𐴀𐴝𐴌𐴀𐴥𐴡 𐴊𐴠𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴒𐴞𐴘𐴥𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 , 𐴀𐴝𐴌𐴀𐴥𐴡 𐴊𐴠𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴕𐴟𐴖𐴝 𐴈𐴥𐴝𐴓𐴞 𐴀𐴠𐴓𐴝𐴑𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴒𐴞𐴘𐴥𐴠 , 𐴀𐴞𐴏𐴧𐴥𐴝 𐴔𐴡𐴃𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴡𐴀𐴡𐴙𐴕𐴧𐴝 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴔𐴡𐴚𐴒𐴡𐴓 𐴁𐴝𐴌𐴠 𐴌𐴝𐴙𐴃𐴡𐴌 𐴸 𐴁𐴝𐴎𐴠 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴁𐴝𐴀𐴝𐴏𐴢 𐴒𐴝𐴌𐴥𐴞 𐴓𐴡𐴘 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴋𐴞𐴒𐴞𐴌𐴞 𐴑𐴦𐴡𐴓𐴠𐴅𐴡𐴌 𐴔𐴝𐴍𐴥𐴡𐴃 𐴀𐴝𐴙𐴕𐴧𐴥𐴠 , 𐴘𐴥𐴝𐴀𐴝𐴕𐴃𐴟 𐴌𐴝𐴙𐴃𐴡𐴌 𐴁𐴤𐴟𐴃𐴡𐴌𐴠 𐴆𐴞𐴄𐴝𐴒𐴡𐴚 𐴎𐴝𐴘𐴁𐴡𐴓𐴧𐴥𐴝 𐴁𐴝𐴘𐴐𐴤𐴝 𐴊𐴞𐴀𐴞𐴁𐴡 𐴱𐴱

𐴌𐴞𐴉𐴟𐴎𐴞𐴌 𐴑𐴤𐴟𐴌𐴝𐴉𐴢 𐴀𐴝𐴌 𐴖𐴝𐴉𐴠𐴏𐴞𐴌 𐴎𐴟𐴣𐴖𐴝𐴛𐴓𐴧𐴝 𐴑𐴡𐴔𐴞𐴐𐴕𐴝𐴌 ( 𐴀𐴝𐴌 𐴀𐴝𐴌 𐴀𐴝𐴌 𐴏𐴞 ) 𐴐𐴤𐴡𐴔𐴏𐴟𐴊 𐴊𐴟𐴅𐴝 𐴘𐴠 𐴈𐴥𐴡𐴁𐴡𐴌 𐴏𐴥𐴡𐴀𐴞 𐴈𐴥𐴝𐴄𐴞 𐴁𐴡𐴓𐴞 𐴈𐴡𐴘𐴧𐴠 , 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠𐴊𐴠 ! 𐴳 𐴳 𐴲 𐴀𐴡𐴔 𐴑𐴤𐴠𐴉𐴡𐴃 𐴀𐴟𐴑𐴤𐴞𐴘𐴝-𐴄𐴠𐴑𐴕𐴝𐴉𐴢 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃𐴧𐴟 𐴂𐴠𐴌𐴝𐴘 𐴊𐴠𐴌 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴒𐴞𐴘𐴥𐴠 , 𐴁𐴟𐴙𐴃 𐴁𐴝𐴌𐴠 𐴏𐴥𐴡𐴀𐴡𐴌𐴠 𐴕𐴠𐴁𐴤𐴞𐴌 𐴉𐴥𐴡𐴗𐴏𐴡𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴀𐴥𐴞𐴃𐴝𐴌𐴝 𐴌𐴠 𐴆𐴞𐴄𐴝𐴚 𐴐𐴤𐴡𐴀𐴡𐴌𐴡𐴃𐴧𐴟 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴓𐴡𐴘 𐴎𐴝𐴘𐴁𐴡 𐴒𐴤𐴡𐴘 𐴱𐴱

𐴘𐴝𐴀𐴝𐴌 𐴀𐴝𐴒𐴠 𐴲 𐴳 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴒𐴞𐴘𐴥𐴠 / 𐴔𐴟𐴇𐴝𐴔𐴧𐴡𐴊 𐴌𐴡𐴐𐴤𐴞𐴊𐴠 𐴒𐴤𐴡𐴌𐴒𐴟𐴐𐴧𐴤𐴞𐴌 𐴔𐴞𐴔𐴁𐴤𐴡𐴌 𐴇𐴥𐴝𐴣𐴃 𐴎𐴡𐴕 𐴓𐴡𐴘 𐴄𐴠𐴑𐴕𐴝𐴉𐴢 𐴓𐴥𐴠𐴊𐴝 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴔𐴟𐴀𐴟𐴕𐴃𐴟 𐴁𐴝𐴀𐴝𐴏𐴡𐴌 𐴀𐴠𐴕𐴃𐴠𐴎𐴝𐴌 𐴒𐴡𐴌𐴥𐴠𐴌 , 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠𐴊𐴠 ! 𐴒𐴤𐴡𐴌𐴒𐴟𐴐𐴧𐴤𐴞𐴌 𐴔𐴞𐴔𐴁𐴤𐴡𐴌 𐴁𐴝𐴌𐴥𐴞 𐴒𐴞𐴘𐴥𐴡𐴘 , 𐴀𐴠𐴍𐴥𐴠 𐴉𐴟𐴖𐴝𐴙𐴕 𐴁𐴦𐴠𐴐𐴢 𐴀𐴥𐴡𐴀𐴡𐴕𐴠 𐴑𐴤𐴟𐴁 𐴁𐴠𐴎𐴟𐴙𐴃𐴡𐴃 𐴀𐴝𐴏𐴥𐴞 , 𐴊𐴟𐴑𐴧𐴤𐴡𐴌 𐴏𐴥𐴝𐴣𐴃𐴠 𐴎𐴞𐴁𐴡𐴕 𐴈𐴝𐴍𐴝 𐴉𐴡𐴌𐴠𐴌 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴃𐴤𐴝𐴑𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴑𐴠𐴀𐴠𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴃𐴟 𐴁𐴤𐴝𐴌𐴡 𐴌𐴝𐴘𐴐𐴤𐴡𐴕 𐴁𐴦𐴠𐴐𐴢 𐴉𐴝𐴀𐴝 , 𐴀𐴥𐴠𐴃𐴡𐴓𐴧𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴌 𐴒𐴤𐴡𐴘𐴊𐴠 𐴱𐴱

𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴀𐴝𐴌𐴑𐴝𐴕𐴡𐴌 𐴇𐴥𐴝𐴓𐴡𐴃 𐴎𐴠𐴃𐴤𐴡 𐴀𐴥𐴠𐴃𐴤𐴡 𐴈𐴥𐴡𐴌𐴝𐴁 𐴀𐴥𐴟𐴀𐴝𐴃 𐴀𐴝𐴏𐴥𐴠 , 𐴀𐴥𐴠 𐴀𐴥𐴞𐴏𐴝𐴉𐴠 𐴘𐴥𐴡 𐴀𐴝𐴌𐴑𐴝𐴕𐴡𐴃 𐴉𐴥𐴞𐴌𐴞 𐴎𐴝𐴘𐴁𐴝𐴌 𐴈𐴡𐴕𐴥𐴡 𐴏𐴦𐴟𐴌𐴡𐴃 𐴊𐴠𐴈𐴥𐴝 𐴕𐴡 𐴎𐴝𐴀𐴝𐴌 , 𐴔𐴟𐴄 𐴈𐴡𐴃𐴤𐴝 𐴁𐴤𐴝𐴐𐴡𐴕 𐴏𐴡𐴌 𐴎𐴡𐴀𐴡𐴕 𐴏𐴥𐴝𐴌𐴥𐴝 𐴈𐴡𐴕𐴥𐴡 𐴀𐴟𐴉𐴥𐴝𐴘 𐴕𐴥𐴝𐴘 , 𐴁𐴡𐴌𐴔𐴥𐴝𐴌𐴃𐴟 𐴎𐴝𐴘 𐴎𐴟𐴓𐴥𐴟𐴔 𐴒𐴡𐴌𐴥𐴞 𐴕𐴦𐴠𐴓𐴝𐴘 𐴊𐴞𐴘𐴥𐴠𐴊𐴠 𐴱 . 𐴱 𐴔𐴡𐴓𐴞𐴘𐴟𐴕𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 , 𐴑𐴝𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴌 𐴀𐴟𐴑𐴤𐴞𐴘𐴝 𐴄𐴠𐴑𐴕𐴝𐴉𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴌 , 𐴑𐴠𐴀𐴠𐴔𐴡𐴌 𐴎𐴝𐴔 𐴀𐴝𐴌 𐴒𐴤𐴞𐴐𐴢 𐴈𐴡𐴔𐴝𐴘 𐴁𐴤𐴡𐴓𐴧𐴝 𐴁𐴡𐴓𐴞 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴕𐴟𐴖𐴝 𐴈𐴥𐴝𐴓𐴞 𐴇𐴥𐴝𐴃𐴞𐴘𐴝 𐴀𐴠𐴓𐴝𐴑𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴠𐴑 𐴓𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴓𐴡𐴘𐴎𐴝𐴘 𐴌𐴝𐴑𐴤𐴞𐴁𐴤𐴡𐴓𐴧𐴝 𐴊𐴟𐴘 𐴁𐴡𐴏𐴥𐴡𐴌 𐴀𐴝𐴒𐴠 𐴓𐴡𐴃𐴞 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴥𐴠 𐴱𐴱

Sources : Ukhiyanews.com