𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 ( 𐴘𐴟 𐴀𐴠𐴏𐴢 𐴀𐴝𐴘 𐴂𐴞 )𐴌 𐴌𐴠𐴂𐴟𐴄 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴏𐴥𐴝𐴀𐴝𐴌𐴝 𐴔𐴡𐴅𐴁𐴟𐴌 𐴀𐴥𐴡𐴘 , 𐴓𐴝𐴌𐴥𐴝𐴘𐴃 𐴔𐴝𐴎𐴤𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴀𐴥𐴟𐴀𐴝 𐴉𐴡𐴌𐴠𐴌 𐴁𐴡𐴓𐴞 , 𐴀𐴝𐴔𐴠𐴌𐴞𐴑𐴝𐴌 𐴐𐴤𐴝𐴕𐴃𐴞 𐴀𐴞𐴕𐴏𐴄𐴞𐴄𐴙𐴟𐴄 ( 𐴘𐴟 𐴀𐴠𐴏𐴢 𐴀𐴝𐴘 𐴂𐴞 ) 𐴘𐴠 𐴕𐴦𐴠𐴓𐴝𐴘𐴧𐴥𐴠𐴊𐴠 𐴌𐴠𐴂𐴟𐴄𐴡𐴃 𐴓𐴠𐴙𐴑𐴧𐴤𐴙𐴠 , 𐴀𐴠𐴈𐴥𐴡𐴕 𐴑𐴤𐴟𐴁𐴢 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴡𐴚 𐴐𐴤𐴡𐴣𐴀𐴡 𐴀𐴝𐴌𐴑𐴝𐴕𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴑𐴟𐴓𐴠 𐴇𐴥𐴝𐴓𐴡𐴃 𐴎𐴡𐴌𐴞𐴉𐴢 𐴒𐴡𐴌𐴥𐴞 𐴏𐴝𐴀𐴝𐴘 𐴁𐴦𐴝𐴊𐴠 , 𐴔𐴠 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴌𐴠𐴂𐴟𐴄 𐴘𐴝𐴀𐴝𐴕 𐴕𐴦𐴠𐴓𐴝𐴘𐴧𐴥𐴠𐴊𐴠 , 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴈𐴥𐴝𐴕𐴝 𐴉𐴞𐴕𐴝 𐴐𐴤𐴡𐴣𐴀𐴡 𐴈𐴡𐴃𐴡 𐴋𐴦𐴡𐴙𐴓𐴧𐴝 𐴎𐴟𐴓𐴥𐴟𐴔 𐴁𐴡𐴊𐴧𐴝𐴐𐴢 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴧𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴡𐴓𐴝𐴎𐴟𐴌𐴞 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴘 𐴓𐴝𐴌𐴥𐴝𐴘𐴌 𐴔𐴟𐴀𐴟𐴔𐴡𐴌 𐴈𐴝𐴃𐴝𐴌𐴡𐴃 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟 𐴔𐴝𐴚𐴓𐴝 𐴒𐴞𐴌𐴥𐴞 𐴉𐴝𐴌𐴝𐴃𐴧𐴤𐴟 𐴊𐴠𐴔𐴝𐴒𐴞 𐴁𐴞𐴘𐴝𐴌𐴝𐴙𐴔𐴧𐴙𐴝 𐴐𐴤𐴡𐴣𐴀𐴡 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴔𐴡𐴚𐴋𐴤𐴟 𐴔𐴝𐴚𐴓𐴝 𐴒𐴞𐴌𐴥𐴞 𐴉𐴝𐴌𐴝𐴃𐴧𐴤𐴟 𐴈𐴡𐴕𐴥𐴡 𐴈𐴡𐴏𐴥𐴟𐴌𐴞 𐴏𐴥𐴝𐴌𐴝 𐴃𐴞𐴕 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 , 𐴔𐴠 𐴔𐴥𐴝𐴐𐴡𐴌 𐴴 𐴃𐴝𐴌𐴥𐴞𐴑𐴡𐴃 𐴀𐴥𐴝𐴣𐴎𐴡𐴙𐴕𐴧𐴝 𐴀𐴝𐴕𐴊𐴝𐴎𐴠 𐴶 𐴁𐴝𐴎𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴠 𐴒𐴤𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕 𐴁𐴡𐴘𐴡𐴐𐴑𐴤𐴡 𐴔𐴝𐴕𐴥𐴟𐴙𐴐𐴢 , / 𐴕𐴟𐴌 𐴀𐴝𐴓𐴡𐴔 ( 𐴁𐴝𐴉𐴢 ) 𐴀𐴥𐴝𐴇𐴔𐴡𐴊 𐴐𐴤𐴡𐴌𐴞𐴉𐴢 𐴁𐴡𐴐𐴢 𐴰 𐴵 𐴁𐴡𐴏𐴥𐴡𐴌 / 𐴌𐴥𐴝𐴇𐴔𐴡𐴃𐴟𐴓𐴧𐴝𐴇𐴢 ( 𐴁𐴝𐴉𐴢 ) 𐴀𐴝𐴁𐴊𐴟𐴌 𐴌𐴥𐴝𐴇𐴔𐴝𐴕 𐴁𐴡𐴐𐴢 𐴲 𐴵 𐴁𐴡𐴏𐴥𐴡𐴌 / 𐴔𐴟𐴈𐴃𐴝𐴌 𐴀𐴥𐴝𐴇𐴔𐴡𐴊 ( 𐴁𐴝𐴉𐴢 ) 𐴀𐴡𐴏𐴥𐴞𐴀𐴟𐴓𐴧𐴝𐴇𐴢 𐴁𐴡𐴐𐴢 𐴳 𐴵 𐴁𐴡𐴏𐴥𐴡𐴌 , 𐴀𐴠 𐴃𐴞𐴕 𐴎𐴡𐴕𐴡𐴌 𐴁𐴤𐴟𐴃𐴡𐴌𐴠 𐴊𐴟𐴘 𐴎𐴡𐴕 𐴊𐴠𐴔𐴝𐴒𐴞 𐴁𐴞𐴘𐴝𐴌𐴝𐴙𐴔𐴧𐴙𐴝 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴐𐴗𐴠 𐴌𐴝𐴚 𐴀𐴥𐴠 𐴉𐴝𐴌𐴝𐴃 𐴒𐴤𐴡𐴌 𐴈𐴡𐴊𐴞𐴒𐴧𐴤𐴞𐴕 𐴉𐴟𐴌𐴝 𐴊𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟 𐴐𐴤𐴡𐴀𐴡𐴌𐴡𐴌 𐴊𐴡𐴀𐴡𐴙𐴕𐴠 𐴰 𐴵 𐴱 𐴐𐴤𐴝𐴕 𐴓𐴡𐴃𐴞 𐴒𐴤𐴡𐴌 𐴀𐴝𐴏𐴥𐴠 𐴊𐴠 , 𐴐𐴗𐴙𐴠 𐴌𐴝𐴚 𐴀𐴥𐴠 𐴉𐴝𐴌𐴝𐴃 𐴔𐴠 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴀𐴥𐴝𐴌𐴡 𐴏𐴝𐴙𐴌 𐴁𐴝𐴎𐴠 , 𐴔𐴠𐴓𐴠𐴄𐴠𐴌𐴞 𐴒𐴤𐴡𐴓𐴞 𐴀𐴦𐴡𐴙𐴕 𐴓𐴝𐴒𐴝𐴘 𐴊𐴞𐴀𐴞 𐴉𐴟𐴌𐴝 𐴊𐴞𐴘𐴥𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴐𐴗𐴠 𐴌𐴝𐴚 𐴀𐴥𐴠 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴤𐴝𐴣𐴄𐴞 𐴓𐴡𐴘 𐴓𐴝𐴌𐴥𐴝𐴘 𐴒𐴡𐴙𐴅𐴧𐴤𐴞𐴓 , 𐴓𐴝𐴌𐴥𐴝𐴘𐴌 𐴁𐴦𐴝𐴊𐴠 𐴔𐴠𐴓𐴠𐴄𐴠𐴌𐴞 𐴒𐴤𐴡𐴓𐴞 𐴉𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴌𐴡𐴉𐴥𐴝 𐴒𐴠𐴙𐴄 𐴑𐴤𐴟𐴓𐴞 𐴔𐴡𐴊𐴡𐴊 𐴉𐴡𐴣𐴀𐴡𐴏𐴝𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴊𐴞𐴀𐴞𐴁𐴡𐴓𐴧𐴥𐴝 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴈𐴡𐴘𐴧𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴠 𐴌𐴡𐴉𐴥𐴝 𐴁𐴡𐴖𐴋𐴝𐴌 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴡𐴕𐴡𐴌 𐴁𐴦𐴝𐴊𐴠 , 𐴀𐴠𐴈𐴥𐴡𐴕 𐴔𐴡𐴊𐴡𐴊 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴈𐴥𐴠𐴊𐴔𐴡𐴃𐴡𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴒𐴤𐴡𐴙𐴓𐴃𐴡 𐴊𐴞𐴀𐴞𐴁𐴡𐴓𐴧𐴥𐴝 , 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴞𐴏𐴌𐴦𐴝𐴙𐴓𐴡𐴌𐴥𐴠 𐴈𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴕𐴃𐴡𐴌 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴟𐴃𐴦𐴝𐴓𐴧𐴠𐴑 𐴔𐴡𐴊𐴡𐴊𐴡𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴇𐴥𐴝𐴣 𐴅𐴟𐴖𐴝𐴁𐴢 𐴕𐴥𐴡 𐴀𐴥𐴡𐴀𐴡 𐴁𐴡𐴓𐴞 , / 𐴔𐴥𐴝𐴏𐴢 𐴓𐴝 𐴘𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴹 𐴱 𐴴 𐴎𐴡𐴕 𐴇𐴥𐴝𐴅𐴞 𐴓𐴡𐴘 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴠𐴑𐴀𐴡𐴔 𐴉𐴥𐴠𐴓𐴝𐴙𐴄𐴢 𐴱𐴱

𐴹 𐴱 𐴴 𐴎𐴡𐴕 𐴇𐴥𐴝𐴅𐴞 𐴓𐴡𐴘 𐴔𐴠 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴰 𐴲 : 𐴷 𐴰 𐴔𐴞𐴓𐴥𐴡𐴄𐴡𐴃 , 𐴁𐴝𐴚𐴓𐴝𐴊𐴠𐴐𐴢 𐴘𐴠𐴀𐴝𐴌 𐴓𐴝𐴙𐴕𐴡𐴌 ( 𐴱 𐴰 𐴳 𐴳 ) 𐴁𐴞 𐴅𐴞 𐴉𐴥𐴠𐴓𐴥𐴝𐴙𐴄 𐴏𐴥𐴡𐴀𐴟𐴊𐴞 𐴀𐴝𐴌𐴡𐴁 𐴌𐴡𐴖𐴝𐴕𐴝 𐴊𐴞𐴘𐴥𐴠 , 𐴋𐴤𐴝𐴑𐴝𐴌 𐴇𐴥𐴡𐴎𐴡𐴌𐴡𐴃 𐴐𐴤𐴝 𐴅𐴡𐴓𐴝𐴓 𐴀𐴝𐴕𐴃𐴡𐴌𐴎𐴝𐴃𐴞𐴑 𐴇𐴥𐴝𐴁𐴝𐴌 𐴔𐴝𐴍𐴡𐴃𐴧𐴤𐴟 , 𐴊𐴤𐴡𐴌𐴔𐴡 𐴀𐴟𐴎𐴞𐴌 / 𐴉𐴥𐴡𐴌𐴞𐴊𐴟𐴓 𐴇𐴥𐴡𐴑 𐴈𐴥𐴝𐴕𐴠 𐴵 𐴴 𐴴 𐴱 𐴇𐴥𐴞𐴅𐴞𐴌𐴞 𐴐𐴤𐴡𐴕 𐴇𐴥𐴡𐴅𐴡𐴌 𐴀𐴠𐴑𐴀𐴡𐴔 𐴉𐴥𐴠𐴓𐴥𐴝𐴙𐴄 𐴏𐴥𐴝𐴣𐴀𐴝𐴃 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱