𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴙𐴓𐴧𐴠𐴊𐴠 𐴀𐴥𐴞𐴃𐴝𐴌𐴝𐴌𐴥𐴠 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡𐴓𐴧𐴝 𐴏𐴝𐴣𐴊𐴝 𐴃𐴟𐴓𐴥𐴠𐴌 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴧𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁𐴡𐴌 𐴒𐴤𐴡𐴗𐴚 𐴋𐴤𐴟𐴑𐴧𐴝 𐴒𐴤𐴗𐴝𐴚𐴡𐴃 𐴀𐴝𐴏𐴥𐴠𐴊𐴠 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 , 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴙𐴓𐴧𐴠𐴊𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡𐴓𐴧𐴝 𐴁𐴡𐴓𐴞 𐴈𐴡𐴀𐴡𐴘 , 𐴑𐴠𐴀𐴠𐴔 𐴑𐴡𐴔𐴞𐴄𐴤𐴞 𐴘𐴥𐴠 𐴏𐴝𐴣𐴊𐴝 𐴃𐴟𐴓𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 , 𐴒𐴤𐴡𐴗𐴚 𐴋𐴤𐴟𐴑𐴧𐴝 𐴒𐴤𐴗𐴝𐴚𐴡𐴌 𐴀𐴟𐴃𐴧𐴡𐴌 𐴀𐴥𐴟𐴚𐴋𐴡 𐴒𐴞𐴌𐴥𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴀𐴝𐴣𐴐𐴄𐴡 𐴈𐴥𐴡𐴕𐴋𐴡 𐴀𐴥𐴞𐴏𐴝𐴉𐴠 𐴀𐴝𐴏𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴝𐴏𐴧𐴡𐴚 𐴵 𐴴 𐴳 𐴏𐴥𐴝𐴕 𐴀𐴝𐴏𐴥𐴠 𐴱𐴱

𐴃𐴡𐴀𐴡𐴘 𐴀𐴥𐴠 𐴀𐴥𐴠𐴏𐴝𐴉𐴠 𐴰 𐴶 𐴷 𐴲 𐴈𐴥𐴡𐴕𐴋𐴡 𐴀𐴝𐴏𐴥𐴠 , 𐴀𐴠𐴑 𐴈𐴥𐴡𐴕𐴋𐴡𐴌 𐴓𐴧𐴝 𐴔𐴝𐴐𐴤𐴠 ( 𐴰 𐴰 𐴰 𐴵 𐴱 ) 𐴉𐴟𐴕𐴊𐴤𐴡𐴌𐴥𐴡 𐴇𐴥𐴝𐴎𐴝𐴌 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴓𐴡𐴀𐴡𐴌 𐴁𐴡𐴓𐴞 𐴈𐴡𐴘𐴧𐴥𐴠 , 𐴀𐴠𐴑 𐴈𐴥𐴡𐴕𐴋𐴡𐴌 𐴓𐴧𐴝 𐴔𐴝𐴐𐴤𐴠 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴓𐴡𐴘𐴃𐴡 𐴊𐴠 𐴀𐴥𐴠𐴃𐴧𐴟 , 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴠𐴊𐴤𐴟𐴒𐴧𐴟𐴕 𐴁𐴝𐴌𐴥𐴝𐴘 𐴓𐴡𐴘𐴓𐴥𐴠 𐴀𐴝𐴣𐴀𐴝𐴌𐴝 𐴑𐴠𐴀𐴠𐴕 𐴒𐴡𐴌𐴥𐴞 𐴊𐴞𐴘𐴟𐴔 , 𐴕𐴡 𐴊𐴞𐴀𐴞𐴓𐴥𐴠 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴓𐴡𐴘𐴁𐴡 𐴁𐴡𐴓𐴞 , 𐴑𐴠𐴀𐴠𐴔 𐴑𐴡𐴔𐴞𐴄𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 𐴱𐴱

𐴀𐴝𐴣𐴀𐴝𐴌𐴝 𐴁𐴝𐴀𐴝𐴌𐴡𐴃𐴧𐴟 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴔𐴡𐴊𐴡𐴊 𐴕𐴡 𐴉𐴝𐴘𐴓𐴥𐴠 , 𐴀𐴠𐴊𐴟𐴒𐴧𐴤𐴟𐴕 𐴁𐴝𐴌𐴥𐴝𐴘 𐴏𐴝𐴣𐴊𐴝 𐴑𐴠𐴀𐴠𐴕 𐴒𐴡𐴌𐴥𐴞 𐴊𐴞𐴘𐴟𐴔 , 𐴀𐴝𐴣𐴀𐴝𐴌𐴝𐴃𐴧𐴟 𐴁𐴠𐴐𐴤𐴞 𐴊𐴟𐴑 𐴔𐴡𐴐𐴑𐴞𐴓 𐴀𐴥𐴡𐴘𐴁𐴡 𐴁𐴡𐴓𐴞 , 𐴀𐴥𐴟𐴚𐴋𐴡 𐴒𐴞𐴌𐴥𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴁𐴡𐴖𐴋𐴝𐴌 𐴕𐴞𐴌𐴝𐴉𐴡𐴃𐴧𐴝 𐴀𐴟𐴎𐴞𐴌 𐴁𐴟𐴔𐴥𐴟 𐴅𐴤𐴞 / 𐴑𐴙𐴡 𐴏𐴟𐴌𐴥𐴝 𐴀𐴝𐴌 𐴋𐴞𐴐𐴄𐴤𐴞𐴑 𐴀𐴟𐴎𐴞𐴌 / 𐴀𐴥𐴟 𐴄𐴞𐴚 𐴓𐴥𐴝𐴚 , 𐴀𐴞𐴃𐴝𐴌𐴥𐴝 𐴘𐴥𐴠 𐴀𐴡𐴋𐴝𐴌 𐴊𐴞𐴘𐴥𐴠 𐴊𐴠 𐴀𐴥𐴠𐴃𐴡𐴓𐴧𐴝 𐴀𐴠𐴊𐴟𐴒𐴧𐴤𐴟𐴕 𐴁𐴝𐴌𐴥𐴝𐴘 𐴏𐴝𐴣𐴊𐴝 𐴃𐴟𐴓𐴥𐴠𐴌 𐴁𐴡𐴓𐴞 𐴑𐴠𐴀𐴠𐴔 𐴑𐴡𐴔𐴞𐴄𐴤𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 𐴱𐴱

𐴏𐴝𐴣𐴊𐴝 𐴃𐴟𐴓𐴥𐴠𐴌𐴊𐴧𐴠 𐴘𐴥𐴝𐴀𐴝𐴕 𐴁𐴦𐴝𐴊𐴠 𐴘𐴥𐴡 𐴕𐴞𐴎𐴡𐴌 𐴔𐴡𐴕𐴐𐴤𐴝 𐴏𐴥𐴝𐴌𐴥𐴝 𐴓𐴡𐴄𐴤𐴝𐴌𐴥𐴞 𐴊𐴞𐴀𐴞 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞𐴁𐴤𐴡𐴓𐴧𐴝 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 , 𐴒𐴡𐴃𐴡 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴐𐴤𐴟𐴌𐴟𐴃 𐴓𐴡𐴃𐴞 𐴀𐴝𐴙𐴑𐴧𐴙𐴝𐴁𐴡𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞𐴌 𐴄𐴠𐴕𐴧𐴞𐴕 𐴊𐴞𐴀𐴞𐴁𐴡𐴓𐴧𐴥𐴝 , 𐴋𐴡𐴣𐴀𐴡𐴌 𐴉𐴝𐴌𐴝𐴃𐴧𐴤𐴟 𐴃𐴞𐴌𐴥𐴞𐴐𐴢 𐴎𐴡𐴕 𐴐𐴤𐴣𐴍𐴡 𐴉𐴝𐴌𐴝𐴃𐴧𐴤𐴟 𐴑𐴟𐴌𐴞 𐴎𐴡𐴕 𐴀𐴥𐴞𐴏𐴝𐴉𐴠 , 𐴇𐴥𐴡𐴑𐴟𐴔𐴡𐴃𐴡𐴌𐴠 𐴊𐴞𐴀𐴞𐴁𐴡𐴓𐴧𐴥𐴝 𐴉𐴝𐴌𐴝𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞 𐴁𐴦𐴝𐴊𐴠 , 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴤𐴟 𐴘𐴥𐴡 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞𐴌 𐴄𐴠𐴕𐴧𐴞𐴕 𐴊𐴞𐴀𐴞𐴁𐴡𐴓𐴧𐴥𐴝 𐴔𐴝𐴃𐴝𐴘 𐴓𐴡𐴘 𐴒𐴞𐴘𐴥𐴡𐴘𐴊𐴠 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

Sources : RFAburmese