𐴁𐴤𐴟𐴏𐴞𐴊𐴡𐴚 𐴒𐴝𐴣𐴌𐴝𐴃𐴡𐴃𐴧𐴤𐴟 𐴈𐴡𐴊𐴞 𐴁𐴠𐴒𐴧𐴤𐴟𐴕 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕 , 𐴁𐴤𐴟𐴏𐴞𐴊𐴡𐴚𐴡𐴌 𐴒𐴝𐴣𐴌𐴝𐴃𐴡𐴃𐴧𐴤𐴟 𐴔𐴠 𐴔𐴝𐴐𐴤𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴈𐴡𐴊𐴞 𐴁𐴠𐴒𐴧𐴤𐴟𐴕 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 , 𐴀𐴝𐴌𐴑𐴝𐴕𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴑𐴤𐴟𐴁 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 , 𐴉𐴡𐴃𐴧𐴞 𐴐𐴤𐴡𐴀𐴡𐴌𐴡𐴌 𐴒𐴝𐴣𐴌𐴝𐴃𐴡𐴃𐴧𐴤𐴟 𐴈𐴡𐴊𐴞 𐴀𐴥𐴡𐴑𐴧𐴡𐴓 𐴌𐴥𐴠 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝𐴃 𐴓𐴝𐴌𐴞 𐴌𐴝𐴑𐴧𐴤𐴞𐴀𐴞𐴓 , 𐴒𐴡𐴃𐴡 𐴀𐴠𐴂𐴌𐴞𐴓𐴡𐴃 𐴁𐴤𐴟𐴏𐴞𐴊𐴡𐴚 𐴒𐴝𐴣𐴌𐴝𐴃𐴡𐴃 𐴰 𐴰 𐴸 𐴎𐴡𐴕 𐴓𐴡𐴃𐴞 𐴈𐴡𐴊𐴞 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴀𐴥𐴞𐴕𐴃𐴟 𐴰 𐴰 𐴴 𐴐𐴤𐴡𐴃𐴡𐴌 𐴑𐴠𐴙𐴏𐴧𐴥𐴟 𐴁𐴠𐴐𐴤𐴞 , 𐴁𐴤𐴟𐴏𐴞𐴊𐴡𐴚 – 𐴔𐴡𐴚𐴋𐴤𐴟 𐴒𐴝𐴌𐴥𐴞𐴌 𐴌𐴝𐴏𐴧𐴝 𐴁𐴝𐴀𐴝𐴘 , 𐴀𐴝𐴙𐴑𐴧𐴙𐴝𐴁𐴡𐴌 𐴒𐴝𐴣𐴌𐴝𐴃𐴡𐴃 𐴕𐴞𐴎𐴝𐴘 𐴁𐴤𐴝𐴌 𐴐𐴤𐴡𐴣𐴀𐴡𐴃 , 𐴶 𐴔𐴝𐴙𐴓 𐴀𐴝𐴌 𐴵 𐴔𐴝𐴙𐴓𐴡𐴌 𐴔𐴝𐴎𐴤𐴠 𐴎𐴝𐴒𐴝 𐴀𐴠𐴑𐴧𐴤𐴝𐴕𐴡𐴃 𐴒𐴝𐴌𐴥𐴞 𐴀𐴥𐴞𐴀𐴞𐴕𐴡𐴌𐴥𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴠𐴄𐴤𐴠𐴑 𐴒𐴡𐴌𐴥𐴡𐴕𐴠 𐴳 𐴎𐴡𐴕 𐴈𐴡𐴊𐴞 𐴔𐴡𐴌𐴞 𐴎𐴝𐴘 𐴸 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴀𐴡𐴙𐴓 , 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴔𐴡𐴒𐴢 , 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴳 𐴎𐴡𐴕 𐴔𐴡𐴒𐴢 𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴥𐴠 , 𐴁𐴝𐴑𐴞 𐴰 𐴰 𐴴 𐴓𐴡𐴃𐴞 𐴈𐴡𐴊𐴞 𐴀𐴝𐴙𐴑𐴧𐴙𐴝𐴁 𐴒𐴝𐴣𐴌𐴝𐴃𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴓 , 𐴀𐴠𐴈𐴥𐴡𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴠𐴌 𐴊𐴧𐴠 𐴀𐴥𐴞𐴀𐴞𐴕 𐴁𐴤𐴟𐴏𐴞𐴊𐴡𐴚 𐴒𐴝𐴣𐴌𐴝𐴃𐴡𐴌 𐴒𐴤𐴞𐴌𐴝𐴌 𐴁𐴤𐴟𐴃𐴤𐴡𐴌𐴠 𐴀𐴥𐴟𐴊𐴧𐴝 𐴉𐴡𐴌𐴠 𐴉𐴥𐴟𐴍𐴠𐴌 𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴁𐴤𐴟𐴏𐴞𐴊𐴡𐴚 𐴒𐴝𐴣𐴌𐴝𐴃𐴡𐴌 𐴎𐴞𐴔𐴧𐴝𐴊𐴝𐴌𐴠 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 𐴀𐴠𐴌𐴞 𐴊𐴞𐴘𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴠𐴌𐴞 𐴊𐴞𐴘𐴥𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴲 𐴱 𐴳 𐴎𐴡𐴕 𐴔𐴡𐴌𐴡𐴊 𐴲 𐴷 𐴎𐴡𐴕 𐴔𐴝𐴘𐴧𐴝 , 𐴔𐴟𐴄 𐴔𐴞𐴓𐴝𐴘 𐴴 𐴸 𐴳 𐴎𐴡𐴕 , 𐴈𐴡𐴊𐴞 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴔𐴡𐴚𐴋𐴤𐴟𐴌 𐴀𐴥𐴡𐴘𐴓𐴠 𐴘𐴥𐴡 𐴀𐴠𐴈𐴥𐴡𐴕 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁 𐴀𐴥𐴡𐴀𐴡𐴕𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴤𐴟𐴏𐴞𐴊𐴡𐴚𐴡𐴌 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴃 , 𐴔𐴡𐴒𐴢 𐴀𐴥𐴡𐴑𐴧𐴡𐴓𐴡𐴌𐴠 𐴔𐴡𐴒𐴢 𐴉𐴝𐴌𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴕𐴝𐴂𐴧𐴥𐴟𐴌𐴝𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴏𐴠𐴕𐴏𐴥𐴝𐴌 𐴈𐴝𐴁𐴡𐴏𐴢 𐴔𐴡𐴎𐴞𐴕 𐴀𐴞𐴚𐴑𐴟𐴖𐴝𐴌𐴞 𐴒𐴡𐴌𐴥𐴞 𐴉𐴡𐴄𐴤𐴟 𐴔𐴝𐴌𐴞 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴕𐴝𐴂𐴧𐴥𐴟𐴌𐴝𐴃 𐴔𐴠 𐴔𐴝𐴐𐴤𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 , 𐴇𐴥𐴡𐴑𐴟𐴔𐴡𐴃𐴠 𐴒𐴡𐴌𐴥𐴞𐴃𐴤𐴡 𐴊𐴠 ( 𐴏𐴗𐴥𐴠 𐴃𐴝𐴚 𐴏𐴥𐴝𐴙𐴑 ) 𐴕𐴡𐴔𐴟𐴕𐴝 𐴓𐴡𐴘 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴘𐴥𐴡 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴞𐴚𐴑𐴟𐴖𐴝𐴌𐴞 𐴏𐴠𐴌𐴥𐴝𐴚 𐴓𐴡𐴘 𐴒𐴞𐴘𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴕𐴝𐴂𐴧𐴥𐴟𐴌𐴝 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 , 𐴀𐴠𐴑 𐴊𐴞𐴕 𐴀𐴝𐴒𐴠 𐴈𐴥𐴡𐴁𐴡𐴌 𐴊𐴞𐴘𐴥𐴡𐴌𐴥𐴠 𐴔𐴠 𐴔𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴀𐴝𐴀𐴝𐴘 𐴉𐴝𐴙𐴅𐴧𐴙𐴝 𐴁𐴠𐴒𐴧𐴤𐴟𐴕𐴡𐴌𐴥𐴠 𐴒𐴤𐴡𐴌𐴡𐴃𐴧𐴟 𐴋𐴝𐴑𐴞 𐴓𐴡𐴘 𐴎𐴝𐴘 𐴃𐴡𐴚 𐴉𐴝𐴌𐴝𐴌 𐴀𐴞𐴐𐴑𐴟𐴓𐴡𐴃 𐴎𐴡𐴔𐴝 𐴒𐴡𐴌𐴥𐴞 , 𐴇𐴥𐴡𐴑𐴟𐴔𐴡𐴃𐴡𐴌 𐴋𐴦𐴡𐴙𐴓𐴧𐴝 ( 𐴏𐴗𐴥𐴠 𐴃𐴝𐴚 𐴏𐴥𐴝𐴙𐴑 ) 𐴕𐴡𐴔𐴟𐴕𐴝 𐴓𐴡𐴘 𐴏𐴠𐴌𐴥𐴝𐴚 𐴓𐴡𐴘 𐴉𐴡𐴄𐴤𐴟 𐴔𐴝𐴌𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 𐴔𐴝𐴘𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴟𐴌𐴈𐴝 𐴀𐴥𐴟𐴊𐴧𐴝 𐴉𐴞𐴕𐴃𐴤𐴡 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴀𐴝𐴌 𐴏𐴠𐴌𐴥𐴝𐴚 𐴒𐴡𐴌𐴥𐴞 𐴉𐴡𐴄𐴤𐴟 𐴔𐴝𐴌𐴞 𐴑𐴞𐴘𐴥𐴡𐴌 𐴓𐴧𐴝 𐴓𐴡𐴘 𐴒𐴞𐴘𐴥𐴠𐴊𐴠 𐴕𐴡 𐴎𐴝𐴕𐴥𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴏𐴞𐴘𐴠𐴕𐴡𐴌 𐴏𐴥𐴠𐴒𐴠𐴄𐴠𐴌𐴞 𐴀𐴝𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴕𐴠𐴂𐴙𐴠 𐴋𐴦𐴡𐴃 𐴉𐴡𐴣𐴀𐴡𐴏𐴧𐴙𐴠 , 𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝𐴌 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴇𐴥𐴡𐴓 𐴃𐴟𐴖𐴝𐴘𐴁𐴤𐴝𐴌 𐴔𐴡𐴐𐴖𐴝𐴌𐴝 𐴱𐴱

𐴀𐴝𐴏𐴞𐴘𐴠𐴕𐴡𐴌 𐴏𐴥𐴠𐴒𐴠𐴄𐴠𐴌𐴞 𐴋𐴝𐴑𐴄𐴡𐴌 / 𐴑𐴝𐴀𐴟 𐴑𐴝𐴚 𐴇𐴥𐴟𐴕 𐴀𐴝𐴌 𐴀𐴝𐴏𐴞𐴘𐴠𐴕𐴡𐴌 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴀𐴝𐴓𐴟𐴕 𐴑𐴠𐴀𐴡 , 𐴀𐴞𐴃𐴝𐴌𐴥𐴝 𐴔𐴠 𐴔𐴝𐴐𐴤𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴕𐴠𐴂𐴙𐴠 𐴋𐴦𐴡𐴃 , 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴓𐴡𐴘 𐴊𐴡𐴓𐴝 𐴀𐴥𐴡𐴘 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴔𐴠𐴓𐴠𐴄𐴠𐴌𐴞𐴌 𐴇𐴥𐴡𐴑𐴟𐴔𐴡𐴃𐴞 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 , 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴤𐴡𐴃 𐴁𐴡𐴌𐴔𐴥𐴝𐴃 𐴏𐴡𐴓𐴠𐴌 𐴊𐴧𐴠 𐴀𐴡𐴐𐴤𐴝𐴕𐴃𐴞𐴌 𐴇𐴥𐴝𐴓𐴡𐴃𐴡𐴌𐴥𐴠 , 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴇𐴥𐴡𐴓 𐴃𐴟𐴖𐴝𐴘 𐴁𐴤𐴡𐴓𐴧𐴝 𐴓𐴝𐴒𐴞𐴁𐴤𐴡𐴊𐴠 𐴀𐴝𐴏𐴞𐴘𐴠𐴕𐴡𐴌 𐴔𐴡𐴊𐴡𐴊𐴡𐴌 𐴁𐴝𐴁𐴡𐴃𐴠 , 𐴁𐴡𐴌𐴔𐴥𐴝 𐴀𐴝𐴌 𐴀𐴝𐴏𐴞𐴘𐴠𐴕𐴡𐴌 𐴕𐴡𐴔𐴝𐴙𐴕𐴊𐴝 𐴊𐴟𐴕𐴥𐴞 𐴃𐴡𐴌𐴉𐴥𐴠 𐴎𐴡𐴌𐴟𐴌𐴞 𐴐𐴡𐴌𐴥𐴡𐴃 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴖𐴥𐴞𐴏𐴄 𐴁𐴤𐴠𐴚𐴑𐴧𐴡𐴃 𐴒𐴟𐴓𐴞 𐴔𐴝𐴌𐴞 𐴃𐴞𐴕 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴁𐴞𐴐𐴤𐴞𐴃 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴓𐴝𐴑𐴝 𐴖𐴥𐴞𐴏𐴄 𐴁𐴤𐴠𐴚𐴑𐴧𐴡𐴃 𐴒𐴟𐴓𐴞 𐴔𐴝𐴌𐴞 𐴃𐴞𐴕 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 , 𐴉𐴥𐴡𐴓𐴡𐴏𐴃𐴞𐴕𐴞 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴖𐴥𐴞𐴏𐴄 𐴁𐴤𐴠𐴚𐴑 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌 𐴉𐴡𐴏𐴥𐴞𐴔𐴠 𐴀𐴝𐴏𐴥𐴠𐴊𐴠 𐴃𐴟𐴓 𐴑𐴡𐴌𐴡𐴔 𐴄𐴡𐴀𐴡𐴕𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴢 𐴀𐴝𐴌 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌 𐴔𐴝𐴎𐴤𐴠 𐴀𐴥𐴡𐴘𐴧𐴠𐴊𐴠 𐴔𐴝𐴌𐴝 𐴔𐴝𐴌𐴞𐴃 𐴀𐴝𐴌𐴀𐴥𐴡 𐴁𐴡𐴀𐴡𐴃 𐴉𐴥𐴡𐴓𐴡𐴏𐴃𐴞𐴕𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 , 𐴉𐴥𐴡𐴓𐴡𐴏𐴃𐴞𐴕𐴞 𐴏𐴠𐴇𐴥𐴠𐴃𐴡𐴌 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱