𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴀𐴝𐴏𐴞𐴘𐴠𐴕-𐴕𐴞𐴘𐴥𐴟𐴎𐴞𐴓𐴠𐴕 𐴔𐴞𐴄𐴤𐴞𐴚𐴡𐴃 𐴀𐴟𐴍𐴥𐴞𐴁𐴤𐴝𐴌 𐴊𐴝𐴖𐴡𐴃 𐴕𐴝𐴔𐴝 𐴉𐴥𐴞𐴌𐴝𐴘 𐴓𐴡𐴘𐴁𐴝𐴌 𐴀𐴝𐴌𐴡𐴎 𐴱𐴱

𐴀𐴝𐴔𐴠𐴌𐴞𐴑𐴝𐴃 𐴉𐴡𐴣𐴀𐴡𐴙𐴏𐴧𐴥𐴠𐴊𐴠 𐴁𐴡𐴌𐴔𐴥𐴝 𐴀𐴥𐴡𐴑𐴧𐴡𐴓𐴠 , 𐴀𐴝𐴏𐴞𐴘𐴠𐴕-𐴕𐴞𐴘𐴥𐴟𐴎𐴞𐴓𐴠𐴕 𐴔𐴞𐴄𐴤𐴞𐴚𐴡𐴃 𐴀𐴟𐴍𐴥𐴞𐴁𐴤𐴡𐴓𐴧𐴥𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴊𐴞𐴘𐴠𐴊𐴠 𐴊𐴝𐴖𐴡𐴃 𐴕𐴝𐴔𐴝 𐴉𐴥𐴞𐴌𐴝𐴘 𐴓𐴡𐴘𐴁𐴡𐴓𐴧𐴥𐴝 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 , 𐴀𐴠𐴂𐴌𐴞𐴓 𐴔𐴝𐴐𐴤𐴡𐴌 𐴸 𐴱 𐴀𐴝𐴌 𐴹 𐴱 𐴃𐴝𐴌𐴥𐴞𐴑 𐴓𐴦𐴡𐴃 𐴀𐴥𐴡𐴘𐴁𐴡𐴊𐴠 𐴔𐴞𐴄𐴤𐴞𐴚𐴡𐴃 𐴀𐴝𐴘𐴁𐴤𐴡𐴓𐴧𐴝 , 𐴕𐴞𐴘𐴥𐴟𐴎𐴞𐴓𐴠𐴕𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴊𐴝𐴖𐴡𐴃 𐴊𐴞𐴘𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴊𐴝𐴖𐴡𐴃 𐴊𐴡𐴀𐴡𐴕𐴧𐴥𐴝𐴕 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌𐴠 𐴈𐴝𐴍𐴠𐴌 𐴔𐴝𐴌𐴠𐴌 𐴀𐴝𐴌 𐴁𐴡𐴕 𐴒𐴡𐴌𐴥𐴠𐴌𐴊𐴧𐴠 𐴀𐴥𐴞𐴀𐴞𐴕𐴡𐴌𐴥𐴠 𐴄𐴤𐴞𐴑 𐴁𐴟𐴎𐴠𐴌𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴁𐴡𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴠𐴂𐴌𐴞𐴓 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑𐴡𐴃 𐴀𐴝𐴔𐴠𐴌𐴞𐴑𐴝𐴌 𐴌𐴝𐴎𐴊𐴤𐴝𐴕𐴞 𐴖𐴝𐴐𐴞𐴕𐴄𐴠𐴕 𐴋𐴞𐴏𐴞𐴃 , 𐴕𐴞𐴘𐴥𐴟𐴎𐴞𐴓𐴠𐴕𐴡𐴌 𐴏𐴥𐴡𐴉𐴝𐴌𐴡𐴃𐴡𐴌 𐴔𐴟𐴀𐴟𐴕𐴃𐴟 𐴊𐴝𐴖𐴡𐴃 𐴕𐴝𐴔𐴝 𐴉𐴥𐴞𐴌𐴝𐴘 𐴓𐴡𐴘 𐴉𐴥𐴠𐴓𐴥𐴝𐴘 𐴁𐴤𐴡𐴓𐴧𐴝 , 𐴀𐴝𐴔𐴠𐴌𐴞𐴑𐴝𐴃 𐴀𐴝𐴏𐴥𐴠𐴊𐴠 𐴁𐴡𐴌𐴔𐴥𐴝 𐴀𐴥𐴡𐴑𐴧𐴡𐴓𐴠 𐴕𐴞𐴘𐴥𐴟𐴎𐴞𐴓𐴠𐴕 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴃𐴡𐴚𐴁𐴝𐴊𐴞 / 𐴔𐴥𐴞𐴚 𐴀𐴡𐴗𐴚 𐴓𐴝𐴙𐴚 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴊𐴝𐴖𐴡𐴃 𐴊𐴡𐴀𐴡𐴕𐴧𐴥𐴝𐴕𐴡𐴌 𐴀𐴝𐴣𐴀𐴝𐴌𐴝 𐴀𐴟𐴓𐴋𐴝 𐴒𐴡𐴙𐴅𐴧𐴤𐴞 𐴀𐴝𐴌 𐴏𐴥𐴡𐴉𐴝𐴌𐴡𐴃𐴡𐴃 𐴆𐴞𐴣𐴍𐴥𐴞 𐴉𐴡𐴣𐴀𐴡𐴏𐴝𐴘𐴧𐴥𐴞 , 𐴃𐴡𐴀𐴡𐴘 𐴀𐴝𐴣𐴀𐴝𐴌𐴝 𐴊𐴞𐴘𐴥𐴞𐴊𐴠 𐴆𐴞𐴣𐴍𐴥𐴞 𐴘𐴥𐴝𐴀𐴝𐴕 𐴕𐴞𐴘𐴥𐴟𐴎𐴞𐴓𐴠𐴕𐴡𐴌 𐴏𐴥𐴡𐴉𐴝𐴌𐴡𐴃𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴒𐴡𐴏𐴥𐴞 𐴓𐴡𐴘𐴧𐴥𐴠 , 𐴀𐴝𐴌 𐴔𐴟𐴃𐴦𐴝𐴓𐴧𐴠𐴑𐴤𐴝 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴃 𐴃𐴟𐴓𐴥𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴀𐴝𐴣𐴀𐴝𐴌𐴝𐴌𐴥𐴠 𐴎𐴝𐴕𐴝𐴘𐴧𐴥𐴠 𐴈𐴡𐴘𐴧𐴥𐴠 , 𐴀𐴝𐴣𐴀𐴝𐴌𐴝 𐴈𐴥𐴝𐴀𐴝𐴏𐴢 𐴒𐴡𐴌𐴥𐴞 𐴈𐴡𐴀𐴡𐴘𐴌𐴊𐴧𐴠 𐴘𐴥𐴝𐴀𐴝𐴕 𐴀𐴥𐴡𐴙𐴓𐴊𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴃𐴞𐴕 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃𐴡 𐴎𐴟𐴊𐴧𐴤𐴡 𐴀𐴡𐴉𐴥𐴡𐴌𐴥𐴝𐴊𐴞 𐴁𐴝𐴌 𐴁𐴝𐴌 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴱𐴱

𐴀𐴝𐴌 𐴓𐴝𐴌𐴥𐴝𐴘𐴌 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴀𐴝𐴌 𐴉𐴝𐴕𐴥𐴞𐴌 𐴎𐴝𐴣𐴀𐴝𐴏𐴢 𐴀𐴥𐴡𐴑𐴧𐴡𐴓 𐴓𐴡𐴘 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴀𐴟𐴖𐴟𐴌𐴠 𐴁𐴟𐴔𐴁𐴝𐴌𐴞 𐴒𐴡𐴌𐴥𐴠𐴌 , 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴎𐴝𐴓𐴞 𐴉𐴟𐴌𐴞 𐴏𐴥𐴝𐴘 𐴒𐴡𐴌𐴥𐴞 𐴉𐴥𐴠𐴓𐴥𐴝𐴌 , 𐴀𐴠𐴃𐴧𐴤𐴡𐴣𐴌 𐴀𐴟𐴒𐴧𐴤𐴗𐴝 𐴎𐴝𐴓𐴠𐴔𐴡𐴌𐴥𐴠 𐴑𐴞𐴘𐴥𐴡𐴓𐴧𐴥𐴝 𐴊𐴝𐴖𐴡𐴃 𐴊𐴞𐴀𐴞𐴓𐴥𐴡 , 𐴀𐴥𐴠𐴃𐴡𐴓𐴧𐴝 𐴊𐴟𐴖𐴝𐴌𐴝 𐴁𐴤𐴝𐴉𐴞 𐴏𐴝𐴀𐴝𐴘 𐴊𐴝𐴖𐴡𐴃 𐴕𐴝𐴔𐴝 𐴉𐴥𐴞𐴌𐴝𐴘 𐴓𐴡𐴘 𐴉𐴥𐴠𐴓𐴥𐴝𐴘𐴃𐴡 𐴈𐴡𐴘𐴧𐴥𐴞𐴊𐴠 𐴀𐴝𐴣𐴀𐴝𐴌𐴝 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴊𐴟𐴕𐴞𐴘𐴝𐴘𐴌 𐴎𐴠 𐴇𐴥𐴡𐴑𐴟𐴔𐴡𐴃𐴠 𐴊𐴝𐴖𐴡𐴃 𐴊𐴞𐴀𐴞𐴁𐴡 𐴊𐴡𐴀𐴡𐴑 𐴀𐴝𐴣𐴀𐴝𐴌 𐴊𐴠𐴐𐴤𐴡𐴙𐴃𐴧𐴝𐴌 𐴃𐴡𐴌𐴉𐴥𐴡𐴃𐴧𐴟 𐴕𐴡𐴔𐴝𐴙𐴕𐴊𐴝 𐴁𐴡𐴕𐴞 𐴁𐴠𐴌𐴟𐴊𐴧𐴤𐴞 𐴒𐴡𐴙𐴅𐴧𐴤𐴟𐴔 𐴱𐴱

Sources : dvbburmese