𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴎𐴟𐴓𐴥𐴟𐴔 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 / 𐴔𐴟𐴇𐴝𐴔𐴧𐴡𐴊 𐴘𐴝𐴏𐴦𐴞𐴕 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 , 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴊 𐴀𐴠𐴑 𐴎𐴡𐴕𐴡𐴌𐴥𐴠 , 𐴈𐴥𐴡𐴌𐴝𐴁 𐴔𐴝𐴕𐴥𐴟𐴙𐴐𐴢 𐴈𐴡𐴊𐴤𐴟𐴒𐴧𐴤𐴟𐴕𐴠 𐴒𐴟𐴓𐴞 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 , 𐴒𐴟𐴓𐴞 𐴒𐴡𐴌𐴥𐴞 𐴔𐴡𐴌𐴞𐴁𐴤𐴝𐴌 𐴀𐴝𐴒𐴠 𐴀𐴥𐴞𐴃𐴝𐴌 𐴇𐴥𐴝𐴃𐴢 𐴄𐴤𐴠𐴚 𐴈𐴝𐴍𐴞 𐴉𐴥𐴠𐴓𐴥𐴝𐴘𐴧𐴠 , 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴌𐴝𐴙𐴃𐴡𐴌 𐴂𐴠𐴌𐴝𐴘 𐴰 𐴱 𐴁𐴝𐴎𐴠 , 𐴀𐴟𐴑𐴤𐴞𐴘𐴝 𐴵 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴒𐴤𐴡𐴙𐴄𐴧𐴤𐴙𐴠 𐴊𐴠 , 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴘𐴝𐴏𐴦𐴞𐴕 𐴵 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 ” 𐴏𐴞 𐴁𐴡𐴓𐴡𐴑𐴡𐴌 𐴁𐴤𐴝𐴐𐴞𐴕𐴊𐴝 ” 𐴱𐴱

𐴀𐴥𐴠𐴏𐴃𐴤𐴝𐴕𐴞𐴘𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴅𐴝𐴕𐴑𐴝𐴌𐴞 𐴔𐴡𐴎𐴞𐴕 , 𐴂𐴠𐴌𐴝𐴘 𐴌𐴝𐴙𐴃𐴡𐴌 𐴰 𐴱 𐴁𐴝𐴎𐴠 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴔𐴝𐴕𐴥𐴟𐴙𐴐𐴢 𐴈𐴡𐴊𐴤𐴟𐴒𐴧𐴤𐴟𐴕 / 𐴘𐴝𐴏𐴦𐴞𐴕𐴡𐴌 𐴒𐴤𐴡𐴌𐴡𐴌 𐴔𐴟𐴀𐴟𐴕𐴃𐴟 𐴀𐴝𐴀𐴝𐴘 𐴀𐴥𐴞𐴃𐴝𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴒𐴡𐴙𐴅𐴧𐴤𐴙𐴠 , 𐴁𐴦𐴝𐴊𐴠 𐴒𐴟𐴓𐴞 𐴔𐴝𐴌𐴞 𐴌𐴝𐴏𐴧𐴝𐴌 𐴀𐴟𐴖𐴡𐴌𐴠 / 𐴘𐴝𐴏𐴦𐴞𐴕𐴡𐴌𐴥𐴠 𐴉𐴥𐴠𐴓𐴥𐴝𐴘𐴧𐴠 , 𐴁𐴦𐴝𐴊𐴠 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴠 𐴊𐴤𐴝𐴌 𐴊𐴦𐴡 𐴓𐴡𐴘 𐴀𐴥𐴞𐴃𐴝𐴌 𐴇𐴥𐴝𐴃𐴢 𐴈𐴝𐴍𐴞 𐴉𐴥𐴠𐴓𐴝𐴘𐴧𐴠 , 𐴁𐴦𐴝𐴊𐴠 𐴀𐴝𐴣𐴍𐴥𐴟𐴌 𐴀𐴟𐴖𐴡𐴌𐴃𐴧𐴤𐴟 𐴒𐴡𐴌𐴥𐴞 𐴄𐴤𐴠𐴚 𐴀𐴠𐴑𐴧𐴤𐴝𐴕 𐴈𐴝𐴍𐴞 𐴉𐴥𐴠𐴓𐴥𐴝𐴘𐴧𐴠 , 𐴇𐴥𐴝𐴃𐴢 𐴄𐴤𐴠𐴚 𐴈𐴝𐴍𐴞 𐴉𐴥𐴠𐴓𐴥𐴝𐴘 𐴔𐴡𐴌𐴞 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴀𐴥𐴡𐴑𐴧𐴡𐴓 𐴎𐴝𐴒𐴝 𐴘𐴥𐴝𐴀𐴝𐴕𐴃𐴟 𐴒𐴞𐴘𐴥𐴠 𐴒𐴤𐴡𐴘 , 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕𐴠 𐴉𐴟𐴌𐴝 𐴑𐴠𐴀𐴠𐴔𐴡𐴃 𐴋𐴡𐴌 𐴉𐴡𐴘𐴊𐴝 𐴒𐴡𐴌𐴥𐴞 𐴊𐴞𐴘𐴠 𐴱𐴱

𐴀𐴠 𐴈𐴡𐴃𐴤𐴝 𐴎𐴝𐴕𐴝 𐴒𐴞𐴘𐴥𐴠𐴊𐴠 ! 𐴘𐴝𐴏𐴦𐴞𐴕𐴡𐴌 𐴁𐴡𐴌 𐴁𐴤𐴝𐴘 / 𐴔𐴡𐴓𐴡𐴘 𐴔𐴡𐴕𐴎𐴟𐴌 𐴌𐴟𐴇𐴝𐴙𐴚𐴒𐴙𐴝 𐴀𐴝𐴃𐴡𐴚𐴒𐴞 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝𐴌 𐴕𐴠𐴃𐴝 , 𐴀𐴥𐴞𐴁𐴝𐴌 𐴎𐴡𐴌𐴞𐴘𐴝 𐴵 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴀𐴝𐴃𐴡𐴚𐴒𐴞 𐴋𐴝𐴀𐴝𐴘 𐴀𐴥𐴞𐴁𐴤𐴝𐴌 𐴊𐴝𐴊𐴝𐴒𐴞𐴌𐴞 𐴏𐴡𐴓𐴠𐴌 , 𐴀𐴥𐴠 𐴈𐴝𐴌𐴡𐴕𐴠 𐴀𐴝𐴌 𐴀𐴟𐴒𐴧𐴤𐴗𐴝 𐴌𐴟𐴇𐴝𐴙𐴚𐴒𐴙𐴝 𐴀𐴝𐴃𐴡𐴚𐴒𐴞 𐴉𐴝𐴄𐴞𐴌 𐴃𐴧𐴤𐴟 𐴎𐴝𐴒𐴝 𐴘𐴥𐴝𐴀𐴝𐴕 𐴏𐴥𐴝𐴌𐴥𐴞 𐴊𐴞𐴘𐴝 𐴉𐴡𐴙𐴅𐴧𐴤𐴙𐴠 , 𐴀𐴝𐴌 𐴉𐴝𐴄𐴞 𐴀𐴥𐴞𐴁𐴤𐴝 𐴁𐴠𐴑𐴟𐴖𐴝𐴙𐴐𐴡𐴃 𐴉𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴈𐴥𐴡𐴌𐴝𐴁𐴢 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴠 𐴁𐴡𐴌 𐴁𐴤𐴝𐴘 𐴔𐴡𐴓𐴡𐴘 𐴔𐴡𐴕𐴎𐴟𐴌𐴡𐴌 𐴈𐴥𐴡𐴁𐴡𐴌 𐴊𐴤𐴡𐴌𐴞 𐴔𐴝𐴌𐴞 𐴁𐴤𐴡𐴓𐴧𐴝 𐴀𐴝𐴙𐴐𐴧𐴤𐴙𐴠 𐴊𐴠 𐴎𐴝𐴒𐴝𐴃 , 𐴀𐴥𐴞𐴁𐴝𐴌𐴠 𐴓𐴦𐴡𐴃 𐴕𐴡 𐴉𐴝𐴘 𐴁𐴠𐴐𐴤𐴞 𐴃𐴦𐴝𐴅𐴧𐴟𐴙𐴂𐴧𐴝 𐴒𐴡𐴌𐴥𐴞 𐴒𐴟𐴐𐴧𐴤𐴝𐴌 𐴏𐴥𐴝𐴣𐴃𐴠 𐴐𐴤𐴡𐴣𐴍𐴡 𐴁𐴤𐴝𐴘 / 𐴘𐴝𐴏𐴦𐴞𐴕𐴡𐴌𐴠 𐴑𐴤𐴟𐴕 𐴒𐴡𐴌𐴥𐴞 𐴊𐴤𐴝𐴘 𐴒𐴞𐴘𐴥𐴡𐴘 , 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴈𐴥𐴝𐴄𐴞 𐴏𐴥𐴡𐴀𐴞 𐴁𐴡𐴓𐴞 𐴸 𐴓𐴡𐴔𐴁𐴤𐴡𐴌 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴡𐴌 ( 𐴋𐴞 𐴀𐴝𐴘 𐴅𐴞 ) / 𐴀𐴝𐴔𐴞𐴌 𐴅𐴝𐴉𐴡𐴌𐴠 𐴈𐴡𐴘𐴧𐴠 , 𐴀𐴥𐴞𐴁𐴤𐴝 𐴘𐴠 𐴁𐴡𐴘𐴝𐴕 𐴊𐴞𐴘𐴠𐴊𐴠 ! 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴘𐴝𐴏𐴦𐴞𐴕𐴡𐴌𐴥𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 , 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴈𐴡𐴕𐴃𐴝𐴌𐴥𐴝 𐴊𐴠 𐴘𐴝𐴀𐴝𐴕 𐴀𐴝𐴘𐴅𐴤𐴡 𐴀𐴥𐴡𐴃 𐴉𐴝𐴀𐴝 𐴕𐴥𐴡 𐴎𐴝𐴀𐴝 𐴱𐴱

Sources : Ukhiyanews.com