𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴕𐴡𐴏𐴥𐴡𐴓 𐴈𐴥𐴡𐴃𐴡𐴔 𐴑𐴝𐴌𐴖𐴝𐴘 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴉𐴥𐴞𐴃𐴞𐴕 𐴀𐴥𐴡 , 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴀𐴝𐴌𐴑𐴝𐴕𐴡𐴃 𐴁𐴤𐴟𐴏𐴞𐴊𐴡𐴚 𐴀𐴝𐴌 𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴊𐴠𐴈𐴥𐴝 𐴎𐴝𐴀𐴝𐴌 , 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴊𐴡𐴘𐴧𐴝 𐴔𐴝𐴘𐴧𐴝 𐴏𐴥𐴝𐴌𐴥𐴝 𐴌𐴟𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴒𐴡𐴌𐴥𐴞 , 𐴀𐴥𐴞𐴃𐴤𐴝𐴌𐴝𐴌 𐴒𐴤𐴡𐴌 𐴁𐴝𐴌𐴞 𐴔𐴡𐴏𐴥𐴡𐴙𐴃 𐴔𐴡𐴊𐴡𐴌𐴥𐴡𐴏𐴝 𐴁𐴤𐴝𐴚𐴞 𐴏𐴟𐴌𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 , 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴔𐴡𐴎𐴞𐴕 𐴁𐴤𐴟𐴏𐴞𐴊𐴡𐴚𐴡𐴌 𐴀𐴠𐴓𐴝𐴑𐴝𐴌 , 𐴒𐴤𐴡𐴌 𐴏𐴥𐴝𐴌𐴥𐴝 𐴃𐴤𐴡𐴌 𐴏𐴥𐴝𐴌𐴥𐴝 𐴀𐴥𐴡𐴘𐴧𐴠𐴊𐴠 𐴶 𐴱 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴞𐴕𐴊𐴞𐴒𐴞𐴌 𐴐𐴤𐴠𐴐𐴢 𐴄𐴝𐴙𐴔𐴡𐴃 𐴐𐴤𐴝𐴕𐴃𐴞𐴌 𐴘𐴦𐴝𐴊𐴒𐴝𐴌𐴞 𐴀𐴥𐴞𐴏𐴝𐴉𐴠 𐴀𐴠𐴑 𐴎𐴝𐴒𐴝𐴃 𐴎𐴡𐴔𐴝 𐴀𐴥𐴡𐴘𐴧𐴠 , 𐴊𐴞𐴕𐴡𐴃𐴧𐴤𐴟 𐴊𐴞𐴕𐴠 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁 𐴀𐴥𐴡𐴀𐴡𐴌 , 𐴀𐴥𐴠𐴍𐴠 𐴖𐴡𐴌𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴝𐴌𐴀𐴥𐴡 𐴈𐴥𐴡𐴌𐴝𐴁 𐴒𐴡𐴌𐴥𐴠𐴌 , 𐴌𐴠𐴂𐴟𐴄 𐴔𐴡𐴎𐴞𐴕 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴐𐴤𐴡𐴣𐴀𐴡 𐴕𐴝𐴌𐴝𐴙𐴕 𐴆𐴤𐴙𐴡𐴚 , 𐴃𐴝𐴙𐴔𐴧𐴥𐴡𐴚 𐴆𐴤𐴙𐴚 , 𐴕𐴝𐴑𐴧𐴝𐴙𐴚 𐴊𐴡𐴚 𐴀𐴝𐴌 𐴏𐴥𐴞𐴕𐴊𐴞 𐴉𐴝𐴌𐴝𐴚 , 𐴁𐴝𐴒𐴧𐴟𐴕𐴥𐴝 𐴑𐴟𐴖𐴝𐴙𐴕 𐴊𐴡𐴚 , 𐴉𐴝𐴌𐴝 𐴀𐴞𐴀𐴞𐴕𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴎𐴤𐴝𐴑𐴧𐴗𐴝 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴑𐴠𐴕𐴠𐴋𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴡𐴔𐴝 𐴀𐴥𐴡𐴘 𐴔𐴡𐴒𐴢 𐴁𐴝𐴒𐴞 𐴌𐴥𐴠 𐴕𐴞𐴕𐴊𐴝 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴈𐴥𐴝𐴏𐴢 𐴒𐴡𐴌𐴞 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴡𐴚𐴡𐴃 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴁𐴠𐴕𐴥𐴝𐴌 𐴊𐴤𐴡𐴌𐴞 , 𐴑𐴠𐴕𐴠𐴋𐴝 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴠𐴃𐴧𐴠𐴉𐴝𐴑𐴡𐴌 𐴏𐴥𐴝𐴣𐴀𐴝𐴃𐴠 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠 , 𐴀𐴝𐴌 𐴀𐴥𐴞𐴃𐴤𐴝𐴌𐴝 𐴊𐴠𐴐𐴁𐴡𐴘𐴃𐴠𐴐𐴤𐴡𐴌 𐴃𐴡𐴕𐴎𐴞𐴔 𐴀𐴡 𐴁𐴟𐴎𐴤𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴀𐴝𐴉𐴞𐴓 𐴒𐴡𐴙𐴅𐴧𐴤𐴙𐴠𐴊𐴠 , 𐴎𐴠𐴃𐴡 𐴈𐴥𐴝𐴌𐴝 𐴉𐴝𐴌𐴠 𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝𐴃 𐴒𐴤𐴡𐴓𐴞 , 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔 𐴀𐴡 𐴅𐴠𐴕𐴟𐴏𐴥𐴝𐴙𐴋𐴡𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴝𐴏𐴝𐴘 𐴓𐴡𐴘 𐴁𐴡𐴓𐴧𐴥𐴝 , 𐴴 𐴲 𐴰 𐴲 𐴐𐴤𐴡𐴕𐴡𐴌 𐴐𐴤𐴟𐴌𐴟 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 , 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔𐴡𐴌 𐴏𐴝𐴑𐴧𐴝𐴃 𐴋𐴡𐴓𐴝𐴙𐴕𐴧𐴝 𐴈𐴥𐴝𐴀𐴝𐴃 𐴀𐴝𐴏𐴥𐴠 , 𐴔𐴡𐴒𐴢 𐴁𐴒𐴞𐴌 𐴁𐴝𐴎𐴤𐴝 𐴊𐴞𐴀𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴔𐴝𐴌𐴠𐴌 , 𐴔𐴠𐴓𐴠𐴄𐴠𐴌𐴞𐴌 𐴁𐴝𐴎𐴤𐴝 𐴊𐴞𐴀𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴌𐴠𐴌 , 𐴀𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴊𐴤𐴡𐴌𐴞𐴁𐴝𐴌 𐴊𐴤𐴡𐴌𐴡𐴕𐴞 𐴕𐴥𐴝𐴘 , 𐴃𐴤𐴝𐴑𐴤𐴞𐴁𐴝𐴌 𐴏𐴥𐴝𐴀𐴝𐴌𐴝 𐴕𐴥𐴝𐴘 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴌𐴥𐴠𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴑𐴞𐴘𐴥𐴡𐴓𐴧𐴝 ” 𐴁𐴝𐴚𐴒𐴝𐴓𐴞 𐴄𐴠𐴌𐴟𐴌𐴥𐴠𐴏𐴄 ” 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴝 𐴎𐴝𐴀𐴝𐴌 𐴱𐴱

𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑 𐴉𐴥𐴞𐴃𐴞𐴕 𐴀𐴝𐴁𐴝𐴌 𐴄𐴡𐴓𐴄𐴡𐴓𐴝𐴌 , 𐴌𐴟𐴇𐴝𐴙𐴚𐴒𐴙𐴝𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 , 𐴕𐴟𐴖𐴝 𐴁𐴤𐴝𐴉𐴠 𐴀𐴟𐴙𐴄𐴧𐴤𐴙𐴠𐴊𐴠 𐴉𐴥𐴡𐴏𐴝𐴊𐴡𐴌 𐴎𐴡𐴌𐴞𐴘𐴝 𐴊𐴟𐴘 𐴓𐴝𐴑 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴃𐴤𐴡𐴌 𐴏𐴥𐴝𐴌𐴥𐴝 𐴀𐴥𐴡𐴘 𐴒𐴞𐴘𐴠 𐴒𐴤𐴡𐴘 , 𐴊𐴠𐴐𐴁𐴡𐴘𐴊𐴠𐴐𐴤𐴞 𐴔𐴞𐴋𐴞𐴘𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 , 𐴁𐴡𐴌𐴔𐴥𐴝𐴌 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 , 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 , 𐴉𐴥𐴞𐴃𐴞𐴕 𐴀𐴝𐴁𐴝𐴌 ” 𐴁𐴝𐴚𐴒𐴝𐴓𐴞 𐴄𐴠𐴌𐴟𐴌𐴥𐴠𐴏𐴄 ” 𐴁𐴡𐴓𐴞 𐴀𐴥𐴞𐴃𐴝𐴌𐴝𐴌 𐴑𐴟𐴓𐴠 𐴋𐴡𐴑𐴤𐴟𐴔𐴥𐴠𐴕 𐴀𐴥𐴡𐴑𐴧𐴡𐴓𐴡𐴃 𐴀𐴝𐴌 𐴀𐴥𐴞𐴃𐴝𐴌𐴝𐴌 𐴀𐴡𐴉𐴥𐴞𐴐𐴤𐴠𐴓 𐴀𐴠𐴏𐴄𐴠𐴙𐴄𐴔𐴥𐴠𐴕 𐴀𐴥𐴡𐴑𐴧𐴡𐴓𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 ” 𐴁𐴝𐴚𐴒𐴝𐴓𐴞 𐴄𐴠𐴌𐴟𐴌𐴥𐴠𐴏𐴄 ” 𐴈𐴡𐴀𐴡𐴌 𐴊𐴧𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 , 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 , 𐴔𐴡𐴒𐴢 𐴁𐴝𐴒𐴞 𐴓𐴠𐴑𐴤𐴠𐴌 𐴊𐴧𐴠 𐴀𐴝𐴌 𐴈𐴡𐴀𐴡𐴌 𐴊𐴧𐴠 𐴘𐴥𐴝𐴀𐴝𐴕 𐴎𐴡𐴊𐴞 𐴈𐴥𐴝𐴍𐴝𐴘 𐴉𐴝𐴌𐴠 , 𐴀𐴝𐴣𐴀𐴝𐴌𐴝 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴡𐴀𐴡𐴕𐴡𐴃 𐴔𐴡𐴐𐴑𐴞𐴓 𐴀𐴥𐴡𐴙𐴃 𐴉𐴝𐴌𐴠 , 𐴀𐴝𐴌 𐴀𐴥𐴞𐴃𐴝𐴌𐴝 𐴀𐴝𐴣𐴀𐴝𐴌𐴝𐴌 𐴀𐴝𐴏𐴥𐴡𐴓 𐴊𐴠𐴐𐴤𐴡𐴙𐴃𐴧𐴝𐴃𐴝 𐴀𐴠𐴑𐴌𐴝𐴌 𐴕𐴡 𐴒𐴡𐴌𐴥𐴠𐴌 , 𐴏𐴥𐴞𐴘𐴝𐴏𐴞 𐴑𐴤𐴠𐴓 𐴑𐴤𐴠𐴓𐴝𐴘 𐴁𐴤𐴡𐴓𐴧𐴝 𐴕𐴟𐴖𐴝 𐴄𐴤𐴠𐴒𐴢 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴈𐴡𐴕𐴥𐴡 𐴑𐴞𐴘𐴥𐴡𐴃𐴧𐴟 𐴇𐴥𐴡𐴑 𐴕𐴥𐴝𐴘 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴔𐴡𐴓𐴠𐴆𐴤𐴙𐴝𐴌 𐴒𐴤𐴡𐴎𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞 𐴌𐴥𐴠 𐴕𐴞𐴕𐴊𐴝 𐴒𐴡𐴌𐴥𐴞 , 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴀𐴠𐴑𐴆𐴤𐴠𐴕 𐴓𐴡𐴘𐴁𐴝𐴌 𐴀𐴝𐴌𐴡𐴎 𐴱𐴱

𐴀𐴞𐴏𐴌𐴥𐴝𐴙𐴓𐴠 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴓𐴝𐴑𐴝𐴃 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴁𐴟𐴔𐴁𐴝𐴌𐴞 𐴒𐴡𐴌𐴥𐴞 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴁𐴠𐴒𐴟𐴕𐴥𐴝 𐴂𐴝𐴂𐴓𐴥𐴞𐴑 𐴔𐴝𐴌𐴞 𐴉𐴥𐴠𐴓𐴥𐴝𐴌 𐴊𐴧𐴠 𐴘𐴥𐴝𐴀𐴝𐴕𐴡𐴃 , 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝𐴒𐴞𐴘𐴥𐴠 , 𐴔𐴠 𐴔𐴝𐴐𐴤𐴡𐴌 𐴷 𐴲 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴕𐴦𐴠𐴓𐴝𐴘𐴧𐴥𐴠𐴊𐴠 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 , 𐴃𐴠𐴓𐴝𐴏𐴢 𐴏𐴟𐴓𐴃𐴝𐴕 , 𐴅𐴡𐴁𐴝𐴓𐴞𐴘𐴝 , 𐴕𐴟𐴏𐴝𐴙𐴌𐴝𐴃 𐴀𐴝𐴌 𐴒𐴤𐴡𐴎𐴧𐴝 𐴐𐴤𐴡𐴀𐴡𐴌𐴡𐴃 , 𐴒𐴡𐴃𐴡 𐴴 𐴲 𐴒𐴤𐴡𐴕𐴄𐴤𐴝𐴌 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴰 𐴰 𐴲 𐴎𐴡𐴕 𐴓𐴡𐴃𐴞 𐴉𐴥𐴡𐴓𐴡𐴏𐴃𐴞𐴕𐴞 𐴔𐴝𐴌𐴝 𐴒𐴞𐴘𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴀𐴝𐴌𐴀𐴥𐴡 𐴓𐴠𐴙𐴑𐴧𐴤𐴙𐴠𐴊𐴠 ! 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴀𐴥𐴡𐴘𐴧𐴠 𐴓𐴡𐴃𐴞 𐴀𐴝𐴙𐴅𐴧𐴙𐴝 𐴃𐴡𐴃 𐴴 𐴳 𐴲 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴴 𐴸 𐴹 𐴵 𐴳 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 , 𐴎𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴦𐴠𐴐𐴢 𐴁𐴤𐴝𐴒𐴢 𐴁𐴠𐴍𐴞𐴀𐴝𐴙𐴕 𐴀𐴝𐴌 𐴉𐴟𐴖𐴝𐴙𐴕 , 𐴀𐴝𐴌 𐴒𐴡𐴕𐴝 𐴏𐴥𐴝𐴌𐴥𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴡𐴉𐴥𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴌 𐴁𐴝𐴁𐴡𐴃𐴠 ( 𐴀𐴡 𐴀𐴝𐴘 𐴏𐴞 ) 𐴘𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌𐴥𐴠 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴥𐴞𐴁𐴡𐴓𐴧𐴝 𐴈𐴡𐴘𐴧𐴥𐴠 𐴱𐴱

𐴀𐴞𐴏𐴓𐴝𐴔𐴞 𐴃𐴦𐴝𐴀𐴟𐴕𐴞 𐴃𐴡𐴕𐴎𐴞𐴔 ( 𐴀𐴡 𐴀𐴝𐴘 𐴏𐴞 ) 𐴘𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴀𐴞𐴏𐴌𐴦𐴝𐴙𐴓𐴠 𐴁𐴤𐴡𐴘𐴝𐴕𐴡𐴑 𐴁𐴤𐴝𐴉𐴠 𐴂𐴝𐴂𐴓𐴥𐴞𐴑 𐴔𐴝𐴌𐴞 𐴉𐴥𐴠𐴓𐴥𐴝𐴌 𐴊𐴧𐴠 𐴀𐴥𐴞𐴀𐴞𐴕𐴡𐴌𐴥𐴠 𐴕𐴞𐴕𐴊𐴝 𐴒𐴡𐴌𐴥𐴞 𐴁𐴦𐴝𐴊𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴐𐴤𐴝𐴕𐴃𐴞 𐴑𐴡𐴗𐴕𐴏𐴥𐴞𐴓𐴡𐴌𐴥𐴠 𐴕𐴞𐴎𐴡𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴔𐴟𐴃𐴝𐴓𐴡𐴁𐴝 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴠 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴡 𐴀𐴝𐴘 𐴏𐴞𐴌 𐴖𐴠𐴁 𐴏𐴥𐴝𐴙𐴄𐴡𐴃 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴘𐴝𐴕𐴡𐴃 , 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴓𐴝𐴌𐴥𐴝𐴘 𐴀𐴡𐴉𐴥𐴡𐴌𐴝𐴊𐴞 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴡𐴌 𐴁𐴠𐴌𐴟𐴊𐴧𐴤𐴠 𐴀𐴡𐴉𐴥𐴡𐴌𐴝𐴊 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴉𐴝𐴀𐴝 𐴒𐴞𐴘𐴥𐴠 , 𐴀𐴥𐴠𐴃𐴡𐴓𐴧𐴝 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴉𐴥𐴟𐴎𐴊𐴝𐴌𐴞 𐴑𐴝𐴕𐴟𐴕 𐴔𐴡𐴎𐴞𐴕 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴀𐴝𐴃𐴡𐴚𐴁𐴝𐴊𐴞 𐴔𐴝𐴕𐴞 𐴓𐴟𐴀𐴝 𐴉𐴡𐴌𐴞𐴁𐴤𐴡 , 𐴀𐴝𐴌 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴌 𐴈𐴝𐴣𐴏𐴥𐴠 𐴈𐴥𐴝𐴏𐴢 𐴒𐴡𐴌𐴥𐴞 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴐𐴤𐴝𐴕𐴃𐴞 𐴑𐴡𐴗𐴕𐴏𐴥𐴞𐴓𐴡𐴌𐴥𐴠 , 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝 𐴁𐴡𐴕 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴔𐴡𐴅𐴁𐴟𐴌 𐴒𐴡𐴌𐴥𐴡𐴕𐴡𐴃 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴥𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱