𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴝𐴀𐴝𐴕 𐴒𐴡𐴌𐴥𐴠𐴌𐴊𐴧𐴠 𐴁𐴡𐴓𐴞 𐴈𐴡𐴘𐴧𐴥𐴠 : 𐴀𐴠 𐴀𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴊𐴤𐴡𐴌𐴔𐴞 , 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴡𐴀𐴡 𐴉𐴝𐴀𐴝𐴕 𐴔𐴡𐴑𐴏𐴥𐴡𐴊 𐴓𐴡𐴘 𐴈𐴝𐴔 𐴒𐴡𐴌𐴥𐴞 𐴎𐴝𐴀𐴝𐴌 𐴊𐴠 𐴀𐴥𐴞𐴀𐴞𐴕 , 𐴑𐴠𐴙𐴏𐴧𐴥𐴟 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴌𐴀𐴥𐴡 𐴁𐴦𐴠𐴐𐴢 𐴁𐴤𐴝𐴉𐴠 𐴒𐴡𐴌𐴥𐴠𐴌 𐴁𐴡𐴓𐴞 , 𐴔𐴡𐴒𐴢 𐴎𐴝𐴃𐴞𐴘𐴡 𐴉𐴝𐴄𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 ( 𐴘𐴟 𐴀𐴠𐴓 𐴀𐴠 / 𐴀𐴠 𐴀𐴠 ) 𐴊𐴟𐴕𐴥𐴞 𐴉𐴝𐴄𐴞 𐴘𐴠 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴥𐴠 , 𐴓𐴝𐴌𐴥𐴘𐴃 𐴔𐴝𐴎𐴤𐴠 𐴀𐴥𐴡𐴣𐴍𐴠𐴌 𐴊𐴧𐴠 𐴘𐴥𐴝𐴀𐴝𐴕𐴡𐴃𐴧𐴟 𐴊𐴤𐴞𐴘𐴝𐴕 𐴊𐴠𐴔𐴝𐴒𐴢 𐴉𐴥𐴞𐴌𐴥𐴝𐴘 𐴉𐴥𐴠𐴓𐴥𐴝𐴘𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴁𐴡𐴓𐴞 , 𐴕𐴦𐴠𐴓𐴝𐴘𐴧𐴥𐴠 𐴊𐴠 𐴀𐴠𐴓𐴝𐴕 𐴕𐴝𐴔𐴝𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴒𐴠𐴓𐴊𐴠 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴁𐴤𐴟𐴏𐴞𐴊𐴤𐴡𐴚𐴡𐴌 𐴑𐴤𐴗𐴥𐴠 𐴑𐴤𐴠𐴔𐴥𐴟 𐴃𐴝𐴕𐴥𐴝 𐴆𐴤𐴙𐴠𐴑 ( 𐴏𐴥𐴝 𐴑𐴝 𐴑𐴤𐴝 𐴵 𐴱 ) 𐴓𐴡𐴔𐴁𐴤𐴡𐴌𐴡𐴌 𐴔𐴠𐴓𐴠𐴄𐴠𐴌𐴞 𐴘𐴠 , 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴥𐴟𐴖𐴥𐴝𐴘𐴁𐴝𐴌 𐴔𐴡𐴑𐴏𐴥𐴡𐴊 𐴓𐴡𐴘 𐴌𐴟𐴇𐴝𐴙𐴚𐴒𐴙𐴌 𐴀𐴥𐴝𐴃𐴝 𐴇𐴥𐴡𐴌𐴃𐴝𐴓 𐴒𐴡𐴌𐴥𐴝𐴘𐴧𐴠𐴊𐴠 𐴁𐴡𐴓𐴞 𐴘𐴥𐴡 𐴀𐴠𐴓𐴝𐴕 𐴕𐴝𐴔𐴝𐴃 𐴓𐴠𐴙𐴑𐴧𐴤𐴙𐴠 , 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴰 𐴰 𐴷 𐴎𐴡𐴕 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴎𐴡𐴔𐴝 𐴒𐴡𐴌𐴥𐴞 , 𐴔𐴡𐴒𐴢 𐴁𐴝𐴒𐴞 ( 𐴀𐴠 𐴀𐴠 ) 𐴊𐴡𐴌𐴈𐴝𐴌 𐴕𐴥𐴝𐴘 , 𐴓𐴝𐴌𐴥𐴝𐴘 𐴊𐴡𐴌𐴈𐴝𐴌 𐴕𐴥𐴝𐴘 , 𐴁𐴤𐴟𐴏𐴞𐴊𐴤𐴡𐴚 𐴁𐴝𐴏𐴝𐴀𐴡 𐴁𐴡𐴓𐴞 𐴈𐴡𐴀𐴡𐴘 𐴏𐴥𐴝𐴀𐴝𐴙𐴕 𐴁𐴤𐴟𐴄 𐴃𐴟𐴓𐴥𐴝𐴘 , 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴌𐴃𐴝𐴓 𐴒𐴡𐴌𐴥𐴝𐴘𐴧𐴠 𐴱𐴱

𐴔𐴡𐴚𐴋𐴤𐴟𐴃 𐴔𐴝𐴎𐴤𐴠 𐴘𐴥𐴡 𐴀𐴥𐴠𐴕𐴋𐴞𐴓𐴧𐴝 𐴇𐴥𐴡𐴌𐴃𐴝𐴓 𐴒𐴡𐴌𐴥𐴝𐴘𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 , 𐴔𐴡𐴕𐴃𐴡𐴌 𐴀𐴝𐴌𐴝𐴑𐴤𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴞𐴏𐴝𐴉𐴠 𐴔𐴠𐴓𐴠𐴄𐴠𐴌𐴞𐴌 𐴏𐴥𐴞𐴘𐴝𐴏𐴞 𐴉𐴥𐴝𐴕𐴡𐴃 𐴕𐴡 𐴉𐴡𐴌𐴞𐴁𐴤𐴡𐴓𐴧𐴝 , 𐴏𐴥𐴞𐴘𐴝𐴏𐴞 𐴅𐴝𐴕𐴑𐴝𐴌𐴞 𐴀𐴝𐴌 𐴀𐴥𐴞𐴐𐴄𐴟𐴌𐴞𐴌 𐴃𐴡𐴅𐴌𐴡𐴁𐴝 𐴓𐴡𐴘 𐴀𐴥𐴟𐴣𐴐𐴞𐴘𐴝𐴌𐴞𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴤𐴞𐴁𐴡𐴓𐴧𐴝 𐴁𐴡𐴓𐴞 ( 𐴘𐴟 𐴀𐴠𐴓 𐴀𐴠 ) 𐴘𐴠 𐴀𐴠𐴓𐴝𐴕 𐴕𐴝𐴔𐴝𐴃 𐴀𐴞𐴐𐴤𐴝𐴌𐴝 𐴒𐴡𐴙𐴅𐴧𐴤𐴙𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴔𐴠𐴓𐴠𐴄𐴠𐴌𐴞𐴌 𐴄𐴠𐴕𐴧𐴞𐴕 𐴈𐴥𐴝𐴔𐴝𐴈𐴥𐴝 𐴓𐴟𐴀𐴝 𐴉𐴡𐴌𐴞𐴁𐴤𐴡 𐴈𐴡𐴀𐴡𐴘 𐴑𐴝𐴕𐴟𐴕 𐴁𐴝𐴕𐴝𐴘 , 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴉𐴡𐴃𐴧𐴞 𐴎𐴝𐴃 𐴁𐴠𐴒𐴧𐴤𐴟𐴕 𐴊𐴡𐴓𐴝 𐴒𐴡𐴌𐴥𐴞 , 𐴌𐴝𐴏𐴥𐴞𐴊𐴡𐴚𐴡𐴃 𐴀𐴥𐴡𐴘𐴧𐴠𐴊𐴠 𐴓𐴝𐴌𐴥𐴝𐴘𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴋𐴤𐴝𐴓 𐴀𐴥𐴞𐴏𐴥𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴓𐴦𐴡𐴃 𐴉𐴝𐴘𐴧𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞𐴌 𐴉𐴥𐴟𐴣𐴖𐴝𐴣𐴃𐴞 𐴔𐴞𐴓𐴞 𐴓𐴝𐴌𐴥𐴝𐴘𐴃 𐴒𐴤𐴡𐴙𐴓𐴧𐴙𐴠𐴊𐴠 𐴉𐴝𐴄𐴞 𐴘𐴝 𐴔𐴝𐴕𐴥𐴟𐴙𐴐𐴢 𐴎𐴞𐴁𐴤𐴝 𐴀𐴥𐴡𐴘𐴁𐴡 𐴀𐴥𐴡𐴀𐴡𐴑 , 𐴀𐴥𐴞𐴃𐴤𐴝𐴌𐴝𐴌𐴥𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴏𐴡𐴀𐴡𐴙𐴕𐴧𐴝 𐴀𐴥𐴞𐴏𐴝𐴉𐴠 𐴁𐴟𐴎𐴤𐴞 𐴀𐴥𐴞𐴃𐴝𐴌𐴝𐴌 𐴓𐴧𐴡𐴘 𐴓𐴝𐴌𐴥𐴝𐴘 𐴒𐴡𐴌𐴥𐴝𐴃 𐴃𐴤𐴝𐴙𐴑𐴧𐴟𐴔 , 𐴀𐴝𐴌𐴝𐴑𐴤𐴝 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞 𐴁𐴦𐴝𐴊𐴠 𐴈𐴡𐴕𐴥𐴡 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴃𐴤𐴝𐴑𐴤𐴞 𐴕𐴡 𐴉𐴝𐴌𐴥𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱𐴱

Sources : RFAburmese