𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴌𐴝𐴉𐴡𐴃𐴧𐴝 𐴊𐴞𐴀𐴞𐴁𐴡𐴓𐴧𐴥𐴝 𐴶 𐴲 𐴃𐴡𐴕𐴎𐴞𐴔𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴠𐴉𐴝𐴎𐴡𐴃𐴞 𐴑𐴡𐴗𐴕𐴏𐴥𐴞𐴓𐴡𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴁𐴝𐴌𐴥𐴠𐴌 𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴀𐴥𐴞𐴀𐴞𐴕𐴡𐴃𐴧𐴟 𐴇𐴥𐴠𐴉𐴝𐴎𐴡𐴃 𐴃𐴤𐴝𐴑𐴤𐴞 𐴉𐴝𐴌𐴠 𐴉𐴝𐴀𐴝𐴕 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴠𐴉𐴝𐴎𐴡𐴃𐴞 𐴑𐴡𐴗𐴕𐴏𐴥𐴞𐴓𐴡𐴌 𐴈𐴝𐴣𐴏𐴥𐴠 , 𐴊𐴠𐴐𐴁𐴞𐴊𐴠𐴐𐴤𐴡𐴃 𐴀𐴝𐴏𐴥𐴠𐴊𐴠 𐴶 𐴲 𐴐𐴤𐴗𐴝 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔𐴠 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 𐴀𐴝𐴂𐴞𐴓 𐴒𐴡𐴙𐴅𐴧𐴤𐴙𐴠 , 𐴀𐴝𐴌 𐴶 𐴱 𐴰 𐴲 – 𐴷 𐴱 𐴰 𐴲 𐴐𐴤𐴡𐴕 𐴀𐴥𐴡𐴑𐴧𐴡𐴓𐴡𐴃 𐴀𐴥𐴡𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴝𐴃𐴡𐴚𐴒𐴞 𐴔𐴦𐴝𐴔𐴠𐴓𐴝 𐴊𐴟𐴀𐴝𐴌𐴝 𐴕𐴡 𐴀𐴥𐴡𐴀𐴡 𐴉𐴝𐴀𐴝𐴕 𐴀𐴥𐴡 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴔𐴠𐴓𐴠𐴄𐴠𐴌𐴞𐴌 𐴄𐴠𐴕𐴧𐴞𐴕 𐴕𐴡 𐴓𐴡𐴘 𐴃𐴤𐴝𐴑𐴤𐴞 𐴕𐴡 𐴉𐴝𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴕𐴎𐴡𐴑𐴧𐴤𐴝 𐴁𐴝𐴕𐴝𐴘𐴧𐴥𐴠𐴊𐴠 𐴑𐴝𐴕𐴟𐴕 𐴔𐴡𐴎𐴞𐴕 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴁𐴡𐴓𐴝𐴎𐴟𐴌𐴞 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴌 𐴊𐴧𐴠 𐴘𐴥𐴝𐴀𐴝𐴕 𐴁𐴠𐴐𐴤𐴞 𐴋𐴡𐴣𐴀𐴡𐴌 𐴈𐴥𐴡𐴌𐴝𐴁 𐴀𐴝𐴌 𐴋𐴡𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴌𐴑𐴝𐴕𐴡𐴌 𐴁𐴡𐴀𐴡𐴃 𐴎𐴝𐴒𐴝 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴁𐴠𐴐𐴤𐴞 𐴈𐴥𐴝𐴌𐴝 𐴇𐴥𐴝𐴌𐴝𐴘 𐴉𐴥𐴠𐴓𐴥𐴝𐴘𐴧𐴠 , 𐴀𐴠 𐴇𐴥𐴝𐴓𐴡𐴃𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴘 𐴔𐴡𐴒𐴢 𐴁𐴝𐴒𐴞𐴌 𐴓𐴡𐴘 𐴖𐴝𐴉𐴠𐴏𐴢 𐴓𐴝𐴌𐴥𐴝𐴘 𐴒𐴡𐴌𐴥𐴞𐴁𐴤𐴝𐴌 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴶 𐴲 𐴉𐴝𐴄𐴞 𐴘𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞𐴃 𐴕𐴡 𐴒𐴤𐴡𐴓𐴞 𐴃𐴤𐴝𐴑𐴤𐴞 𐴕𐴡 𐴉𐴝𐴌𐴥𐴞𐴁𐴤𐴡 𐴑𐴝𐴕𐴟𐴕 𐴔𐴡𐴎𐴞𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴁𐴝𐴌 𐴈𐴡𐴀𐴡𐴌 𐴊𐴧𐴠 , 𐴘𐴥𐴝𐴀𐴝𐴕 𐴔𐴞𐴏𐴥𐴝 𐴒𐴡𐴓𐴧𐴡𐴃 𐴁𐴡𐴓𐴞 , 𐴀𐴝𐴌𐴑𐴝𐴕𐴡𐴃 𐴔𐴝𐴃𐴤𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 𐴇𐴥𐴡𐴑𐴟𐴔𐴡𐴃𐴞 𐴕𐴡𐴔𐴝𐴙𐴕𐴊𐴝 𐴘𐴠 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 ( 𐴔𐴞𐴘𐴝𐴕𐴔𐴝 𐴀𐴝𐴓𐴧𐴥𐴝𐴚 ) 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴡𐴃 𐴈𐴡𐴘𐴧𐴥𐴠 , 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴥𐴞𐴃𐴤𐴝𐴌𐴝 𐴌𐴠 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 , 𐴔𐴠𐴓𐴠𐴄𐴠𐴌𐴞𐴌 𐴉𐴥𐴟𐴣𐴖𐴝𐴣𐴃𐴞 𐴓𐴝𐴌𐴥𐴝𐴘 𐴒𐴡𐴌𐴥𐴞𐴁𐴤𐴝𐴌 𐴀𐴞𐴏𐴧𐴥𐴝 𐴕𐴥𐴝𐴘 𐴁𐴡𐴓𐴞 𐴶 𐴲 𐴐𐴤𐴗𐴝 𐴌𐴟𐴇𐴝𐴙𐴚𐴒𐴙𐴝𐴌 𐴃𐴡𐴕𐴎𐴞𐴔𐴠 𐴈𐴡𐴘𐴧𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴕𐴞𐴌𐴝𐴉𐴡𐴃𐴧𐴝 𐴊𐴞𐴘𐴝 𐴉𐴡𐴌𐴥𐴞𐴁𐴤𐴡 𐴈𐴡𐴘𐴓𐴥𐴠 , 𐴀𐴝𐴌𐴑𐴝𐴕𐴡𐴃 𐴐𐴤𐴝𐴕𐴃𐴞𐴌 𐴏𐴥𐴝𐴣𐴃𐴠 𐴃𐴤𐴝𐴑𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴤𐴡𐴌 𐴔𐴝𐴎𐴠 𐴔𐴟𐴋𐴁𐴤𐴠𐴍 𐴀𐴥𐴡𐴘𐴁𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 , 𐴀𐴠𐴈𐴥𐴡𐴕 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙 𐴀𐴥𐴡𐴑𐴧𐴡𐴓 𐴊𐴟𐴘 𐴀𐴝𐴌𐴔𐴥𐴞𐴌 ( 𐴉𐴥𐴡𐴗𐴏𐴡𐴌 ) 𐴔𐴝𐴎𐴤𐴠 , 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴃𐴧𐴟 𐴀𐴠𐴑𐴧𐴤𐴝𐴕 𐴊𐴤𐴝𐴘 𐴓𐴟𐴖𐴝𐴘𐴁𐴤𐴝𐴌 𐴎𐴝𐴒𐴝 𐴀𐴥𐴟𐴊𐴧𐴤 𐴕𐴥𐴝𐴘 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱𐴱

Sources : RFAburmese