𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴀𐴦𐴡𐴙𐴕 , 𐴇𐴥𐴝𐴣𐴃 𐴇𐴥𐴝𐴎𐴝𐴌𐴡𐴌 𐴁𐴦𐴠𐴐𐴢 𐴔𐴝𐴕𐴥𐴟𐴙𐴐𐴢 𐴃𐴤𐴡𐴌 𐴒𐴤𐴡𐴌 𐴏𐴥𐴝𐴌𐴝 𐴀𐴥𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴏𐴥𐴡 𐴃𐴝𐴌𐴥𐴞𐴑 𐴒𐴡𐴃𐴡 𐴌𐴝𐴙𐴃 𐴇𐴥𐴝𐴣𐴃 𐴃𐴝𐴌𐴥𐴞𐴑𐴡𐴃 𐴀𐴦𐴡𐴙𐴕 𐴊𐴤𐴡𐴌𐴞 𐴰 𐴵 𐴸 𐴐𐴤𐴝𐴕 𐴓𐴡𐴃𐴞 𐴒𐴤𐴡𐴌 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴡𐴘 𐴁𐴡𐴓𐴞 , 𐴑𐴠𐴀𐴠𐴔 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴔𐴝𐴕𐴥𐴟𐴙𐴐𐴢 𐴒𐴤𐴟𐴔𐴡𐴃 𐴉𐴡𐴙𐴅𐴧𐴤𐴙𐴠𐴊𐴠 𐴀𐴡𐴑𐴃𐴤𐴡𐴃 𐴂𐴠𐴌𐴝𐴘 𐴌𐴝𐴙𐴃𐴡𐴌 𐴀𐴠𐴑 𐴁𐴝𐴎𐴠 , 𐴀𐴟𐴑𐴤𐴞𐴘𐴝 𐴵 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃𐴧𐴟 𐴀𐴦𐴡𐴙𐴕 𐴎𐴡𐴓𐴝 𐴐𐴤𐴟𐴌𐴟 𐴀𐴥𐴡𐴘𐴧𐴠 , 𐴓𐴡𐴒𐴁𐴤𐴡𐴒𐴢 𐴃𐴞𐴕 𐴒𐴤𐴡𐴕𐴄𐴤𐴝𐴌 𐴖𐴡𐴌𐴠 𐴑𐴟𐴐𐴤𐴞𐴐𐴢 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴀𐴦𐴡𐴙𐴕 𐴕𐴞𐴉𐴥𐴝𐴘 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 𐴱𐴱

𐴀𐴠 𐴀𐴦𐴡𐴙𐴕 𐴎𐴡𐴓𐴝 𐴒𐴤𐴡𐴄𐴡𐴕𐴝𐴌 𐴎𐴡𐴌𐴞𐴘𐴝𐴰 𐴵 𐴸 𐴐𐴤𐴝𐴕𐴡𐴌 𐴁𐴠𐴐𐴤𐴞 𐴒𐴤𐴡𐴌 𐴎𐴡𐴓𐴞 𐴉𐴟𐴌𐴞 𐴁𐴡𐴌𐴁𐴝𐴊 𐴀𐴥𐴡𐴘 𐴎𐴡𐴀𐴡𐴕𐴠 , 𐴰 𐴰 𐴰 𐴷 𐴇𐴥𐴝𐴣𐴃 𐴇𐴥𐴝𐴎𐴝𐴌𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴒𐴤𐴡𐴌 𐴃𐴤𐴡𐴌 𐴏𐴥𐴝𐴌𐴝 𐴀𐴥𐴡𐴘 𐴒𐴞𐴘𐴡𐴘 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑 𐴃𐴡𐴕𐴎𐴞𐴔 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 ) 𐴃𐴡𐴕𐴎𐴞𐴔𐴠 𐴈𐴡𐴘𐴧𐴠 , 𐴔𐴡𐴏𐴥𐴡𐴙𐴃 , 𐴀𐴞𐴐𐴑𐴟𐴓 , 𐴇𐴥𐴝𐴐𐴉𐴝𐴃𐴝𐴓 , 𐴄𐴝𐴄𐴧𐴞 𐴀𐴝𐴌 𐴒𐴟𐴏𐴥𐴡𐴓 𐴈𐴥𐴝𐴕𐴝 𐴐𐴤𐴡𐴣𐴀𐴡 , 𐴌𐴞𐴉𐴟𐴎𐴞 𐴁𐴠𐴒𐴧𐴤𐴟𐴕𐴡𐴌 𐴀𐴠𐴏𐴃𐴝𐴔𐴝𐴓𐴡𐴌 𐴓𐴧𐴥𐴝 𐴁𐴝𐴣𐴊𐴤𐴞 𐴊𐴞𐴘𐴠 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴰 𐴲 𐴱 𐴘𐴥𐴝𐴕 𐴓𐴡𐴃𐴞 𐴀𐴝𐴏𐴧𐴡𐴚 𐴎𐴡𐴓𐴞 𐴉𐴟𐴌𐴞 𐴒𐴞𐴘𐴡𐴘 𐴱𐴱

𐴑𐴟𐴃𐴤𐴟 𐴉𐴝𐴓𐴡𐴚 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 / 𐴑𐴟 𐴀𐴡𐴚 𐴔𐴠𐴌𐴝𐴙𐴚𐴠 𐴈𐴡𐴘𐴧𐴠𐴊𐴠 ” 𐴀𐴠𐴈𐴥𐴡𐴕 𐴒𐴤𐴡𐴌 𐴉𐴟𐴌𐴞 𐴒𐴞𐴘𐴡𐴘 𐴊𐴠 𐴌𐴞𐴉𐴟𐴎𐴞 𐴁𐴠𐴒𐴧𐴤𐴟𐴕 𐴉𐴟𐴌𐴝 𐴁𐴤𐴞𐴍𐴝𐴃 ( 𐴎𐴝𐴒𐴝𐴃 ) 𐴃𐴤𐴝𐴑𐴠𐴌 𐴊𐴧𐴠 , 𐴀𐴝𐴌 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴈𐴝𐴣𐴏𐴥𐴠 𐴈𐴝𐴛𐴏𐴧𐴥𐴙𐴝 𐴀𐴝𐴏𐴥𐴠𐴊𐴠 𐴑𐴠𐴀𐴠𐴔𐴡𐴃 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞𐴌 𐴒𐴤𐴡𐴌𐴡𐴃 𐴃𐴤𐴝𐴑𐴠𐴌 , 𐴀𐴠𐴈𐴥𐴡𐴕 𐴀𐴥𐴞𐴃𐴝𐴌𐴝𐴌 𐴃𐴧𐴟 𐴈𐴡𐴕𐴥𐴡 𐴀𐴡𐴖𐴣𐴏𐴥𐴝 𐴈𐴡𐴕𐴥𐴡 𐴏𐴥𐴝𐴕𐴞 𐴀𐴝𐴌 𐴈𐴥𐴝𐴘𐴁𐴡𐴓𐴧𐴝 𐴑𐴠𐴙𐴏𐴧𐴥𐴟 𐴕𐴥𐴝𐴘 , 𐴏𐴡𐴙𐴓 𐴉𐴝𐴘𐴓𐴠 𐴌𐴝𐴣𐴊𐴤𐴞 𐴁𐴤𐴝𐴌 𐴃𐴤𐴝𐴌𐴝 𐴕𐴥𐴝𐴘 ” 𐴱𐴱

𐴀𐴠𐴑𐴀𐴡𐴔𐴥𐴞𐴑 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴊𐴟𐴑 𐴎𐴡𐴈𐴥𐴡𐴔 𐴉𐴝𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡 𐴕𐴥𐴝𐴘 𐴀𐴝𐴌 𐴀𐴦𐴡𐴙𐴕𐴠 𐴉𐴟𐴌𐴞 𐴔𐴡𐴙𐴅𐴧𐴤𐴙𐴠 𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡 𐴕𐴥𐴝𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 , 𐴁𐴡𐴌𐴔𐴥𐴝𐴃𐴧𐴟 𐴁𐴝𐴚𐴓𐴝𐴊𐴠𐴐𐴤𐴡𐴃 𐴎𐴝𐴘 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 𐴊𐴠 𐴌𐴞𐴉𐴟𐴎𐴞 𐴑𐴠𐴀𐴠𐴔 , 𐴊𐴟𐴕𐴞𐴘𐴝𐴘𐴌 𐴖𐴡𐴌𐴠 𐴀𐴥𐴡𐴑𐴧𐴡𐴓𐴡𐴌 𐴃𐴧𐴟 𐴁𐴤𐴝𐴌𐴥𐴡 𐴋𐴡𐴣𐴀𐴡𐴌 𐴑𐴠𐴀𐴠𐴔 , 𐴒𐴤𐴞𐴐𐴝 𐴒𐴤𐴞𐴐𐴧𐴝 𐴒𐴡𐴌𐴥𐴞 𐴃𐴤𐴝𐴑𐴤𐴡𐴕𐴡𐴌 𐴎𐴡𐴌𐴞𐴘𐴝 𐴉𐴟𐴌𐴝 𐴉𐴟𐴌𐴞 𐴒𐴤𐴡𐴕𐴡 𐴒𐴤𐴡𐴕𐴡 𐴀𐴥𐴡𐴀𐴡 𐴱𐴱

Sources : RFAburmese.com