𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴃 𐴀𐴠𐴑 𐴔𐴝𐴐𐴤𐴡𐴌 𐴁𐴤𐴟𐴃𐴡𐴌𐴠 𐴰 𐴰 𐴱 𐴎𐴡𐴕𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴃 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴁𐴤𐴟𐴃𐴡𐴌𐴠 , 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴇𐴥𐴝𐴓𐴡𐴃 𐴓𐴡𐴘 𐴉𐴡𐴣𐴀𐴡𐴙𐴏𐴧𐴙𐴠𐴊𐴠 𐴰 𐴰 𐴱 𐴎𐴡𐴕𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴉𐴟𐴓𐴞𐴐𐴡𐴌 𐴇𐴥𐴝𐴃𐴡𐴃 𐴁𐴡𐴕 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 , 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴱 𐴳 𐴃𐴝𐴌𐴥𐴞 𐴉𐴡𐴙𐴅𐴧𐴡𐴕𐴃𐴡 , 𐴐𐴤𐴡𐴔𐴡𐴘 𐴘𐴝𐴀𐴝𐴕𐴡𐴌 𐴁𐴤𐴟𐴃𐴡𐴌𐴠 𐴱𐴱

𐴉𐴝𐴕𐴥𐴞𐴌 𐴌𐴝𐴏𐴧𐴝 𐴘𐴝𐴃𐴡 𐴉𐴥𐴟𐴖𐴝𐴕𐴝𐴌 𐴌𐴝𐴏𐴧𐴝 𐴁𐴝𐴀𐴝𐴘 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴃 𐴉𐴡𐴣𐴀𐴡𐴙𐴏𐴧𐴙𐴠 𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴲 𐴵 𐴎𐴡𐴕 𐴀𐴝𐴌 𐴁𐴠𐴍𐴞𐴘𐴝𐴙𐴕 𐴱 𐴳 𐴎𐴡𐴕 𐴀𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕 𐴸 𐴱 𐴎𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴈𐴝𐴔 𐴏𐴝𐴓𐴝𐴀𐴡𐴙𐴕𐴧𐴝 𐴀𐴠𐴑 𐴎𐴡𐴕𐴠 ” 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴌𐴠𐴕𐴒𐴟𐴕𐴡𐴌 𐴃𐴟𐴌𐴥𐴟 𐴀𐴡𐴙𐴕𐴧𐴡 𐴊𐴠𐴐𐴢 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴕𐴞𐴎𐴡𐴌 𐴃𐴤𐴡𐴌𐴡𐴃𐴧𐴟 𐴕𐴠𐴀𐴠𐴓𐴞 𐴀𐴝𐴙𐴐𐴧𐴤𐴙𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴟𐴕 𐴀𐴝𐴌𐴑𐴝𐴕𐴡𐴃𐴧𐴤𐴟 𐴀𐴝𐴙𐴐𐴧𐴤𐴙𐴠𐴊𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴊𐴠𐴐𐴤𐴡𐴌 𐴇𐴥𐴝𐴓𐴡𐴃 𐴁𐴤𐴝𐴓𐴝 𐴕𐴥𐴝𐴘𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴡𐴐𐴤𐴝𐴕𐴃𐴞 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴈𐴝𐴔 𐴈𐴝𐴎 𐴒𐴡𐴌𐴥𐴞 𐴉𐴝𐴌𐴡𐴕𐴡𐴌 𐴐𐴤𐴟𐴎𐴟𐴑 𐴐𐴤𐴟𐴘𐴊𐴝 𐴕𐴡 𐴃𐴤𐴝𐴑𐴤𐴡𐴕𐴠 , 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑 𐴉𐴝𐴀𐴝𐴌 𐴊𐴠 , 𐴀𐴝𐴌 𐴑𐴡𐴗𐴔 𐴉𐴡𐴌𐴥𐴡𐴑 𐴔𐴦𐴝𐴔𐴠𐴓𐴝 𐴎𐴠𐴃𐴤𐴡 𐴀𐴠𐴃𐴤𐴡 𐴁𐴦𐴠𐴐𐴢 𐴀𐴥𐴡𐴘 𐴀𐴝𐴘𐴧𐴠𐴌 𐴊𐴠 , 𐴇𐴥𐴝𐴓𐴡𐴃 𐴀𐴞𐴀𐴞𐴕𐴡𐴌 𐴎𐴡𐴌𐴞𐴘𐴝 𐴊𐴠𐴐𐴤𐴡𐴃𐴧𐴟 𐴕𐴠𐴀𐴠𐴓𐴞 𐴀𐴝𐴘𐴧𐴥𐴠𐴌 𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 , 𐴕𐴞𐴎𐴡𐴌 𐴔𐴡𐴑𐴏𐴟𐴊 𐴄𐴤𐴞𐴑𐴝𐴕𐴝𐴃 𐴉𐴡𐴣𐴀𐴡𐴏𐴞𐴁𐴝𐴌 𐴀𐴝𐴒𐴠 𐴀𐴝𐴊𐴤𐴝 𐴌𐴝𐴏𐴧𐴝𐴃 𐴊𐴤𐴡𐴌𐴝 𐴉𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 ” 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴝𐴒𐴠 𐴊𐴤𐴡𐴌𐴝 𐴉𐴡𐴅𐴧𐴤𐴞𐴀𐴞𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴓𐴡𐴘 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠 , 𐴀𐴞𐴘𐴝 𐴊𐴤𐴡𐴌𐴝 𐴉𐴡𐴌𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴕𐴥𐴡 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴕𐴡 𐴒𐴡𐴌𐴥𐴠𐴌 𐴁𐴡𐴓𐴞 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴉𐴟𐴓𐴞𐴐𐴡𐴌 𐴁𐴠𐴐𐴤𐴞 𐴈𐴝𐴣𐴏𐴥𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 ” 𐴀𐴝𐴒𐴠 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴎𐴞𐴘𐴓𐴡𐴃 𐴊𐴞𐴘𐴠 , 𐴉𐴟𐴖𐴝𐴙𐴕𐴊𐴤𐴡𐴌𐴠 𐴉𐴟𐴖𐴝𐴙𐴕 𐴌𐴝𐴑𐴤𐴠𐴊𐴠 𐴎𐴞𐴘𐴡𐴓𐴡𐴃 𐴌𐴝𐴙𐴑𐴧𐴤𐴙𐴠 𐴊𐴠 𐴁𐴠𐴐𐴤𐴞 𐴀𐴝𐴏𐴥𐴠 , 𐴀𐴠𐴈𐴥𐴡𐴕 𐴐𐴤𐴟𐴊𐴠 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠” 𐴁𐴡𐴓𐴞 𐴈𐴡𐴘𐴧𐴠 , 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴁𐴤𐴟𐴃𐴡𐴌𐴠 , 𐴇𐴥𐴝𐴙𐴚𐴒𐴞𐴌𐴥𐴞 𐴋𐴞𐴘𐴝 , 𐴏𐴡𐴁𐴧𐴤𐴡𐴚 , 𐴚𐴡𐴌𐴥𐴟𐴑 𐴑𐴤𐴡𐴚 , 𐴖𐴥𐴝𐴑𐴠 𐴔𐴥𐴝 , 𐴇𐴝𐴕𐴏𐴝𐴋𐴝 𐴀𐴠 𐴐𐴤𐴡𐴀𐴡𐴌 𐴀𐴞𐴀𐴞𐴕𐴡𐴃𐴧𐴤𐴟 𐴱 𐴰 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴱𐴱

Sources : DVBburmese