𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴦𐴡𐴙𐴕 𐴊𐴤𐴡𐴌𐴥𐴝𐴘 𐴊𐴡𐴀𐴡𐴕𐴠 𐴰 𐴰 𐴰 𐴸 𐴓𐴡𐴃𐴞 𐴒𐴤𐴡𐴌 𐴎𐴡𐴓𐴞 𐴒𐴞𐴘𐴥𐴡𐴘 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴤𐴡𐴌𐴥𐴝𐴘 𐴊𐴞𐴘𐴠𐴊𐴠 𐴀𐴦𐴡𐴙𐴕𐴡𐴌 𐴎𐴡𐴌𐴞𐴘𐴝 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃 𐴰 𐴰 𐴰 𐴸 𐴀𐴝𐴣𐴐𐴄𐴡 𐴇𐴥𐴝𐴎𐴝𐴌 𐴓𐴡𐴃𐴞 𐴒𐴤𐴡𐴌 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 , 𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴰 𐴱 𐴁𐴝𐴎𐴞 𐴁𐴤𐴝𐴌 𐴀𐴝𐴒𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴟𐴕 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 , 𐴔𐴡𐴒𐴢 𐴁𐴝𐴒𐴞 𐴘𐴠 𐴷 𐴱 𐴃𐴝𐴌𐴥𐴞𐴑𐴡𐴃 𐴔𐴟𐴑𐴤𐴠 𐴀𐴡𐴋𐴝𐴌 𐴊𐴞𐴀𐴞 𐴒𐴞𐴘𐴥𐴡𐴘 , 𐴔𐴡𐴕𐴃𐴡𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴕𐴞𐴎𐴠 𐴈𐴡𐴀𐴡𐴘 𐴁𐴦𐴝𐴊𐴠 𐴘𐴥𐴡 , 𐴀𐴥𐴠 𐴄𐴝𐴙𐴔𐴡𐴌 𐴀𐴠𐴕𐴃𐴠𐴎𐴝𐴌 𐴕𐴡 𐴒𐴡𐴌𐴥𐴞 𐴌𐴝𐴙𐴃𐴡𐴌 𐴐𐴤𐴝𐴀𐴝𐴌𐴡 𐴕𐴡 𐴁𐴝𐴎𐴠 𐴰 𐴳 : 𐴹 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴥𐴠 𐴁𐴡𐴖𐴄𐴝 𐴀𐴟𐴌𐴝𐴘 𐴀𐴟𐴌𐴝𐴘 𐴎𐴞𐴃𐴝𐴌 𐴑𐴤𐴟𐴐𐴞 𐴔𐴝𐴕𐴘 𐴒𐴤𐴡𐴓𐴞 𐴒𐴤𐴡𐴌 𐴉𐴟𐴌𐴝 𐴊𐴞𐴘𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴉𐴟𐴌𐴝𐴕 𐴀𐴠𐴔 𐴂𐴞 / 𐴐𐴗𐴠 𐴔𐴡𐴚𐴡𐴌 𐴒𐴤𐴡𐴌 𐴐𐴤𐴡𐴣𐴀𐴡 𐴰 𐴰 𐴰 𐴸 𐴇𐴥𐴝𐴎𐴝𐴌𐴡𐴌 𐴁𐴠𐴐𐴤𐴞 𐴒𐴤𐴡𐴌 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 , 𐴎𐴠 𐴌𐴥𐴠𐴑𐴧𐴤𐴗𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴁𐴠𐴐𐴤𐴞 , 𐴌𐴥𐴠𐴑𐴧𐴤𐴗𐴝 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃𐴠 𐴊𐴤𐴡𐴌𐴞𐴁𐴤𐴝𐴌 𐴖𐴝𐴌𐴞𐴕 𐴁𐴝𐴀𐴞𐴌 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴀𐴝𐴐𐴤𐴝 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴡𐴌𐴔𐴥𐴝𐴌 𐴇𐴥𐴡𐴑𐴟𐴔𐴡𐴃𐴠 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 , 𐴘𐴥𐴝𐴀𐴝𐴕𐴡𐴌 𐴓𐴧𐴝 𐴑𐴤𐴟𐴙𐴓𐴧𐴙𐴠𐴊𐴠 𐴔𐴦𐴡𐴊𐴧𐴞𐴔𐴝 𐴉𐴥𐴟𐴕𐴥𐴝 𐴉𐴥𐴟𐴕𐴥𐴞 𐴒𐴡𐴌𐴥𐴞 , 𐴒𐴡𐴁𐴤𐴝 𐴐𐴤𐴝𐴑𐴧𐴞 𐴀𐴝𐴌 𐴏𐴥𐴡𐴏𐴝𐴁𐴟𐴃 𐴁𐴠𐴒𐴧𐴤𐴞𐴕 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴉𐴝𐴘𐴧𐴥𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴠 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴤𐴡𐴌𐴠 𐴊𐴠𐴐𐴁𐴞𐴊𐴠𐴐𐴤𐴞 𐴊𐴤𐴡𐴌𐴝𐴌 𐴖𐴝𐴌𐴞𐴕 𐴁𐴝𐴀𐴞𐴌 𐴒𐴡𐴌𐴥𐴞𐴁𐴤𐴡 𐴊𐴠 , 𐴀𐴝𐴕𐴊𐴝𐴎𐴝 𐴒𐴡𐴌𐴥𐴝 𐴎𐴝𐴀𐴝𐴌 𐴁𐴡𐴓𐴞 , 𐴀𐴝𐴌𐴅𐴠𐴕𐴄𐴤𐴞𐴕𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴀𐴟𐴑𐴞𐴓 / 𐴄𐴟𐴔𐴝𐴏𐴢 𐴑𐴞𐴕𐴄𐴞𐴕𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴹 𐴱 𐴰 𐴲 𐴐𐴤𐴡𐴕 𐴓𐴡𐴃𐴞 𐴑𐴤𐴟𐴙𐴓𐴧𐴙𐴠𐴊𐴠 𐴔𐴦𐴡𐴊𐴧𐴞𐴔𐴝𐴃 𐴁𐴟𐴆𐴤𐴙𐴟𐴑 𐴔𐴥𐴟𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴐𐴤𐴡𐴣𐴀𐴡 𐴔𐴠𐴓𐴠𐴄𐴠𐴌𐴞 𐴑𐴡𐴗𐴚𐴏𐴞𐴌 𐴔𐴞𐴔𐴁𐴤𐴡𐴌 , 𐴓𐴝𐴌𐴥𐴝𐴘𐴌 𐴁𐴟𐴆𐴤𐴙𐴟𐴑 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴥𐴝𐴏𐴢 𐴀𐴝𐴐𐴤𐴝𐴔𐴞 𐴀𐴥𐴞𐴏𐴝𐴉𐴠 𐴕𐴝𐴔 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 , 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴑𐴡𐴂𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴉𐴟𐴌𐴝𐴕 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴔𐴝𐴐𐴄𐴡𐴌 𐴑𐴞𐴕𐴄𐴞𐴕𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴟𐴑𐴞𐴓 𐴀𐴥𐴞𐴏𐴝𐴉𐴠 𐴔𐴦𐴡𐴊𐴧𐴞𐴔𐴝 𐴁𐴝𐴀𐴝𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴌𐴟𐴇𐴝𐴙𐴚𐴒𐴙𐴝 𐴉𐴝𐴄𐴞𐴌 𐴴 𐴎𐴡𐴕 𐴔𐴞𐴔𐴁𐴤𐴡𐴌 𐴁𐴠𐴐𐴤𐴞 𐴀𐴥𐴝𐴣𐴃𐴞𐴘𐴝𐴌 𐴒𐴟𐴓𐴝 𐴁𐴝𐴌𐴟𐴊 𐴐𐴤𐴡𐴣𐴀𐴡 𐴒𐴠𐴌𐴠𐴉𐴃𐴝𐴌 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴰 𐴲 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴋𐴤𐴝𐴑𐴤𐴡𐴌 𐴉𐴝𐴀𐴝𐴌𐴡𐴃𐴧𐴟 , 𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴁𐴝𐴚𐴓𐴝𐴊𐴠𐴐𐴤𐴞 𐴇𐴥𐴡𐴑𐴟𐴔𐴃𐴞 𐴉𐴟𐴓𐴞𐴐𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞 , 𐴁𐴠𐴐𐴤𐴞 𐴒𐴡𐴌𐴥𐴞 𐴀𐴥𐴝𐴣𐴃𐴞𐴘𐴝𐴌 𐴒𐴟𐴓𐴝 𐴁𐴝𐴌𐴟𐴊 𐴐𐴤𐴡𐴣𐴀𐴡 , 𐴌𐴟𐴇𐴝𐴙𐴚𐴒𐴙𐴝 𐴉𐴝𐴄𐴞𐴌 𐴴 𐴎𐴡𐴕 𐴔𐴞𐴔𐴁𐴤𐴡𐴌 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴴 𐴱 𐴓𐴡𐴔𐴁𐴤𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴎𐴞𐴔𐴧𐴝𐴊𐴝 ( 𐴋𐴞 𐴀𐴝𐴘 𐴅𐴞 ) / 𐴔𐴟𐴇𐴝𐴔𐴧𐴡𐴊 𐴀𐴠𐴑𐴁𐴝𐴓𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴕𐴟𐴏𐴝𐴘𐴌𐴝𐴃 𐴑𐴠𐴀𐴠𐴔𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 , 𐴱 𐴳 𐴎𐴡𐴕 𐴐𐴤𐴡𐴇𐴞𐴊 𐴱𐴱

𐴒𐴤𐴡𐴎𐴧𐴝 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴓𐴝𐴑𐴝𐴌 𐴔𐴝𐴎𐴤𐴠 𐴔𐴝𐴙𐴅𐴧𐴤𐴙𐴝 𐴀𐴝𐴏𐴥𐴠𐴊𐴠 𐴕𐴟𐴏𐴝𐴘𐴌𐴝𐴃 𐴑𐴠𐴀𐴠𐴔𐴡𐴃 , 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴀𐴠𐴑𐴧𐴤𐴝𐴕 𐴒𐴤𐴡𐴌𐴡𐴃𐴧𐴟 𐴈𐴡𐴔𐴡𐴃 𐴱 𐴳 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 , 𐴐𐴤𐴡𐴀𐴡𐴌 𐴁𐴝𐴏𐴝 𐴀𐴠𐴅𐴤𐴠𐴕𐴏𐴞𐴌 𐴃𐴡𐴌𐴉𐴥𐴡𐴌 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 / 𐴔𐴝𐴇𐴔𐴦𐴟𐴊 𐴁𐴡𐴏𐴥𐴡𐴓𐴠 𐴌𐴦𐴡𐴘 𐴁𐴝𐴌𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴐𐴤𐴡𐴀𐴡𐴌 𐴁𐴝𐴏𐴝 𐴋𐴞𐴂𐴝𐴌𐴔𐴥𐴠𐴕𐴡𐴌 𐴈𐴝𐴔𐴧𐴗𐴝 𐴀𐴥𐴡𐴑𐴧𐴡𐴓𐴠 , 𐴇𐴝𐴏𐴡𐴕 𐴒𐴤𐴡𐴌𐴒𐴟𐴐𐴧𐴤𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴌𐴝𐴑𐴤𐴠𐴊𐴠 , 𐴀𐴠𐴑𐴧𐴤𐴝𐴕 𐴒𐴤𐴡𐴌𐴡𐴃𐴧𐴟 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴀𐴥𐴡𐴘𐴧𐴠𐴊𐴠 , 𐴱 𐴳 𐴎𐴡𐴕 𐴐𐴤𐴡𐴇𐴞𐴊 𐴀𐴝𐴌 𐴰 𐴲 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴔𐴝𐴕𐴥𐴟𐴙𐴐𐴢 𐴕𐴦𐴠𐴓𐴝𐴘𐴧𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴋𐴝𐴑𐴟 𐴀𐴥𐴡𐴑𐴧𐴡𐴓𐴡𐴌 𐴒𐴟𐴓𐴞𐴌 𐴎𐴡𐴌𐴞𐴘𐴝 𐴇𐴥𐴡𐴅𐴡𐴃 𐴎𐴡𐴀𐴡𐴙𐴕𐴧𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 , 𐴉𐴟𐴖𐴝 𐴒𐴤𐴝𐴙𐴓 𐴱𐴱

𐴂𐴝𐴑𐴞𐴏𐴃𐴤𐴝𐴕𐴡𐴌 𐴂𐴡𐴕𐴅𐴝𐴁𐴢 𐴋𐴞𐴐𐴄𐴤𐴞𐴑𐴡𐴌 𐴌𐴝𐴎𐴊𐴤𐴝𐴕𐴞 𐴓𐴝𐴇𐴦𐴟𐴌𐴡𐴌 𐴀𐴠𐴓𐴝𐴑𐴝𐴀𐴠𐴑𐴁𐴝𐴓 𐴄𐴡𐴀𐴡𐴕𐴡𐴌 𐴐𐴤𐴞𐴔𐴝𐴃 , 𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴀𐴠𐴑𐴧𐴤𐴝𐴕 𐴋𐴝𐴣𐴈𐴝𐴃𐴞𐴌 𐴒𐴤𐴡𐴄𐴡𐴕𐴝 𐴀𐴥𐴡𐴘𐴧𐴠 , 𐴎𐴠 𐴒𐴤𐴡𐴄𐴡𐴕𐴝𐴃 𐴹 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴇𐴥𐴡𐴅𐴡𐴌 𐴏𐴥𐴡𐴉𐴡𐴌𐴡𐴃 𐴕𐴦𐴠𐴙𐴓𐴃𐴡𐴊𐴠 / 𐴉𐴝𐴌𐴟𐴑 𐴀𐴝𐴎𐴡𐴔 𐴁𐴡𐴐𐴢 𐴸 𐴵 𐴁𐴡𐴏𐴥𐴡𐴌 , 𐴀𐴞𐴁𐴤𐴝𐴌𐴠 𐴋𐴝𐴑𐴟 𐴀𐴥𐴡𐴑𐴧𐴡𐴓𐴠 𐴒𐴤𐴡𐴌𐴡𐴌 𐴊𐴡𐴌𐴡𐴎𐴝𐴃 𐴒𐴟𐴓𐴞 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 , 𐴐𐴤𐴡𐴇𐴞𐴊 𐴉𐴝𐴌𐴟𐴑 𐴀𐴝𐴎𐴡𐴔 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴉𐴟𐴖𐴝 𐴀𐴥𐴞𐴁𐴤𐴝 𐴀𐴝𐴌 𐴕𐴞𐴎𐴡𐴌 𐴁𐴡𐴖 𐴓𐴡𐴘 𐴹 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴇𐴥𐴡𐴅𐴡𐴌 𐴏𐴥𐴡𐴉𐴡𐴌𐴡𐴃 𐴎𐴝𐴘𐴁𐴝𐴌 𐴃𐴡𐴘𐴧𐴝𐴌 𐴀𐴥𐴡𐴘𐴧𐴝 𐴔𐴝𐴕𐴥𐴟𐴙𐴐𐴢 𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱