𐴀𐴝𐴙𐴑𐴧𐴙𐴝𐴁𐴡𐴃 𐴀𐴥𐴝𐴣𐴃𐴤𐴞𐴘𐴝𐴌 𐴀𐴡𐴓𐴝 𐴈𐴡𐴊𐴦𐴟𐴕𐴡𐴌 𐴊𐴟𐴀𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴊𐴟𐴘 𐴎𐴡𐴕 𐴒𐴤𐴝𐴙𐴓𐴢 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁𐴢 𐴐𐴤𐴡𐴀𐴡𐴌𐴡𐴌 𐴁𐴤𐴟𐴔𐴠 𐴉𐴝𐴌𐴝𐴃 , 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴀𐴥𐴝𐴣𐴃𐴤𐴞𐴘𐴝𐴌 𐴀𐴡𐴓𐴝 𐴈𐴡𐴊𐴦𐴟𐴕𐴡𐴌 𐴒𐴟𐴓𐴞𐴌 𐴊𐴟𐴀𐴝𐴌𐴝 𐴱 𐴰 𐴲 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴊𐴟𐴘 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴉𐴝𐴌𐴝𐴌 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠 , 𐴀𐴥𐴝𐴣𐴃𐴤𐴞𐴘𐴝𐴌 𐴀𐴡𐴓𐴝 𐴊𐴟𐴘 𐴎𐴡𐴕 𐴀𐴝𐴌 𐴀𐴥𐴞𐴃𐴤𐴝𐴌𐴝𐴌 𐴉𐴥𐴟𐴣𐴖𐴝𐴣𐴃𐴞 𐴃𐴞𐴕 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴟𐴄 𐴉𐴝𐴣𐴏𐴢 𐴎𐴡𐴕𐴠 , 𐴇𐴥𐴝𐴘𐴅𐴤𐴠𐴑 𐴒𐴡𐴅𐴧𐴤𐴞𐴀𐴞𐴓 𐴊𐴠 𐴃𐴞𐴕 𐴁𐴡𐴏𐴥𐴡𐴙𐴌𐴅𐴧𐴙𐴝 𐴔𐴝𐴘𐴧𐴝𐴌 𐴓𐴝𐴐𐴢 𐴓𐴡𐴘 𐴁𐴤𐴟𐴔𐴠 𐴉𐴝𐴌𐴝𐴃 𐴀𐴝𐴙𐴐𐴧𐴤𐴙𐴠𐴊𐴠 𐴀𐴡𐴑𐴃𐴤𐴡𐴃 , 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴈𐴡𐴃𐴤𐴝 𐴁𐴝𐴌𐴥𐴝 𐴁𐴤𐴝𐴌𐴞 𐴀𐴥𐴡𐴘𐴧𐴠𐴊𐴠 𐴐𐴤𐴡𐴔𐴡𐴃 , 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴀𐴥𐴡𐴑𐴧𐴡𐴓𐴠 𐴒𐴟𐴓𐴞 𐴏𐴝𐴓𐴝𐴘𐴧𐴥𐴠 𐴁𐴡𐴓𐴞 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴏𐴟𐴑 𐴊𐴠𐴈𐴥𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴁𐴤𐴟𐴔𐴠 𐴉𐴝𐴌𐴝𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 / 𐴀𐴥𐴟 𐴔𐴡𐴗𐴚 𐴆𐴙𐴡𐴌 𐴔𐴝𐴘𐴧𐴝 / 𐴔𐴥𐴝 𐴀𐴟𐴔𐴧𐴝 𐴇𐴝 𐴁𐴡𐴐𐴢 ( 𐴳 ) 𐴁𐴡𐴏𐴥𐴡𐴌 , 𐴀𐴞𐴁𐴤𐴝 𐴌𐴥𐴠 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴰 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴕𐴥𐴟𐴙𐴐𐴢 𐴈𐴡𐴊𐴦𐴟𐴕𐴠 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 , 𐴄𐴠𐴓𐴞𐴉𐴥𐴟𐴕 𐴒𐴡𐴌𐴥𐴞 𐴰 𐴰 𐴱 𐴓𐴝𐴑 𐴄𐴞𐴛𐴝 𐴏𐴥𐴟𐴌𐴥𐴝𐴕𐴞 𐴔𐴝𐴙𐴒𐴧𐴤𐴙𐴠 𐴱 𐴉𐴥𐴞𐴃𐴞𐴕 𐴀𐴝𐴌𐴀𐴥𐴡 𐴰 𐴵 𐴓𐴝𐴑 𐴁𐴝𐴌𐴥𐴝𐴘 𐴔𐴝𐴙𐴒𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴥𐴠 , 𐴒𐴟𐴌𐴝 𐴉𐴟𐴖𐴝 𐴀𐴞𐴁𐴤𐴝 𐴉𐴝𐴘𐴁𐴡𐴓𐴧𐴥𐴝 / 𐴀𐴥𐴟 𐴔𐴡𐴗𐴚 𐴆𐴙𐴡 𐴘𐴠 ( 𐴑𐴠 𐴁𐴞 𐴎𐴠 𐴂𐴥𐴠𐴘 ) 𐴌 𐴃𐴟𐴌𐴥𐴟 𐴘𐴠 𐴰 𐴵 𐴱 𐴓𐴝𐴑 𐴄𐴞𐴛𐴝 𐴊𐴞𐴀𐴞 𐴁𐴦𐴝𐴊𐴠 𐴘𐴥𐴡 , 𐴒𐴡𐴃𐴡 𐴈𐴝𐴙𐴓𐴧𐴝 𐴊𐴞𐴘𐴥𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠 𐴱𐴱 𐴎𐴡𐴈𐴥𐴡𐴔𐴡𐴌 𐴊𐴝𐴑 𐴓𐴡𐴘 𐴔𐴡𐴌𐴝 𐴉𐴟𐴖𐴝𐴌 𐴓𐴝𐴐𐴢 𐴁𐴤𐴠 𐴀𐴝𐴕𐴥𐴞 𐴁𐴝𐴉𐴡𐴌𐴥𐴠 𐴒𐴡𐴏𐴥𐴝𐴘 𐴊𐴞𐴘𐴥𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠 𐴱𐴱

𐴉𐴟𐴖𐴝 𐴇𐴥𐴝𐴘𐴅𐴤𐴠𐴑 𐴒𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴝𐴌 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 ( 𐴀𐴠 𐴀𐴠𐴓 𐴂𐴞 ) 𐴔𐴡𐴒𐴢 𐴁𐴝𐴒𐴞𐴌 𐴔𐴞𐴔𐴁𐴤𐴡𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 , 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 ( 𐴀𐴝𐴌 𐴀𐴠𐴉𐴢 𐴀𐴠 ) 𐴘𐴠 ( 𐴀𐴠 𐴀𐴠𐴓 𐴂𐴞 ) 𐴌 𐴏𐴥𐴠𐴒𐴠𐴄𐴠𐴌𐴥𐴞 𐴀𐴡𐴉𐴥𐴞𐴏𐴡𐴃𐴧𐴤𐴟 𐴄𐴠𐴓𐴥𐴞𐴉𐴥𐴟𐴕𐴠 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠 𐴔𐴡𐴕𐴃𐴡𐴌 𐴀𐴥𐴞𐴃𐴤𐴝𐴌𐴝 𐴅𐴟𐴖𐴝𐴁 𐴊𐴞𐴘𐴥𐴠𐴊𐴠 ( 𐴀𐴞𐴀𐴞𐴕 𐴏𐴥𐴞𐴘𐴝𐴏𐴞 𐴏𐴡𐴑𐴧𐴡𐴌𐴝𐴕𐴃𐴡 ) 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴀𐴥𐴞𐴃𐴤𐴝𐴌𐴝𐴌 𐴅𐴟𐴖𐴝𐴁𐴢 ” 𐴀𐴞𐴀𐴞𐴕 𐴀𐴝𐴓𐴠𐴊𐴤𐴝 𐴏𐴥𐴞𐴘𐴝𐴏𐴞 𐴏𐴡𐴑𐴧𐴡𐴌𐴝𐴕𐴃𐴡 𐴀𐴝𐴣𐴀𐴝𐴌𐴝 𐴀𐴝𐴌 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴊𐴤𐴡𐴌𐴔𐴞𐴘𐴡 𐴏𐴞𐴘𐴥𐴝𐴌𐴥𐴝 𐴌𐴥𐴠 𐴁𐴡𐴊𐴡𐴓𐴞 𐴏𐴥𐴞𐴘𐴝𐴏𐴞 𐴏𐴡𐴑𐴧𐴡𐴌𐴝𐴕𐴃𐴡𐴌 𐴀𐴥𐴞𐴑𐴧𐴤𐴙𐴝 𐴓𐴡𐴘 𐴎𐴝𐴘𐴁𐴤𐴝𐴌 𐴑𐴝𐴌𐴖𐴝𐴘 𐴁𐴡𐴓𐴞 𐴈𐴡𐴘𐴃𐴤𐴡 𐴔𐴡𐴕𐴠 𐴈𐴡𐴀𐴡𐴌 ” 𐴇𐴥𐴝𐴘𐴅𐴤𐴠𐴑𐴝𐴌 𐴀𐴥𐴡𐴑𐴧𐴡𐴓𐴠 ( 𐴀𐴠 𐴀𐴠𐴓 𐴂𐴞 ) 𐴌 𐴕𐴝𐴔 𐴀𐴠𐴏𐴃𐴠𐴔𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱𐴱

Sources : RFAburmese