𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴆𐴠𐴀𐴠𐴓 𐴔𐴝𐴙𐴅𐴧𐴤𐴙𐴠 , 𐴕𐴥𐴠𐴕𐴌𐴝 𐴒𐴤𐴟𐴕 𐴉𐴝𐴌𐴝 𐴉𐴟𐴌𐴝 𐴊𐴞𐴘𐴥𐴠 𐴱𐴱

𐴓𐴝𐴌𐴥𐴝𐴘𐴌 𐴋𐴡𐴌𐴡𐴃𐴧𐴤𐴟 𐴁𐴝𐴏𐴞 𐴃𐴤𐴝𐴑𐴤𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 𐴃𐴡𐴀𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴀𐴠𐴏𐴥𐴠𐴊𐴠 𐴇𐴥𐴡𐴑𐴟𐴔𐴡𐴃𐴞 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 , 𐴔𐴠 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑 𐴌𐴝𐴙𐴃𐴡𐴌 𐴀𐴡𐴕𐴟𐴔𐴝𐴕𐴞𐴑 𐴐𐴤𐴝𐴀𐴝𐴌𐴡 𐴸 𐴁𐴝𐴎𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴰 𐴴 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴀𐴝𐴌 𐴈𐴡𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴈𐴥𐴝𐴄𐴞 𐴁𐴤𐴝𐴉𐴠 𐴎𐴝𐴕𐴝 𐴕𐴥𐴡 𐴎𐴝𐴀𐴝 , 𐴀𐴝𐴌 𐴄𐴡𐴀𐴡𐴕𐴡𐴌 𐴀𐴝𐴃𐴡𐴌 𐴈𐴝𐴣𐴏𐴥𐴡𐴌 𐴉𐴝𐴌𐴝 𐴘𐴥𐴡 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 , 𐴉𐴝𐴌𐴝 𐴀𐴥𐴞𐴀𐴞𐴕𐴡𐴌 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴀𐴥𐴡 𐴋𐴝𐴑𐴄𐴡𐴌 𐴈𐴥𐴝𐴕𐴝𐴌 𐴒𐴤𐴞𐴌𐴝 𐴁𐴤𐴟𐴃𐴤𐴡𐴌𐴠 𐴏𐴥𐴝𐴀𐴝𐴌𐴝 𐴓𐴡𐴘𐴢 𐴃𐴤𐴝𐴙𐴑𐴧𐴤𐴙𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴄𐴡𐴀𐴡𐴕 𐴏𐴥𐴝𐴌𐴞 𐴊𐴤𐴝𐴌 𐴒𐴤𐴡𐴘 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴄𐴡𐴀𐴡𐴕𐴡𐴌𐴥𐴠 𐴉𐴝𐴑𐴧𐴤𐴝𐴘 𐴉𐴝𐴑𐴧𐴤𐴝𐴘 𐴒𐴤𐴟𐴌𐴞 𐴒𐴤𐴟𐴌𐴞 𐴁𐴡𐴕 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴇𐴥𐴠𐴉𐴝𐴎𐴡𐴃𐴡𐴌 𐴁𐴝𐴁𐴡𐴃𐴠 𐴀𐴡𐴐𐴤𐴝𐴕𐴃𐴤𐴞𐴃 𐴉𐴡𐴌𐴞 𐴁𐴠𐴐𐴤𐴝 𐴁𐴠𐴐𐴤𐴞 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴄𐴡𐴀𐴡𐴕 𐴏𐴥𐴝𐴌𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴓𐴡𐴘 𐴀𐴝𐴀𐴝 𐴎𐴝𐴀𐴝 𐴓𐴝𐴒𐴝𐴖 𐴌𐴝𐴑𐴤𐴠𐴊𐴠 𐴉𐴟𐴓 𐴏𐴝𐴙𐴌 𐴒𐴤𐴗𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴤𐴝𐴚𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 , 𐴔𐴠 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴒𐴤𐴡𐴓𐴝 𐴕𐴦𐴠𐴓𐴝 𐴁𐴡𐴕 𐴒𐴡𐴌𐴥𐴞 𐴊𐴡𐴀𐴡𐴕𐴠 , 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴉𐴡𐴌𐴝𐴕𐴡𐴌 𐴇𐴥𐴠𐴉𐴝𐴎𐴡𐴃𐴡𐴌𐴥𐴠 𐴋𐴡𐴌𐴝𐴘 , 𐴄𐴡𐴀𐴡𐴕𐴡𐴌 𐴔𐴡𐴒𐴢 𐴀𐴝𐴕𐴊𐴝𐴎𐴠 𐴁𐴠𐴒𐴧𐴤𐴟𐴕 𐴊𐴤𐴝𐴘 𐴒𐴞𐴘𐴥𐴡𐴘 , 𐴀𐴠𐴈𐴥𐴡𐴕 𐴐𐴤𐴡𐴃 𐴑𐴝𐴌𐴝 ٪ 𐴰 𐴲 𐴎𐴡𐴕 𐴀𐴥𐴟𐴊𐴧𐴝 𐴕𐴥𐴝𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴂𐴠𐴄𐴌𐴟𐴓 , 𐴊𐴝𐴁𐴝𐴘 𐴀𐴝𐴌 𐴈𐴥𐴝𐴘𐴁𐴝𐴌 𐴏𐴥𐴝𐴔𐴝𐴕 𐴉𐴥𐴟𐴌𐴝𐴘 𐴒𐴞𐴘𐴥𐴡𐴘 𐴱𐴱

𐴀𐴝𐴌𐴑𐴝𐴕 𐴓𐴡𐴘 𐴓𐴝𐴃𐴧𐴤𐴝 𐴎𐴟𐴑𐴝𐴎𐴟𐴑 𐴌𐴝𐴑𐴤𐴠𐴊𐴠 𐴉𐴝𐴕𐴥𐴞𐴌 𐴌𐴝𐴏𐴧𐴝 , 𐴉𐴥𐴟𐴖𐴝𐴕𐴝𐴌 𐴌𐴝𐴏𐴧𐴝 𐴁𐴠𐴒𐴧𐴤𐴞𐴕 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴵 𐴔𐴝𐴐𐴤𐴡𐴌 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 , 𐴀𐴥𐴠𐴔 , 𐴀𐴝𐴙𐴑𐴧𐴙𐴝𐴁 , 𐴑𐴙𐴡𐴑𐴄𐴡 𐴀𐴝𐴌 𐴔𐴠𐴌𐴠 𐴁𐴟𐴕 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 , 𐴔𐴟𐴓 𐴈𐴥𐴝𐴘𐴁𐴝𐴌 𐴏𐴞𐴏𐴢 𐴀𐴝𐴌 𐴊𐴝𐴁𐴝𐴘 𐴀𐴥𐴡𐴑𐴧𐴡𐴓𐴡𐴌 𐴊𐴝𐴔 𐴁𐴠𐴐𐴤𐴞 𐴁𐴝𐴌𐴥𐴞 𐴎𐴡𐴀𐴡𐴕𐴠 𐴑𐴞𐴕𐴃𐴠 𐴁𐴠𐴐𐴤𐴞 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴌𐴠𐴕𐴒𐴟𐴕 – 𐴀𐴝𐴙𐴑𐴧𐴙𐴝𐴁𐴢 𐴉𐴝𐴕𐴥𐴞𐴌 𐴌𐴝𐴏𐴧𐴝 𐴁𐴝𐴀𐴝𐴘 𐴂𐴝𐴁𐴡𐴕𐴊𐴞𐴌 𐴏𐴥𐴝𐴣𐴀𐴝𐴃𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 , 𐴀𐴝𐴙𐴑𐴧𐴙𐴝𐴁𐴢 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴉𐴝𐴌𐴠𐴊𐴠 𐴀𐴡𐴙𐴕𐴧𐴡 𐴌𐴝𐴏𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓 𐴓𐴝𐴔𐴝 𐴀𐴟𐴍𐴥𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴡𐴕𐴠 𐴔𐴝𐴓𐴡𐴌 𐴊𐴝𐴔 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴦𐴠𐴐𐴢 𐴀𐴥𐴡𐴘𐴧𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴘𐴠 𐴒𐴤𐴡𐴎𐴧𐴝𐴃 𐴉𐴡𐴖𐴌𐴥𐴞 𐴓𐴝𐴌𐴥𐴝𐴘 𐴁𐴡𐴕 𐴀𐴝𐴌 𐴈𐴡𐴊𐴞 𐴀𐴥𐴡𐴑𐴧𐴡𐴓𐴡𐴌 𐴌𐴠𐴇𐴥𐴝𐴘 𐴒𐴡𐴌𐴥𐴞𐴁𐴤𐴝𐴌 𐴀𐴠𐴉𐴞𐴓 𐴒𐴡𐴙𐴅𐴧𐴤𐴙𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴅𐴡𐴕𐴡𐴌𐴥𐴡𐴓 𐴏𐴥𐴠𐴒𐴠𐴄𐴠𐴌𐴞 / 𐴀𐴠𐴕𐴃𐴡𐴕𐴞𐴘𐴟 𐴒𐴠𐴄𐴌𐴥𐴠𐴏𐴠 𐴱 𐴒𐴤𐴡𐴎𐴧𐴝𐴃 𐴔𐴝𐴎𐴤𐴠 𐴏𐴡𐴓𐴠𐴌𐴊𐴧𐴠 𐴀𐴞𐴏𐴌𐴦𐴝𐴙𐴓 – 𐴇𐴝𐴔𐴦𐴝𐴏𐴢 𐴓𐴝𐴌𐴥𐴝𐴘 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴁𐴡𐴕 𐴒𐴡𐴌𐴥𐴞 , 𐴑𐴟𐴓𐴠 𐴈𐴡𐴊𐴞 𐴀𐴥𐴡𐴑𐴧𐴡𐴓𐴡𐴌 𐴌𐴠𐴇𐴥𐴝𐴘 𐴀𐴝𐴌 𐴀𐴞𐴏𐴌𐴦𐴝𐴙𐴓𐴠 𐴒𐴤𐴠𐴌𐴖𐴝 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 𐴊𐴠 𐴉𐴡𐴓𐴡𐴏𐴃𐴞𐴕𐴞 𐴀𐴠𐴓𐴑𐴝𐴃 , 𐴁𐴦𐴠𐴐𐴢 𐴒𐴡𐴌𐴥𐴞 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡𐴓𐴧𐴝 𐴈𐴡𐴘𐴧𐴥𐴠 𐴱𐴱

𐴀𐴞𐴕𐴋𐴟𐴕𐴞𐴆𐴤𐴙𐴝𐴃 𐴉𐴝𐴕𐴥𐴞 𐴁𐴝𐴕𐴠 𐴴 𐴳 𐴎𐴡𐴕𐴡𐴌 𐴔𐴡𐴖𐴃 , 𐴶 𐴱 𐴎𐴡𐴕 𐴀𐴥𐴝𐴣𐴎𐴞 𐴒𐴞𐴘𐴥𐴡𐴘 𐴱𐴱

𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴉𐴡𐴏𐴥𐴞𐴔 𐴋𐴤𐴝𐴑𐴤𐴡𐴃 𐴀𐴝𐴃𐴤𐴞𐴑𐴧𐴙𐴝 𐴀𐴦𐴡𐴙𐴕𐴞 𐴉𐴝𐴀𐴝𐴌 𐴉𐴥𐴟𐴍𐴥𐴞 𐴁𐴦𐴝𐴊𐴠 , 𐴏𐴥𐴡𐴌𐴡𐴊 𐴓𐴝𐴁𐴝 𐴁𐴝𐴀𐴝𐴘 𐴀𐴝𐴘𐴧𐴥𐴡𐴕𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴎𐴤𐴡𐴌 𐴁𐴡𐴌𐴏𐴦𐴝𐴃 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴉𐴝𐴕𐴥𐴞𐴁𐴤𐴝𐴕 𐴀𐴥𐴡𐴘 , 𐴈𐴡𐴔𐴡𐴃 𐴴 𐴳 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴶 𐴱 𐴎𐴡𐴕 𐴓𐴡𐴃𐴞 𐴃𐴟𐴖𐴝𐴘 𐴕𐴡 𐴉𐴝𐴀𐴝𐴌 𐴁𐴡𐴓𐴞 𐴱 𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃𐴡𐴌 𐴀𐴡𐴉𐴥𐴞𐴏𐴡𐴃𐴧𐴟 𐴔𐴠 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱