𐴀𐴞𐴊𐴤𐴡𐴌 𐴔𐴟𐴕𐴝𐴎𐴝𐴃𐴡𐴃 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴀𐴝𐴎𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴈𐴝𐴍𐴝 𐴔𐴝𐴌𐴝 𐴀𐴝𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴐𐴤𐴡𐴘 𐴕𐴡 𐴉𐴝𐴌𐴥𐴞 , 𐴷 𐴱 𐴹 𐴱 𐴐𐴤𐴡𐴕𐴡𐴃 𐴸 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴐𐴤𐴞𐴔𐴝 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 , 𐴊𐴡𐴉𐴥𐴝 𐴊𐴡𐴉𐴥𐴝 𐴀𐴝𐴘𐴃𐴠 𐴀𐴝𐴘𐴃𐴠 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴀𐴠𐴑 𐴔𐴡𐴓𐴞𐴘𐴥𐴟𐴕 𐴀𐴠𐴑 𐴓𐴝𐴑𐴤𐴡𐴌 𐴁𐴠𐴐𐴤𐴞 𐴀𐴥𐴡𐴘𐴧𐴠 , 𐴀𐴥𐴞𐴃𐴤𐴝𐴌𐴝𐴌𐴥𐴠 𐴀𐴟𐴑𐴤𐴞𐴘𐴝 , 𐴄𐴠𐴑𐴕𐴝𐴉𐴡𐴃 𐴲 𐴳 𐴐𐴤𐴝𐴕 𐴑𐴠𐴀𐴠𐴔 𐴁𐴝𐴕𐴝𐴘 𐴀𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴌𐴝𐴙𐴑𐴧𐴤𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴌𐴡 𐴏𐴥𐴡 𐴁𐴡𐴏𐴥𐴡𐴌 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴤𐴡 𐴘𐴝𐴀𐴝𐴕𐴡𐴃 ( 𐴁𐴡𐴏𐴥𐴡𐴌𐴡𐴃 𐴀𐴞𐴊𐴟𐴓 𐴉𐴞𐴃𐴤𐴞𐴌 , 𐴀𐴞𐴊𐴟𐴓 𐴀𐴝𐴊𐴇𐴥𐴝 ) 𐴊𐴟𐴘 𐴀𐴞𐴊𐴢 𐴀𐴥𐴞𐴏𐴝𐴉𐴠 𐴴 𐴱 𐴀𐴞𐴊𐴢 𐴑𐴠𐴀𐴠𐴔𐴡𐴃 𐴉𐴟𐴌𐴝𐴘 𐴒𐴞𐴘𐴥𐴡𐴘 , 𐴀𐴡𐴙𐴕𐴧𐴡 𐴊𐴠𐴐𐴤𐴡𐴃 𐴌𐴞𐴉𐴟𐴎𐴞 𐴁𐴡𐴕𐴞 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴓𐴝𐴑𐴤𐴝 𐴓𐴝𐴑𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴞𐴊𐴤𐴡𐴌 𐴕𐴟𐴖𐴥𐴝𐴏𐴢 𐴀𐴝𐴊𐴝𐴘 𐴒𐴡𐴙𐴅𐴧𐴤𐴙𐴠 , 𐴀𐴞𐴊𐴤𐴡𐴌 𐴕𐴟𐴖𐴥𐴝𐴏𐴡𐴌 𐴐𐴤𐴠𐴐𐴠 𐴁𐴠𐴒𐴧𐴤𐴟𐴕𐴠 𐴈𐴝𐴣𐴊𐴞 𐴈𐴝𐴣𐴊𐴞 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴈𐴝𐴣𐴏𐴥𐴠 𐴊𐴟𐴀𐴝 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴀𐴝𐴎𐴧𐴟 𐴒𐴡𐴙𐴅𐴧𐴤𐴙𐴠 , 𐴎𐴠𐴀𐴠𐴕𐴥𐴠 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴅𐴝𐴕𐴑𐴝𐴌𐴞 𐴔𐴡𐴎𐴞𐴕 𐴲 𐴳 𐴐𐴤𐴝𐴕 𐴑𐴠𐴀𐴠𐴔𐴡𐴃 𐴃𐴞𐴕 𐴇𐴥𐴝𐴎𐴝𐴌 𐴓𐴡𐴃𐴞 𐴔𐴡𐴏𐴥𐴡𐴙𐴃 𐴀𐴝𐴌 𐴕𐴟𐴌𐴝𐴕𐴞 𐴐𐴤𐴞𐴑𐴧𐴤𐴝𐴌 𐴔𐴡𐴊𐴡𐴌𐴥𐴡𐴏𐴥𐴝 𐴀𐴝𐴏𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴞𐴀𐴞𐴕𐴡𐴃 𐴀𐴞𐴊𐴤𐴡𐴌 𐴕𐴟𐴖𐴥𐴝𐴏𐴢 𐴀𐴝𐴊𐴝𐴘 𐴒𐴡𐴙𐴅𐴧𐴤𐴙𐴠 , 𐴋𐴝𐴀𐴝𐴘 𐴋𐴝𐴀𐴝𐴘 𐴒𐴤𐴡𐴌𐴡𐴃𐴧𐴟 𐴕𐴦𐴠𐴓𐴞 𐴀𐴞𐴊𐴤𐴡𐴌 𐴕𐴟𐴖𐴥𐴝𐴏𐴢 𐴉𐴡𐴌𐴥𐴞 𐴐𐴤𐴠𐴐𐴠 , 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴥𐴞𐴁𐴤𐴝𐴌 𐴀𐴝𐴎𐴧𐴟 𐴓𐴡𐴘 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴈𐴝𐴣𐴏𐴥𐴠 𐴈𐴝𐴣𐴊𐴞 𐴈𐴝𐴣𐴊𐴞 𐴊𐴟𐴀𐴝 𐴒𐴡𐴙𐴅𐴧𐴤𐴙𐴠 , 𐴁𐴝𐴓𐴟𐴈𐴥𐴝𐴓𐴞 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 / 𐴁𐴡𐴐𐴤𐴡𐴌𐴠 𐴈𐴡𐴘𐴧𐴥𐴠𐴊𐴠 ! 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴀𐴞𐴊𐴤𐴡𐴌 𐴕𐴟𐴖𐴥𐴝𐴏𐴢 𐴉𐴡𐴌𐴥𐴞 𐴉𐴝𐴌𐴞𐴓𐴥𐴝𐴔 𐴊𐴠 𐴘𐴥𐴝𐴀𐴝𐴕𐴡𐴃 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴁𐴠𐴐𐴤𐴞 𐴐𐴤𐴟𐴑𐴟𐴌𐴞𐴘𐴝 𐴀𐴝𐴊𐴝𐴘 𐴒𐴡𐴌𐴥𐴞𐴓𐴥𐴝𐴔 , 𐴔𐴡𐴕𐴃𐴡𐴌 𐴎𐴡𐴊𐴞 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴉𐴡𐴌𐴥𐴞 𐴉𐴝𐴙𐴃𐴧𐴝𐴔 𐴁𐴠𐴐𐴤𐴞 𐴑𐴤𐴟𐴐𐴞 𐴓𐴝𐴒𐴞𐴃𐴤𐴡 𐴱𐴱

𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝𐴌 𐴐𐴤𐴟𐴊𐴠 𐴀𐴠𐴑𐴧𐴤𐴝𐴕 𐴐𐴤𐴡𐴂𐴧𐴡𐴕 , 𐴘𐴥𐴝𐴀𐴝𐴕 𐴀𐴥𐴡𐴙𐴓𐴊𐴠 𐴈𐴡𐴣𐴀𐴡𐴃𐴧𐴠 𐴀𐴝𐴣𐴀𐴝𐴌𐴝 𐴕𐴞𐴎𐴡𐴌 𐴊𐴠𐴐𐴢 𐴁𐴡𐴔𐴥𐴝 𐴀𐴝𐴌𐴑𐴝𐴕𐴡𐴃 𐴀𐴞𐴊𐴤𐴡𐴌 𐴕𐴟𐴖𐴥𐴝𐴏𐴢 𐴉𐴡𐴌𐴥𐴞 𐴉𐴝𐴌𐴞𐴘𐴥𐴟𐴔 , 𐴓𐴝𐴔𐴁𐴝𐴐𐴤𐴞𐴘𐴝 𐴀𐴠𐴑 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 / 𐴇𐴥𐴝𐴔𐴞𐴊𐴠 𐴈𐴡𐴘𐴧𐴥𐴠𐴊𐴠 ! 𐴀𐴝𐴣𐴀𐴝𐴌𐴝 𐴊𐴠𐴐𐴤𐴡𐴃 𐴎𐴠 𐴁𐴤𐴝𐴉𐴠 𐴀𐴞𐴊𐴢 𐴒𐴡𐴌𐴥𐴞𐴃𐴤𐴝𐴔 , 𐴀𐴠𐴍𐴥𐴠 𐴁𐴠𐴒𐴧𐴤𐴞𐴕 𐴉𐴝𐴘 𐴁𐴦𐴝𐴊𐴠 𐴘𐴥𐴡 𐴕𐴞𐴎𐴡𐴌 𐴊𐴠𐴐𐴢 𐴕𐴡 𐴀𐴥𐴡𐴀𐴡𐴕𐴠 , 𐴀𐴥𐴠 𐴁𐴝𐴉𐴠 𐴀𐴞𐴊𐴢 𐴒𐴡𐴌𐴥𐴞 𐴕𐴥𐴡 𐴉𐴝𐴌𐴞 𐴱𐴱

Sources : Ukhiyanews.com