𐴀𐴝𐴙𐴑𐴧𐴙𐴝𐴁𐴡𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴎𐴡𐴌𐴞𐴘𐴝 𐴇𐴥𐴝𐴣𐴃 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴉𐴝𐴣𐴏𐴢 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁𐴢 𐴄𐴡𐴀𐴡𐴕𐴡𐴌 𐴑𐴡𐴏𐴥𐴞 𐴌𐴥𐴠𐴑𐴧𐴤𐴗𐴥𐴝 𐴀𐴝𐴌 𐴀𐴡𐴚 𐴔𐴝𐴚𐴓𐴝 𐴌𐴥𐴠𐴑𐴧𐴤𐴗𐴥𐴝𐴌 𐴔𐴝𐴎𐴤𐴠 𐴔𐴦𐴝𐴌𐴠𐴆𐴡𐴌 𐴹 𐴃𐴝𐴌𐴥𐴞𐴑𐴡𐴃 𐴌𐴝𐴙𐴃𐴧𐴝 𐴱 𐴱 𐴁𐴝𐴎𐴞 𐴁𐴦𐴝𐴊𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴒𐴟𐴓𐴞 𐴉𐴡𐴌𐴞 𐴉𐴥𐴟𐴍𐴞𐴘𐴡𐴌𐴥𐴠 𐴇𐴥𐴝𐴣𐴃 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 , 𐴀𐴝𐴌 𐴀𐴥𐴡 𐴉𐴝𐴣𐴏𐴢 𐴎𐴡𐴕 𐴒𐴤𐴝𐴙𐴓𐴢 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴇𐴥𐴝𐴣𐴃 𐴎𐴡𐴕𐴡𐴌 𐴁𐴤𐴟𐴃𐴡𐴃𐴧𐴟 𐴉𐴝𐴣𐴏𐴢 𐴎𐴡𐴕 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴝𐴑𐴞 𐴊𐴟𐴘 𐴎𐴡𐴕 𐴔𐴝𐴌𐴠𐴆𐴡𐴌 𐴰 𐴱 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴀𐴝𐴙𐴑𐴧𐴙𐴝𐴁𐴡𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 , 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠 𐴱𐴱

𐴒𐴤𐴝𐴙𐴓𐴢 𐴀𐴥𐴡𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴁𐴦𐴠𐴐𐴢 𐴀𐴥𐴞𐴏𐴧𐴥𐴝 𐴔𐴝𐴃𐴤𐴝𐴃 𐴀𐴝𐴌 𐴒𐴝𐴀𐴝𐴌 𐴕𐴞𐴏𐴡𐴌 𐴀𐴥𐴞𐴏𐴧𐴥𐴝𐴃 , 𐴒𐴟𐴓𐴞 𐴉𐴥𐴟𐴍𐴞 𐴏𐴡𐴚𐴈𐴥𐴝 𐴀𐴥𐴡𐴑𐴧𐴡𐴓 𐴉𐴡𐴌𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 , 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴥𐴞𐴃𐴤𐴝𐴌𐴝 𐴌𐴥𐴠 𐴀𐴝𐴙𐴑𐴧𐴙𐴝𐴁𐴢 𐴇𐴥𐴝𐴐𐴉𐴝𐴃𐴝𐴓𐴡𐴌 𐴏𐴥𐴞𐴕𐴝 𐴏𐴞𐴌𐴥𐴝 𐴈𐴥𐴡𐴕𐴋𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴥𐴠 𐴁𐴡𐴓𐴞 𐴈𐴡𐴘𐴧𐴠 , 𐴀𐴞𐴕𐴄𐴝𐴌𐴕𐴥𐴠𐴄𐴢 𐴊𐴟𐴌𐴁𐴡𐴓𐴢 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴥𐴞𐴃𐴤𐴝𐴌𐴥𐴝 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊 𐴀𐴥𐴞𐴃𐴝𐴌𐴥𐴝𐴌 𐴏𐴥𐴡𐴀𐴞 𐴕𐴝𐴔 𐴒𐴠𐴌𐴥𐴝𐴔 𐴓𐴡𐴘 𐴉𐴝𐴌𐴝 𐴕𐴥𐴡 𐴎𐴝𐴀𐴝 , 𐴀𐴠𐴊𐴧𐴤𐴟𐴌 𐴎𐴝𐴕𐴝 𐴒𐴞𐴘𐴥𐴠𐴊𐴠 𐴉𐴟𐴖𐴝𐴙𐴕 𐴀𐴝𐴌 𐴑𐴠𐴙𐴏𐴧𐴥𐴟 𐴁𐴟𐴌𐴥𐴝 𐴁𐴠𐴍𐴞𐴘𐴥𐴝𐴙𐴕 𐴁𐴡𐴓𐴞 𐴱𐴱

𐴈𐴡𐴕𐴥𐴡 𐴎𐴝𐴒𐴝𐴃 𐴐𐴤𐴡𐴌𐴞 𐴎𐴝𐴘 𐴒𐴤𐴡𐴘 𐴕𐴡 𐴉𐴝𐴌𐴥𐴡𐴕𐴠 𐴋𐴡𐴌𐴝𐴘 𐴋𐴡𐴌𐴝𐴘 𐴃𐴤𐴝𐴑𐴤𐴝 𐴉𐴡𐴌𐴠𐴌 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠 , 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴞𐴘𐴡𐴌𐴥𐴠 𐴀𐴝𐴊𐴤𐴝 𐴒𐴤𐴡𐴕𐴄𐴤𐴝 𐴀𐴥𐴝𐴕𐴞𐴑 𐴁𐴦𐴝𐴊𐴠 , 𐴑𐴡𐴏𐴥𐴞 𐴌𐴥𐴠𐴑𐴧𐴤𐴗𐴥𐴝𐴃 𐴁𐴠𐴐𐴤𐴞 𐴔𐴠𐴓𐴠𐴄𐴠𐴌𐴞 𐴀𐴝𐴙𐴐𐴧𐴤𐴙𐴠 𐴀𐴝𐴌 𐴐𐴤𐴡𐴀𐴡𐴌𐴡𐴌 𐴁𐴤𐴟𐴃𐴡𐴌𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴙𐴃𐴧𐴤𐴡 𐴊𐴞𐴀𐴞𐴓𐴥𐴠 𐴘𐴥𐴡 𐴐𐴤𐴡𐴀𐴡𐴌𐴡𐴌 𐴁𐴝𐴀𐴝𐴌𐴠 𐴎𐴝𐴘𐴁𐴝𐴌 𐴀𐴠𐴅𐴝𐴎𐴡𐴃 𐴕𐴡 𐴊𐴠𐴀𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 , 𐴂𐴝𐴂𐴓𐴥𐴞𐴑 𐴔𐴝𐴕𐴥𐴟𐴙𐴐𐴢 𐴃𐴤𐴝𐴑𐴤𐴠𐴊𐴠 𐴎𐴝𐴒𐴝𐴌 𐴀𐴥𐴠𐴑𐴧𐴙𐴝 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴏𐴝𐴀𐴝𐴘 𐴏𐴥𐴞𐴃𐴤𐴞 𐴒𐴟𐴓𐴞 𐴔𐴝𐴌𐴠𐴊𐴠 𐴁𐴡𐴓𐴞 𐴀𐴝𐴙𐴑𐴧𐴙𐴝𐴁𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠 𐴱𐴱

𐴀𐴥𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴟𐴀𐴟𐴕 , 𐴀𐴝𐴙𐴑𐴧𐴙𐴝𐴁 𐴄𐴡𐴀𐴡𐴕𐴡𐴌 𐴁𐴤𐴟𐴃𐴡𐴌𐴠 𐴀𐴝𐴏𐴥𐴠𐴊𐴠 ( 𐴲 𐴱 ) 𐴓𐴡𐴔𐴁𐴤𐴡𐴌 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴡𐴃𐴧𐴤𐴟 𐴔𐴝𐴌𐴠𐴊𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 , 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴀𐴝𐴙𐴑𐴧𐴙𐴝𐴁𐴡𐴌 𐴁𐴡𐴌 𐴁𐴝𐴎𐴝𐴌𐴡𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴒𐴟𐴓𐴞 𐴉𐴡𐴌𐴞 𐴉𐴥𐴟𐴍𐴞𐴘𐴡𐴌𐴥𐴠 𐴲 𐴱 𐴎𐴡𐴕 𐴊𐴠𐴐𐴤𐴡𐴙𐴃𐴧𐴝 𐴔𐴡𐴌𐴞 𐴒𐴞𐴀𐴞𐴓 𐴒𐴤𐴡𐴘 𐴀𐴝𐴌 𐴸 𐴱 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴀𐴡𐴙𐴓 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 𐴱𐴱

Sources : RFAburmese