𐴂𐴟𐴕𐴧𐴥𐴥𐴝 𐴆𐴤𐴗𐴥𐴠𐴕 𐴐𐴤𐴡𐴀𐴡𐴌𐴡𐴃 𐴉𐴡𐴕𐴎𐴝𐴙𐴆 𐴉𐴝𐴌𐴝 𐴓𐴡𐴃𐴞 𐴈𐴥𐴝𐴘𐴁𐴤𐴝𐴌 𐴉𐴝𐴕𐴥𐴞 𐴓𐴡𐴘 𐴊𐴟𐴑 𐴉𐴝𐴀𐴝𐴌 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴂𐴟𐴕𐴧𐴥𐴝 𐴆𐴤𐴗𐴥𐴠𐴕 𐴐𐴤𐴡𐴀𐴡𐴌𐴡𐴌 𐴉𐴡𐴕𐴎𐴝𐴙𐴆 𐴉𐴝𐴌𐴝 𐴓𐴡𐴃𐴞 , 𐴈𐴥𐴝𐴘𐴁𐴤𐴝𐴌 𐴉𐴝𐴕𐴥𐴞𐴌 𐴉𐴡𐴀𐴡𐴙𐴌 𐴉𐴥𐴟𐴖𐴝𐴘 𐴎𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴉𐴝𐴕𐴥𐴞 𐴓𐴡𐴘 𐴁𐴠𐴐𐴤𐴞 𐴊𐴟𐴑 𐴉𐴝𐴀𐴝𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴠 , 𐴏𐴡𐴌𐴥𐴝 𐴆𐴙𐴟 , 𐴀𐴡𐴚 𐴂𐴟𐴌𐴟 𐴂𐴡𐴌𐴝𐴚 , 𐴂𐴥𐴠𐴕 𐴕𐴞𐴓𐴝 , 𐴑𐴠𐴌𐴠𐴕 𐴑𐴤𐴝𐴚 , 𐴀𐴝𐴄𐴧𐴤𐴝 𐴔𐴡𐴌𐴥𐴝𐴓𐴥𐴠 , 𐴀𐴠𐴕𐴋𐴞𐴓𐴧𐴝 𐴉𐴝𐴌𐴝 𐴉𐴡𐴕𐴎𐴝𐴙𐴆 𐴉𐴝𐴌𐴝 𐴉𐴡𐴙𐴅𐴧𐴡𐴕𐴃𐴡 , 𐴀𐴠𐴂𐴌𐴞𐴓 𐴔𐴝𐴐𐴤𐴡𐴌 𐴐𐴤𐴟𐴌𐴟 𐴀𐴥𐴡𐴘𐴃𐴠 𐴔𐴠 𐴔𐴝𐴐𐴤𐴡𐴌 𐴀𐴝𐴙𐴅𐴧𐴙𐴝 𐴵 𐴱 𐴃𐴝𐴌𐴥𐴞𐴑 𐴓𐴡𐴃 𐴈𐴥𐴝𐴘𐴁𐴤𐴝𐴌 𐴉𐴝𐴕𐴥𐴞 𐴓𐴡𐴘 𐴊𐴟𐴑 𐴉𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠 , 𐴂𐴟𐴕𐴧𐴥𐴝 𐴆𐴤𐴗𐴥𐴠𐴕 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴉𐴡𐴃𐴧𐴞 𐴁𐴡𐴏𐴥𐴡𐴌 𐴉𐴝𐴕𐴥𐴞𐴌 𐴈𐴡𐴔𐴞 𐴓𐴡𐴘 𐴊𐴟𐴑 𐴉𐴝𐴀𐴝𐴊𐴠 𐴀𐴥𐴡𐴘𐴓𐴠 𐴘𐴥𐴡 , 𐴀𐴠 𐴁𐴡𐴏𐴥𐴡𐴌 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴊𐴟𐴑 𐴉𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠 , 𐴈𐴡𐴏𐴡𐴌𐴝 𐴉𐴝𐴕𐴥𐴞 𐴈𐴥𐴝𐴀𐴝 𐴉𐴡𐴌𐴡𐴕𐴠 𐴑𐴠𐴙𐴏𐴧𐴥𐴟 𐴔𐴝𐴙𐴕𐴐𐴤𐴡𐴃𐴧𐴟 𐴓𐴝𐴔𐴝𐴕𐴞 𐴁𐴞𐴘𐴝𐴌𐴝𐴔 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴧𐴝 𐴀𐴞𐴌𐴝𐴕𐴡𐴌 𐴈𐴥𐴝𐴕𐴝𐴌 𐴔𐴡𐴊𐴡𐴊𐴢 𐴱𐴱

𐴁𐴡𐴌𐴔𐴥𐴝𐴃 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴧𐴝 , 𐴀𐴞𐴌𐴝𐴕𐴠 𐴈𐴥𐴝𐴕𐴝𐴌 𐴔𐴡𐴊𐴡𐴊 𐴉𐴡𐴣𐴀𐴡𐴏𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴠 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴋𐴤𐴝𐴑𐴝𐴌 𐴀𐴞𐴌𐴝𐴕𐴞 𐴏𐴥𐴡𐴉𐴞𐴌𐴠 𐴈𐴡𐴘𐴧𐴥𐴠𐴊𐴠 , 𐴀𐴞𐴌𐴝𐴕𐴞 𐴕𐴡𐴔𐴝𐴙𐴕𐴊𐴝 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 , 𐴑𐴝𐴑𐴏𐴡 𐴁𐴝𐴎𐴝𐴌𐴡𐴌 𐴀𐴟𐴑𐴤𐴞𐴘𐴝𐴌 𐴴 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴈𐴥𐴝𐴕𐴝𐴌 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴁𐴡𐴌𐴝𐴃 𐴒𐴡𐴌𐴥𐴞 𐴊𐴠𐴀𐴠𐴌 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴒𐴡𐴙𐴅𐴧𐴤𐴙𐴠𐴊𐴠 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴃𐴧𐴤𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴷 𐴱 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴃 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠 𐴓𐴡𐴃𐴞 , 𐴀𐴞𐴌𐴝𐴕𐴞 𐴇𐴥𐴡𐴑𐴟𐴔𐴡𐴃𐴠 𐴓𐴝𐴒𐴝𐴃𐴝𐴌 𐴔𐴡𐴊𐴡𐴊 𐴒𐴡𐴌𐴥𐴞 𐴎𐴝𐴀𐴝𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴌 𐴁𐴡𐴌 𐴔𐴡𐴏𐴥𐴡𐴙𐴃 𐴑𐴤𐴟𐴓𐴞 𐴊𐴞𐴘𐴥𐴠𐴊𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴝𐴉𐴢 𐴱𐴱

𐴲 𐴱 𐴰 𐴲 𐴐𐴤𐴡𐴕𐴡𐴌 𐴑𐴡𐴗𐴔𐴞 𐴉𐴥𐴡𐴏𐴦𐴝𐴊𐴡𐴌𐴥𐴠 𐴔𐴟𐴓 𐴁𐴝𐴕𐴝𐴘 𐴀𐴥𐴠 𐴀𐴡𐴑𐴃𐴤𐴡𐴌 ” 𐴕𐴥𐴝 𐴏𐴥𐴝 𐴑𐴤𐴝 ” 𐴘𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴡𐴌 𐴔𐴡𐴏𐴥𐴡𐴙𐴃 𐴁𐴡𐴕 𐴒𐴡𐴌𐴥𐴞 𐴊𐴞𐴀𐴞𐴓 , 𐴲 𐴱 𐴁𐴝𐴌𐴥𐴡 𐴁𐴡𐴏𐴥𐴡𐴌 𐴁𐴦𐴝𐴊𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴔𐴠 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴑𐴤𐴟𐴓𐴞 𐴊𐴞𐴘𐴥𐴠 , 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴔𐴡𐴚𐴋𐴤𐴟 𐴁𐴤𐴝𐴐𐴞 𐴌𐴟𐴇𐴝𐴙𐴚𐴇𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴑𐴤𐴞𐴘𐴝𐴓 𐴀𐴝𐴌 𐴁𐴤𐴝𐴉𐴢 𐴑𐴠𐴙𐴏𐴧𐴥𐴟 𐴀𐴡𐴕𐴡𐴌𐴝𐴌 𐴔𐴟𐴀𐴟𐴕𐴃𐴟 𐴌𐴝𐴑𐴤𐴝 𐴎𐴝𐴀𐴝𐴌 , 𐴀𐴥𐴡𐴙𐴃 𐴉𐴝𐴌𐴠 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴑𐴧𐴡𐴓𐴡𐴌𐴥𐴠 𐴊𐴡𐴓𐴝 𐴒𐴡𐴌𐴥𐴞𐴁𐴤𐴝𐴌 𐴔𐴡𐴑𐴏𐴥𐴡𐴊 𐴓𐴡𐴘 𐴑𐴤𐴟𐴓𐴞 𐴊𐴞𐴘𐴥𐴠 , 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓 𐴓𐴝𐴌𐴥𐴝𐴘𐴌 𐴋𐴡𐴌𐴡𐴃𐴧𐴟𐴕 𐴁𐴝𐴏𐴞 𐴓𐴟𐴖𐴝𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴎𐴝𐴕𐴞 𐴉𐴝𐴌𐴞 𐴁𐴦𐴝𐴊𐴠 , 𐴔𐴝𐴙𐴕𐴐𐴤𐴡𐴌 𐴊𐴞𐴓𐴡𐴃 𐴁𐴞𐴐𐴧𐴤𐴝𐴐𐴢 𐴎𐴡𐴔𐴝𐴘 𐴁𐴤𐴡𐴓𐴧𐴝 𐴑𐴤𐴟𐴓𐴞 𐴊𐴞𐴘𐴥𐴠𐴊𐴠 𐴀𐴥𐴡𐴙𐴃 𐴉𐴝𐴌𐴠 , 𐴔𐴟𐴄𐴝 𐴔𐴟𐴄𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴓𐴟𐴏𐴧𐴝𐴕𐴞𐴃 𐴉𐴡𐴣𐴀𐴡𐴏𐴝𐴘 𐴁𐴝𐴌 𐴔𐴡𐴑𐴏𐴥𐴡𐴊 𐴓𐴡𐴘 𐴑𐴤𐴟𐴓𐴞 𐴊𐴞𐴘𐴥𐴠 𐴁𐴡𐴓𐴞 𐴁𐴟𐴎𐴤𐴝 𐴎𐴝𐴀𐴝𐴌 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴄𐴠𐴀𐴠𐴚 𐴌𐴡𐴉𐴥𐴝𐴌 𐴀𐴝𐴁𐴝𐴊𐴞 𐴀𐴠𐴓𐴝𐴑𐴝𐴌 𐴁𐴤𐴡𐴃𐴡𐴌𐴠 , 𐴀𐴟𐴃𐴧𐴡𐴌 𐴒𐴤𐴡𐴎𐴧𐴝𐴃 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴓𐴝𐴌𐴥𐴝𐴘𐴌 𐴄𐴠𐴀𐴠𐴚 𐴴 𐴱 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴌 𐴉𐴟𐴒𐴢 𐴋𐴤𐴝𐴑𐴡𐴃 𐴒𐴤𐴡𐴓𐴞 𐴀𐴝𐴁𐴝𐴊𐴞 𐴀𐴠𐴓𐴝𐴑𐴝𐴃 𐴉𐴡𐴣𐴀𐴡𐴙𐴏𐴧𐴙𐴠 𐴒𐴤𐴡𐴘 , 𐴎𐴠𐴍𐴥𐴠 𐴊𐴡𐴐𐴢 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴉𐴡𐴓𐴡𐴏𐴃𐴞𐴕𐴞 𐴌𐴞𐴉𐴟𐴎𐴞 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 , 𐴀𐴠𐴈𐴥𐴡𐴕𐴡𐴌 𐴏𐴦𐴟𐴌𐴡𐴃 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴐𐴤𐴡𐴇𐴞𐴊 𐴀𐴥𐴡𐴘𐴁𐴤𐴝𐴌 𐴋𐴡𐴌 𐴀𐴥𐴡𐴘𐴧𐴠 , 𐴁𐴞𐴌𐴞𐴄𐴤𐴞𐴆 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠𐴊𐴠 , 𐴀𐴞𐴏𐴌𐴦𐴝𐴙𐴓𐴡𐴌 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴠𐴑𐴎𐴟𐴃𐴞 𐴒𐴟𐴌𐴥𐴟𐴂𐴢 𐴀𐴝𐴌 𐴀𐴠𐴔𐴊𐴝𐴊𐴞 𐴒𐴟𐴌𐴥𐴟𐴂𐴢 𐴀𐴥𐴡𐴑𐴧𐴡𐴓𐴠 𐴌𐴡𐴉𐴥𐴝𐴃 𐴎𐴡𐴁𐴞𐴕𐴞 𐴇𐴥𐴝𐴔𐴓𐴝 𐴕𐴡 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴁𐴝𐴌 𐴁𐴝𐴌 𐴔𐴝𐴕𐴥𐴝 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴘𐴥𐴡 𐴀𐴞𐴏𐴌𐴦𐴝𐴙𐴓𐴠 𐴕𐴡 𐴔𐴝𐴕𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴟𐴖𐴡𐴌𐴡𐴌 𐴃𐴡𐴑𐴧𐴝𐴌 𐴀𐴝𐴊𐴝𐴓𐴡𐴃𐴠 𐴀𐴠 𐴇𐴥𐴝𐴉𐴃𐴝𐴃 𐴀𐴞𐴏𐴌𐴦𐴝𐴙𐴓𐴠 𐴌𐴡𐴉𐴥𐴝𐴃 𐴒𐴡𐴙𐴅𐴧𐴤𐴙𐴠𐴊𐴠 𐴇𐴥𐴝𐴔𐴓𐴝𐴌 𐴁𐴝𐴁𐴡𐴃𐴠 𐴉𐴥𐴟𐴕𐴞𐴁𐴤𐴡 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴟𐴖𐴡𐴌𐴡𐴌 𐴃𐴡𐴑𐴧𐴝𐴌 𐴀𐴝𐴊𐴝𐴓𐴡𐴃𐴠 , 𐴌𐴡𐴉𐴥𐴝𐴃 𐴒𐴡𐴌𐴥𐴠𐴌 𐴊𐴧𐴠 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴌𐴥𐴠 𐴁𐴡𐴕 𐴒𐴡𐴌𐴥𐴝𐴘 𐴁𐴤𐴝𐴌 𐴇𐴥𐴡𐴑𐴟𐴔 𐴕𐴝𐴔𐴥𐴝 𐴎𐴝𐴌𐴞 𐴒𐴡𐴌𐴥𐴞𐴁𐴤𐴡𐴓𐴧𐴝 𐴊𐴡𐴀𐴡𐴙𐴕 𐴀𐴝𐴉𐴌𐴞𐴑𐴤𐴝 𐴘𐴠 𐴊𐴞𐴘𐴥𐴠𐴊𐴠 𐴊𐴡𐴌𐴈𐴥𐴝𐴏𐴡𐴌 𐴁𐴝𐴁𐴡𐴃𐴠 , 𐴁𐴞𐴐𐴤𐴞𐴃 𐴁𐴝𐴌𐴠 𐴀𐴝𐴌 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴉𐴥𐴟𐴕𐴡𐴕𐴞 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴇𐴥𐴠𐴒𐴡𐴃 𐴀𐴝𐴏𐴥𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴊𐴝𐴓𐴡𐴃 ( 𐴀𐴝𐴘 𐴏𐴞 𐴅𐴠 ) 𐴘𐴠 𐴁𐴞𐴐𐴤𐴞𐴃 𐴁𐴝𐴌𐴠 𐴱 𐴊𐴡𐴀𐴡𐴙𐴕 𐴀𐴝𐴉𐴌𐴞𐴑𐴤𐴝𐴌 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓𐴡𐴌 𐴒𐴤𐴞𐴕 𐴉𐴥𐴟𐴕𐴞𐴁𐴤𐴡 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴀𐴞𐴏𐴌𐴦𐴝𐴙𐴓𐴡𐴌 𐴅𐴟𐴖𐴝𐴁 𐴉𐴥𐴟𐴕𐴞𐴁𐴤𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱