𐴁𐴤𐴟𐴏𐴞𐴊𐴡𐴚𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴎𐴡𐴌𐴞𐴘𐴝 𐴰 𐴳 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝𐴌 𐴔𐴡𐴗𐴃 , 𐴊𐴟𐴘 𐴐𐴤𐴡𐴃 𐴓𐴡𐴃𐴞 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 𐴀𐴟𐴖𐴡𐴌𐴠 𐴔𐴠 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃 𐴊𐴦𐴟𐴛𐴅𐴧𐴙𐴝 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴁𐴝𐴌 𐴓𐴝𐴙𐴕 𐴀𐴝𐴌 𐴋𐴡𐴌𐴟𐴕 𐴀𐴠𐴏𐴃𐴠𐴔𐴝𐴓 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 , 𐴲 𐴱 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 , 𐴁𐴤𐴟𐴏𐴞𐴊𐴡𐴚𐴡𐴌 𐴊𐴡𐴀𐴡𐴙𐴕𐴡𐴌 𐴰 𐴲 𐴘𐴥𐴝𐴕 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴤𐴡𐴓𐴧𐴝 𐴀𐴝𐴀𐴝𐴘 , 𐴄𐴡𐴀𐴡𐴕𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴟𐴖𐴡𐴌𐴡𐴌 𐴀𐴞𐴐𐴑𐴟𐴓𐴡𐴃 𐴃𐴡𐴀𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴀𐴞𐴐𐴑𐴟𐴓 𐴐𐴤𐴡𐴣𐴀𐴡 𐴀𐴝𐴃𐴡𐴌 𐴈𐴝𐴣𐴏𐴥𐴡𐴌 𐴎𐴝𐴒𐴝𐴃 , 𐴉𐴥𐴞𐴃𐴞𐴕 𐴀𐴥𐴝𐴣𐴎𐴡𐴙𐴕𐴧𐴝 𐴴 𐴁𐴝𐴎𐴠 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴁𐴝𐴌 𐴓𐴝𐴙𐴕 𐴀𐴝𐴌 𐴋𐴡𐴌𐴟𐴕 𐴀𐴠𐴏𐴃𐴠𐴔𐴝𐴓 𐴓𐴝𐴌𐴥𐴝𐴘𐴃 𐴸 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 , 𐴊𐴟𐴕𐴥𐴞 𐴇𐴥𐴝𐴔𐴓𐴝𐴃 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴰 𐴳 𐴎𐴡𐴕 𐴓𐴡𐴃𐴞 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴊𐴟𐴘 𐴐𐴤𐴡𐴃 𐴎𐴡𐴕 𐴓𐴡𐴃𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴑𐴠𐴙𐴏𐴧𐴥𐴟 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴃𐴧𐴤𐴟 𐴁𐴝𐴏𐴝𐴘 𐴓𐴡𐴘 𐴁𐴡𐴓𐴧𐴥𐴝 ( 𐴀𐴠 𐴂𐴞 𐴀𐴠𐴆 𐴀𐴝𐴌 ) 𐴃𐴡𐴕𐴎𐴞𐴔𐴡𐴌 𐴀𐴝𐴌𐴡𐴎 𐴱𐴱

𐴔𐴡𐴒𐴢 𐴁𐴝𐴒𐴢 𐴘𐴠 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠 𐴊𐴠 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴋𐴝𐴀𐴝𐴘 𐴋𐴝𐴀𐴝𐴘 𐴎𐴤𐴝𐴑𐴧𐴗𐴝 𐴔𐴝𐴌𐴝 𐴈𐴝𐴍𐴝 𐴕𐴡 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴅𐴡𐴓𐴊𐴞 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴱 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 , 𐴀𐴝𐴏𐴞𐴘𐴠𐴕 𐴀𐴝𐴌 𐴊𐴠𐴐𐴁𐴞𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌𐴥𐴠 , 𐴀𐴞𐴕𐴏𐴦𐴝𐴕𐴞 𐴇𐴥𐴑𐴧𐴡𐴌 𐴔𐴟𐴃𐴦𐴝𐴓𐴧𐴠𐴑 𐴊𐴡𐴀𐴡𐴙𐴕 𐴉𐴟𐴑 𐴀𐴞𐴐𐴤𐴞𐴘𐴝𐴌 𐴂𐴝𐴓𐴞𐴔𐴠𐴕 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴋𐴝𐴀𐴝𐴘 ( 𐴀𐴠 𐴂𐴞 𐴀𐴠𐴆 𐴀𐴝𐴌 ) 𐴃𐴡𐴕𐴎𐴞𐴔𐴠 𐴒𐴡𐴃𐴡 𐴈𐴝𐴓𐴞𐴘𐴝 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴤𐴝 𐴀𐴥𐴞𐴏𐴥𐴝𐴉𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴐𐴤𐴡𐴣𐴀𐴡 𐴀𐴝𐴃𐴌𐴝𐴉𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃 𐴀𐴠𐴔 𐴂𐴞 / 𐴐𐴗𐴠 𐴔𐴡𐴚𐴡𐴌 𐴒𐴤𐴡𐴌 𐴐𐴤𐴡𐴣𐴀𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 , 𐴀𐴝𐴌𐴀𐴥𐴡 𐴀𐴠𐴕𐴋𐴞𐴓𐴧𐴝 𐴔𐴟𐴀𐴟𐴔𐴧𐴞𐴑𐴧𐴤𐴙𐴝 𐴓𐴝𐴌𐴥𐴝𐴘 𐴀𐴡𐴉𐴥𐴡𐴌𐴥𐴝𐴊𐴞 𐴕𐴡 𐴀𐴥𐴡𐴀𐴡 𐴉𐴥𐴝𐴀𐴝𐴕 , 𐴅𐴡𐴓𐴊𐴞 𐴅𐴟𐴖𐴝𐴁 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠 𐴁𐴡𐴓𐴞 ( 𐴀𐴠 𐴂𐴞 𐴀𐴠𐴆 𐴀𐴝𐴌 ) 𐴃𐴡𐴕 𐴎𐴞𐴔𐴡𐴌 𐴀𐴥𐴟𐴑𐴤𐴝𐴄𐴝 , 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴂𐴝𐴓𐴞𐴔𐴠𐴕 𐴀𐴟𐴎𐴞𐴌 / 𐴔𐴠𐴌𐴏𐴞 𐴑𐴤𐴠𐴌𐴥𐴠𐴏𐴄𐴞 𐴁𐴝𐴌𐴥𐴠𐴕𐴋𐴏𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴈𐴡𐴘𐴧𐴥𐴠 ( 𐴀𐴠𐴕 𐴘𐴟 𐴅𐴞 ) 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴊𐴟𐴘 𐴀𐴡𐴔 𐴀𐴟𐴎𐴞𐴌 𐴱𐴱

𐴀𐴝𐴌𐴑𐴝𐴕 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴒𐴟𐴣𐴍𐴝 𐴒𐴡𐴃𐴡 𐴈𐴝𐴓𐴞𐴘𐴝 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 ( 𐴀𐴠𐴕 𐴘𐴟 𐴅𐴞 ) 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴊𐴟𐴘 𐴀𐴡𐴔 𐴀𐴟𐴎𐴞𐴌 𐴀𐴥𐴟 / 𐴀𐴡𐴚 𐴆𐴙𐴡 𐴔𐴥𐴟 𐴘𐴠 ” 𐴓𐴝𐴌𐴥𐴘𐴃 𐴔𐴝𐴎𐴤𐴠 𐴘𐴥𐴡 𐴑𐴝𐴕𐴟𐴕 𐴀𐴝𐴏𐴥𐴠 ” 𐴈𐴡𐴀𐴡𐴘 𐴐𐴤𐴟𐴌𐴕𐴝𐴔 𐴊𐴞𐴀𐴞 𐴓𐴠𐴙𐴑𐴧𐴤𐴙𐴠 𐴊𐴠 ! 𐴀𐴦𐴝𐴛 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴓𐴡𐴘 𐴈𐴡𐴃𐴤𐴝 𐴈𐴡𐴘𐴧𐴥𐴞𐴊𐴠 𐴀𐴥𐴞𐴀𐴞𐴕𐴡𐴌 𐴑𐴤𐴟𐴓𐴝𐴏𐴝 𐴀𐴥𐴡𐴙𐴓𐴊𐴠 , 𐴀𐴥𐴞𐴃𐴝𐴌𐴝 𐴈𐴡𐴘𐴧𐴥𐴠𐴊𐴠 , 𐴊𐴟𐴘 𐴊𐴞𐴕 𐴀𐴝𐴒𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴄𐴡𐴀𐴡𐴕𐴡𐴌 𐴔𐴟𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴞𐴄𐴤𐴞𐴚𐴡𐴃 𐴔𐴝𐴃𐴝𐴘 𐴈𐴡𐴘𐴧𐴥𐴠𐴊𐴠 , 𐴎𐴠𐴃𐴡 𐴈𐴥𐴝𐴌𐴝 𐴉𐴝𐴌𐴡 𐴃𐴟𐴣𐴖𐴥𐴝𐴣𐴌𐴥𐴝 𐴒𐴤𐴡𐴌 𐴏𐴥𐴝𐴌𐴞 𐴊𐴞𐴀𐴞 𐴎𐴡𐴀𐴡 𐴒𐴤𐴡𐴘 , 𐴔𐴡𐴒𐴢 𐴁𐴝𐴒𐴞 𐴘𐴠 𐴄𐴡𐴀𐴡𐴕 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴁𐴤𐴡 , 𐴃𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴝𐴣𐴀𐴝𐴌𐴝𐴌 𐴃𐴧𐴟 𐴎𐴝𐴁𐴡𐴓𐴧𐴥𐴝 𐴈𐴡𐴕𐴥𐴡 𐴎𐴝𐴒𐴝 𐴕𐴥𐴝𐴘 , 𐴀𐴝𐴣𐴀𐴝𐴌𐴝 𐴒𐴤𐴡𐴌 𐴏𐴥𐴝𐴌𐴞 𐴕𐴡 𐴊𐴞𐴘𐴥𐴟𐴔 𐴁𐴡𐴓𐴞 𐴈𐴡𐴘𐴧𐴠, 𐴀𐴝𐴎𐴞𐴘𐴝 𐴁𐴞𐴀𐴞𐴕𐴧𐴝 𐴰 𐴱 𐴁𐴝𐴎𐴠 𐴓𐴡𐴃𐴞 𐴐𐴤𐴟𐴌𐴥𐴟 𐴒𐴡𐴌𐴥𐴞 𐴒𐴟𐴣𐴍𐴝 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕 𐴏𐴥𐴝𐴘𐴧𐴡𐴌 𐴄𐴝𐴓 𐴀𐴥𐴡𐴘 𐴒𐴞𐴘𐴥𐴡𐴘 , 𐴀𐴠𐴈𐴥𐴡𐴕 𐴄𐴡𐴀𐴡𐴕 𐴁𐴤𐴝𐴐𐴞 𐴁𐴠𐴒𐴧𐴤𐴟𐴕 𐴔𐴡𐴚𐴋𐴤𐴟 – 𐴁𐴤𐴟𐴏𐴞𐴊𐴡𐴚 𐴌𐴟𐴀𐴟𐴋𐴡𐴌 𐴈𐴝𐴣𐴏𐴝 𐴓𐴡𐴘 𐴀𐴥𐴝𐴓 𐴎𐴡𐴁𐴞𐴕𐴡𐴃 𐴑𐴤𐴟𐴓𐴝 𐴀𐴝𐴏𐴧𐴝𐴕𐴡𐴌 𐴃𐴡𐴓𐴠 , 𐴊𐴤𐴝𐴘 𐴊𐴦𐴟𐴣𐴌𐴞 𐴄𐴡𐴀𐴡𐴕𐴡𐴃𐴧𐴤𐴟 𐴕𐴦𐴠𐴓𐴞 𐴎𐴝𐴘𐴃𐴠 𐴈𐴡𐴎𐴡𐴕 𐴇𐴥𐴝𐴃 𐴄𐴤𐴠𐴚 𐴁𐴤𐴝𐴚𐴞 𐴒𐴤𐴝𐴙𐴓 𐴀𐴥𐴡𐴘 𐴒𐴞𐴘𐴥𐴡𐴘 𐴒𐴡𐴕𐴝 𐴏𐴥𐴝𐴌𐴥𐴝 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴓𐴝𐴌𐴥𐴝𐴘 𐴎𐴟𐴌𐴥𐴠 𐴐𐴤𐴟𐴌𐴠 𐴱𐴱

𐴒𐴤𐴡𐴎𐴧𐴝𐴌 𐴊𐴡𐴀𐴡𐴙𐴕 𐴀𐴥𐴞𐴏𐴧𐴝 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴒𐴡𐴃𐴡 𐴈𐴝𐴓𐴞𐴘𐴝 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴁𐴟𐴔 𐴔𐴝𐴌𐴝 𐴐𐴤𐴡𐴣𐴀𐴡 𐴔𐴠𐴍𐴞𐴌 𐴓𐴝𐴌𐴥𐴝𐴘 𐴑𐴤𐴟𐴁𐴢 𐴎𐴟𐴌𐴠 𐴐𐴤𐴟𐴌𐴠 𐴏𐴡𐴓𐴠𐴌 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴑𐴠𐴙𐴏𐴧𐴥𐴟 𐴊𐴞𐴕𐴡𐴌 𐴓𐴧𐴝 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴁𐴡𐴓𐴞 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴈𐴡𐴘𐴓𐴥𐴠 𐴘𐴥𐴡 , 𐴀𐴠 𐴈𐴥𐴡𐴕 𐴊𐴡𐴐𐴢 𐴊𐴞𐴕𐴡𐴃𐴧𐴤𐴟 𐴁𐴠𐴐𐴤𐴞 𐴀𐴥𐴡𐴘 𐴒𐴞𐴘𐴥𐴡𐴘 , 𐴀𐴟𐴃𐴧𐴡𐴌 𐴒𐴤𐴡𐴎𐴧𐴝𐴃 𐴔𐴝𐴎𐴤𐴠 𐴘𐴥𐴡 𐴇𐴝𐴔𐴦𐴝𐴏𐴢 𐴀𐴝𐴌 𐴀𐴞𐴏𐴌𐴦𐴝𐴙𐴓𐴡𐴌 𐴊𐴡𐴌𐴔𐴞𐴘𐴝𐴕𐴡𐴃 𐴀𐴝𐴁𐴝𐴌 𐴀𐴥𐴡 𐴊𐴡𐴌𐴥𐴡 𐴔𐴡𐴌𐴥𐴡 𐴓𐴝𐴌𐴥𐴝𐴘 𐴏𐴡𐴓𐴠𐴌 , 𐴒𐴡𐴃𐴡 𐴌𐴝𐴙𐴃 𐴁𐴤𐴡𐴌 𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔 𐴁𐴝𐴌𐴞𐴌 𐴎𐴡𐴌𐴞𐴘𐴝 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴟𐴒𐴧𐴤𐴗𐴝𐴃 , 𐴊𐴟𐴘 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 𐴀𐴥𐴡𐴘𐴧𐴠 𐴁𐴡𐴓𐴞 𐴒𐴤𐴡𐴎𐴧𐴝𐴃 𐴀𐴝𐴏𐴥𐴠𐴊𐴠 𐴑𐴟𐴖𐴥𐴝𐴙𐴃𐴞 𐴋𐴝𐴑𐴄𐴡𐴌 𐴈𐴥𐴝𐴕𐴝𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱