴥𐴝 𐴁𐴡𐴓𐴝𐴎𐴟𐴌𐴞 𐴎𐴡𐴔𐴝 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 , 𐴀𐴝𐴙𐴑𐴧𐴙𐴝𐴁𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 , 𐴏𐴝𐴑𐴧𐴞 𐴉𐴝𐴌𐴝 , 𐴀𐴥𐴟𐴕 𐴋𐴦𐴡 𐴅𐴤𐴞 , 𐴁𐴝𐴀𐴝𐴏𐴧𐴡𐴌𐴝 , 𐴋𐴠𐴁𐴝𐴙𐴚 , 𐴏𐴥𐴠 𐴆𐴤𐴙𐴡𐴚 , 𐴀𐴞𐴀𐴞𐴕 𐴐𐴤𐴡𐴣𐴀𐴡 𐴰 𐴱 𐴑𐴠𐴀𐴠𐴔𐴡𐴃𐴧𐴟 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴉𐴥𐴞𐴃𐴞𐴕 𐴀𐴥𐴡 𐴉𐴡𐴙𐴃𐴧𐴡 𐴑𐴠𐴀𐴠𐴔𐴡𐴃𐴧𐴟 , 𐴸 𐴱 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴰 𐴳 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃𐴡 𐴁𐴡𐴐𐴢 𐴀𐴡𐴓𐴝 𐴰 𐴳 𐴎𐴡𐴕 𐴀𐴥𐴞𐴏𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴘 𐴁𐴡𐴓𐴧𐴥𐴝 , 𐴔𐴠 𐴔𐴝𐴐𐴤𐴡𐴌 𐴷 𐴲 𐴃𐴝𐴌𐴥𐴞𐴑 𐴓𐴡𐴃𐴞 𐴎𐴡𐴁𐴡𐴌 𐴊𐴤𐴡𐴏𐴢 𐴔𐴡𐴅𐴁𐴟𐴌 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞 𐴁𐴡𐴓𐴧𐴝 𐴔𐴝𐴙𐴕𐴐𐴤𐴡𐴌 𐴓𐴞𐴐𐴄𐴤𐴞 𐴕𐴡 𐴊𐴞𐴀𐴞𐴓𐴥𐴠 , 𐴉𐴡𐴙𐴃𐴧𐴡 𐴔𐴝𐴐𐴤𐴠 𐴈𐴥𐴝𐴕𐴝𐴌 𐴌𐴝𐴘𐴐𐴤𐴡𐴕 𐴊𐴠𐴀𐴠𐴊𐴠 𐴊𐴠𐴐𐴢 𐴁𐴡𐴘𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌𐴥𐴠 , 𐴌𐴝𐴘𐴐𐴤𐴡𐴕 𐴁𐴡𐴕 𐴒𐴡𐴌𐴥𐴝𐴘 𐴊𐴞𐴘𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴊𐴠𐴀𐴠𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴝𐴕𐴥𐴟𐴙𐴐𐴢 𐴊𐴡𐴓𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴃𐴡𐴌𐴉𐴥𐴡𐴃𐴧𐴟 𐴔𐴟𐴑𐴡𐴌𐴧𐴡𐴌 𐴒𐴡𐴌𐴥𐴞 𐴎𐴞𐴔𐴧𐴝𐴊𐴝𐴌𐴞 𐴊𐴞𐴘𐴥𐴠𐴊𐴠 , 𐴑𐴠𐴀𐴠𐴔 𐴏𐴥𐴡𐴊𐴧𐴝𐴌 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴙𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴓𐴞𐴐𐴄𐴤𐴞 𐴒𐴡𐴌𐴥𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 𐴀𐴟𐴓𐴋𐴝 𐴉𐴟𐴓𐴋𐴝 𐴔𐴝𐴃𐴞𐴓𐴥𐴠 , 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴎𐴝𐴕𐴝𐴘 𐴊𐴞𐴘𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴄𐴞𐴛𐴝 𐴔𐴝𐴒𐴠 𐴁𐴡𐴓𐴞 , 𐴑𐴠𐴀𐴠𐴔𐴡𐴌 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴦𐴝𐴓𐴡𐴔𐴞 𐴁𐴠𐴀𐴠𐴚𐴡𐴌 𐴃𐴡𐴌𐴉𐴥𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝𐴌𐴓𐴧𐴝 𐴰 𐴰 𐴷 𐴔𐴡𐴓𐴞𐴘𐴥𐴟𐴕 𐴋𐴦𐴡𐴓𐴝𐴌𐴡𐴌 𐴔𐴡𐴊𐴡𐴊 𐴱𐴱

𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴈𐴥𐴡𐴃𐴡𐴔 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 , 𐴀𐴥𐴠𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴕𐴞𐴎𐴡𐴌 𐴎𐴡𐴌𐴔𐴡𐴏𐴃𐴝𐴕 𐴏𐴥𐴝𐴌𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 , 𐴀𐴝𐴌 𐴀𐴥𐴞𐴃𐴝𐴌𐴝𐴌𐴥𐴠 𐴏𐴥𐴝𐴀𐴝𐴌𐴝 𐴊𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴔𐴟𐴓 𐴎𐴡𐴌𐴟𐴌𐴡𐴃 𐴉𐴟𐴌𐴝 𐴒𐴡𐴌𐴥𐴞 𐴁𐴤𐴡𐴓𐴧𐴝 , 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴏𐴥𐴡𐴚𐴑𐴡𐴄𐴡𐴃 𐴈𐴥𐴡𐴏𐴧𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴀𐴝𐴌 𐴊𐴟𐴘 𐴘𐴥𐴝𐴕 𐴂𐴡𐴌𐴡𐴅𐴤𐴠𐴑𐴄 𐴑𐴟𐴙𐴄𐴧𐴝𐴘 𐴀𐴝𐴕𐴥𐴞𐴁𐴤𐴡𐴓𐴧𐴝 𐴀𐴦𐴝𐴓𐴡𐴔𐴞 𐴁𐴠𐴀𐴠𐴚𐴠 𐴰 𐴰 𐴷 𐴇𐴥𐴝𐴣𐴃 𐴐𐴤𐴡𐴃 𐴔𐴡𐴓𐴞𐴘𐴥𐴟𐴕 𐴋𐴦𐴡𐴓𐴝𐴌 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴟𐴓 𐴄𐴞𐴛𐴝𐴃𐴧𐴤𐴟 𐴀𐴝𐴊𐴧𐴤𐴡𐴑 𐴰 𐴵 𐴳 𐴔𐴡𐴓𐴞𐴘𐴥𐴟𐴕 , 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴀𐴥𐴞𐴃𐴝𐴌𐴝𐴌𐴥𐴠 𐴏𐴥𐴝𐴀𐴝𐴌𐴝 𐴊𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴔𐴟𐴓 𐴎𐴡𐴌𐴟𐴌𐴡𐴃 𐴉𐴟𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴁𐴝𐴑𐴞 𐴀𐴝𐴊𐴧𐴤𐴡𐴑 𐴰 𐴵 𐴳 𐴔𐴡𐴓𐴞𐴘𐴥𐴟𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴎𐴞𐴕𐴊𐴞𐴒𐴞𐴌𐴥𐴠 𐴀𐴠𐴏𐴄𐴤𐴠𐴕𐴋𐴤𐴝𐴋 𐴁𐴝𐴕𐴝𐴘 𐴁𐴤𐴡𐴓𐴧𐴝 𐴈𐴥𐴡𐴏𐴧𐴝 𐴒𐴡𐴌𐴥𐴞𐴁𐴡𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌
𐴔𐴡𐴓𐴠𐴐𐴤𐴙𐴝𐴃 𐴁𐴠𐴑𐴝𐴕𐴟𐴕𐴞 𐴃𐴡𐴖𐴌𐴠 𐴒𐴡𐴤𐴓𐴞 𐴃𐴤𐴝𐴙𐴑𐴧𐴤𐴙𐴠𐴊𐴠 𐴁𐴡𐴌𐴔𐴥𐴝𐴌 𐴔𐴝𐴕𐴥𐴟𐴙𐴐𐴢 𐴁𐴠𐴐𐴞𐴤 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱
𐴔𐴡𐴓𐴠𐴐𐴤𐴙𐴝𐴃 𐴁𐴠𐴑𐴝𐴕𐴟𐴕𐴞 𐴃𐴡𐴖𐴌𐴠 𐴒𐴡𐴤𐴓𐴞 𐴃𐴝𐴤𐴑𐴤𐴠𐴌 𐴊𐴧𐴠 𐴁𐴡𐴌𐴔𐴥𐴝𐴌 𐴀𐴝𐴌 𐴀𐴡𐴙𐴕𐴧𐴡 𐴊𐴠𐴐𐴡𐴤𐴙𐴃𐴧𐴝 𐴔𐴞𐴓𐴝𐴘 𐴁𐴠𐴒𐴧𐴤𐴟𐴕𐴠𐴳 𐴲 𐴱 𐴎𐴡𐴕 𐴉𐴡𐴙𐴅𐴧𐴡𐴕𐴃𐴡 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴔𐴡𐴓𐴠𐴆𐴤𐴙𐴝𐴌 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴓𐴠𐴐𐴤𐴙𐴝𐴌 𐴔𐴝𐴙𐴕𐴐𐴤𐴡𐴌 𐴇𐴠𐴥𐴉𐴝𐴎𐴡𐴃𐴞 𐴃𐴤𐴝𐴕𐴥𐴝𐴌 𐴈𐴥𐴡𐴁𐴡𐴌 𐴔𐴟𐴃𐴝𐴁𐴠𐴑 𐴔𐴠 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝

𐴀𐴠𐴑 𐴁𐴝𐴎𐴠 𐴏𐴠𐴕𐴃𐴟𐴓 𐴎𐴝𐴒𐴝𐴌 𐴇𐴝𐴣𐴏𐴠𐴥 𐴁𐴠𐴑𐴝𐴕𐴟𐴕𐴞 𐴃𐴡𐴖𐴌𐴠 𐴒𐴤𐴡𐴓𐴞 𐴃𐴤𐴝𐴑𐴤𐴝𐴃 𐴀𐴝𐴏𐴠𐴥𐴊𐴠 𐴁𐴡𐴘𐴊𐴠𐴐𐴤𐴡𐴙𐴃𐴧𐴝

𐴀𐴡𐴑𐴧𐴡𐴓𐴡𐴌 𐴈𐴥𐴡𐴁𐴡𐴌 𐴉𐴝𐴘 𐴔𐴡𐴓𐴠𐴆𐴤𐴙𐴝𐴌 𐴉𐴟𐴓𐴞𐴐𐴢 𐴎𐴝𐴘 𐴐𐴠𐴑 𐴒𐴡𐴙𐴅𐴧𐴤𐴙𐴠 , 𐴐𐴠𐴑 𐴒𐴡𐴌𐴞𐴥 𐴁𐴝𐴦𐴊𐴠 𐴑𐴠𐴙𐴏𐴧𐴥𐴟𐴃𐴧𐴟 𐴑𐴠𐴙𐴏𐴧𐴥𐴟𐴃𐴧𐴟 𐴈𐴝𐴁𐴡𐴏𐴢 𐴉𐴡𐴕𐴧𐴝𐴌 𐴑𐴡𐴔𐴎𐴟𐴌𐴞 𐴉𐴝𐴘𐴧𐴥𐴠𐴊𐴠 𐴳 𐴲 𐴱 𐴎𐴡𐴕𐴡𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴀𐴞𐴔𐴞𐴒𐴞𐴌𐴞𐴐𐴤𐴠𐴕 𐴀𐴡𐴉𐴥𐴞𐴏𐴡𐴃 𐴀𐴝𐴕𐴥𐴞 𐴁𐴤𐴝𐴓𐴝 𐴔𐴡𐴃𐴠 𐴏𐴠𐴑 𐴒𐴡𐴙𐴅𐴧𐴤𐴙𐴠𐴊𐴠 𐴀𐴞𐴥𐴀𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴷 𐴎𐴡𐴕 𐴀𐴞𐴕𐴋𐴟𐴕𐴞𐴐𐴤𐴙𐴝𐴌 , 𐴱 𐴲 𐴎𐴡𐴕 𐴀𐴞𐴕𐴋𐴤𐴞𐴘𐴝𐴌 𐴀𐴝𐴌 𐴁𐴝𐴑𐴞 𐴒𐴤𐴟𐴕 𐴁𐴠𐴒𐴧𐴤𐴟𐴕 𐴁𐴡𐴌𐴔𐴥𐴝𐴌𐴊𐴠 𐴎𐴝𐴕𐴞 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴔𐴡𐴓𐴠𐴆𐴤𐴙𐴝𐴌 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴡𐴉𐴥𐴝𐴌 𐴎𐴤𐴝𐴑𐴧𐴗𐴝 𐴔𐴝𐴌𐴝𐴌 𐴁𐴝𐴁𐴡𐴃𐴠 𐴀𐴝𐴓𐴅𐴤𐴠𐴌𐴞𐴘𐴝 𐴘𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴃 𐴌𐴠𐴂𐴟𐴄 𐴉𐴡𐴣𐴀𐴡𐴏𐴝𐴘𐴁𐴡 𐴱𐴱

𐴉𐴠𐴌𐴦𐴝𐴣𐴏𐴡𐴌 𐴈𐴥𐴡𐴁𐴡𐴌 𐴉𐴡𐴣𐴀𐴡𐴏𐴝 𐴀𐴠𐴅𐴤𐴠𐴕𐴏𐴞𐴌 𐴔𐴡𐴎𐴞𐴕 , 𐴀𐴞𐴏𐴌𐴦𐴝𐴙𐴓𐴠 𐴒𐴤𐴡𐴎𐴧𐴝𐴌 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴇𐴝𐴔𐴦𐴝𐴏𐴡𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴒𐴡𐴌𐴥𐴠𐴌 𐴈𐴡𐴀𐴡𐴘 , 𐴉𐴥𐴡𐴓𐴡𐴏𐴃𐴞𐴕𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴒𐴡𐴌𐴥𐴠𐴌 , 𐴔𐴠 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴑𐴠𐴀𐴠𐴔𐴡𐴃 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴈𐴡𐴔𐴡𐴃 𐴱 𐴲 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 , 𐴀𐴝𐴔𐴌𐴞𐴑𐴝 𐴀𐴝𐴌 𐴉𐴡𐴏𐴥𐴞𐴔𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴈𐴡𐴃𐴤𐴝 𐴕𐴡 𐴔𐴝𐴕𐴞 , 𐴀𐴞𐴏𐴌𐴦𐴝𐴙𐴓𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴉𐴥𐴡𐴖𐴅𐴞 𐴑𐴝𐴌𐴖𐴝𐴘 𐴀𐴝𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 𐴒𐴡𐴌𐴥𐴝𐴃 𐴀𐴝𐴏𐴥𐴠 , 𐴒𐴠𐴓𐴊𐴠 𐴌𐴦𐴡𐴘 𐴁𐴝𐴌𐴡𐴌 𐴇𐴥𐴝𐴔𐴓𐴝𐴃 𐴵 𐴴 𐴎𐴡𐴕 𐴔𐴡𐴌𐴡𐴕𐴡𐴌 𐴁𐴦𐴝𐴊𐴠 , 𐴀𐴝𐴓𐴅𐴤𐴠𐴌𐴞𐴘𐴝 𐴘𐴠 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴐𐴤𐴝𐴕𐴃𐴞 𐴑𐴡𐴗𐴕𐴏𐴥𐴞𐴓𐴡𐴌 𐴔𐴞𐴄𐴤𐴞𐴚 𐴔𐴝𐴃𐴝𐴘 𐴁𐴤𐴡𐴓𐴧𐴝 𐴊𐴡𐴌𐴈𐴥𐴝𐴏𐴢 𐴊𐴞𐴀𐴞𐴓 , 𐴘𐴝 𐴘𐴥𐴡 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴇𐴥𐴝𐴔𐴓𐴝 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴉𐴥𐴞𐴃𐴞𐴕 𐴀𐴥𐴡 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴃 𐴌𐴠𐴂𐴟𐴄 𐴉𐴡𐴣𐴀𐴡𐴏𐴝𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴈𐴥𐴝𐴁𐴡𐴌 𐴎𐴝𐴕𐴝 𐴒𐴞𐴘𐴥𐴠 𐴱𐴱