𐴀𐴠 𐴀𐴠 𐴘𐴠 𐴀𐴝𐴌𐴑𐴝𐴕𐴡𐴃 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴇𐴥𐴝𐴓𐴡𐴃 𐴁𐴝𐴕𐴝𐴌 𐴁𐴡𐴓𐴞 𐴱 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴱 𐴔𐴡𐴒𐴢 𐴁𐴝𐴒𐴞 ( 𐴀𐴠 𐴀𐴠 ) 𐴘𐴠 𐴇𐴥𐴝𐴓𐴡𐴃 𐴁𐴝𐴕𐴝𐴌 𐴁𐴝𐴕𐴝𐴌 𐴁𐴡𐴓𐴞 𐴱 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴃𐴡𐴌𐴉𐴥𐴡𐴌 𐴈𐴡𐴃𐴤𐴝 𐴈𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 𐴱 𐴁𐴟𐴆𐴤𐴙𐴟𐴑 / 𐴎𐴡𐴔𐴥𐴞𐴚 𐴄𐴟𐴕𐴠 𐴱 𐴇𐴥𐴡𐴑𐴟𐴔𐴡𐴃𐴞 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴀𐴠𐴂𐴌𐴞𐴓 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴀𐴠𐴓𐴎𐴝𐴔 𐴓𐴝𐴒𐴝𐴘 𐴈𐴡𐴘𐴧𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴌𐴑𐴝𐴕𐴡𐴃 𐴈𐴡𐴕𐴥𐴡 𐴀𐴡𐴑𐴃𐴤𐴡𐴃 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴕𐴥𐴝𐴘 𐴱 𐴁𐴠𐴒𐴧𐴤𐴞𐴕 𐴀𐴠 𐴀𐴠 𐴘𐴠 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴘𐴥𐴡 𐴁𐴟𐴆𐴤𐴙𐴟𐴑 / 𐴎𐴡𐴔𐴥𐴞𐴚 𐴄𐴟𐴕𐴠 𐴈𐴡𐴘𐴧𐴥𐴠 ( 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴱 𐴀𐴠𐴑 𐴋𐴝𐴀𐴝𐴘 𐴘𐴠 𐴀𐴝𐴌 𐴀𐴠𐴑 𐴋𐴝𐴀𐴝𐴘𐴌 𐴁𐴝𐴎𐴤𐴝 𐴊𐴞𐴀𐴞 𐴊𐴞𐴀𐴞 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴥𐴝𐴘 𐴉𐴥𐴠𐴓𐴥𐴡𐴕 ) 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 ( 𐴵 ) 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴔𐴝𐴎𐴤𐴠 𐴱𐴱

𐴀𐴠𐴂𐴌𐴞𐴓 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃 𐴀𐴦𐴡𐴙𐴕𐴡𐴌 𐴉𐴟𐴌𐴝 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕 𐴱 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴄𐴡𐴀𐴡𐴕𐴡𐴃 𐴃𐴤𐴝𐴑𐴤𐴠𐴊𐴠 𐴔𐴟𐴏𐴥𐴡𐴓𐴔𐴝𐴕 𐴑𐴠𐴙𐴏𐴧𐴥𐴟 𐴓𐴡𐴘 𐴔𐴞𐴓𐴞 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴰 𐴰 𐴶 𐴱 𐴎𐴡𐴕 𐴇𐴥𐴞𐴕𐴊𐴟 𐴀𐴝𐴌 𐴰 𐴲 𐴱 𐴎𐴡𐴕 𐴔𐴡𐴒𐴢 𐴱 𐴀𐴟𐴀𐴟𐴕𐴟𐴌𐴥𐴠 𐴀𐴞𐴏𐴓𐴝𐴔𐴥𐴞𐴑 𐴉𐴝𐴄𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 𐴈𐴡𐴀𐴡𐴘 𐴱 𐴀𐴞𐴕𐴋𐴤𐴞𐴘𐴝𐴌 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴢 ( 𐴀𐴞𐴕𐴋𐴤𐴞𐴘𐴝 𐴀𐴞𐴑𐴏𐴂𐴠𐴌𐴥𐴠𐴏𐴡𐴃 ) 𐴓𐴠𐴙𐴑𐴧𐴤𐴙𐴠 𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴏𐴥𐴝𐴉𐴢 𐴒𐴡𐴌𐴥𐴞 𐴁𐴟𐴎𐴤𐴝𐴘 𐴊𐴠𐴀𐴠𐴌 𐴊𐴧𐴠 𐴱𐴱

𐴀𐴞𐴕𐴋𐴤𐴞𐴘𐴝𐴌 𐴈𐴥𐴡𐴁𐴡𐴌 𐴘𐴥𐴝𐴀𐴝𐴕𐴡𐴌𐴥𐴠 𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞𐴌 𐴓𐴦𐴞𐴋𐴝𐴌 𐴁𐴟𐴆𐴤𐴙𐴟𐴑 / 𐴄𐴤𐴗𐴥𐴠𐴕 𐴔𐴥𐴙𐴥𐴠 𐴕𐴝𐴙𐴚𐴠 𐴀𐴥𐴞𐴃𐴤𐴝𐴌 𐴄𐴗𐴠𐴄𐴝 𐴀𐴠𐴑𐴤𐴝𐴀𐴡𐴕𐴡𐴃 𐴊𐴟𐴖𐴝𐴌𐴝 𐴒𐴡𐴌𐴥𐴞 𐴐𐴤𐴞𐴘𐴥𐴝𐴌 𐴒𐴡𐴙𐴅𐴧𐴤𐴙𐴠 𐴱 𐴓𐴠𐴈𐴥𐴝 𐴘𐴥𐴝𐴀𐴝𐴕 𐴓𐴡𐴘 𐴁𐴤𐴟𐴏𐴞𐴊𐴡𐴚 𐴀𐴝𐴌 𐴔𐴡𐴚𐴋𐴤𐴟𐴌 𐴀𐴠𐴓𐴝𐴑𐴝𐴃 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴇𐴥𐴠𐴉𐴝𐴎𐴡𐴃𐴞 𐴉𐴟𐴓𐴞𐴐𐴡𐴌 𐴁𐴝𐴁𐴡𐴃𐴠 𐴁𐴤𐴟𐴓 𐴁𐴟𐴎𐴤𐴝 𐴁𐴟𐴎𐴤𐴞 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 / 𐴎𐴡𐴔𐴥𐴞𐴚 𐴄𐴟𐴕𐴠 𐴈𐴡𐴘𐴧𐴥𐴠 𐴱𐴱

𐴘𐴝𐴀𐴝𐴕 𐴁𐴦𐴝𐴊𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝𐴌 𐴑𐴡𐴌𐴔𐴞 / 𐴀𐴥𐴟 𐴄𐴤𐴟𐴚 𐴑𐴞𐴚 𐴀𐴝𐴌 𐴑𐴟 𐴌𐴟 𐴕𐴠𐴏𐴥𐴠𐴕 𐴓𐴗𐴠𐴕 𐴱 𐴊𐴟𐴕𐴥𐴞 𐴎𐴡𐴕 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴘 𐴱 𐴀𐴠𐴀𐴠 𐴔𐴡𐴒𐴢 𐴁𐴝𐴒𐴞𐴌 𐴕𐴠𐴃𐴝𐴌 𐴓𐴡𐴘 𐴊𐴡𐴓𐴝 𐴀𐴥𐴡𐴘 𐴉𐴡𐴕𐴎𐴝𐴙𐴐𐴢 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴀𐴠 𐴓𐴡𐴘 𐴉𐴥𐴟𐴣𐴖𐴥𐴝𐴣𐴃𐴞 𐴈𐴝𐴔 𐴒𐴡𐴌𐴥𐴞𐴁𐴤𐴡𐴓𐴧𐴥𐴝 𐴄𐴤𐴞𐴑 𐴒𐴡𐴌𐴥𐴞 𐴊𐴞𐴘𐴥𐴠 𐴁𐴡𐴓𐴞 𐴔𐴞𐴏𐴥𐴝 𐴀𐴠𐴑𐴧𐴤𐴝𐴕 𐴁𐴝𐴕𐴝𐴘 / 𐴁𐴟𐴆𐴤𐴙𐴟𐴑 𐴎𐴡𐴔𐴥𐴞𐴚 𐴄𐴟𐴕𐴠 𐴀𐴥𐴞𐴃𐴤𐴝𐴌𐴝𐴌 𐴖𐴡𐴌𐴠 𐴀𐴠𐴓𐴎𐴝𐴔 𐴊𐴞𐴘𐴥𐴠 𐴱𐴱

Sources : RFAburmese