𐴌𐴥𐴠 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴊𐴡𐴙𐴅𐴧𐴙𐴝𐴌 𐴁𐴤𐴟𐴃𐴤𐴡𐴌𐴠 𐴔𐴠𐴓𐴠𐴄𐴠𐴌𐴞 𐴘𐴠 𐴰 𐴸 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴗𐴠𐴕 𐴋𐴞𐴐𐴄𐴤𐴞𐴑𐴡𐴌 𐴌𐴥𐴠 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴑𐴡𐴓𐴥𐴝 𐴑𐴤𐴟𐴀 𐴋𐴞𐴘𐴝𐴌 𐴉𐴡𐴏𐴥𐴞𐴔𐴠 𐴊𐴡𐴀𐴡𐴙𐴕𐴠 𐴊𐴡𐴙𐴅𐴧𐴙𐴝𐴌 𐴁𐴤𐴟𐴃𐴤𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴘𐴠 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴰 𐴸 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴑𐴡𐴓𐴥𐴝 𐴑𐴤𐴟𐴀 𐴋𐴞𐴘𐴝𐴌 𐴉𐴡𐴏𐴥𐴞𐴔𐴠 𐴊𐴡𐴀𐴡𐴙𐴕𐴠 𐴊𐴡𐴙𐴅𐴧𐴙𐴝𐴌 𐴁𐴤𐴟𐴃𐴡𐴌𐴠 𐴁𐴞𐴀𐴞𐴕𐴧𐴝 𐴏𐴥𐴡 𐴁𐴝𐴎𐴞 𐴁𐴦𐴝𐴊𐴠 , 𐴎𐴗𐴥𐴠 𐴑𐴤𐴠 𐴏𐴥𐴠𐴕 𐴕𐴝𐴔𐴡𐴌 𐴀𐴞𐴕𐴅𐴞𐴓𐴡𐴌 𐴁𐴟𐴄 𐴀𐴠𐴑𐴧𐴤𐴝𐴕𐴡 𐴌𐴥𐴠 , 𐴉𐴝𐴕𐴥𐴞𐴌 𐴉𐴥𐴡𐴗𐴏𐴢 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴡𐴖𐴎𐴝𐴘 𐴊𐴤𐴡𐴌𐴞 𐴏𐴠𐴑 𐴒𐴡𐴙𐴅𐴧𐴤𐴙𐴠𐴊𐴠 𐴐𐴤𐴡𐴣𐴀𐴡𐴃 , 𐴁𐴟𐴄 𐴓𐴡𐴘 𐴀𐴝𐴘𐴧𐴥𐴠𐴌 𐴊𐴠 𐴉𐴝𐴐𐴤𐴞𐴕𐴊𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴓𐴦𐴡𐴃 𐴉𐴝𐴘 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴥𐴠 𐴁𐴟𐴄 𐴘𐴥𐴝𐴀𐴝𐴕𐴡𐴃𐴧𐴤𐴟 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 , 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝 𐴴 𐴴 𐴎𐴡𐴕 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞 𐴴 𐴳 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴔𐴟𐴄 𐴸 𐴷 𐴎𐴡𐴕 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴉𐴟𐴏𐴥𐴝𐴌 𐴀𐴝𐴏𐴥𐴝𐴌 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴉𐴝𐴀𐴝 𐴒𐴠𐴓𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴁𐴝𐴚𐴓𐴝𐴊𐴠 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 , 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴘𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴠𐴈𐴥𐴡𐴕𐴡𐴌 𐴀𐴡𐴑𐴃𐴤𐴡𐴃 , 𐴑𐴡𐴓𐴥𐴝 𐴑𐴤𐴟𐴀 𐴋𐴞𐴘𐴝𐴃 𐴔𐴝𐴎𐴤𐴠 𐴘𐴥𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴃𐴝𐴊𐴝𐴌𐴟𐴑 𐴃𐴡𐴊𐴡𐴕𐴃𐴡 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴁𐴦𐴝𐴊𐴠 , 𐴑𐴝𐴕𐴟𐴕 𐴔𐴡𐴎𐴞𐴕 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴡 𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴀𐴥𐴠𐴕𐴋𐴞𐴓𐴧𐴝 𐴒𐴡𐴃𐴡 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴃 𐴔𐴝𐴎𐴤𐴠 𐴘𐴥𐴡 𐴏𐴠𐴕 𐴂𐴟𐴌𐴟 𐴎𐴠𐴌𐴥𐴠 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌 𐴖𐴝 𐴑𐴡 𐴌𐴟 𐴉𐴝𐴌𐴝𐴌 𐴌𐴠𐴉𐴥𐴡𐴄 𐴁𐴝𐴌𐴞𐴎𐴝𐴌 𐴁𐴤𐴟𐴃𐴤𐴡𐴃𐴧𐴟 𐴘𐴥𐴡 𐴷 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 , 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴅𐴧𐴤𐴞𐴀𐴞𐴓 𐴱𐴱

Sources : AEN