𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴁𐴤𐴝𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴎𐴡𐴌 𐴉𐴝𐴌𐴝𐴃 𐴎𐴝𐴘𐴃𐴡 𐴕𐴡 𐴊𐴞𐴀𐴞 𐴁𐴦𐴝𐴊𐴠 , 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴃 𐴐𐴤𐴞𐴚𐴒𐴝𐴃 𐴑𐴟𐴣𐴌𐴥𐴞 𐴒𐴤𐴡𐴓𐴞 𐴏𐴥𐴝𐴏𐴝𐴔𐴝𐴕 𐴏𐴟𐴌 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴁𐴤𐴟𐴃𐴤𐴡𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 , 𐴇𐴥𐴝𐴣𐴃 𐴇𐴥𐴝𐴎𐴝𐴌 𐴰 𐴰 𐴰 𐴷 𐴓𐴡𐴃𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴕𐴞𐴎𐴡𐴌 𐴉𐴝𐴌𐴝 𐴏𐴥𐴝𐴌𐴥𐴞 𐴓𐴝𐴌𐴥𐴝𐴘 𐴈𐴡𐴔 𐴏𐴡𐴓𐴠𐴌 𐴊𐴧𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴀𐴝𐴌 𐴄𐴡𐴀𐴡𐴕𐴡𐴌 𐴁𐴤𐴟𐴃𐴡𐴌𐴠 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴖𐴝𐴉𐴠𐴏𐴢 𐴕𐴞𐴎𐴡𐴌 𐴉𐴝𐴌𐴝𐴃 𐴒𐴤𐴡𐴌𐴡𐴃 𐴎𐴝𐴘𐴃𐴡 𐴕𐴡 𐴊𐴞𐴀𐴞 𐴁𐴦𐴝𐴊𐴠 𐴐𐴤𐴞𐴚𐴒𐴝𐴣𐴃 𐴑𐴟𐴣𐴌𐴥𐴞 𐴒𐴤𐴡𐴌𐴡𐴃 𐴒𐴤𐴡𐴓𐴞 , 𐴀𐴥𐴝𐴣𐴐𐴢 𐴑𐴟𐴌𐴥𐴝 , 𐴒𐴡𐴌𐴟 𐴏𐴥𐴡𐴀𐴡𐴓 , 𐴏𐴡𐴙𐴓 𐴊𐴤𐴝𐴕 𐴀𐴝𐴌 𐴀𐴡𐴙𐴕𐴧𐴡 𐴏𐴥𐴝𐴏𐴝𐴔𐴝𐴕 𐴁𐴠𐴒𐴧𐴤𐴞𐴕 𐴏𐴟𐴌 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 , 𐴔𐴡𐴚𐴋𐴤𐴟 𐴁𐴤𐴝𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴤𐴟𐴏𐴞𐴊𐴡𐴚𐴡𐴌 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴉𐴠𐴌𐴠𐴐𐴝𐴕𐴞 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴁𐴤𐴟𐴏𐴞𐴊𐴡𐴚𐴡𐴌 𐴀𐴠𐴓𐴝𐴑𐴝𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴀𐴥𐴡𐴘𐴧𐴠𐴊𐴠 𐴇𐴥𐴝𐴓𐴡𐴃𐴡𐴌 𐴁𐴝𐴁𐴡𐴃𐴠 , 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕𐴞 𐴀𐴡𐴐𐴤𐴝𐴕𐴃𐴞 𐴁𐴤𐴟𐴒𐴢 𐴒𐴡𐴌𐴥𐴠𐴌 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴘𐴠 , 𐴔𐴠 𐴔𐴝𐴐𐴤𐴡𐴌 𐴱 𐴲 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴠 , 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴑𐴡𐴗𐴔𐴞 𐴉𐴥𐴡𐴏𐴦𐴝𐴊 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴎𐴝𐴕𐴞 𐴉𐴥𐴟𐴕𐴞 𐴔𐴡𐴑𐴏𐴥𐴡𐴊 𐴓𐴡𐴘 , 𐴔𐴡𐴒𐴢 𐴀𐴝𐴌 𐴇𐴥𐴞𐴕𐴊𐴟 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴉𐴟𐴌𐴝 𐴊𐴞𐴘𐴥𐴠 , 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴁𐴟𐴔 𐴔𐴝𐴙𐴅𐴧𐴤𐴙𐴠 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴠𐴏𐴃𐴠𐴔𐴝𐴓 𐴒𐴡𐴙𐴅𐴧𐴤𐴙𐴠 , 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴑𐴡𐴗𐴔 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴎𐴡𐴌 𐴎𐴝𐴒𐴝 𐴀𐴝𐴌 𐴉𐴝𐴌𐴝𐴃𐴧𐴤𐴟 𐴓𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 , 𐴒𐴤𐴡𐴌 𐴁𐴝𐴌𐴞 𐴀𐴥𐴡𐴑𐴧𐴡𐴓 𐴁𐴡𐴌𐴁𐴝𐴊 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 , 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 , 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴈𐴡𐴃𐴡 𐴔𐴝𐴕𐴥𐴟𐴙𐴐𐴢 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴀𐴝𐴌 𐴒𐴤𐴝𐴙𐴓 𐴒𐴡𐴙𐴅𐴧𐴤𐴙𐴠 , 𐴀𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞𐴌 𐴁𐴝𐴁𐴡𐴃𐴠 , ( 𐴀𐴠𐴕 𐴘𐴟 𐴅𐴞 ) 𐴁𐴠𐴐𐴤𐴞 𐴏𐴞𐴕𐴃𐴝𐴃 𐴀𐴝𐴌 𐴉𐴠𐴌𐴠𐴐𐴝𐴕 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴊𐴤𐴝𐴘 𐴒𐴞𐴘𐴥𐴡𐴘𐴊𐴠 𐴰 𐴰 𐴵 𐴳 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴤𐴟𐴏𐴞𐴊𐴡𐴚𐴡𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴓𐴟𐴖𐴝𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃 𐴀𐴥𐴡𐴀𐴡𐴌 𐴊𐴧𐴠 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴡𐴃𐴧𐴤𐴟 𐴁𐴝𐴏𐴞𐴁𐴤𐴡𐴓𐴧𐴝 , 𐴄𐴡𐴀𐴡𐴕𐴡𐴃𐴧𐴤𐴟 𐴕𐴦𐴠𐴓𐴞 𐴊𐴤𐴝𐴘 𐴁𐴤𐴟𐴏𐴞𐴊𐴡𐴚𐴡𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴓𐴟𐴖𐴝𐴘 𐴃𐴤𐴝𐴙𐴑𐴧𐴙𐴠 , 𐴀𐴝𐴌 𐴑𐴠𐴙𐴏𐴧𐴥𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴓𐴟𐴖𐴝𐴘 𐴌𐴡𐴘𐴧𐴥𐴠 𐴀𐴝𐴌 𐴑𐴠𐴙𐴏𐴧𐴥𐴟 𐴈𐴡𐴍𐴥𐴠 𐴒𐴞𐴘𐴥𐴠 𐴈𐴥𐴡𐴁𐴡𐴌 𐴀𐴥𐴟𐴊𐴧𐴤𐴝 𐴕𐴥𐴝𐴘 , 𐴔𐴠 𐴔𐴝𐴐𐴤𐴡𐴌 𐴷 𐴱 – 𐴸 𐴱 𐴃𐴝𐴌𐴥𐴞𐴑𐴡𐴃 𐴁𐴤𐴟𐴏𐴞𐴊𐴡𐴚 𐴉𐴟𐴌𐴝 𐴉𐴟𐴌𐴞 𐴁𐴦𐴝𐴊𐴠 , 𐴔𐴠 𐴔𐴝𐴐𐴤𐴡𐴌 𐴹 𐴱 – 𐴰 𐴲 𐴃𐴝𐴌𐴥𐴞𐴑𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴄𐴡𐴀𐴡𐴕𐴡𐴃𐴧𐴟 𐴕𐴦𐴠𐴓𐴞 𐴊𐴤𐴝𐴘 , 𐴁𐴤𐴟𐴏𐴞𐴊𐴡𐴚𐴡𐴌 𐴀𐴟𐴃𐴧𐴡𐴌𐴠 𐴔𐴥𐴞𐴚𐴒𐴞𐴎𐴞 , 𐴕𐴝𐴌𐴝𐴙𐴚 𐴆𐴤𐴙𐴡𐴚 𐴀𐴝𐴌 𐴑𐴤𐴞𐴕𐴞𐴏𐴞 , 𐴉𐴝𐴌𐴝 𐴀𐴞𐴀𐴞𐴕𐴡𐴃 𐴎𐴝𐴘 𐴰 𐴰 𐴵 𐴳 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴓𐴟𐴖𐴝𐴘𐴧𐴥𐴠 𐴒𐴤𐴡𐴘 , 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴉𐴡𐴣𐴃𐴤𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 , 𐴀𐴥𐴞𐴃𐴝𐴌𐴝𐴃𐴧𐴤𐴟 𐴄𐴞𐴛𐴝 𐴀𐴝𐴌 𐴊𐴝𐴔𐴞 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴞𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 , 𐴇𐴥𐴝𐴃𐴧𐴑𐴤𐴞 𐴕𐴟𐴖𐴝 𐴀𐴝𐴌 𐴏𐴥𐴝𐴉𐴢 𐴔𐴞𐴑𐴧𐴙𐴝 𐴉𐴞𐴣𐴊𐴡𐴕𐴡𐴃 𐴀𐴝𐴏𐴥𐴠𐴊𐴠 𐴓𐴡𐴚𐴒𐴞 𐴁𐴝𐴎𐴟 𐴀𐴥𐴟𐴊𐴧𐴤𐴝 𐴑𐴤𐴟𐴣𐴖𐴝𐴛 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴏𐴥𐴞𐴚𐴒𐴝𐴉𐴟𐴌𐴞 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴡𐴌 𐴏𐴡𐴓𐴝 𐴁𐴠𐴃𐴝𐴓 𐴀𐴥𐴡𐴀𐴡𐴕𐴠 𐴉𐴝𐴐𐴤𐴞𐴕𐴊𐴝𐴌 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴰 𐴳 𐴎𐴡𐴕 𐴒𐴤𐴝𐴙𐴓 𐴱𐴱

𐴓𐴡𐴕𐴋𐴤𐴡𐴕𐴡𐴌 𐴇𐴥𐴞𐴃𐴡𐴌𐴟 𐴇𐴥𐴝𐴁𐴝𐴌 𐴔𐴝𐴍𐴥𐴡𐴃𐴧𐴟 𐴱 𐴱 𐴲 𐴎𐴡𐴕 𐴔𐴟𐴏𐴦𐴝𐴉𐴠𐴌 𐴓𐴡𐴘 𐴏𐴥𐴞𐴚𐴒𐴝𐴉𐴟𐴌 𐴎𐴡𐴀𐴡𐴙𐴕𐴧𐴝 𐴉𐴝𐴐𐴤𐴞𐴕𐴊𐴝𐴌𐴞 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 , 𐴇𐴥𐴝𐴁𐴝𐴌 𐴖𐴡𐴌𐴠 𐴔𐴟𐴀𐴟𐴏𐴡𐴔𐴡𐴌 𐴈𐴥𐴡𐴌𐴝𐴁𐴞𐴌 𐴎𐴡𐴌𐴞𐴘𐴝 𐴀𐴝𐴃𐴤𐴞𐴑𐴧𐴙𐴝 𐴀𐴟𐴓𐴋𐴞 𐴉𐴟𐴓𐴋𐴞 𐴕𐴝𐴄 𐴈𐴥𐴝𐴀𐴝𐴌 , 𐴎𐴞𐴘𐴥𐴝𐴕𐴡𐴌 𐴏𐴥𐴡𐴁𐴡𐴁𐴠 𐴊𐴡𐴌𐴥𐴡 𐴔𐴡𐴌𐴥𐴡 𐴅𐴤𐴝𐴄𐴑𐴝 𐴉𐴡𐴌𐴡𐴕𐴡𐴌 𐴎𐴡𐴌𐴞𐴘𐴝 , 𐴉𐴝𐴐𐴤𐴞𐴕𐴊𐴝𐴌 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴰 𐴳 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴀𐴡𐴕𐴠 , 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴤𐴝𐴃 𐴄𐴤𐴝𐴘𐴓𐴥𐴠𐴕𐴡𐴌 𐴁𐴠𐴚𐴑𐴤𐴡𐴑 𐴇𐴥𐴝𐴁𐴝𐴌 𐴔𐴝𐴍𐴥𐴡𐴃 𐴓𐴝𐴔𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴅𐴡𐴕𐴞𐴕𐴡𐴃 𐴉𐴥𐴡𐴓𐴡𐴏𐴃𐴞𐴕𐴞 𐴋𐴝𐴑𐴄𐴡𐴌 𐴐𐴤𐴡𐴣𐴀𐴡 𐴇𐴥𐴝𐴣𐴃 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴉𐴥𐴡𐴓𐴡𐴏𐴞𐴃𐴞𐴕𐴞 𐴀𐴠𐴓𐴝𐴑𐴝 𐴖𐴥𐴞𐴏𐴄 𐴁𐴤𐴠𐴚𐴡𐴌 𐴅𐴡𐴕𐴞𐴕 𐴐𐴤𐴡𐴀𐴡𐴌𐴡𐴃 𐴀𐴝𐴏𐴥𐴠𐴊𐴠 , 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴟𐴒𐴧𐴤𐴗𐴝𐴃 𐴔𐴠 𐴔𐴝𐴐𐴤𐴡𐴌 𐴱 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴇𐴥𐴝𐴔𐴓𐴝 𐴒𐴡𐴌𐴥𐴞 , 𐴀𐴠𐴑 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴋𐴝𐴑𐴄𐴡𐴌 𐴐𐴤𐴡𐴣𐴀𐴡 𐴇𐴥𐴝𐴣𐴃 𐴎𐴡𐴕 𐴉𐴥𐴡𐴓𐴡𐴏𐴞𐴃𐴞𐴕𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴀𐴝𐴌 𐴕𐴡 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴉𐴥𐴡𐴓𐴡𐴏𐴃𐴞𐴕𐴞 𐴏𐴠𐴇𐴥𐴠𐴃𐴡𐴌 𐴋𐴞𐴂𐴦𐴝𐴌𐴔𐴥𐴠𐴕𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱