𐴁𐴤𐴟𐴏𐴞𐴊𐴡𐴚 𐴏𐴝 𐴑𐴝 𐴑𐴤𐴝 ( 𐴵 𐴱 ) 𐴡𐴌 𐴊𐴟𐴘𐴀𐴡𐴔 𐴄𐴤𐴠𐴀 𐴔𐴥𐴟 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴣𐴏𐴥𐴠 𐴏𐴥𐴠𐴓𐴠𐴕𐴄𐴝𐴌 𐴱𐴱

𐴀𐴝𐴌𐴑𐴝𐴕 , 𐴁𐴤𐴟𐴏𐴞𐴊𐴡𐴚𐴡𐴌 𐴏𐴝 𐴑𐴝 𐴑𐴤𐴝 𐴃𐴝𐴕𐴥𐴝 𐴆𐴤𐴙𐴟𐴑𐴡𐴌𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴠 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑 𐴓𐴡𐴃𐴞 𐴒𐴤𐴞𐴌𐴞 𐴊𐴤𐴡𐴌𐴞 , 𐴑𐴤𐴟𐴁 𐴎𐴟𐴌𐴠 𐴓𐴝𐴌𐴥𐴝𐴘 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴔𐴠 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃 , 𐴊𐴟𐴘𐴀𐴡𐴔 𐴄𐴤𐴠𐴀 𐴔𐴥𐴟 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴏𐴥𐴠𐴓𐴠𐴕𐴄𐴝𐴌 𐴀𐴥𐴡𐴘 𐴒𐴞𐴘𐴥𐴡𐴘 , 𐴇𐴥𐴝𐴓𐴡𐴃 𐴘𐴥𐴝𐴀𐴝𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴞𐴋𐴞𐴘𐴟 𐴁𐴝𐴕𐴝𐴘 𐴏𐴟𐴆𐴠𐴓 𐴔𐴞𐴋𐴞𐴘𐴝𐴃 𐴏𐴥𐴝𐴌𐴞 𐴊𐴞𐴘𐴠 , 𐴎𐴠 𐴁𐴞𐴋𐴞𐴘𐴟𐴃 𐴐𐴤𐴡𐴃𐴝 𐴐𐴤𐴡𐴃𐴞 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴃𐴝𐴌𐴥𐴝𐴌 𐴒𐴤𐴡𐴌𐴒𐴟𐴐𐴧𐴤𐴞 𐴀𐴝𐴌 𐴎𐴡𐴈𐴥𐴡𐴔 𐴉𐴝𐴘𐴧𐴝 𐴀𐴥𐴡𐴑𐴧𐴡𐴓 𐴀𐴝𐴌 𐴇𐴥𐴡𐴑𐴟𐴔𐴡𐴃𐴠 𐴁𐴡𐴓𐴝𐴎𐴟𐴌𐴞 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴘𐴥𐴡 𐴊𐴠𐴈𐴥𐴝 𐴎𐴝𐴀𐴝𐴌 𐴱𐴱

𐴔𐴡𐴚𐴋𐴟𐴃 𐴇𐴥𐴡𐴑𐴟𐴔𐴡𐴃 𐴉𐴝𐴄𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴓𐴝𐴌𐴥𐴝𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴊𐴟𐴘 𐴎𐴡𐴕 𐴒𐴤𐴝𐴙𐴓 , 𐴃𐴞𐴕 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴉𐴝𐴌𐴝 𐴏𐴥𐴝𐴌𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃𐴧𐴟 𐴃𐴞𐴕 𐴔𐴝𐴙𐴓 𐴀𐴟𐴃𐴧𐴡𐴌𐴠 𐴂𐴥𐴡𐴚 𐴎𐴤𐴝 𐴀𐴝𐴌 𐴓𐴥𐴝𐴁𐴡 𐴎𐴤𐴝 𐴉𐴝𐴌𐴝𐴃 , 𐴔𐴠 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴇𐴥𐴡𐴑𐴟𐴔𐴡𐴃 𐴉𐴝𐴄𐴞 𐴀𐴝𐴙𐴐𐴧𐴤𐴙𐴠𐴊𐴠 𐴈𐴥𐴡𐴁𐴡𐴌 𐴉𐴝𐴘 𐴱 𐴰 𐴰 𐴵 𐴉𐴡𐴙𐴅𐴧𐴡𐴕𐴃 𐴔𐴡𐴒𐴢 𐴁𐴝𐴒𐴞 𐴀𐴝𐴀𐴝𐴘 𐴉𐴝𐴌𐴝 𐴌𐴥𐴠 𐴒𐴤𐴞𐴌𐴞 𐴉𐴥𐴠𐴓𐴝𐴘𐴧𐴥𐴠 , 𐴁𐴞𐴀𐴞𐴕𐴧𐴝 𐴰 𐴱 𐴁𐴝𐴎𐴠 𐴓𐴡𐴃𐴞 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴀𐴥𐴡𐴘 𐴀𐴥𐴝𐴣𐴎𐴡𐴙𐴕𐴧𐴧𐴝 𐴶 𐴁𐴝𐴎𐴠 𐴓𐴡𐴃 𐴏𐴡𐴙𐴓𐴧𐴥𐴙𐴠 , 𐴃𐴞𐴕𐴥𐴞 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴈𐴡𐴕𐴥𐴡 𐴏𐴥𐴝𐴏𐴝𐴔𐴝𐴕 𐴏𐴥𐴝𐴌𐴝 𐴉𐴡𐴌𐴝𐴕 𐴁𐴝𐴏𐴝𐴘𐴁𐴤𐴡𐴓𐴧𐴝 𐴀𐴡𐴙𐴕𐴧𐴡 𐴉𐴝𐴌𐴝𐴃 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠 , 𐴔𐴡𐴒𐴢 𐴁𐴝𐴒𐴞𐴌 𐴒𐴟𐴓𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴊𐴟𐴘 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴡𐴇𐴝𐴙𐴚𐴒𐴙𐴝 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴉𐴟𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴊𐴡𐴀𐴡𐴙𐴕𐴠 𐴈𐴡𐴛𐴧𐴝 𐴏𐴥𐴡𐴌𐴞 , 𐴊𐴤𐴝𐴁𐴧𐴡𐴌𐴞 𐴆𐴤𐴙𐴡𐴚 𐴉𐴝𐴌𐴝𐴃 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 , 𐴔𐴠 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴒𐴟𐴓𐴞 𐴔𐴝𐴌𐴞 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 , 𐴔𐴡𐴌𐴊 𐴀𐴝𐴌 𐴉𐴟𐴖𐴝𐴙𐴕 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴀𐴝𐴌 𐴎𐴤𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌 𐴒𐴡𐴙𐴅𐴧𐴤𐴙𐴠 , 𐴁𐴤𐴟𐴏𐴞𐴊𐴡𐴚𐴡𐴌 𐴱 𐴵 𐴵 𐴓𐴡𐴔𐴁𐴤𐴡𐴌 𐴔𐴠𐴓𐴠𐴄𐴠𐴌𐴞 𐴑𐴠𐴕𐴄𐴤𐴠𐴕𐴔𐴥𐴠𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴝𐴌𐴥𐴞 𐴓𐴡𐴘 𐴁𐴦𐴝𐴊𐴠 𐴋𐴤𐴑𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴉𐴝𐴌𐴝 𐴏𐴥𐴝𐴌𐴞 𐴎𐴝𐴘𐴃𐴡 𐴒𐴤𐴡𐴘 𐴈𐴡𐴘𐴧𐴥𐴠 , 𐴎𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴤𐴙𐴠 , 𐴃𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴟𐴄 𐴁𐴤𐴡𐴌𐴞 𐴔𐴡𐴒𐴢 𐴉𐴝𐴌𐴝𐴃 𐴓𐴡𐴘 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 𐴉𐴝𐴌𐴝 𐴒𐴤𐴞𐴕 𐴎𐴝𐴓𐴞 𐴊𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌 // 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃 𐴉𐴝𐴕𐴥𐴞𐴁𐴝𐴕𐴠 𐴔𐴠𐴍𐴞 𐴁𐴤𐴝𐴚𐴞 𐴲 𐴱 𐴎𐴡𐴕𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴏𐴟𐴓𐴝𐴖𐴠𐴏𐴞 𐴋𐴞𐴘𐴝𐴃 𐴉𐴝𐴕𐴥𐴞𐴁𐴝𐴕𐴠 𐴔𐴠𐴍𐴞 𐴁𐴤𐴝𐴚𐴞 , 𐴁𐴠𐴐𐴤𐴞 𐴒𐴤𐴡𐴌 𐴁𐴤𐴝𐴚𐴞 𐴒𐴞𐴘𐴥𐴡𐴘 𐴀𐴝𐴌 𐴌𐴝𐴏𐴧𐴝 𐴈𐴥𐴡𐴌𐴝𐴁𐴢 𐴀𐴥𐴡𐴘𐴧𐴠 , 𐴀𐴝𐴌 𐴴 𐴱 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 , 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃𐴡𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴡𐴙𐴕𐴧𐴝 𐴀𐴠𐴅𐴤𐴠𐴏𐴞 𐴘𐴠 𐴈𐴡𐴘𐴧𐴥𐴠 𐴱𐴱

𐴀𐴞𐴏𐴌𐴦𐴝𐴙𐴓𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴸 𐴎𐴡𐴕 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴲 𐴲 𐴎𐴡𐴕 𐴐𐴤𐴡𐴇𐴞𐴊𐴢 𐴒𐴡𐴙𐴅𐴧𐴤𐴙𐴠 𐴱𐴱

𐴒𐴤𐴡𐴎𐴧𐴝 𐴀𐴝𐴌 𐴔𐴞𐴏𐴥𐴞𐴌𐴡𐴌 𐴐𐴤𐴞𐴔𐴝𐴃 𐴀𐴝𐴏𐴥𐴠𐴊𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴃 , 𐴀𐴞𐴏𐴌𐴦𐴝𐴙𐴓𐴠 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔 𐴔𐴝𐴌𐴞 𐴔𐴠 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴸 𐴎𐴡𐴕 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴲 𐴲 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 , 𐴘𐴝𐴀𐴝𐴌 𐴁𐴦𐴝𐴊𐴠 𐴘𐴥𐴡 𐴀𐴞𐴏𐴌𐴦𐴝𐴙𐴓𐴠 𐴉𐴥𐴡𐴓𐴡𐴏𐴃𐴞𐴕𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴌𐴡𐴉𐴥𐴝 𐴐𐴤𐴡𐴀𐴡𐴌𐴡𐴌 𐴉𐴟𐴑 𐴀𐴥𐴞𐴏𐴧𐴝𐴃𐴧𐴟 𐴓𐴡𐴌𐴞 𐴎𐴝𐴘𐴃𐴡 𐴒𐴤𐴡𐴘 𐴈𐴡𐴘𐴧𐴠 , 𐴀𐴝𐴌 𐴊𐴡𐴀𐴡𐴙𐴕 𐴒𐴤𐴡𐴎𐴧𐴝𐴃 𐴁𐴠𐴐𐴤𐴞 𐴁𐴡𐴓 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴀𐴥𐴟𐴣𐴐𐴞𐴘𐴝𐴌𐴞 𐴊𐴞𐴘𐴥𐴠 𐴱𐴱