𐴀𐴝𐴙𐴑𐴧𐴝𐴉𐴡𐴃 𐴀𐴝𐴏𐴠𐴥𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴓𐴠𐴔 𐴒𐴡𐴀𐴡𐴌𐴔𐴥𐴠𐴕𐴠 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴠𐴥 𐴔𐴠𐴓𐴠𐴄𐴠𐴌𐴞𐴃 𐴒𐴡𐴤𐴓𐴞𐴁𐴡𐴓𐴧𐴝 𐴀𐴝𐴁𐴝𐴦𐴌 𐴁𐴡𐴓𐴝𐴎𐴟𐴌𐴞 𐴒𐴡𐴌𐴥𐴠𐴌 𐴱𐴱

‎𐴀𐴝𐴌𐴝𐴑𐴝𐴕𐴡𐴌 𐴀𐴝𐴙𐴑𐴧𐴝𐴉𐴡𐴃 𐴀𐴝𐴏𐴠𐴥𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴓𐴠𐴔 𐴒𐴡𐴀𐴡𐴌𐴔𐴥𐴠𐴕𐴠 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴠𐴥 𐴔𐴠𐴓𐴠𐴄𐴠𐴌𐴞𐴃 𐴒𐴡𐴤𐴓𐴞𐴁𐴡𐴓𐴧𐴝 𐴒𐴞𐴘𐴡𐴥𐴘𐴊𐴠 𐴈𐴝𐴙𐴓𐴧𐴝 𐴔𐴠 𐴔𐴝𐴐𐴡𐴤𐴌 𐴲𐴵 𐴃𐴝𐴌𐴥𐴞𐴑𐴡𐴃 𐴀𐴝𐴁𐴝𐴦𐴌 𐴁𐴡𐴓𐴝𐴎𐴟𐴌𐴞𐴥 𐴒𐴡𐴙𐴅𐴧𐴙𐴤𐴠𐴊𐴠 𐴀𐴞𐴥𐴘𐴝𐴕 𐴎𐴝𐴕𐴝 𐴒𐴞𐴘𐴠𐴥.

‎𐴀𐴝𐴙𐴑𐴧𐴝𐴉𐴡𐴃 𐴀𐴝𐴏𐴠𐴥𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴁𐴝𐴀𐴝𐴏𐴧𐴡𐴥𐴌𐴝 ، 𐴀𐴥𐴟𐴕𐴊𐴦𐴡𐴅𐴞𐴤 ، 𐴀𐴥𐴟𐴕𐴊𐴦𐴡𐴐𐴠𐴤 ، 𐴁𐴡𐴊𐴟𐴂𐴝 ، 𐴏𐴝𐴑𐴧𐴞𐴂𐴝𐴌𐴝𐴚 𐴀𐴝𐴌 𐴀𐴡𐴙𐴕𐴧𐴡 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴡𐴑𐴧𐴡𐴓𐴡𐴌𐴠𐴥 𐴒𐴞𐴘𐴡𐴥𐴘𐴊𐴠 𐴇𐴝𐴙𐴓𐴧𐴝 𐴔𐴠 𐴔𐴝𐴐𐴡𐴤𐴌 𐴲𐴵 𐴃𐴝𐴌𐴥𐴞𐴑𐴡𐴃 𐴁𐴠𐴀𐴠𐴕𐴧𐴝 𐴎𐴝𐴓𐴠𐴔 𐴒𐴡𐴀𐴡𐴌𐴔𐴥𐴠𐴕 𐴎𐴝𐴘 𐴁𐴡𐴓𐴝𐴎𐴟𐴌𐴞 𐴀𐴝𐴌 𐴊𐴤𐴡𐴔𐴑𐴞 𐴊𐴞𐴀𐴞 𐴔𐴠𐴓𐴠𐴄𐴠𐴌𐴞𐴃 𐴒𐴡𐴤𐴓𐴞𐴁𐴡𐴓𐴧𐴝 𐴈𐴡𐴘𐴧𐴠𐴥 𐴁𐴡𐴓𐴞 𐴑𐴠𐴀𐴠𐴔𐴡𐴌 𐴁𐴟𐴤𐴃𐴤𐴡𐴃𐴧𐴟𐴕 𐴌𐴟𐴇𐴝𐴙𐴚𐴒𐴙𐴝 𐴘𐴠𐴥 𐴈𐴡𐴘𐴧𐴠 𐴱 𐴀𐴡𐴏𐴧𐴠𐴥 𐴎𐴡𐴊𐴞 𐴔𐴠𐴓𐴠𐴄𐴠𐴌𐴞 𐴈𐴝𐴔𐴡𐴃 𐴕𐴡 𐴒𐴤𐴡𐴓𐴞𐴓𐴠𐴥 𐴀𐴠𐴑 𐴒𐴡𐴤𐴌𐴡𐴃𐴧𐴟 𐴀𐴠𐴑 𐴓𐴝𐴑 𐴀𐴥𐴡𐴘𐴃𐴠 𐴊𐴟𐴘 𐴓𐴝𐴑 𐴉𐴡𐴙𐴅𐴧𐴡𐴕𐴃𐴡 𐴄𐴞𐴛𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴊𐴞𐴘𐴠𐴥 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠𐴥 ، 𐴀𐴞𐴈𐴥𐴡𐴕𐴡𐴌 𐴄𐴝𐴙𐴔𐴡𐴃 𐴔𐴝𐴙𐴕𐴐𐴤𐴡𐴃𐴧𐴟 𐴈𐴡𐴕𐴡𐴥 𐴈𐴝𐴔 𐴈𐴡𐴌𐴡𐴏𐴢 𐴕𐴡 𐴃𐴤𐴝𐴑𐴤𐴞 𐴈𐴥𐴝𐴘𐴃𐴡 𐴓𐴡𐴘𐴃𐴠 𐴁𐴠𐴐𐴞𐴤 𐴊𐴟𐴑𐴧𐴡𐴤𐴃 𐴉𐴡𐴙𐴅𐴧𐴙𐴤𐴠𐴊𐴠 𐴄𐴝𐴙𐴔𐴡𐴃 𐴔𐴠𐴓𐴠𐴄𐴠𐴌𐴞 𐴈𐴝𐴔𐴡𐴃 𐴕𐴡 𐴒𐴤𐴡𐴓𐴞𐴓𐴥𐴠 𐴀𐴞𐴥𐴃𐴝𐴌𐴝𐴌𐴠𐴥 𐴄𐴞𐴛𐴝 𐴊𐴞𐴘𐴝 𐴁𐴠𐴐𐴞𐴤 𐴔𐴡𐴐𐴑𐴞𐴓 𐴀𐴡𐴥𐴘𐴁𐴡| 𐴀𐴝𐴌 𐴀𐴠𐴑 𐴋𐴤𐴝𐴑𐴡𐴃𐴧𐴟 𐴀𐴝𐴣𐴀𐴝𐴌𐴝 𐴎𐴡𐴊𐴞 𐴔𐴠𐴓𐴠𐴄𐴠𐴌𐴞𐴃 𐴒𐴡𐴤𐴓𐴞 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴌𐴉𐴥𐴡𐴃𐴧𐴟 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴉𐴝𐴘𐴧𐴟𐴔| 𐴀𐴠𐴥𐴃𐴡𐴓𐴧𐴝 𐴁𐴟𐴎𐴤𐴡𐴘𐴧𐴝 𐴀𐴝𐴌 𐴊𐴠𐴐𐴁𐴞𐴊𐴠𐴐𐴤𐴡𐴌 𐴑𐴝𐴕𐴟𐴕 𐴎𐴝𐴕𐴡𐴘𐴧𐴝 𐴀𐴥𐴡𐴑𐴧𐴡𐴓 𐴒𐴡𐴤𐴓𐴞𐴘𐴡𐴌𐴥𐴞 𐴔𐴝𐴦𐴔𐴠𐴓𐴝 𐴌𐴠𐴥 𐴇𐴡𐴥𐴓 𐴒𐴡𐴌𐴥𐴡𐴕𐴧𐴝𐴥𐴕 𐴎𐴡𐴌𐴟𐴌𐴞 𐴁𐴡𐴓𐴞” 𐴀𐴝𐴁𐴝𐴦𐴌 𐴌𐴟𐴇𐴝𐴙𐴚𐴒𐴙𐴝 𐴀𐴟𐴒𐴧𐴗𐴤𐴝 𐴘𐴠𐴥 𐴈𐴡𐴘𐴧𐴠 ||

‎𐴀𐴝𐴌𐴝𐴑𐴝𐴕𐴡𐴃 𐴁𐴦𐴠𐴐𐴢 𐴇𐴞𐴏𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴃𐴝𐴤𐴑𐴠𐴤𐴊𐴠 𐴎𐴝𐴒𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴑𐴠𐴀𐴠𐴔𐴡𐴃 𐴒𐴞𐴘𐴡𐴥𐴘𐴊𐴠 𐴉𐴥𐴠𐴌𐴖𐴝𐴌𐴞 𐴓𐴡𐴃𐴞 𐴁𐴡𐴌𐴔𐴥𐴝𐴌 𐴎𐴝𐴓𐴠𐴔 𐴒𐴡𐴀𐴡𐴌𐴔𐴥𐴠𐴕𐴠 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴠𐴥 𐴔𐴠𐴓𐴠𐴄𐴠𐴌𐴞𐴃 𐴒𐴡𐴤𐴓𐴝𐴘 𐴓𐴝𐴌𐴝𐴥𐴘𐴃 𐴔𐴟𐴀𐴟𐴕𐴃𐴟 𐴋𐴤𐴝𐴓 𐴁𐴝𐴕𐴝𐴘 𐴊𐴞𐴀𐴞 𐴐𐴡𐴤𐴃 𐴐𐴡𐴤𐴃 𐴐𐴤𐴡𐴇𐴞𐴊 𐴒𐴡𐴌𐴞𐴥 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠𐴥 || 𐴁𐴠𐴐𐴤𐴝 𐴁𐴠𐴐𐴞𐴤 𐴎𐴡𐴁𐴡𐴌 𐴊𐴡𐴤𐴏𐴢 𐴓𐴝𐴌𐴥𐴝𐴘 𐴏𐴡𐴓𐴠𐴌𐴊𐴧𐴠 𐴔𐴡𐴚𐴋𐴟𐴤𐴃 𐴔𐴡𐴒𐴢 𐴁𐴝𐴒𐴞 𐴓𐴡𐴘 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴞𐴁𐴡𐴓𐴧𐴝 𐴋𐴡𐴌𐴟𐴕 𐴀𐴝𐴌 𐴁𐴟𐴔 𐴃𐴡𐴘𐴧𐴝𐴌𐴞 𐴒𐴡𐴌𐴠𐴥𐴌 𐴒𐴡𐴀𐴡𐴌𐴔𐴠𐴕𐴠

‎𐴁𐴠𐴐𐴞𐴤 𐴎𐴡𐴁𐴡𐴌 𐴊𐴡𐴤𐴏𐴢 𐴓𐴝𐴌𐴥𐴝𐴘 𐴏𐴡𐴓𐴠𐴌𐴊𐴧𐴠 𐴀𐴝𐴌𐴝𐴑𐴝𐴕𐴡𐴌 𐴀𐴟𐴃𐴧𐴡𐴌 𐴉𐴡𐴏𐴥𐴞𐴔𐴡𐴌 𐴁𐴡𐴖𐴋𐴝𐴌𐴡𐴃 𐴀𐴝𐴏𐴠𐴥𐴊𐴠 𐴔𐴡𐴚𐴋𐴟𐴤 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴒𐴡𐴤𐴓𐴞𐴓𐴠 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴞𐴁𐴡𐴓𐴧𐴝 𐴋𐴡𐴌𐴟𐴕 𐴀𐴝𐴌 𐴁𐴟𐴔 𐴒𐴡𐴀𐴡𐴌𐴔𐴠𐴕𐴠 𐴃𐴡𐴘𐴧𐴝𐴌 𐴒𐴡𐴌𐴠𐴥𐴌 𐴁𐴡𐴓𐴞 𐴊𐴠𐴙𐴑𐴧𐴠𐴤𐴊𐴠 𐴌𐴟𐴇𐴝𐴙𐴚𐴒𐴙𐴝 𐴘𐴠𐴥 𐴈𐴡𐴘𐴧𐴧𐴠.
‎𐴔𐴠 𐴔𐴝𐴐𐴡𐴤𐴌 𐴲𐴵 𐴃𐴝𐴌𐴥𐴞𐴑𐴡𐴃 𐴇𐴝𐴥𐴣𐴎𐴞𐴕𐴧𐴝 𐴏𐴠𐴥𐴚 𐴒𐴡𐴙𐴅𐴧𐴙𐴤𐴠 𐴁𐴡𐴓𐴞 𐴘𐴡𐴥 𐴊𐴠𐴙𐴑𐴧𐴠𐴤𐴊𐴠 𐴌𐴟𐴇𐴝𐴙𐴚𐴒𐴙𐴝 𐴘𐴠𐴥 𐴈𐴡𐴘𐴧𐴧𐴠. 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴒𐴡𐴤𐴓𐴞𐴓𐴠 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴞𐴁𐴡𐴓𐴧𐴝 𐴋𐴡𐴌𐴟𐴕 𐴀𐴝𐴌 𐴁𐴟𐴔 𐴒𐴡𐴀𐴡𐴌𐴔𐴠𐴕𐴠 𐴃𐴡𐴘𐴧𐴝𐴌 𐴒𐴡𐴌𐴠𐴥𐴌. 𐴒𐴡𐴀𐴡𐴌𐴔𐴠𐴕𐴠 𐴒𐴡𐴃𐴡 𐴇𐴝𐴙𐴓𐴧𐴝 𐴑𐴠𐴙𐴏𐴧𐴟𐴥 𐴎𐴝𐴒𐴝𐴃 𐴁𐴟𐴔 𐴔𐴝𐴌𐴞 𐴏𐴠𐴥𐴚 𐴒𐴡𐴌𐴞 𐴏𐴝𐴘𐴧𐴠𐴥 𐴁𐴡𐴓𐴞” 𐴊𐴠𐴙𐴑𐴧𐴙𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴘𐴠𐴥 𐴈𐴡𐴘𐴧𐴧𐴠.

‎𐴔𐴡𐴚𐴋𐴟𐴤𐴌 𐴀𐴝𐴃𐴌𐴝𐴉𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴞𐴤𐴌𐴞 𐴌𐴝𐴙𐴑𐴧𐴙𐴤𐴞 𐴒𐴡𐴀𐴡𐴌𐴔𐴠𐴕𐴠 𐴘𐴡𐴥 𐴁𐴡𐴓𐴝𐴎𐴟𐴌𐴞 𐴇𐴥𐴝𐴣𐴃𐴞𐴘𐴝𐴌 𐴊𐴤𐴡𐴌𐴝𐴘𐴧𐴠𐴊𐴠𐴤 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴱𐴰𐴰𐴰 𐴓𐴡𐴘 𐴀𐴝𐴌 𐴁𐴠𐴐𐴝𐴤 𐴁𐴠𐴐𐴞𐴤 𐴔𐴠𐴓𐴠𐴄𐴠𐴌𐴞𐴌 𐴁𐴡𐴓 𐴓𐴡𐴘 𐴔𐴟𐴏𐴥𐴡𐴓𐴔𐴝𐴕 𐴃𐴝𐴤𐴑𐴤𐴠𐴊𐴠 𐴉𐴝𐴌𐴝𐴃 𐴏𐴞𐴥𐴌𐴥𐴝 𐴏𐴞𐴥𐴌𐴥𐴝 𐴒𐴡𐴌𐴥𐴞 𐴃𐴡𐴘𐴧𐴝𐴌𐴞 𐴒𐴡𐴌𐴠𐴥𐴌 𐴁𐴡𐴓𐴞 𐴈𐴡𐴘𐴧𐴠.

‎𐴀𐴠𐴥𐴃𐴡𐴓𐴧𐴝 𐴔𐴡𐴚𐴋𐴟𐴤𐴃 𐴔𐴝𐴎𐴠 𐴀𐴝𐴌𐴀𐴥𐴡 𐴲𐴲 𐴐𐴤𐴗𐴝 𐴔𐴠𐴓𐴠𐴄𐴠𐴌𐴞𐴌 𐴓𐴡𐴐𐴑𐴡𐴌 𐴓𐴡𐴘 𐴀𐴝𐴌 𐴁𐴠𐴐𐴝𐴤 𐴁𐴠𐴐𐴞𐴤 𐴋𐴡𐴌𐴟𐴕 𐴀𐴝𐴌 𐴁𐴟𐴔 𐴀𐴝𐴌 𐴀𐴡𐴙𐴕𐴧𐴡 𐴁𐴡𐴌𐴡 𐴁𐴡𐴌𐴡 𐴇𐴥𐴝𐴣𐴃𐴞𐴘𐴝𐴌 𐴓𐴡𐴘 𐴑𐴝𐴘𐴠𐴚 𐴐𐴙𐴡𐴤𐴚 𐴀𐴝𐴌 𐴔𐴡𐴌𐴝𐴖𐴡𐴄𐴞 𐴁𐴙𐴟𐴇𐴝𐴃 𐴁𐴠𐴐𐴝𐴤 𐴁𐴠𐴐𐴞𐴤 𐴓𐴝𐴌𐴝𐴥𐴙𐴌 𐴃𐴡𐴘𐴧𐴝𐴌𐴞 𐴒𐴡𐴌𐴠𐴥𐴌 𐴁𐴡𐴓𐴞 𐴁𐴟𐴤𐴃𐴤𐴡𐴃𐴧𐴟 𐴔𐴝𐴙𐴕𐴐𐴠𐴤 𐴈𐴡𐴘𐴧𐴠.

‎𐴔𐴡𐴒𐴢 𐴁𐴝𐴒𐴞 𐴘𐴠𐴥 𐴔𐴡𐴚𐴋𐴟𐴤𐴌𐴥𐴠 𐴁𐴠𐴐𐴞𐴤 𐴁𐴡𐴓𐴡𐴌 𐴏𐴥𐴝𐴣𐴀𐴝𐴃𐴠 𐴓𐴝𐴌𐴥𐴝𐴘 𐴒𐴡𐴌𐴞𐴥 𐴔𐴡𐴚𐴋𐴟𐴤𐴌𐴠 𐴑𐴡𐴁𐴎𐴝 𐴒𐴡𐴌𐴞𐴥𐴁𐴡 𐴁𐴡𐴓𐴞 𐴀𐴝𐴌 𐴒𐴡𐴀𐴡𐴌𐴔𐴠𐴕𐴠 𐴘𐴡𐴥 𐴁𐴠𐴐𐴤𐴝 𐴁𐴠𐴐𐴞𐴤 𐴔𐴝𐴕𐴥𐴟𐴙𐴐𐴢 𐴃𐴝𐴤𐴑𐴤𐴠𐴊𐴠 𐴎𐴝𐴒𐴝𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴇𐴥𐴝𐴣𐴃𐴞𐴘𐴝𐴌 𐴀𐴠𐴏𐴃𐴠𐴔𐴝𐴓 𐴒𐴡𐴌𐴞𐴥 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴞𐴁𐴡𐴤 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴠𐴐𐴞𐴤 𐴋𐴡𐴌𐴝𐴌 𐴁𐴡𐴓𐴞 𐴈𐴡𐴘𐴧𐴠.



‎𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

‎∆ 𐴃𐴟𐴌𐴑𐴞𐴌 𐴒𐴡𐴀𐴡𐴌𐴔𐴠𐴕𐴠 𐴀𐴝𐴌𐴝𐴑𐴝𐴕𐴡𐴃 𐴊𐴞𐴕𐴡𐴃𐴧𐴟𐴤 𐴊𐴞𐴕𐴠 𐴔𐴝𐴦𐴔𐴠𐴓𐴝 𐴁𐴝𐴌𐴥𐴠𐴌𐴊𐴧𐴠 𐴀𐴞𐴥𐴘𐴝𐴕𐴡𐴌 𐴖𐴡𐴌𐴠 𐴀𐴠𐴓𐴝𐴕 𐴕𐴝𐴔𐴝 𐴕𐴠𐴦𐴓𐴝𐴘𐴧𐴠 𐴱𐴱


‎𐴒𐴢𐴢𐴎𐴡𐴌𐴞 𐴒𐴞𐴘𐴡𐴥𐴘𐴊𐴠 𐴔𐴝𐴐𐴢 𐴓𐴡𐴃𐴞 𐴁𐴡𐴌𐴔𐴥𐴝𐴌 𐴁𐴤𐴟𐴃𐴤𐴡𐴌𐴠 𐴀𐴥𐴟𐴀𐴝𐴃 𐴀𐴝𐴏𐴠𐴥 𐴊𐴠 𐴔𐴝𐴌𐴝 𐴔𐴝𐴌𐴞 𐴁𐴝𐴌𐴞𐴥 𐴎𐴝𐴀𐴝𐴌 𐴀𐴝𐴌 𐴀𐴝𐴌𐴝𐴙𐴓𐴧𐴝 𐴉𐴝𐴌𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴡𐴌 𐴎𐴝𐴕 𐴔𐴝𐴓 𐴉𐴥𐴟𐴌𐴥𐴝𐴘 𐴎𐴝𐴀𐴝 𐴁𐴠𐴐𐴞𐴤 𐴁𐴝𐴌𐴥𐴠𐴌 𐴊𐴧𐴠 𐴀𐴞𐴥𐴘𐴝𐴕𐴡𐴌 𐴖𐴡𐴌𐴠 𐴀𐴝𐴣𐴀𐴝𐴌𐴝 𐴕𐴡𐴎𐴡𐴌 𐴓𐴝𐴒𐴝𐴘 𐴃𐴤𐴝𐴙𐴑𐴧𐴠𐴤 𐴁𐴡𐴓𐴞 𐴃𐴟𐴌𐴑𐴞𐴌 𐴒𐴡𐴀𐴡𐴌𐴔𐴥𐴠𐴕𐴠 𐴈𐴡𐴘𐴧𐴠 || 𐴈𐴥𐴝𐴏𐴢 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕𐴡𐴌 𐴖𐴡𐴌𐴠 𐴎𐴟𐴓𐴥𐴟𐴔 𐴀𐴥𐴡𐴀𐴡𐴌 𐴊𐴧𐴠 𐴀𐴞𐴥𐴘𐴝𐴕 𐴀𐴝𐴌 𐴀𐴝𐴌𐴝𐴑𐴝𐴕𐴡𐴃 𐴀𐴝𐴏𐴥𐴠𐴊𐴠 𐴀𐴡𐴙𐴕𐴧𐴡 𐴑𐴡𐴗𐴔𐴡𐴌 𐴖𐴡𐴌𐴠 𐴁𐴠𐴐𐴝𐴤 𐴁𐴠𐴐𐴞𐴤 𐴎𐴟𐴓𐴥𐴟𐴔 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴇𐴝𐴥𐴎𐴝𐴌 𐴇𐴝𐴥𐴎𐴝𐴌 𐴔𐴝𐴕𐴥𐴟𐴙𐴐𐴢 𐴒𐴡𐴤𐴌 𐴏𐴥𐴝𐴌𐴝𐴥 𐴃𐴤𐴡𐴌 𐴏𐴥𐴝𐴌𐴝𐴥 𐴀𐴡𐴘𐴧𐴠𐴊𐴠 𐴀𐴞𐴥𐴘𐴝𐴕 𐴀𐴝𐴣𐴀𐴝𐴌𐴝 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴉𐴝𐴘 𐴁𐴠𐴐𐴝𐴤 𐴁𐴠𐴐𐴞𐴤 𐴀𐴡𐴐𐴤𐴝𐴕𐴃𐴞 𐴎𐴝𐴇𐴥𐴠𐴌 𐴒𐴡𐴙𐴅𐴧𐴞𐴤 𐴁𐴡𐴓𐴞 𐴃𐴠𐴌𐴌𐴑𐴞𐴌 𐴒𐴡𐴀𐴡𐴌𐴔𐴥𐴠𐴕𐴠 𐴈𐴡𐴘𐴧𐴠𐴥 ||

‎𐴊𐴟𐴕𐴞𐴘𐴝𐴘𐴌 𐴕𐴞𐴘𐴡𐴔 𐴑𐴝𐴕𐴟𐴕 𐴀𐴝𐴌 𐴈𐴥𐴝𐴕𐴝 𐴉𐴞𐴕𐴝𐴌 𐴔𐴡𐴊𐴡𐴃 𐴏𐴡𐴥𐴊𐴡𐴃 𐴒𐴡𐴌𐴥𐴡𐴘𐴧𐴝𐴌 𐴕𐴞𐴘𐴡𐴔 𐴑𐴝𐴕𐴟𐴕𐴡𐴌𐴥𐴠 𐴕𐴡 𐴔𐴝𐴕𐴞 𐴔𐴝𐴌𐴝𐴔𐴝𐴌𐴞 𐴒𐴡𐴌𐴥𐴠𐴌 𐴊𐴧𐴠 𐴋𐴝𐴀𐴝𐴘 𐴊𐴞𐴕𐴞𐴥𐴖𐴝𐴥𐴌𐴠 𐴔𐴝𐴕𐴞 𐴎𐴝𐴙𐴁𐴡𐴓𐴧𐴝𐴥 𐴀𐴝𐴌𐴡𐴏𐴢 𐴒𐴡𐴙𐴅𐴧𐴙𐴤𐴠 𐴁𐴡𐴓𐴞 𐴈𐴡𐴘𐴧𐴠𐴥 || 𐴊𐴠𐴐𐴤𐴡𐴙𐴃𐴧𐴝 𐴀𐴝𐴌 𐴃𐴝𐴌𐴥𐴝𐴌 𐴔𐴟𐴓 𐴎𐴡𐴌𐴟𐴌𐴞 𐴏𐴥𐴝𐴏𐴝𐴔𐴝𐴕 𐴀𐴝𐴌 𐴊𐴧𐴠 𐴒𐴡𐴤𐴌 𐴁𐴝𐴌𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴇𐴠𐴥𐴉𐴝𐴎𐴡𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 | 𐴊𐴠𐴐𐴤𐴡𐴙𐴃𐴧𐴝 𐴌𐴠𐴥 𐴔𐴡𐴅𐴁𐴟𐴌 𐴒𐴡𐴌𐴞𐴥 𐴀𐴠𐴑 𐴎𐴝𐴒𐴝𐴃 𐴎𐴡𐴔𐴝 𐴒𐴡𐴌𐴝𐴥 𐴀𐴝𐴌 𐴎𐴝𐴃 𐴉𐴡𐴌𐴥𐴡𐴑 𐴒𐴡𐴌𐴞𐴥 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴉𐴥𐴡𐴏𐴦𐴝𐴊 𐴉𐴥𐴞𐴃𐴕𐴝 𐴒𐴡𐴌𐴥𐴝𐴃𐴧𐴟 𐴁𐴝𐴏𐴞 𐴃𐴝𐴤𐴑𐴤𐴞 𐴁𐴡𐴓𐴧𐴝 | 𐴈𐴥𐴝𐴕𐴝 𐴉𐴞𐴥𐴕𐴝 𐴔𐴡𐴊𐴡𐴃 𐴏𐴡𐴥𐴊𐴡𐴃 𐴒𐴡𐴌𐴥𐴡𐴘𐴧𐴝 𐴌𐴠𐴥 𐴈𐴡𐴕𐴡𐴥 𐴀𐴡𐴣𐴖𐴏𐴝𐴥 𐴏𐴝𐴥𐴌𐴥𐴝 𐴎𐴝𐴒𐴝 𐴁𐴡𐴎𐴝𐴒𐴝𐴃 𐴎𐴝𐴘 𐴔𐴡𐴊𐴡𐴃 𐴐𐴡𐴤𐴊𐴡𐴃 𐴒𐴡𐴌𐴞𐴥 𐴉𐴝𐴌𐴞𐴁𐴤𐴡𐴓𐴧𐴝 𐴔𐴡𐴖𐴑𐴝 𐴊𐴞𐴀𐴞 𐴁𐴡𐴓𐴧𐴝𐴥 𐴃𐴟𐴌𐴑𐴞𐴌 𐴒𐴡𐴀𐴡𐴌𐴔𐴠𐴕𐴠 𐴈𐴡𐴘𐴧𐴠𐴥