𐴑𐴠𐴕𐴅𐴤𐴙𐴝 𐴕𐴡𐴂𐴟𐴌𐴞𐴃 𐴔𐴝𐴎𐴤𐴠 𐴁𐴠𐴀𐴝𐴙𐴕𐴞 𐴌𐴟𐴇𐴝𐴙𐴚𐴒𐴙𐴝 𐴰 𐴳 𐴎𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴝𐴌 𐴉𐴝𐴌𐴝𐴌 𐴇𐴥𐴠𐴉𐴝𐴎𐴡𐴃𐴞 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴐𐴤𐴡𐴣𐴀𐴡 𐴀𐴠𐴔𐴒𐴞𐴌𐴞𐴐𐴤𐴠𐴕 𐴀𐴥𐴟𐴊𐴧𐴤𐴝 𐴂𐴥𐴡𐴚 𐴒𐴡𐴙𐴅𐴧𐴤𐴙𐴝 𐴋𐴝𐴀𐴝𐴘 𐴘𐴠 , 𐴁𐴡𐴖𐴋𐴝𐴌 𐴁𐴝𐴀𐴝𐴘 𐴒𐴤𐴡𐴓𐴠𐴌 𐴊𐴧𐴠 𐴒𐴝𐴌𐴥𐴞 𐴀𐴥𐴡𐴑𐴧𐴡𐴓 𐴏𐴠𐴑 𐴒𐴡𐴌𐴥𐴠𐴌 𐴊𐴧𐴠 𐴐𐴤𐴡𐴣𐴀𐴡𐴃 , 𐴁𐴞𐴀𐴞𐴕𐴧𐴝 𐴶 𐴁𐴝𐴎𐴠 𐴈𐴝𐴓𐴝 𐴌𐴡𐴚𐴡𐴌 𐴄𐴟𐴘𐴟𐴄𐴝 𐴇𐴝𐴘𐴓𐴥𐴟𐴑𐴏𐴢 𐴒𐴝𐴌𐴥𐴞 𐴀𐴠𐴑𐴧𐴤𐴝𐴕𐴡𐴌𐴥𐴠 , 𐴁𐴤𐴠𐴕 𐴂𐴡𐴓𐴠𐴕 𐴂𐴠 𐴉𐴝𐴌𐴝𐴌 𐴋𐴤𐴝𐴑𐴠 𐴀𐴞𐴕𐴑𐴟𐴖𐴝𐴌𐴞 𐴒𐴠𐴙𐴍𐴡𐴃 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴃𐴤𐴞𐴘𐴝𐴘𐴃𐴡 𐴈𐴡𐴘𐴧𐴠 , 𐴔𐴡𐴕𐴃𐴡𐴌 𐴒𐴝𐴌𐴥𐴞 𐴀𐴡𐴓𐴝 𐴇𐴥𐴡𐴑𐴟𐴔 𐴕𐴡 𐴔𐴝𐴕𐴞 𐴁𐴠𐴐𐴤𐴞 𐴃𐴠𐴎 𐴒𐴡𐴌𐴥𐴞 𐴏𐴝𐴓𐴝𐴘 𐴒𐴞𐴘𐴥𐴡𐴘 𐴱𐴱

𐴏𐴠𐴑 𐴂𐴦𐴟𐴏𐴄𐴡𐴌 𐴉𐴟𐴓𐴞𐴐𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴉𐴞𐴏𐴥𐴠 𐴉𐴞𐴏𐴥𐴠 𐴓𐴦𐴡𐴌𐴝𐴘 𐴓𐴡𐴘 𐴒𐴞𐴘𐴥𐴡𐴘 , 𐴊𐴤𐴡𐴌𐴡𐴔 𐴊𐴤𐴡𐴌𐴡𐴔 𐴀𐴥𐴡𐴘𐴧𐴊𐴠 𐴀𐴡𐴑𐴃𐴤𐴡𐴃 𐴇𐴝𐴘𐴓𐴥𐴟𐴑𐴏𐴢 𐴒𐴝𐴌𐴥𐴞 𐴘𐴥𐴝𐴀𐴝𐴕 , 𐴀𐴠𐴓𐴠𐴑𐴄𐴤𐴌𐴞𐴌 𐴈𐴥𐴝𐴔𐴁𐴤𐴝𐴃 𐴋𐴤𐴟𐴆 𐴔𐴝𐴌𐴞 𐴌𐴝𐴏𐴧𐴝𐴌 𐴈𐴝𐴣𐴏𐴝𐴃 𐴉𐴡𐴌𐴞 𐴒𐴞𐴘𐴥𐴡𐴘 , 𐴒𐴤𐴝𐴌𐴞𐴌 𐴁𐴤𐴟𐴃𐴡𐴌 𐴃𐴧𐴟 𐴀𐴟𐴎𐴦𐴡𐴌 𐴀𐴝𐴌 𐴔𐴡𐴊𐴡𐴊 𐴒𐴡𐴌𐴥𐴡 𐴈𐴡𐴀𐴡𐴌 𐴊𐴧𐴠 𐴀𐴝𐴁𐴝𐴏𐴢 𐴉𐴥𐴟𐴕𐴞 , 𐴎𐴝𐴘 𐴏𐴠𐴑 𐴒𐴡𐴌𐴥𐴞 𐴏𐴝𐴀𐴝𐴌 𐴊𐴧𐴠 𐴊𐴟𐴑 𐴎𐴡𐴈𐴥𐴡𐴔 𐴉𐴝𐴘𐴧𐴠𐴊𐴠 𐴀𐴥𐴟𐴀𐴟𐴕 𐴐𐴤𐴡𐴣𐴀𐴡 𐴁𐴠𐴍𐴞𐴀𐴝𐴙𐴕 𐴁𐴠𐴍𐴝𐴀𐴝𐴙𐴕 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴒𐴤𐴡𐴓𐴠𐴌 𐴀𐴥𐴝𐴘𐴊𐴠 𐴉𐴝𐴘𐴓𐴡 , 𐴀𐴝𐴕𐴊𐴤𐴝𐴌𐴡𐴌 𐴃𐴧𐴟 𐴉𐴥𐴝𐴘𐴊𐴝 𐴃𐴟𐴓𐴥𐴞 𐴋𐴠𐴌𐴠𐴁𐴤𐴝𐴌 𐴊𐴤𐴝𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴏𐴝𐴓𐴟 𐴒𐴝𐴌𐴥𐴞 𐴀𐴝𐴃𐴤𐴞𐴑𐴧𐴙𐴝 𐴋𐴤𐴟𐴆 𐴈𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴒𐴟𐴌𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴐𐴤𐴡𐴣𐴀𐴡 𐴋𐴡𐴣𐴀𐴡𐴌 𐴔𐴝𐴕𐴥𐴟𐴙𐴐𐴢 𐴷 𐴎𐴡𐴕 𐴊𐴟𐴑 𐴎𐴡𐴈𐴥𐴡𐴔 𐴉𐴝𐴘𐴧𐴠 , 𐴊𐴟𐴑 𐴎𐴡𐴈𐴥𐴡𐴔 𐴉𐴝𐴘𐴧𐴠𐴊𐴠 𐴀𐴥𐴞𐴃𐴝𐴌𐴝𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴀𐴥𐴡𐴀𐴡𐴕𐴠 , 𐴀𐴥𐴞𐴃𐴝𐴌𐴝𐴌𐴠 𐴏𐴠𐴕 𐴑𐴡𐴓𐴟𐴂𐴟𐴌𐴞 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 , 𐴁𐴡𐴐𐴢 𐴰 𐴲 𐴁𐴡𐴏𐴥𐴡𐴌𐴅𐴧𐴙𐴝 𐴁𐴡𐴌𐴔𐴥𐴝 𐴀𐴠𐴑 𐴎𐴡𐴕𐴡𐴌 𐴔𐴟𐴑 𐴎𐴟𐴁𐴝𐴕𐴞 𐴔𐴡𐴎𐴞𐴕 , 𐴀𐴝𐴌𐴑𐴝𐴕𐴡𐴃 𐴓𐴝𐴌𐴥𐴝𐴘 𐴏𐴡𐴓𐴡𐴕𐴠 𐴎𐴝𐴕𐴡𐴌 𐴈𐴥𐴡𐴃𐴡𐴌𐴝 𐴀𐴝𐴌 𐴈𐴝𐴔 𐴈𐴡𐴌𐴡𐴏𐴢 𐴕𐴡 𐴃𐴤𐴝𐴑𐴤𐴡𐴕𐴠 𐴖𐴦𐴝𐴙𐴆𐴧𐴤𐴙𐴝 𐴃𐴞𐴌𐴝𐴙𐴆𐴧𐴤𐴙𐴝 𐴃𐴤𐴝𐴑𐴤𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴋𐴡𐴌𐴠 , 𐴔𐴡𐴓𐴠𐴆𐴤𐴙𐴝 𐴎𐴝𐴘 𐴁𐴡𐴓𐴧𐴥𐴝 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱

𐴄𐴤𐴝𐴘𐴓𐴠𐴕-𐴁𐴡𐴌𐴔𐴥𐴝 𐴁𐴡𐴖𐴋𐴝𐴌 𐴑𐴠𐴕𐴅𐴤𐴙𐴝 𐴕𐴡𐴂𐴟𐴌𐴞 𐴀𐴠𐴓𐴝𐴑𐴝 𐴏𐴠𐴕𐴑𐴡𐴓𐴥𐴝 𐴂𐴟𐴌𐴞 𐴐𐴤𐴡𐴀𐴡𐴌𐴡𐴃 , 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 , 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴰 𐴳 𐴎𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴑𐴠𐴕𐴅𐴤𐴙𐴝 𐴕𐴡𐴂𐴟𐴌𐴞 𐴀𐴥𐴠𐴏𐴃𐴝𐴕𐴞 𐴈𐴥𐴡𐴁𐴡𐴌𐴡𐴃 𐴈𐴡𐴘𐴧𐴠 , 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴡𐴙𐴕𐴧𐴡 𐴊𐴠𐴐𐴤𐴡𐴃𐴧𐴟 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴔𐴝𐴕𐴥𐴟𐴙𐴐𐴢 𐴑𐴠𐴙𐴏𐴧𐴥𐴟 𐴒𐴤𐴡𐴓𐴠𐴌 𐴁𐴡𐴓𐴞 , 𐴀𐴝𐴒𐴡𐴌𐴞 𐴈𐴥𐴡𐴁𐴡𐴌 𐴉𐴝𐴘𐴧𐴥𐴠𐴊𐴠 𐴔𐴡𐴎𐴞𐴕 𐴱𐴱

Sources : DVBnews.com