𐴀𐴦𐴡𐴙𐴕𐴠 𐴉𐴟𐴙𐴅𐴧𐴤𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴧𐴥𐴝 𐴘𐴟𐴌𐴟𐴂𐴞𐴘𐴠𐴕 𐴘𐴟𐴕𐴞𐴀𐴥𐴡𐴕𐴠 𐴳 𐴑𐴟𐴄𐴤𐴞 𐴸 𐴵 𐴓𐴝𐴑 𐴄𐴞𐴛𐴝 𐴉𐴥𐴝𐴕𐴋 𐴈𐴦𐴝𐴏𐴢 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴀𐴥𐴡𐴘 𐴉𐴝𐴌𐴠 𐴉𐴥𐴝𐴀𐴝𐴕𐴱 𐴃𐴞𐴕 𐴓𐴝𐴑 𐴘𐴟𐴌𐴟 𐴱 𐴃𐴞𐴕 𐴑𐴟𐴄𐴤𐴞 𐴸 𐴵 𐴓𐴝𐴑 𐴶 𐴵 𐴇𐴥𐴝𐴎𐴝𐴌 𐴁𐴝𐴚𐴓𐴝 𐴄𐴞𐴛𐴝 𐴔𐴡𐴊𐴡𐴊 𐴊𐴞𐴀𐴞𐴁𐴝𐴌 𐴓𐴧𐴥𐴝 𐴊𐴤𐴝𐴙𐴅𐴧𐴡 𐴒𐴡𐴙𐴅𐴧𐴤𐴙𐴠 𐴘𐴟𐴌𐴟𐴂𐴞𐴘𐴠𐴕 𐴘𐴟𐴕𐴞𐴀𐴥𐴡𐴕 (𐴀𐴞 𐴘𐴟) 𐴘𐴠 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴦𐴡𐴙𐴕𐴠 𐴉𐴟𐴌𐴞 𐴃𐴤𐴡𐴌 𐴒𐴤𐴡𐴌 𐴀𐴥𐴝𐴌𐴝𐴘 𐴓𐴟𐴏𐴧𐴝𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴱 𐴄𐴞𐴛𐴝 𐴀𐴟𐴀𐴟𐴕 𐴊𐴞𐴘𐴝 𐴎𐴝𐴘𐴁𐴡 𐴱𐴱

𐴘𐴟𐴌𐴟𐴂𐴞𐴘𐴠𐴕 𐴀𐴞𐴑𐴏𐴄𐴤𐴝𐴌𐴕𐴠𐴓 𐴀𐴠𐴑𐴐𐴤𐴠𐴕 𐴏𐴥𐴝𐴌𐴁𐴠𐴏𐴡𐴌 𐴱 𐴖𐴠𐴁𐴏𐴥𐴝𐴙𐴄𐴡𐴃 𐴁𐴟𐴙𐴃 𐴁𐴝𐴌𐴠 𐴓𐴠𐴙𐴑𐴧𐴤𐴙𐴠 𐴊𐴠 𐴀𐴠𐴏𐴄𐴠𐴀𐴞𐴄 – 𐴔𐴥𐴠𐴕𐴡𐴌 𐴎𐴡𐴌𐴞𐴘𐴝 𐴈𐴥𐴡𐴁𐴡𐴌 𐴘𐴝𐴀𐴝𐴕 𐴎𐴝𐴕𐴝 𐴒𐴞𐴘𐴠 𐴱 𐴒𐴡𐴃𐴡 𐴅𐴝𐴕𐴖𐴝𐴌𐴞 𐴔𐴝𐴐𐴡𐴌 𐴷 𐴃𐴝𐴌𐴥𐴞𐴑𐴡𐴃 𐴒𐴤𐴡𐴙𐴄𐴧𐴤𐴙𐴠 𐴊𐴠 𐴉𐴟𐴌𐴝 𐴉𐴟𐴌𐴞𐴌 𐴒𐴤𐴡𐴄𐴡𐴕𐴝𐴃 𐴱 𐴀𐴡𐴕𐴃𐴡𐴃𐴡 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴔𐴝𐴕𐴥𐴟𐴙𐴐𐴢 𐴃𐴤𐴡𐴌 𐴒𐴤𐴡𐴌 𐴏𐴥𐴝𐴌𐴝 𐴀𐴥𐴡𐴘 𐴒𐴞𐴘𐴥𐴡𐴘 𐴱 𐴔𐴡𐴊𐴡𐴊 𐴀𐴞𐴀𐴞𐴕 𐴉𐴝𐴘𐴓𐴠 𐴀𐴥𐴞𐴃𐴝𐴌𐴝𐴌 𐴎𐴞𐴁𐴡𐴕𐴡𐴌 𐴔𐴝𐴕 𐴁𐴤𐴝𐴓𐴝 𐴐𐴤𐴟𐴕𐴊𐴡𐴌 𐴀𐴥𐴡𐴘𐴁𐴡 𐴱𐴱

𐴈𐴦𐴝𐴏𐴢 𐴒𐴡𐴌𐴥𐴞 𐴏𐴥𐴝𐴀𐴝𐴌𐴝 𐴒𐴤𐴡𐴌𐴡𐴌 𐴄𐴝𐴔𐴁𐴟 𐴱 𐴉𐴝𐴕𐴥𐴞 𐴀𐴝𐴌 𐴔𐴟𐴓 𐴁𐴟𐴕𐴘𐴝𐴊𐴞 𐴈𐴝𐴔 𐴀𐴥𐴑𐴧𐴡𐴓 𐴁𐴤𐴝𐴓𐴝 𐴁𐴝𐴕𐴝𐴀𐴡𐴕𐴡𐴃 𐴱 𐴄𐴞𐴛𐴝 𐴀𐴟𐴀𐴟𐴕 𐴈𐴥𐴡𐴏𐴧𐴝 𐴒𐴡𐴌𐴥𐴝 𐴎𐴝𐴘𐴁𐴡 𐴱 𐴄𐴞𐴛𐴝 𐴀𐴟𐴀𐴟𐴕 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 ) 𐴃𐴡𐴕𐴎𐴞𐴔𐴡𐴌 𐴃𐴟𐴌𐴥𐴟 𐴈𐴥𐴡𐴏𐴧𐴝 𐴀𐴝𐴌 𐴁𐴝𐴣𐴍𐴝 𐴎𐴝𐴘𐴁𐴡 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴁𐴠𐴒𐴧𐴤𐴞𐴕𐴡𐴌 𐴁𐴤𐴟𐴃𐴡𐴌𐴠 𐴱 𐴵 / 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴒𐴤𐴡𐴕𐴡 𐴀𐴝𐴌 𐴒𐴤𐴞𐴐𐴝 𐴒𐴤𐴞𐴐𐴧𐴝 𐴱 𐴀𐴥𐴠𐴃𐴡𐴓𐴧𐴝 𐴀𐴦𐴡𐴙𐴕𐴠 𐴀𐴡𐴕𐴃𐴡𐴃𐴡 𐴰 𐴵 𐴹 𐴐𐴤𐴝𐴕 𐴓𐴡𐴃𐴞 𐴒𐴤𐴡𐴌 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 𐴱𐴱

𐴀𐴞𐴀𐴞𐴕 𐴁𐴦𐴝𐴊𐴠 𐴀𐴠𐴑𐴧𐴤𐴝𐴕 𐴇𐴥𐴝𐴐𐴉𐴝𐴃𐴝𐴓 𐴱 𐴵 𐴱 𐴖𐴥𐴝𐴕 𐴀𐴞𐴐𐴑𐴟𐴓 𐴔𐴡𐴊𐴡𐴌𐴡𐴏𐴥𐴝 𐴐𐴤𐴞𐴑𐴧𐴤𐴝 𐴒𐴤𐴡𐴌 𐴀𐴝𐴌 𐴁𐴠𐴐𐴤𐴞 𐴒𐴡𐴌𐴥𐴞 𐴄𐴝𐴄𐴧𐴞 𐴎𐴡𐴓𐴞 𐴒𐴞𐴘𐴥𐴡𐴘 𐴱 𐴎𐴝𐴣𐴀𐴝 𐴇𐴥𐴡𐴑 𐴁𐴤𐴡𐴓𐴡𐴕𐴄𐴞𐴘𐴝𐴌 ( 𐴌𐴡𐴎𐴝𐴑𐴝𐴌 ) 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴀𐴝𐴌 𐴈𐴥𐴝𐴌𐴝 𐴅𐴡𐴓𐴊𐴞 𐴀𐴦𐴡𐴙𐴕 𐴕𐴞𐴉𐴥𐴝 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓 𐴉𐴡𐴣𐴀𐴡𐴏𐴡𐴕𐴠 𐴱 𐴈𐴡𐴕𐴥𐴡 𐴅𐴝𐴕𐴞 𐴓𐴟𐴏𐴧𐴝𐴕 𐴕𐴡𐴀𐴡 𐴀𐴥𐴡𐴀𐴡 𐴱 𐴒𐴡𐴃𐴡 𐴁𐴡𐴏𐴥𐴡𐴌 𐴀𐴥𐴡 𐴘𐴟𐴌𐴟𐴂𐴞𐴘𐴠𐴕 𐴘𐴟𐴕𐴞𐴀𐴥𐴡𐴕𐴠 𐴸 𐴳 𐴔𐴡𐴓𐴞𐴘𐴟𐴕𐴡𐴌 𐴁𐴠𐴐𐴤𐴞 (𐴘𐴟 𐴌𐴟) 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴧𐴥𐴝 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴀𐴥𐴞𐴏𐴝𐴉𐴠 𐴁𐴝𐴚𐴓𐴝𐴊𐴠𐴐𐴤𐴡𐴌𐴥𐴠 𐴊𐴞𐴀𐴞𐴓 𐴱𐴱

Sources : Ukhiyanews.com