𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴇𐴥𐴠𐴋 𐴔𐴝𐴎𐴤𐴞 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴔𐴠 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴌𐴝𐴙𐴃𐴡𐴌 𐴴 𐴁𐴝𐴎𐴠 , 𐴀𐴟𐴑𐴤𐴞𐴘𐴝 𐴴 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴏𐴞/𐴳 𐴁𐴡𐴓𐴡𐴑𐴡𐴃 𐴃𐴤𐴝𐴑𐴤𐴠𐴊𐴠 / 𐴀𐴝𐴁𐴟𐴓 𐴑𐴝𐴏𐴥𐴞𐴔𐴡𐴌 𐴉𐴟𐴖𐴝 / 𐴔𐴟𐴇𐴝𐴔𐴧𐴡𐴊 𐴀𐴞𐴓𐴘𐴝𐴏𐴢 𐴁𐴡𐴐𐴢 𐴳 𐴴 𐴁𐴡𐴏𐴥𐴡𐴌 , 𐴎𐴞𐴁𐴤𐴝 𐴴 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴏𐴞/ 𐴳 𐴁𐴡𐴓𐴡𐴑𐴡𐴌 𐴇𐴥𐴠𐴋 𐴔𐴝𐴎𐴤𐴞 𐴱 𐴀𐴞𐴁𐴤𐴝𐴌𐴥𐴠 𐴰 𐴱 – 𐴵 𐴱 𐴎𐴡𐴕 𐴓𐴡𐴃𐴞 𐴀𐴡𐴏𐴞𐴕𐴧𐴡 𐴔𐴝𐴕𐴥𐴟𐴙𐴐𐴢 𐴈𐴡𐴊𐴦𐴟𐴕𐴠 𐴒𐴤𐴡𐴌𐴡𐴌 𐴊𐴡𐴌𐴎𐴝 𐴁𐴤𐴝𐴚𐴞 𐴊𐴤𐴡𐴌𐴞 𐴁𐴝𐴣𐴊𐴤𐴞 𐴃𐴟𐴓𐴥𐴞 𐴓𐴡𐴘 𐴎𐴝𐴘 , 𐴴 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴀𐴠𐴑𐴆𐴄𐴠𐴕𐴐𐴤𐴠𐴕𐴡𐴌 𐴇𐴥𐴠𐴕𐴋𐴑𐴙𐴝𐴉𐴢 𐴀𐴡𐴉𐴥𐴞𐴏𐴡𐴌 𐴉𐴞𐴏𐴥𐴠 𐴕𐴞𐴎𐴝𐴘 𐴒𐴟𐴓𐴞 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴥𐴠 , 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴎𐴞𐴔𐴧𐴝𐴊𐴝𐴌 ( 𐴀𐴡 𐴏𐴞 ) / 𐴔𐴟𐴇𐴝𐴔𐴧𐴡𐴊 𐴐𐴤𐴡𐴔𐴞𐴔 𐴇𐴟𐴏𐴝𐴠𐴕𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴇𐴥𐴝𐴣𐴃 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴑𐴡𐴁𐴎𐴝𐴃 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴑𐴤𐴟𐴁𐴢 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 , 𐴀𐴝𐴌𐴑𐴝𐴕𐴡𐴌 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃𐴧𐴤𐴟 𐴇𐴥𐴝𐴣𐴃 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴒𐴝 𐴀𐴥𐴞𐴀𐴞𐴕𐴡𐴃 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 , 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴌𐴉𐴥𐴡𐴃𐴧𐴟 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴠𐴓𐴠𐴄𐴠𐴌𐴞 𐴘𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴔𐴝𐴌𐴠𐴌𐴊𐴧𐴠 , 𐴑𐴝𐴅𐴤𐴙𐴝 𐴂𐴥𐴝 , 𐴑𐴝𐴅𐴤𐴙𐴝 𐴂𐴥𐴝 𐴑𐴠𐴕 𐴂𐴡𐴌𐴝𐴚 , 𐴀𐴝𐴓𐴞𐴘𐴥𐴡𐴚 , 𐴁𐴝𐴒𐴧𐴤𐴟𐴕𐴥𐴝 , 𐴓𐴥𐴝𐴏𐴝 𐴀𐴝𐴌 𐴀𐴥𐴡 𐴀𐴡𐴙𐴕𐴧𐴡 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴤𐴟 𐴏𐴥𐴝𐴀𐴝𐴌𐴝 𐴊𐴞𐴀𐴞 𐴁𐴤𐴡𐴓𐴧𐴝 𐴁𐴡𐴓𐴞 𐴈𐴡𐴀𐴡𐴘 , 𐴑𐴠𐴙𐴏𐴧𐴥𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴡𐴘 𐴒𐴞𐴘𐴥𐴡𐴘 𐴀𐴝𐴌 𐴑𐴠𐴙𐴏𐴧𐴥𐴟 𐴔𐴠𐴓𐴠𐴄𐴠𐴌𐴞𐴌 𐴑𐴡𐴁𐴎𐴝 ( 𐴸 ) 𐴓𐴡𐴔𐴁𐴤𐴡𐴌 𐴕𐴠𐴑𐴠𐴌𐴥𐴝 𐴏𐴥𐴡𐴚 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞𐴃 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴦𐴡 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴘 𐴁𐴤𐴡𐴙𐴕 𐴀𐴥𐴝𐴙𐴕 𐴊𐴟𐴀𐴝 𐴒𐴡𐴌𐴥𐴡 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌𐴥𐴠 𐴎𐴝𐴕𐴠 𐴁𐴝𐴏𐴝𐴘 𐴌𐴝𐴑𐴤𐴠 𐴉𐴥𐴝𐴀𐴝𐴕 𐴱𐴱

𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴉𐴝𐴕𐴥𐴞𐴁𐴝𐴕𐴡𐴌 𐴁𐴦𐴝𐴊𐴠 𐴀𐴝𐴉𐴒𐴝𐴕𐴞𐴏𐴃𐴤𐴝𐴕 𐴔𐴡𐴊𐴡𐴊𐴡𐴌 𐴀𐴠𐴕𐴃𐴠𐴎𐴝𐴌𐴡𐴃 𐴱𐴱

𐴀𐴟𐴃𐴧𐴡𐴌 𐴀𐴝𐴉𐴒𐴝𐴕𐴞𐴏𐴃𐴤𐴝𐴕𐴡𐴌 𐴇𐴥𐴝𐴣𐴃 𐴋𐴞𐴐𐴄𐴤𐴞𐴑𐴡𐴃 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴀𐴥𐴡𐴘𐴧𐴠𐴊𐴠 𐴔𐴝𐴌𐴡𐴃𐴧𐴡𐴑 𐴉𐴝𐴕𐴥𐴞𐴁𐴝𐴕𐴡𐴃𐴧𐴤𐴟 𐴁𐴝𐴏𐴞 𐴃𐴤𐴝𐴙𐴑𐴧𐴤𐴙𐴠 𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴎𐴡𐴌𐴟𐴌𐴞 𐴔𐴡𐴊𐴡𐴊 𐴏𐴥𐴝𐴌𐴥𐴝 , 𐴕𐴞𐴎𐴡𐴌 𐴔𐴡𐴊𐴡𐴊 𐴓𐴡𐴘 𐴏𐴡𐴓𐴞 𐴉𐴝𐴌𐴞𐴁𐴤𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 , 𐴐𐴤𐴡𐴌𐴑𐴝𐴌𐴞 𐴀𐴠𐴓𐴝𐴕 𐴔𐴡𐴎𐴞𐴕 𐴰 𐴰 𐴳 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 , 𐴀𐴝𐴌 𐴰 𐴰 𐴶 𐴱 𐴎𐴡𐴕 𐴓𐴡𐴃𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴀𐴝𐴌 𐴰 𐴰 𐴶 𐴲 𐴃𐴤𐴝𐴕 𐴒𐴤𐴡𐴌 𐴁𐴡𐴌𐴁𐴝𐴊 𐴀𐴥𐴡𐴘 𐴒𐴞𐴘𐴥𐴡𐴘 , 𐴀𐴝𐴌 𐴁𐴡𐴀𐴡𐴃 𐴔𐴝𐴕𐴥𐴟𐴙𐴐𐴢 𐴀𐴝𐴘𐴅𐴤𐴡 𐴈𐴥𐴡𐴁𐴡𐴌 𐴏𐴥𐴝𐴌𐴥𐴝 𐴀𐴝𐴌 𐴔𐴝𐴓 𐴐𐴤𐴡𐴔𐴁𐴡𐴃𐴧𐴞 𐴒𐴡𐴌𐴟 𐴏𐴥𐴡𐴀𐴡𐴓 𐴁𐴠𐴐𐴤𐴞 𐴉𐴝𐴕𐴥𐴞𐴌 𐴉𐴥𐴟𐴣𐴖𐴥𐴝𐴣𐴃𐴞 𐴁𐴤𐴝𐴐𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴡𐴌 𐴁𐴟𐴔𐴁𐴝𐴌𐴞𐴌 𐴎𐴡𐴌𐴞𐴘𐴝 𐴒𐴤𐴡𐴎𐴧𐴝𐴃 𐴐𐴤𐴡𐴃 𐴑𐴝𐴌𐴝 𐴵 ٫ 𐴲 𐴷 𐴀𐴞𐴐𐴑𐴟𐴓 𐴁𐴡𐴌𐴁𐴝𐴊𐴢 , 𐴓𐴝𐴑𐴤𐴝 𐴓𐴝𐴑𐴤𐴞 𐴉𐴟𐴖𐴝𐴙𐴕 𐴃𐴦𐴝𐴓𐴞𐴔𐴡𐴃𐴧𐴤𐴟 𐴔𐴝𐴇𐴌𐴦𐴟𐴔 𐴱𐴱

𐴒𐴤𐴡𐴎𐴧𐴝𐴃 𐴓𐴝𐴌𐴥𐴝𐴘 𐴏𐴡𐴓𐴠𐴌𐴊𐴧𐴠 𐴇𐴥𐴝𐴣𐴃 𐴔𐴝𐴐𐴤𐴡𐴌 𐴁𐴠𐴐𐴤𐴞 𐴁𐴤𐴝𐴌𐴝𐴘 𐴒𐴞𐴘𐴥𐴠𐴊𐴠 𐴄𐴝𐴙𐴔 𐴘𐴝𐴀𐴝𐴕𐴡𐴃 , 𐴀𐴞𐴏𐴌𐴦𐴝𐴙𐴓𐴠 𐴁𐴟𐴔𐴁𐴝𐴌𐴞 𐴒𐴡𐴌𐴥𐴞 𐴒𐴤𐴡𐴎𐴧𐴝 𐴁𐴞𐴌𐴝𐴕𐴝 𐴒𐴤𐴡𐴌𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴀𐴥𐴠𐴍𐴠 , 𐴁𐴠𐴐𐴤𐴞 𐴀𐴞𐴐𐴑𐴟𐴓 𐴘𐴟𐴕𐴞𐴁𐴝𐴌𐴏𐴞𐴄𐴤𐴞 𐴘𐴥𐴡 𐴁𐴡𐴌𐴁𐴝𐴊 𐴀𐴥𐴡𐴘 𐴒𐴞𐴘𐴠 𐴒𐴤𐴡𐴘 , 𐴑𐴠𐴙𐴏𐴧𐴥𐴟 𐴁𐴝𐴑𐴞 𐴃𐴤𐴝𐴑𐴤𐴞𐴓𐴠 𐴘𐴥𐴡 𐴀𐴥𐴞𐴀𐴞𐴕 𐴈𐴝𐴔𐴡𐴃 𐴕𐴡 𐴀𐴝𐴘𐴧𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴔𐴡𐴕𐴃𐴡𐴌 𐴉𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓 𐴓𐴡𐴘 𐴑𐴠𐴙𐴏𐴧𐴥𐴟 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴇𐴥𐴝𐴔 𐴊𐴡𐴌𐴊𐴞 𐴌𐴝𐴑𐴤𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 , 𐴒𐴤𐴡𐴎𐴧𐴝𐴌 𐴁𐴤𐴟𐴃𐴤𐴡𐴌𐴠 𐴀𐴥𐴡𐴀𐴡𐴑 𐴘𐴝𐴃𐴤𐴡 𐴒𐴤𐴡𐴎𐴧𐴝𐴌 𐴁𐴝𐴀𐴝𐴌𐴠 𐴀𐴥𐴡𐴀𐴡𐴑 𐴃𐴦𐴝𐴓𐴞𐴔𐴡𐴌 𐴏𐴥𐴞𐴓𐴏𐴞𐴓𐴝 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱