𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴅𐴟𐴖𐴝𐴕 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴢 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 / 𐴔𐴟𐴇𐴝𐴔𐴧𐴡𐴊 𐴀𐴝𐴓𐴡𐴔 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴠𐴑 𐴎𐴡𐴕𐴡𐴌𐴥𐴠 , 𐴔𐴠 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴐𐴤𐴝𐴀𐴝𐴌𐴡 𐴸 𐴁𐴝𐴎𐴠 , 𐴔𐴟𐴀𐴟𐴏𐴠𐴕𐴞 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴃 𐴒𐴟𐴓𐴞 𐴔𐴝𐴌𐴞 , 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴠 , 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴀𐴝𐴓𐴡𐴔 𐴄𐴠𐴑𐴕𐴝𐴉𐴡𐴌 𐴕𐴥𐴞𐴓𐴝 𐴘𐴟𐴕𐴞𐴘𐴡𐴕𐴡𐴌 𐴔𐴟𐴀𐴟𐴏𐴠 𐴌𐴠𐴅𐴞𐴏𐴄𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 ( 𐴀𐴞 ) 𐴁𐴡𐴓𐴡𐴑𐴡𐴌 𐴁𐴤𐴝𐴐𐴞𐴕𐴊𐴝 , 𐴄𐴠𐴑𐴕𐴝𐴉𐴢 𐴃𐴤𐴝𐴕𐴝𐴌 𐴉𐴟𐴓𐴞𐴐𐴡𐴌 𐴁𐴡𐴌𐴡 ( 𐴀𐴡 𐴏𐴞 ) / 𐴔𐴟𐴇𐴝𐴔𐴧𐴡𐴊 𐴀𐴟𐴏𐴔𐴝𐴕 𐴒𐴡𐴕𐴞 𐴘𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴀𐴝𐴌 𐴔𐴡𐴚𐴋𐴤𐴟𐴃 𐴓𐴝𐴌𐴥𐴝𐴘 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴈𐴡𐴍𐴥𐴠 𐴎𐴝𐴀𐴝𐴌 𐴉𐴝𐴃𐴧𐴝 𐴕𐴥𐴝𐴘 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴡𐴚𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 , 𐴔𐴠 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴹 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 𐴑𐴤𐴟𐴁𐴢 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 , 𐴆𐴝𐴓𐴞𐴐𐴢 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴋𐴡𐴌 𐴏𐴥𐴝𐴌𐴥𐴝 𐴎𐴝𐴒𐴝𐴌 𐴀𐴥𐴞𐴑𐴧𐴙𐴝 𐴎𐴝𐴘 𐴃𐴤𐴝𐴑𐴤𐴝 𐴉𐴡𐴌𐴠𐴌 𐴁𐴡𐴓𐴞 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴁𐴠𐴐𐴤𐴞 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 , 𐴑𐴝𐴙𐴅𐴧𐴤𐴙𐴝 𐴂𐴥𐴝 , 𐴀𐴝𐴓𐴞𐴘𐴥𐴡𐴚 , 𐴁𐴝𐴒𐴧𐴤𐴕𐴥𐴝 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴁𐴠𐴐𐴤𐴞 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 , 𐴂𐴥𐴡𐴚 𐴎𐴤𐴝 𐴀𐴝𐴌 𐴓𐴥𐴝𐴁𐴡 𐴎𐴤𐴝𐴀𐴝 , 𐴉𐴝𐴌𐴝 𐴀𐴞𐴀𐴞𐴕 𐴐𐴤𐴡𐴣𐴀𐴡 𐴀𐴝𐴌𐴀𐴥𐴡 𐴊𐴡𐴐𐴢 𐴉𐴟𐴕𐴊𐴤𐴡𐴌𐴡 𐴉𐴝𐴌𐴝𐴃𐴧𐴤𐴟 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴤𐴝𐴘 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴌𐴟𐴇𐴝𐴙𐴚𐴒𐴙𐴝𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴙𐴅𐴧𐴤𐴙𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴀𐴝𐴓𐴞𐴘𐴥𐴡𐴚𐴡𐴌 𐴀𐴝𐴃𐴌𐴝𐴉𐴡𐴌 𐴌𐴟𐴇𐴝𐴙𐴚𐴒𐴙 𐴉𐴝𐴌𐴝 𐴑𐴝𐴑𐴤𐴠𐴄 𐴁𐴤𐴠𐴄 𐴀𐴝𐴌 𐴁𐴝𐴒𐴧𐴤𐴟𐴕𐴥𐴝𐴃 , 𐴔𐴡𐴒𐴢 𐴁𐴝𐴒𐴢 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴔𐴠 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴀𐴥𐴡𐴘𐴧𐴠𐴊𐴠 𐴓𐴝𐴌𐴥𐴝𐴘𐴃 , 𐴈𐴡𐴔𐴡𐴃 𐴏𐴝𐴙𐴌 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴙𐴅𐴧𐴤𐴙𐴠 𐴀𐴝𐴌 𐴀𐴡𐴕𐴟𐴔𐴝𐴕𐴞𐴑 𐴷 𐴳 𐴎𐴡𐴕𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴉𐴒𐴝𐴕𐴞𐴏𐴃𐴤𐴝𐴕𐴡𐴃 𐴉𐴝𐴕𐴥𐴞 𐴁𐴝𐴕𐴠 𐴰 𐴵 𐴎𐴡𐴕𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴝𐴉𐴒𐴝𐴕𐴞𐴏𐴃𐴤𐴝𐴕𐴡𐴌 𐴀𐴟𐴃𐴧𐴡𐴌 𐴀𐴞𐴏𐴧𐴥𐴝𐴌 𐴁𐴡𐴓𐴒𐴝𐴕 𐴋𐴞𐴐𐴄𐴤𐴞𐴑𐴡𐴌 𐴵 𐴏𐴥𐴝𐴕 𐴑𐴠𐴌𐴝𐴙𐴚𐴡𐴃 , 𐴔𐴠 𐴔𐴝𐴐𐴤𐴡𐴌 𐴰 𐴱 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴁𐴠𐴐𐴤𐴞 𐴎𐴤𐴡𐴌 𐴊𐴡𐴀𐴡𐴕𐴠 𐴉𐴝𐴕𐴥𐴞 𐴁𐴝𐴕 𐴀𐴥𐴡𐴘 , 𐴔𐴠 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑𐴡𐴃 𐴈𐴡𐴔𐴡𐴃 𐴰 𐴵 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴰 𐴰 𐴱 𐴎𐴡𐴕𐴡𐴌 𐴁𐴠𐴐𐴤𐴞 𐴎𐴡𐴈𐴥𐴡𐴔 𐴉𐴝𐴘𐴧𐴥𐴠 𐴁𐴡𐴓𐴞 , 𐴒𐴤𐴡𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴥𐴡𐴃𐴧𐴟 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴔𐴡𐴌𐴝𐴌 𐴒𐴡𐴕𐴝 𐴀𐴝𐴌𐴀𐴥𐴡 𐴁𐴝𐴌𐴥𐴞𐴃 𐴉𐴝𐴌𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱