𐴁𐴤𐴟𐴏𐴞𐴊𐴡𐴚𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴥𐴞𐴃𐴞𐴕 𐴀𐴥𐴡 𐴊𐴟𐴘 𐴐𐴤𐴡𐴃 𐴌𐴟𐴇𐴝𐴙𐴚𐴒𐴙𐴝 𐴁𐴝𐴏𐴝𐴘 𐴌𐴝𐴙𐴑𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴓𐴝𐴌𐴥𐴝𐴘𐴌 𐴁𐴤𐴟𐴃𐴤𐴡𐴌𐴠 𐴃𐴤𐴝𐴑𐴤𐴞 𐴊𐴟𐴘 𐴐𐴤𐴡𐴃 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴀𐴝𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴥𐴠 , 𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴑𐴠𐴂𐴧𐴟𐴌𐴟 𐴊𐴤𐴡𐴚 , 𐴃𐴝𐴙𐴔𐴧𐴥𐴡𐴚 𐴈𐴥𐴝𐴓𐴞 , 𐴕𐴝𐴙𐴑𐴧𐴡𐴕 𐴊𐴤𐴡𐴚 , 𐴉𐴝𐴌𐴝 𐴀𐴞𐴀𐴞𐴕𐴡𐴃 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 , 𐴶 𐴶 𐴱 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴉𐴝𐴀𐴝𐴌𐴡𐴌 𐴁𐴤𐴟𐴃𐴤𐴡𐴌𐴠 𐴉𐴡𐴌𐴝𐴕𐴡 𐴊𐴡𐴣𐴀𐴡𐴏𐴠 𐴒𐴤𐴡𐴓𐴧𐴞𐴀𐴞𐴓 𐴒𐴤𐴡𐴘 , 𐴀𐴥𐴞𐴃𐴤𐴝𐴌𐴝𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴦𐴡𐴃 𐴉𐴝𐴘 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴔𐴡𐴊𐴡𐴊 𐴐𐴤𐴡𐴣𐴊𐴡𐴊 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴟𐴀𐴟𐴕 𐴁𐴦𐴝𐴊𐴠 𐴘𐴥𐴡 𐴁𐴤𐴟𐴏𐴞𐴊𐴡𐴚 𐴁𐴟𐴕𐴘𐴝𐴊𐴞 ( 𐴑𐴤𐴝 𐴔𐴥𐴝 𐴌𐴥𐴝 – 𐴳 𐴵 𐴳 ) 𐴓𐴡𐴔𐴁𐴤𐴡𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴒𐴤𐴝𐴣𐴄𐴞 𐴌𐴥𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴌𐴥𐴝𐴘 𐴒𐴡𐴌𐴥𐴞 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 , 𐴔𐴠𐴓𐴠𐴄𐴠𐴌𐴞 𐴘𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴁𐴝𐴕𐴝𐴘 𐴁𐴤𐴡𐴓𐴧𐴝 ( 𐴑𐴤𐴝 𐴔𐴥𐴝 𐴌𐴥𐴝 – 𐴳 𐴵 𐴳 ) 𐴓𐴡𐴔𐴁𐴤𐴡𐴌 𐴒𐴤𐴝𐴣𐴄𐴞𐴌 𐴀𐴝𐴃𐴌𐴝𐴉𐴡𐴃𐴧𐴟 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴀𐴞𐴓 𐴒𐴤𐴡𐴘𐴊𐴠 𐴵 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴘𐴥𐴡 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴟𐴕 𐴌𐴗𐴝𐴃 𐴒𐴡𐴌𐴡𐴔𐴠 𐴏𐴝𐴙𐴌 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴠𐴑 𐴎𐴡𐴕 𐴐𐴤𐴡𐴃 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴁𐴡𐴌𐴔𐴥𐴝𐴌 𐴏𐴥𐴝𐴘 𐴒𐴤𐴝𐴙𐴚 𐴋𐴞𐴐𐴄𐴤𐴞𐴑𐴡𐴃 𐴔𐴠 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴹 𐴱 𐴃𐴝𐴌𐴥𐴞𐴑𐴡𐴌 𐴁𐴤𐴟𐴃𐴡𐴌𐴠 , 𐴒𐴡𐴌𐴡𐴔𐴡𐴌 𐴄𐴠𐴔𐴂𐴠𐴌𐴠𐴆𐴙𐴝𐴌 𐴁𐴠𐴐𐴤𐴞 𐴁𐴝𐴌𐴥𐴡𐴕𐴠 𐴀𐴠 𐴏𐴝𐴙𐴌 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 , 𐴀𐴠𐴑 𐴐𐴤𐴡𐴃 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴝 𐴋𐴝𐴀𐴝𐴘 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴠 𐴏𐴝𐴙𐴌 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴰 𐴷 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠𐴊𐴠 , 𐴔𐴟𐴕 𐴌𐴗𐴝 𐴐𐴤𐴡𐴀𐴡𐴌𐴡𐴌 ( 𐴘𐴥𐴟𐴃 𐴏𐴟𐴆𐴙𐴠𐴓 𐴀𐴠𐴏𐴥𐴞𐴏𐴄𐴤𐴠𐴕 𐴀𐴠𐴏𐴟𐴏𐴥𐴙𐴠𐴆𐴠𐴕 ) 𐴃𐴡𐴕𐴎𐴞𐴔𐴡𐴌 𐴃𐴡𐴌𐴉𐴥𐴡𐴃𐴧𐴟 , 𐴀𐴝𐴌 𐴱 𐴳 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠𐴊𐴠 ( 𐴁𐴡𐴓𐴡𐴋 𐴋𐴟𐴕𐴥𐴝𐴌 𐴀𐴠𐴏𐴟𐴏𐴥𐴙𐴠𐴆𐴠𐴕 𐴃𐴡𐴕𐴎𐴞𐴔𐴡𐴌 𐴃𐴡𐴌𐴉𐴥𐴡𐴃𐴧𐴟 , 𐴔𐴟𐴄 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴱 𐴰 𐴱 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴒𐴡𐴌𐴡𐴔 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴃𐴡𐴚𐴁𐴝𐴊𐴞𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌 𐴊𐴧𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 ( 𐴀𐴡 𐴀𐴝𐴘 𐴏𐴞𐴌 ) 𐴉𐴠𐴌𐴠𐴐𐴝𐴕𐴞 𐴱𐴱

𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴃𐴡𐴚𐴁𐴝𐴊𐴞𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴌 𐴊𐴧𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴀𐴡 𐴀𐴝𐴘 𐴏𐴞 𐴘𐴠 𐴔𐴠 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕𐴞 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 , 𐴀𐴝𐴌𐴑𐴝𐴕 𐴁𐴤𐴟𐴏𐴞𐴊𐴡𐴚𐴡𐴃 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴀𐴝𐴃𐴡𐴚𐴁𐴝𐴊𐴞𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴕 , 𐴁𐴡𐴓𐴝𐴎𐴟𐴌𐴞 𐴕𐴞𐴎𐴡𐴌 𐴎𐴝𐴒𐴝𐴃𐴧𐴤𐴟𐴕 𐴓𐴦𐴡𐴌𐴝𐴘 𐴊𐴞𐴘𐴝 𐴎𐴡𐴀𐴡𐴕 𐴀𐴝𐴌 𐴕𐴞𐴎𐴡𐴌 𐴑𐴡𐴁𐴎𐴝𐴌 𐴐𐴤𐴡𐴐𐴤𐴡𐴔𐴁𐴡𐴃𐴧𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝 𐴎𐴡𐴀𐴡𐴕𐴡𐴌 𐴁𐴝𐴁𐴡𐴃𐴠 , 𐴈𐴥𐴡𐴁𐴡𐴌 𐴀𐴥𐴡𐴘𐴧𐴠𐴊𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴀𐴡 𐴀𐴝𐴘 𐴏𐴞𐴌 𐴅𐴡𐴕𐴡𐴌𐴥𐴡𐴓 𐴏𐴥𐴠𐴒𐴠𐴄𐴠𐴌𐴞 𐴘𐴠 𐴊𐴞𐴓𐴡𐴌 𐴔𐴟𐴌𐴡𐴃𐴧𐴤𐴟 𐴉𐴠𐴌𐴠𐴐𐴝𐴕𐴞 𐴀𐴝𐴌 𐴀𐴡𐴐𐴤𐴝𐴕𐴃𐴞 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴊𐴟𐴕𐴥𐴞 𐴋𐴝𐴀𐴝𐴘𐴃𐴧𐴟 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴊𐴠𐴐𐴁𐴞𐴊𐴠𐴐𐴤𐴞 𐴑𐴝𐴕𐴟𐴕 𐴔𐴡𐴎𐴞𐴕 𐴀𐴡𐴣𐴖𐴏𐴥𐴝 𐴊𐴞𐴀𐴞 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴡𐴕 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴖𐴡𐴌𐴠 𐴎𐴞𐴔𐴧𐴝 𐴀𐴝𐴏𐴥𐴠 𐴁𐴡𐴓𐴞 , 𐴀𐴡 𐴀𐴝𐴘𐴏𐴞𐴌 𐴅𐴡𐴕𐴡𐴌𐴥𐴡𐴓 𐴏𐴥𐴠𐴒𐴠𐴄𐴠𐴌𐴞 𐴘𐴠 𐴃𐴝𐴑𐴞𐴊 𐴒𐴡𐴌𐴥𐴞 𐴎𐴟𐴌 𐴊𐴞𐴘𐴥𐴡𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴡𐴖𐴣𐴏𐴥𐴝 𐴊𐴞𐴀𐴞 , 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴡𐴃𐴧𐴤𐴟 𐴁𐴝𐴏𐴝𐴘 𐴌𐴝𐴑𐴤𐴞 𐴁𐴤𐴡𐴓𐴧𐴝 𐴊𐴠𐴐𐴢𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃 ( 𐴀𐴝𐴘 𐴏𐴞 𐴅𐴠 ) 𐴘𐴠 𐴊𐴞𐴘𐴥𐴊𐴠 𐴐𐴡𐴌𐴥𐴡𐴃 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴟𐴌𐴟𐴏𐴧𐴝𐴁 𐴁𐴤𐴝𐴉𐴠 𐴔𐴝𐴕𐴞 𐴎𐴝𐴘 𐴁𐴡𐴓𐴧𐴥𐴝 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴀𐴥𐴡𐴑𐴧𐴡𐴓 𐴀𐴡𐴣𐴖𐴏𐴥𐴝 𐴏𐴥𐴝𐴌𐴝 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴊𐴞𐴀𐴞 𐴉𐴝𐴌𐴡𐴕 𐴏𐴝𐴀𐴝 𐴁𐴡𐴓𐴞 𐴀𐴡 𐴀𐴝𐴘 𐴏𐴞 𐴘𐴠 𐴈𐴡𐴘𐴧𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴞𐴌𐴝𐴕𐴡𐴌 𐴌𐴝𐴎𐴝 , 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 , 𐴀𐴞𐴃𐴝𐴌𐴥𐴝 𐴇𐴥𐴠𐴓𐴞𐴑𐴝𐴂𐴄𐴝𐴌 𐴁𐴤𐴝𐴚𐴝 𐴒𐴤𐴡𐴄𐴡𐴕𐴝𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴞𐴌𐴝𐴕𐴡𐴌 𐴌𐴝𐴎𐴝 / 𐴀𐴞𐴁𐴌𐴝𐴇𐴦𐴞𐴔 𐴌𐴡𐴀𐴞𐴏𐴞 𐴀𐴝𐴌 𐴀𐴞𐴌𐴝𐴕𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴇𐴟𐴏𐴝𐴙𐴕 𐴀𐴝𐴔𐴞𐴌 𐴀𐴝𐴁𐴊𐴟𐴓 𐴓𐴠𐴇𐴘𐴝𐴕 , 𐴐𐴤𐴡𐴣𐴀𐴡 𐴹 𐴎𐴡𐴕 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴓𐴡𐴘 𐴎𐴝𐴀𐴝𐴌 𐴊𐴧𐴠 𐴇𐴥𐴠𐴓𐴞𐴑𐴝𐴂𐴄𐴝𐴌 𐴀𐴟𐴃𐴧𐴡𐴌 𐴉𐴡𐴏𐴥𐴞𐴔 𐴀𐴠𐴓𐴝𐴑𐴝𐴃 , 𐴉𐴟𐴑 𐴀𐴝𐴎𐴡𐴌 𐴁𐴝𐴘𐴅𐴝𐴕 𐴋𐴞𐴐𐴄𐴤𐴞𐴑𐴡𐴌 𐴖𐴡𐴌𐴎𐴟 𐴑𐴝𐴕 𐴐𐴤𐴡𐴀𐴡𐴌 𐴀𐴝𐴌 𐴅𐴟𐴓𐴉𐴝 𐴐𐴤𐴡𐴀𐴡𐴌𐴡𐴌 𐴊𐴡𐴌𐴔𐴞𐴘𐴝𐴕𐴡𐴃 𐴀𐴝𐴏𐴥𐴠𐴊𐴠 𐴎𐴦𐴡𐴣𐴓𐴡𐴃 𐴉𐴡𐴌𐴞 𐴁𐴤𐴝𐴚𐴞 𐴒𐴞𐴘𐴥𐴡𐴘 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴇𐴥𐴠𐴓𐴞𐴑𐴝𐴂𐴄𐴝𐴌𐴡𐴃 𐴀𐴝𐴐𐴧𐴤𐴞𐴓 𐴊𐴠 𐴹 𐴎𐴡𐴕 𐴁𐴠𐴒𐴧𐴤𐴟𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱