𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴡𐴌 𐴔𐴝𐴎𐴤𐴠 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴇𐴥𐴝𐴓𐴡𐴃𐴡𐴃 𐴀𐴝𐴏𐴥𐴠 𐴱𐴱

𐴔𐴡𐴚𐴋𐴤𐴟 𐴈𐴝𐴖𐴧𐴝𐴌 𐴁𐴞𐴓𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴤𐴡𐴃 𐴱 𐴔𐴠 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴏𐴥𐴡 𐴊𐴞𐴕 𐴓𐴝𐴒𐴝𐴃𐴝𐴌 , 𐴀𐴠𐴕𐴋𐴞𐴓𐴧𐴝 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴀𐴝𐴌 𐴈𐴝𐴍𐴝 𐴔𐴝𐴌𐴝 𐴁𐴡𐴓𐴡𐴃𐴑𐴝𐴌𐴞𐴌 𐴐𐴤𐴞𐴑𐴝𐴌 𐴀𐴥𐴟𐴀𐴝𐴃 𐴀𐴝𐴏𐴥𐴠 , 𐴎𐴞𐴀𐴞𐴕𐴡𐴌𐴥𐴠 𐴁𐴡𐴘𐴝𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴎𐴟𐴁𐴝𐴕 𐴕𐴥𐴝𐴘 𐴀𐴝𐴌 𐴓𐴠𐴑𐴤𐴞 𐴁𐴤𐴡𐴓𐴧𐴝 𐴓𐴡𐴉𐴎𐴤𐴡 𐴕𐴥𐴝𐴘 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴠𐴂𐴟𐴄 𐴔𐴡𐴎𐴞𐴕 𐴈𐴝𐴖𐴧𐴝𐴌 𐴁𐴞𐴓 𐴐𐴤𐴡𐴣𐴀𐴡 𐴀𐴝𐴃𐴡𐴌 𐴈𐴝𐴣𐴏𐴥𐴡𐴌 𐴉𐴝𐴌𐴝 𐴁𐴠𐴒𐴧𐴤𐴞𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴤𐴠𐴌𐴖𐴝 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 , 𐴈𐴥𐴝𐴕𐴝 𐴀𐴝𐴌 𐴊𐴝𐴁𐴝𐴘 𐴐𐴤𐴡𐴣𐴀𐴡 𐴈𐴡𐴕𐴥𐴡 𐴔𐴟𐴓 𐴎𐴡𐴌𐴟𐴌𐴞 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴉𐴝𐴌𐴝 𐴀𐴥𐴞𐴀𐴞𐴕𐴡𐴃 𐴒𐴤𐴡𐴙𐴓𐴃𐴡 𐴒𐴤𐴡𐴓𐴝𐴘𐴃𐴡 𐴕𐴡 𐴊𐴠𐴀𐴠𐴌 , 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴁𐴤𐴟𐴑𐴧𐴠 𐴔𐴡𐴗𐴃𐴡𐴌 𐴉𐴡𐴣𐴃𐴤𐴡𐴃 𐴀𐴝𐴌 𐴑𐴠𐴙𐴏𐴧𐴥𐴟 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔𐴡𐴌 𐴏𐴝𐴑𐴧𐴝𐴃 𐴉𐴞𐴐𐴤𐴝𐴃 𐴀𐴝𐴏𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴥𐴠 𐴉𐴝𐴌𐴝 𐴀𐴥𐴞𐴀𐴞𐴕𐴡𐴌 𐴀𐴝𐴃𐴌𐴝𐴉𐴡𐴃 𐴊𐴠𐴈𐴥𐴝 𐴎𐴝𐴀𐴝𐴌 𐴊𐴠 𐴔𐴡𐴌𐴝 𐴓𐴡𐴐𐴢 𐴀𐴥𐴡𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴀𐴡𐴕𐴡𐴌𐴥𐴝 𐴁𐴟𐴎𐴤𐴞 𐴉𐴝𐴌𐴞𐴁𐴤𐴝 , 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴥𐴠 𐴉𐴝𐴌𐴝𐴃 𐴈𐴡𐴕𐴋𐴞𐴓𐴧𐴝 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌𐴊𐴧𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴵 𐴴 𐴇𐴥𐴝𐴎𐴝𐴌 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴊𐴤𐴝𐴘 𐴎𐴝𐴀𐴝 𐴒𐴤𐴡𐴘 𐴉𐴡𐴌𐴠𐴌 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴔𐴡𐴒𐴢 𐴁𐴝𐴒𐴢 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴔𐴝𐴎𐴤𐴠 𐴏𐴡𐴓𐴠𐴌𐴊𐴧𐴠 𐴓𐴝𐴌𐴥𐴘𐴌 𐴎𐴡𐴌𐴞𐴘𐴝 𐴵 𐴴 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌𐴝 𐴉𐴝𐴌𐴝 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴌𐴠𐴌 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴋𐴡𐴣𐴀𐴡𐴌 𐴎𐴞𐴔𐴧𐴝𐴊𐴝𐴌𐴡𐴌 𐴀𐴡𐴉𐴥𐴞𐴏𐴡𐴃𐴧𐴟 𐴈𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 / 𐴀𐴠𐴓𐴞𐴎𐴝 𐴁𐴤𐴠𐴄 𐴏𐴠𐴌𐴠𐴂𐴢 𐴏𐴥𐴠𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴒𐴡𐴃𐴡 𐴈𐴡𐴀𐴠𐴑 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴤𐴟𐴏𐴞𐴊𐴡𐴚 𐴀𐴝𐴌 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃𐴧𐴤𐴟 , 𐴓𐴝𐴌𐴥𐴝𐴘𐴌 𐴀𐴡𐴐𐴤𐴝𐴕𐴃𐴞𐴌 𐴎𐴡𐴌𐴞𐴘𐴝 𐴒𐴤𐴡𐴌 𐴁𐴝𐴌𐴞 𐴊𐴤𐴡𐴕 𐴊𐴡𐴖𐴓𐴡𐴃 𐴉𐴥𐴠𐴓𐴥𐴝𐴘 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴖𐴋𐴝𐴌 𐴕𐴝𐴉𐴢 𐴊𐴡𐴅𐴧𐴙𐴝𐴌 𐴈𐴝𐴣𐴏𐴝𐴃 𐴀𐴝𐴀𐴝𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴎𐴡𐴌 𐴒𐴤𐴡𐴌𐴡𐴃𐴧𐴟 𐴕𐴦𐴠𐴓𐴝𐴘 𐴊𐴞𐴀𐴞 𐴁𐴦𐴝𐴊𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴟𐴙𐴓𐴧𐴡𐴔𐴝𐴕 𐴏𐴥𐴝𐴔𐴝𐴕 𐴒𐴤𐴞𐴕 𐴓𐴡𐴘 𐴁𐴦𐴝𐴊𐴠 𐴉𐴝𐴌𐴝 𐴄𐴤𐴞𐴘𐴝 𐴎𐴝𐴓𐴞 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴑𐴡𐴂𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴋𐴡𐴣𐴀𐴡𐴌 𐴎𐴞𐴔𐴧𐴝𐴊𐴝𐴌𐴡𐴌 𐴀𐴡𐴉𐴥𐴞𐴏𐴡𐴌 𐴱 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴀𐴡𐴉𐴥𐴞𐴏𐴡𐴌 𐴁𐴡𐴌𐴡 / 𐴅𐴤𐴞𐴔𐴏𐴢 𐴌𐴟𐴋𐴤𐴠𐴁𐴝 𐴘𐴠 , 𐴒𐴟𐴌𐴟𐴋𐴤𐴟𐴃𐴧𐴟 𐴓𐴡𐴘𐴧𐴥𐴠𐴊𐴠 𐴉𐴡𐴄𐴤𐴟 , 𐴀𐴞𐴕𐴄𐴝𐴌𐴕𐴥𐴠𐴄𐴡𐴃 𐴉𐴝𐴘𐴧𐴥𐴠𐴊𐴠 𐴉𐴡𐴄𐴤𐴟 𐴀𐴝𐴌 𐴁𐴞𐴋𐴞𐴘𐴟 𐴀𐴥𐴡𐴑𐴧𐴡𐴓 𐴔𐴡𐴎𐴞𐴕 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴎𐴝𐴓𐴞 𐴉𐴟𐴌𐴞 𐴏𐴥𐴝𐴘 𐴁𐴝𐴕𐴝𐴘 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴊𐴟𐴕𐴞𐴘𐴝𐴘𐴌 𐴔𐴟𐴀𐴟𐴕𐴃𐴟 𐴁𐴠𐴈𐴡𐴏𐴥𐴟𐴌 𐴏𐴥𐴝𐴁𐴟𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴊𐴟𐴕𐴞𐴘𐴝𐴘𐴌 𐴊𐴤𐴡𐴌𐴥𐴝 𐴀𐴝𐴌 𐴏𐴞𐴁𐴡𐴃𐴧𐴤𐴟𐴕 𐴁𐴝𐴏𐴞 𐴁𐴤𐴡𐴓𐴧𐴝 , 𐴇𐴥𐴞𐴕𐴊𐴟𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴥𐴝𐴣𐴃𐴞𐴘𐴝𐴌𐴡𐴌 𐴎𐴟𐴌𐴠 𐴔𐴡𐴒𐴤𐴡𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴊𐴠𐴀𐴠𐴌𐴊𐴧𐴠𐴌 , 𐴔𐴡𐴒𐴢 𐴀𐴥𐴡𐴑𐴧𐴡𐴓𐴡𐴌𐴠 𐴔𐴝𐴌𐴠𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 , 𐴁𐴝𐴕𐴡𐴄𐴞 𐴁𐴞𐴋𐴞𐴘𐴟 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘 𐴁𐴝𐴕𐴝𐴘 𐴏𐴟𐴆𐴠𐴓 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴃 𐴏𐴥𐴝𐴁𐴟𐴃 𐴀𐴥𐴞𐴏𐴝𐴉𐴠 𐴃𐴟𐴓𐴥𐴠𐴌 𐴊𐴧𐴠 𐴊𐴠𐴈𐴥𐴝 𐴎𐴝𐴀𐴝𐴌 , 𐴀𐴥𐴞𐴀𐴞𐴕 𐴁𐴝𐴊𐴠 𐴒𐴟𐴌𐴥𐴝𐴃𐴧𐴟 𐴒𐴝𐴏𐴢 𐴈𐴝𐴍𐴞 𐴁𐴦𐴝𐴊𐴠 𐴀𐴝𐴒𐴝𐴃𐴧𐴤𐴟 𐴉𐴝𐴕𐴞 𐴊𐴠𐴀𐴠 𐴉𐴥𐴝𐴀𐴝𐴕 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴔𐴡𐴊𐴡𐴊 𐴒𐴡𐴌𐴥𐴠𐴌 𐴊𐴧𐴠 , 𐴈𐴥𐴝𐴕𐴝 𐴉𐴝𐴕𐴥𐴞 𐴊𐴠𐴀𐴠𐴌 𐴊𐴧𐴠 𐴀𐴥𐴞𐴕𐴋𐴞𐴓𐴧𐴝 𐴁𐴞𐴋𐴞𐴘𐴟 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘 𐴁𐴝𐴕𐴝𐴘 𐴘𐴥𐴡 𐴏𐴟𐴆𐴠𐴓 𐴔𐴞𐴋𐴞𐴘𐴝𐴃 𐴃𐴟𐴓𐴥𐴠𐴌 , 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 𐴁𐴝𐴚𐴓𐴝𐴊𐴠𐴐𐴤𐴡𐴌 𐴃𐴟𐴌𐴥𐴟 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴡𐴚 𐴒𐴤𐴡𐴓𐴝𐴘 , 𐴊𐴤𐴡𐴌𐴔𐴡 𐴓𐴝𐴙𐴕𐴡𐴌 𐴌𐴟𐴇𐴝𐴙𐴚𐴒𐴙𐴝𐴌 𐴔𐴟𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴡𐴌 𐴀𐴥𐴝𐴃𐴝 , 𐴀𐴝𐴣𐴀𐴝𐴌𐴝𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴟𐴓𐴥𐴟𐴔 𐴕𐴥𐴡 𐴒𐴡𐴌𐴥𐴠 𐴀𐴝𐴌 𐴕𐴡 𐴒𐴡𐴌𐴥𐴠𐴌 , 𐴀𐴝𐴣𐴀𐴝𐴌𐴝𐴌 𐴒𐴤𐴡𐴌 𐴉𐴟𐴌𐴝 𐴕𐴥𐴡 𐴊𐴠𐴀𐴠 𐴁𐴤𐴡𐴓𐴑𐴤𐴞 𐴀𐴝𐴣𐴀𐴝𐴌𐴝𐴌𐴥𐴠 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴙𐴓𐴧𐴙𐴠 𐴊𐴠 𐴀𐴥𐴞𐴃𐴝𐴌𐴝 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝 𐴉𐴟𐴌𐴝 𐴊𐴞𐴘𐴥𐴠𐴊𐴠 𐴀𐴝𐴌 𐴎𐴟𐴓𐴥𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 , 𐴈𐴟𐴀𐴥𐴝𐴘 𐴁𐴤𐴡𐴓𐴧𐴝 𐴁𐴠𐴐𐴤𐴞 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴊𐴝𐴓𐴡𐴃𐴠 𐴉𐴥𐴝𐴘𐴏𐴠𐴓𐴝 𐴉𐴥𐴟𐴕𐴝𐴘 𐴀𐴠𐴑 𐴊𐴞𐴕 𐴁𐴦𐴝𐴊𐴠 𐴀𐴥𐴟𐴊𐴧𐴤𐴝 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴦𐴝𐴓𐴡𐴔𐴞 𐴀𐴝𐴊𐴝𐴓𐴡𐴃𐴠 𐴓𐴝𐴌𐴥𐴝𐴘 𐴁𐴡𐴕 𐴒𐴡𐴌𐴥𐴞𐴁𐴤𐴝𐴌 𐴀𐴝𐴌 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴎𐴡𐴁𐴞𐴕𐴞 𐴉𐴥𐴡𐴖𐴅𐴞 𐴑𐴝𐴌𐴖𐴝𐴘 𐴈𐴥𐴡𐴃𐴡𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴉𐴥𐴝𐴘𐴏𐴠𐴓𐴝 𐴉𐴥𐴟𐴕𐴝𐴘 𐴀𐴠𐴑 𐴊𐴞𐴕 𐴁𐴦𐴝𐴊𐴠 𐴀𐴥𐴟𐴊𐴧𐴤𐴝 , 𐴐𐴤𐴡𐴕𐴞 𐴁𐴝𐴌𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌 𐴐𐴤𐴡𐴣𐴀𐴡 𐴒𐴤𐴡𐴎𐴧𐴝𐴌 𐴁𐴡𐴀𐴡𐴃 𐴎𐴝𐴒𐴝𐴃 𐴀𐴞𐴏𐴌𐴦𐴝𐴙𐴓𐴠 𐴁𐴟𐴔𐴁𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴦𐴝𐴓𐴡𐴔𐴞 𐴀𐴝𐴊𐴝𐴓𐴡𐴃𐴠 𐴔𐴞𐴏𐴥𐴞𐴌 𐴀𐴝𐴌 𐴒𐴤𐴡𐴎𐴧𐴝𐴌 𐴊𐴡𐴌𐴔𐴞𐴘𐴝𐴕𐴡𐴌 𐴌𐴡𐴉𐴥𐴝 𐴁𐴡𐴖𐴋𐴝𐴌 𐴑𐴤𐴟𐴓𐴝 𐴌𐴝𐴑𐴤𐴞𐴁𐴤𐴡𐴓𐴧𐴝 𐴘𐴥𐴡 𐴇𐴥𐴡𐴑𐴟𐴔 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 𐴇𐴝𐴔𐴦𐴝𐴏𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴌 𐴁𐴝𐴁𐴡𐴃𐴠 𐴀𐴦𐴝𐴓𐴡𐴔𐴞 𐴀𐴝𐴊𐴝𐴓𐴡𐴃𐴡𐴌 𐴉𐴥𐴝𐴘𐴏𐴠𐴓𐴝𐴌𐴥𐴠 𐴏𐴥𐴟𐴖𐴝𐴒𐴡𐴃 𐴒𐴡𐴙𐴅𐴧𐴤𐴙𐴠 , 𐴔𐴡𐴕𐴃𐴡𐴌 𐴉𐴥𐴝𐴘𐴏𐴠𐴓𐴝 𐴕𐴝𐴔𐴝𐴃 𐴒𐴤𐴡𐴎𐴧𐴝𐴌 𐴀𐴡𐴙𐴕𐴧𐴡 𐴀𐴥𐴞𐴏𐴧𐴝𐴌𐴥𐴠 𐴕𐴥𐴡 𐴒𐴤𐴡𐴓𐴝𐴊𐴠 𐴘𐴥𐴝𐴀𐴝𐴕𐴡𐴃 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴠𐴏𐴂𐴞𐴕𐴠 𐴌𐴡𐴉𐴥𐴝𐴌 𐴁𐴝𐴁𐴡𐴃𐴠 𐴀𐴦𐴝𐴓𐴡𐴔𐴞 𐴀𐴝𐴊𐴝𐴓𐴡𐴃𐴡𐴌 𐴉𐴥𐴝𐴘𐴏𐴠𐴓𐴝 𐴔𐴝𐴕𐴞 𐴁𐴤𐴡𐴓𐴧𐴝 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴈𐴡𐴘𐴧𐴥𐴠 𐴱𐴱

𐴀𐴠𐴏𐴂𐴞𐴕 𐴇𐴥𐴡𐴑𐴟𐴔𐴡𐴃𐴠 𐴔𐴠 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 , 𐴀𐴦𐴝𐴓𐴡𐴔𐴞 𐴀𐴝𐴊𐴝𐴓𐴡𐴃𐴠 𐴔𐴠 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴉𐴥𐴟𐴕𐴝𐴘 𐴊𐴞𐴘𐴥𐴠𐴊𐴠 𐴉𐴥𐴝𐴘𐴏𐴠𐴓𐴝 𐴇𐴥𐴡𐴑𐴟𐴔 𐴔𐴝𐴕𐴞𐴘𐴡𐴌𐴥𐴠 , 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴁𐴟𐴔𐴁𐴝𐴌𐴞 𐴒𐴡𐴌𐴥𐴝 𐴀𐴝𐴌 𐴎𐴡𐴁𐴞𐴕𐴞 𐴉𐴥𐴡𐴖𐴅𐴞 𐴑𐴝𐴌𐴖𐴝𐴘 , 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴁𐴡𐴕 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴦𐴝𐴓𐴡𐴔𐴞 𐴀𐴝𐴊𐴝𐴓𐴡𐴃𐴠 𐴒𐴤𐴟𐴐𐴕𐴝 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴇𐴃𐴞𐴘𐴝𐴃𐴞 𐴀𐴟𐴉𐴥𐴝𐴘 𐴔𐴝𐴕𐴞 𐴌𐴡𐴉𐴥𐴝𐴃 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴥𐴟𐴔 𐴁𐴡𐴕 𐴒𐴡𐴌𐴥𐴞 , 𐴀𐴝𐴌 𐴔𐴟𐴓 𐴓𐴝𐴌𐴥𐴝𐴘 𐴁𐴡𐴕 𐴒𐴡𐴌𐴥𐴞 𐴈𐴡𐴊𐴞 𐴀𐴥𐴡𐴑𐴧𐴡𐴓𐴡𐴌 𐴁𐴡𐴊𐴡𐴓𐴝 𐴁𐴡𐴊𐴡𐴓𐴞 𐴒𐴡𐴌𐴥𐴞 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴀𐴥𐴡𐴑𐴧𐴡𐴓 𐴒𐴤𐴡𐴎𐴧𐴝𐴃 𐴒𐴤𐴡𐴓𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴀𐴝𐴌 𐴒𐴤𐴡𐴎𐴧𐴝𐴌 𐴔𐴝𐴙𐴕𐴐𐴤𐴡𐴌 𐴊𐴟𐴑 𐴀𐴡𐴐𐴤𐴝𐴕𐴃𐴞 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘 𐴁𐴤𐴡𐴓𐴧𐴝 , 𐴀𐴠𐴏𐴂𐴞𐴕𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴅𐴤𐴡𐴏𐴢 𐴔𐴝𐴕𐴙𐴟𐴓 𐴀𐴝𐴓𐴁𐴤𐴝𐴌𐴏𐴠 , 𐴀𐴥𐴞𐴁𐴤𐴝𐴌 𐴄𐴗𐴠𐴄𐴝𐴌 𐴀𐴠𐴑𐴤𐴡𐴕𐴡𐴃 𐴓𐴠𐴙𐴑𐴧𐴤𐴙𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱